《受恩蒙福的一生》

 | | | 轉寄

現代化kap理想ê老境

作者 林宗要 2011.02.27

箴言16：31；提多書2：13

老化是近代世界中有備受注意ê一個人生問題，因為追求長歲壽ê人ē tàng講是人ê本性，通常人lóng ǹg望伊ê人生有美好koh久長ê日子。古代社會提起三多：多財、多子、多壽。可見自有人生以來，人一直ǹg望長歲壽，因此mā有bē少祈求長歲壽或者不死丹ê事例。有一則故事：荷蘭有一位名醫哈佛博士，m̄ nā醫術好，救人無數，而且歲壽真長。Tehbeh過往chìn前留落－無beh外傳ê長歲壽秘方，藏tī封起來ê鐵箱中。有一位英國好額人開掉伊ê家產，向chit位名醫ê後代kā chit份長歲壽秘方買落來，帶tńg來家鄉kā厝內ê人lóng叫來，用chiok期待ê心情phah開chitkha鐵箱，發現伊用大筆ê金錢買tio̍h ê只是一張紙，頂面寫tio̍h兩chōa字：「人若beh長歲壽，頭ài冷，腳ài燒；食飯只食八分飽。」chit位大好額人用大筆金錢買來ê只是生活中ê智識而已，這兩chōa字「頭冷腳燒」，確實是一位健康ê人ê形象，尤其是食飯八分飽，kohkhah是歷代名人所主張ê長歲壽秘訣。

雖然老化kap長歲壽是人生所關心ê問題，講tio̍h人類性命ê年限，相信咱lóng了解古早時，人類平均歲壽是30左右，古羅馬時代是30出，亞歷山大大帝32歲死，凱撒大帝活到45歲；中古世紀烏死病kap malálí'á hō͘人e̍歲壽mā tī 30出頭左右，一直到工業革命了後，chiah突破40歲。美國自1900年間開始統計是49.2歲，1950年是70.2歲，2000年soah超過78歲。台灣ê情況mā相仝；根據今年9月份ê統計，65歲以上ê人有213萬人，百歲以上ê人瑞有713人。主因是生活環境ê改善kap現代醫療ê進步，對歲壽ê延長有正面ê作用。

唐朝詩人韓愈（西元768824）tī伊ê〈祭十二郎文〉中寫tio̍h「我iáu有三ê阿兄lóng不幸早早來過身去，我歲數iáu末四十tio̍h看茫茫、髮蒼蒼、齒牙搖動」，文中提起三位阿兄歲壽lóng無長，家己mā呈現老化ê現象，頭毛白、嘴齒動搖，視力茫茫可能是白內障或者老花，雖然韓愈本身活到56歲，tī當時無算是早死，但是chiahê老化ê現象是人生ê過程，雖然因為個人遺傳kap體質有一kóa無仝，但是面對老化chitê問題，hiahê人tiāⁿtiāⁿ想出所有ê辦法想beh去解決或者延遲老化ê現象，老人本身確實必須ài認真去面對老化ê事實。美國南加州有一個特別ê國際組織，叫做「長青社（Hemlock Society）」，Hemlock是北美洲ê松科ê長青樹，chitê團體是tùi多位諾貝爾獎得主發起ê，主旨是推sak hō͘老化變慢ê活動，其中提出「疾病壓縮論」，盡力hō͘人年老ê病ê痛苦愈短愈好，siōng好是the beh過身前一個禮拜，或者tī前一兩工chiah破病，kohkhah好是無病痛ê自然變老過身，mā to̍h是咱社會所提起ê人生五福「考命終」。所以，如何實現人生teh老化ê過程有理想kap完美，確實是今á日老人生活ê一件大事。

雖然每一個有歲ê人，tī伊老年ê生活中，的確真期待理想ê老年期生活。但是實際生活上，人進入老化ê過程往往有各種無仝ê影響，比如細胞組織ê退化，mā to̍h是生理ê退化。因為老化所形成ê生理狀況，致使老年人食ê方面無理想，kohkhah影響老年人ê身軀狀況，是造成老年體弱多病ê主因為之一，疾病mā影響胃口，形成惡性循環。因此tùi頭頂到腳底，差不多所有器官lóng會發生狀況，視力、聽力、嘴齒，慢性病比如高血壓、糖尿病、心臟病、腰子病，甚至是帕金森氏症或者退化成植物人，必須完全依賴別人或者醫療設備維生。除了生理ê退化問題之外，老年ài面對ê iáu有家庭問題、經濟問題、文化問題等，chiahê問題lóng會影響老年生活。相信chiahê每一個人lóng必須去面對ê人生現實，因為老年mā是人生ê一個ê時期，ná親像少年、壯年仝款是人生ê一個過程。既然是人生過程，必須用平常心態去面對伊，同時ài準備迎接老化ê過程。因為明知老化ê必然，若有先準備就khah ē tàng適應，生活適應好就ē tàng khah順利，mā to̍h是teh老化ê過程中有khah美好ê理想狀況，體驗人生比如倒食甘蔗，愈食愈甜。

Tùi心理上，咱mài kā老化看做是一種老，伊是成熟。古早詩人杜甫ê詩句「人生七十古來稀」，chit句詩tī現代人需要重新評估，目前台灣70歲以上ê人身心狀況lóng iáu相當理想，真chē lóng ē tàng完全自理生活，這是可喜ê現象。因為現代ê老人bōesái有古早時ê老人觀念，古早老人一切生活lóng tùi序細服侍，現在chit種生活方式已經無可能，確實有màikoh tī以前ê時代。所以今á日ê主題咱beh來思考（一）現代化kap人生（二）現代化對老年kap人生ê影響（三）理想ê老境。

（一） 現代化kap人生
現代化是英國伊麗莎白時代所產生ê語詞，表示當時ê生活比過去ê生活好真chē，各方面lóng真進步。台灣社會tī 50年前kap chitmá，mā是完全無仝ê社會狀況。因為人生kap時間kap空間有密切ê關係，ē tàng講人是活tī時間kap空間ê中間，chit種ê時空ê變遷tī近年代是非常快速ê，相信40、50 gōa歲ê人lóng ē tàng tùi觀察中感受tio̍h，若用回顧過去kap現在ê社會動態，會發覺tio̍h時間kap空間ê變遷，其實非常激烈，因此有人稱做「急變ê現代」。但是現代化有toh一kóa特性neh？

（1）Speed速度：速度是現代化ê特徵，生活上ê實例，ē tàng講50、60歲ê人lóng經驗過gín'á時社會動態ê清幽，kap現在社會ê緊張是非常明顯ê區別。我回憶兒童時代庄內面腳踏車iáu m̄是真普遍，歸庄mā只有一位姓許ê先生有一台50cc ê otobái，當時有otobái是真轟動ê tāichì。Hit時公車ê速度mā bōe緊，我bat jiok tī公車後面走了兩三百米，車到站，我mā到阿。Hit時kap現代ê分秒必爭完全無仝，過去社會是安然、和氣kap真慢ê步調。現在大都市內，無論是tī街路行ê人、病院ê醫生，四界lóng像用走ê仝款，快步行，因為hiahê人lóng感覺時間無夠用！以前有一部片叫做環遊世界80工，是想beh顯示現代交通ê速度，chitmá無需要80工阿。Chitmá飛龍機比汽車火車kohkhah緊，hiahê人甚至ē tàng坐火箭起lih月球，速度是現代化ê重要特色。

（2）Change變化：mā是現代化ê特徵。若詳細觀察現在ê人生社會、文化背景、價值心態，咱lóng ē tàng體會tio̍h近年社會型態、都市發展、庄腳ê變遷lóng真快速。有一kóa人因為都市計劃，一下á變成大富戶，街路四通八達，交通利便，家家戶戶lóng有自用車，少年人教育經濟水準提koân，家庭結構mā改變，大家庭變成以夫妻kap kiáⁿ兒兩代為主ê小家庭，以往用老人做家庭ê中心，現在變成用孩童做家庭ê中心。Iáu有價值觀ê改變，古早時男女授受不親、飼囝防老、查某囝仔無才to̍h是德，chiahê觀念lóng已經無合時代，因為價值心態完全無仝，思考模式或者是行事規則無仝，以前ê人安份守己、m̄敢為非sám做。現代有一kóa青少年為tio̍h beh達到目的不擇手段，欠錢用竟然用搶劫、綁票來解決！強調「只要我歡喜，有甚麼bē tàng」，自我放縱ê表現，是現代化ê不良ê改變。

（3）Confusion混亂：mā是現代化ê產物。以往大路或者交通ê情形iáu bōe hō͘人感覺混亂kap繁雜；現代社會ê步調快速加上hiahê人自私無守法ê結果，就變kah混亂。Phah開社會版ê新聞，搶劫、兇殺、綁票、強姦：政治上ê混亂像911事件、暴動；國際之間民主kap共產ê對立、回教國家敵視西方英美；宗教ê亂象以及現代性方面ê亂象等等。雖然現代化提昇真chē人類生活ê方便kap舒適，但是mā造成了真chē人生ê混亂，chit種負面混亂ê現象，是以往單純ê社會裡m̄ bat發生ê tāichì。

（二） 現代化對老年kap人生ê影響
有歲數ê老人因為過去所受ê教育kap社會經歷，kap現在chitê時陣相比，有siuⁿ大ê變遷，因此有真chē觀點、價值觀kap心態，以及對事物ê觀察角度，lóng kap現代青年無仝，chit種時代ê差異是難免ê，需要雙方面ê互相調適，chiah ē tàng hō͘家長生活kohkhah美滿。To̍h是因為ánne chiah出現老人獨居ê情況，老人獨居mā是現代化ê產物，過去三、四代同堂真普遍，現在是真少看tio̍h ê，主因to̍h是兩代之間受tio̍h現代化ê影響，產生觀念kap價值觀上ê差異，tùi此thang知現代化對老年有絕對ê影響。問題是beh如何減輕chit種現代化對老人造成ê負擔？這就ài看人看款阿，主要就是ài調整到ē tàng承受ê範圍內。有人講人生ná親像是坐火車，坐過車站一站koh一站，無注意tio̍h到了終點，千萬mài坐特快車，甘願坐慢車ta̍uhta̍uh'á欣賞沿路風景。

當然，現代化對老人ê影響siōng大ê to̍h是身心ê變遷。因為人生若tī時空中過tio̍h相當ê一段時間，必然經歷人tī時空中產生ê真chē問題，若用以往to̍h有ê觀念kap價值心態，看待現代完全無仝ê價值觀kap思考模式，當然會產生無適應。這是目前真chē老人對青年人ê生活方式無法度接納、甚至討厭ê原因。現代老人看kiáⁿ孫輩對待父母、takekoaⁿ ê行為kap態度，會認為是真無合理ê人生態度，以前我tī Digest雜誌上看tio̍h一篇khau洗ê文章，寫tio̍h「人生70 ê五子登科」：（1）厝內ê人上班或者外出，我顧厝；（2）厝內是非m̄聽，做一個臭耳聾。（3）後生新婦上班，我看孫。（4）無順眼ê時，就當chheⁿmê。（5）厝內ê tāichì mài講，就做啞口。文中mā提起老人生理上必須準備面臨ê人生狀況：（1）身軀ê肉鬆鬆（2）白頭毛kap落頭毛（3）血管硬化（4）體能落降（5）器官退化（6）性退化（7）新陳代謝bái；吸收力、胃口無好，無法度維持水準ê體能。若生理ê問題之外koh加上其他ê負擔，ná親像是經濟壓力、kiáⁿ孫無關心ê時，lóng會形成無理想、負面ê老境，to̍h算長歲壽，mā會出現真chē問題。

（三） 理想ê老境
基督徒對老境ê人生價值觀，應該tio̍h有比一般人kohkhah高層次ê人生體會。Ùi咱ê人生發出ê有基督，主耶穌bat應允信祂ê人有豐盛ê性命（約10；10）tīchia所講ê豐盛，當然包括每一個人老化ê人生，因此有信仰ê人生，tī人生ê過程中，必定有比別人kohkhah豐盛ê性命表現。當然tīchia所必備ê條件，先是對家己ê身軀ài有相當程度ê了解，然後配合智識kap意志力去好好á照顧。Teh老化ê過程中，有完美理想ê表現是上帝交hō͘咱ê責任，健康ê身軀確實ē tàng延遲老化，這是咱必須了解ê事實。但是健康是需要tī平時ê生活，去建立ê性命內容，絕對m̄是只靠健康食品而已。因為健康ê身軀是指整體性ê，食物雖然重要，但是其他ê身心靈各方面ê配合mā是要素，保持運動kap好ê生活習慣，mā必須吸收保健ê智識，chiah ē tàng幫助咱建立美好ê人生內容。對咱身軀ê狀況ài了解，我本身自1980年開始記錄健康狀況近60 pái。通常咱lóng知影ài保持健康ê生活、飲食、生活環境、禁薰酒、多多運動、保持心情愉快，但是實行上真有問題，所以理想ê老境是ài建立：（1）老人本身ê認知kap意志力：認知指ê是ài建立老人生活ê正常ê價值觀，用此價值觀做基準，去經營符合老境ê生活方式，應該是bōe差siuⁿ遠。講到意志力，kohkhah重要，伊是推動咱生活去達成目標ê動力，一般來講，老人ē tàng家己正確ê食藥仔、照顧三頓食穿，to̍h是理想ê老境，可惜人因為老化，漸漸因為真chē症狀，加減lóng會影響tio̍h意志力，這可能是老人必須去克服ê問題之一。（2）家庭kap kiáⁿ孫（親人）ê關懷：理想ê老境是需要家庭親情，這是絕對ê事實。21世紀初人類ê兩大危機：愛滋病kap癌症，現在koh增加了憂鬱症，尤其是老年憂鬱症。因為理想ê完全是在teh老化ê過程中，生活tī完美理想ê過程來ê，老化ê現實若kap理想相差siuⁿ過chē，老年ê生活ē sái講是無幸福thang講。Chit種理想kap現實差siuⁿ大ê老化ê過程，會成做老人ê負擔，但是老人無負擔ê本錢；理想ê老境是老人生活無負擔kap壓力，無論現代化變遷ê衝擊如何，厝內ê人親情ê潤澤，siōng ē tàng hō͘老人生活感覺溫暖。（3）信仰ê完成kap上帝ê賜福：箴言16：31「白髮是榮耀ê冠冕，tī公義ê道上必定ē tàng得tio̍h。」非常清楚說明了人生得勝ê目標，基督教ê價值tīchia，咱人生ê一切，有上帝豐富ê預備，只要你具備信心，伸出信心ê手路接受豐盛ê神恩！