《趁iau2日時》

 | | | 轉寄

導/倒盲磚

作者 林俊育 2008.11.02

一九九一年初，我發現台北市開始鋪設導盲磚，因無做好宣導，真少人知影he是什麼物件，無怪乎導盲磚上照停汽機車，結果變成「倒」盲磚，盲朋友mā就大罵政府浪費公帑。況而且導盲磚是鋪tī行廊外，任視障朋友日曬雨淋，真無公平。

Tú好hit年ê行憲紀念日﹝kap聖誕節同一工﹞，台北市政府tī李登輝總統ê「hō͘宗教潔淨民心」指示下，邀請西羅亞盲人合唱團去國父紀念館ê行憲紀念會中演唱。最後，黃大洲市長上台帶領全体與會者合唱「平安夜」，領隊兼串場ê彭德貴牧師把握良機，向在場ê市政官員透露盲人ê心聲，請做好宣導並禁止tī導盲磚上停汽機車。

過無久，人行道上畫了白線格á hō͘機車停，倒盲磚ê暢通改進了一kóa。但是，汽車照樣爬上人行道，大大方方停tī導盲磚上；盲朋友行tī導盲磚上，盲杖tú tio̍h汽車iáu遭車主辱罵一下，真倒楣。行tī導盲磚上，m̄ nā會撞車跌倒，運氣無好tú tio̍h m̄ bat字ê車主，iáu會倒楣挨罵，誰敢koh再行「倒」盲磚？

當時以色列盲人社工協會主席 NURIT NEUSTADT 博士beh寫世界盲人行動定向訓練報告，邀我提供台灣ê資料。我chhōe國內各視障機構學校提供資料，結果慕光盲人重建中心ê盧明松主任kap台北啟明學校ê范文良老師提供真chē資料，hō͘我ē tàng交卷。

我iáu邀請范老師餐敘，hō͘我對台灣視障教育有一個概念。Kap伊深談三個鐘頭了後，我有一個發現：「其實導盲磚是一個落伍ê物件，對失明人來講siōng重要ê是定向行動訓練，有了良好ê訓練chiah敢出門，一出門是靠盲杖來「看」路行。台灣ê教育部長大多是靠特殊教育出身ê，明知影定向行動訓練必須一個老師對一個學生，卻講因師資無夠而一個老師對一個班教學；老師無夠卻無將定向訓練師納入教師資格。Hiahê靠特殊教育升官而不落實視障行動定向訓練，是台灣視障朋友ê悲哀。」

一九九一年暑期，我參加美國波士頓佳樂盲人重建中心主辦ê國際盲人事工交換計畫，會記得第一堂課我就被矇上目睭開始定向行動訓練。二年前西羅亞合唱團製作錄影帶拍外景時，我發現團員ê盲杖握法無正確，有ê甚至講從來無學過，真是bē tàng想像。

舊年台北市市長候選人陳水扁ê競選錄影帶，有一段關懷視障ê「政見」講，伊當選市長後beh將導盲磚移到行廊內。真歡喜陳水扁市長當選後，敦聘前社會局長白秀雄擔任副市長，伊是殘障界siōng受尊敬ê長官。我忍不住寫一封信hō͘白副市長：「chitpái陳市長競選文宣錄影帶中，有段講伊當市長後ài kā導盲磚移到行廊內，kahná針對盲人抱怨講目前台北市ê導盲磚叫盲人日晒雨淋。請慎重考慮導盲磚對kuiê社會ê優缺點，我個人tī美國東岸ê四次盲人機構考察知影，美國重視切身實際ê個人定向行動訓練，而不採用造成行人尤其是輪椅肢障者不便ê導盲磚。定向行動訓練無好ê盲人連出門lóng驚驚，kohkhah chē ê導盲磚mā無濟tī事。請成立『盲人定向行動訓練重要性ê研究小組』，徹底檢討台灣目前m̄肯開錢改進盲人個人定向行動訓練，而花大冤枉錢tī『倒』盲磚上ê倒行逆施政策。」

真歡喜收tio̍h白副市長ê回phoe講：「市政府每年編列預算，委託台北啟明學校kap新莊盲人重建院做盲人ê行動定向訓練。」但m̄知市府做過成果評估無？研究過定向行動訓練kap導盲磚優缺點無？有可能建議kap做決策ê人無深入做專業性ê研究，台灣目前mā無視障方面ê專業圖書館，希望政府ē tàng tī chit方面加強努力。

台北市目前大量鋪設導盲磚，普及率ē sái講是世界第一。先進國家tio̍h重個人ê定向行動訓練，而落後國家無hiahni̍h chē錢thang浪費tī鋪設導盲磚上，只有「錢淹腳目」有錢bē曉用ê「窮」台灣，造成目前ê街道滿目瘡痍，有點á慘不忍睹。

專收盲多障ê台中私立惠明盲校看bē tio̍h導盲磚，被尊稱做台灣盲人ê母ê陳淑靜校長堅持講：「阮ê學生接受真好ê定向行動訓練，不需要開錢鋪無用ê導盲磚，in bē碰壁ê。」chit對盲目鋪設導盲磚ê政府官員是一大諷刺，現在是該檢討kap研究發展ê時chūn了，因為thang用ê資源是有限ê，如何有效地利用是咱ê共同課題。

恭喜「盲劍客」鄭龍水先生當選下屆立法委員，據報載講立法院正為chit位第一個視障立委ê「無障礙空間」大費周章，希望所謂ê「導盲設施」bē包括「倒/導盲磚」，因為那將造成大眾kohkhah chē ê障礙：譬如輪椅行入受阻、年紀大人ê容易被絆倒、穿高跟鞋ê女士行路不便等等，chit種落伍ê「倒/導盲磚」應該叫停了。

希望鄭龍水先生進入立法院了後，ē tàng廣學國外先進ê「視障措施」，切勿koh再有閉門造車、浮濫鋪設「倒/導盲磚」ê現象。Tùi siōng基本ê「定向行動訓練」開始徹底做起，少來浪費國家資源ê政治秀。舉個例來講，全盲ê視障音樂家周昱開先生，thang tùi公車ê聲音「看」出是幾號車，因為伊有siōng基本ê聽力定向訓練。天資聰明ê鄭龍水立委，應該知影什麼是視障朋友siōng基本ê需要，mā希望伊ē tàng多徵詢真正專家學者ê意見，千萬bē tàng憑一己之快而誤了全台視障朋友ê福利，是盼！
（台灣教會公報 期199. . .）