《Kah陳小小做伙讀台語》

 | | | 轉寄

Teh聽我看tio̍h我ê上主

作者 陳小小，台譯：Lîm ChùnIo̍k 2026.10.11




Teh聽我看tio̍h我ê上主

《夏甲與天使》（Hagar and the Angel），弗朗切斯科·瑪菲（Francesco Maffei），1657年。（圖片來源／THE MET）

Hitê拜五透早，電話聲linliang 叫。老父嚨喉cha̍t講老母過往，ài我緊tńg去厝裡！Hit時我當teh kah chabó͘ kiáⁿ、kiáⁿ兩姊弟食早頓，歡喜teh講隔tńg工外公、外媽beh來做伙kā阿姊過生日，講kah真興奮，siuⁿ大聲吵tio̍h iáu teh睏ê尪。

隔了三年，一个禮拜日透早，電話聲linliang 叫。旅行團ê導遊tùi中國四川ê九寨溝khah過來，講阮老父tī旅館大廳昏倒，狀況真無好，ài我khoán行李飛去接老父。過了二十gōa分鐘，電話鐘聲koh一pái響起來，講老父過往à！

He是我到taⁿ siōng驚惶m̄知怎樣chiah好ê兩場苦境。每人tú tio̍h ê狀況無仝，m̄koh基督徒比世間人有何等ê幸運，咱有一位teh聽咱、看顧咱ê上主。

後厝相爭悲劇

聖經記載，幾nā千年前有一个埃及chabó͘ gíná夏甲，因為chih載bē tiâu女主人撒萊ê苦毒來逃離主人ê厝，tī前往埃及書珥路裡ê曠野一个所在ê水泉邊歇睏。她已經有娠，驚惶kah m̄知án怎chiah好，煩惱tńg來故鄉了後kakī tio̍h án怎孤身一人kah腹肚內ê gín'á生存落去？

M̄koh上主關心她。耶和華ê使者tī chia chhōe tio̍h夏甲，對她講ê第一句話：「撒萊ê女婢夏甲，妳tùi tó位來？Beh往tó位去？」（創世記16章8節）

耶和華ê使者kám ē m̄知她tùi tó位來，beh往tó位去？伊ánne問是引chhōa夏甲kā kakī chitmá ê處境講出來。使者koh有講出夏甲ê身分，她是撒萊ê女婢，שִׁפְחָהkoh khah搭óa原文ê意思是女僕、女婢。Á夏甲回答：「我tùi我ê女主人撒萊面前逃走出來。」她mā有肯定撒萊是女主人，kakī是撒萊ê女婢。

耶和華ê使者對夏甲講：「妳tńg來妳主母hia，屈服tī她ê手下。」續接koh講：「我一定hō͘妳ê kiáⁿ孫真chē，甚至bētàng算得。」「妳chitmá有娠beh生一个kiáⁿ兒，thang kā伊號名叫以實瑪利，因為耶和華有聽tio̍h妳ê苦情。」（參創世記16章9～11節）

大多數ê華語聖經，無kā創世記16章9節ê意思準確翻譯出來，lóng翻譯做「服tī她手下」á是「屈服tī她手下」「順從她」，m̄koh希伯來文עָנָה kah 16章6節b：「撒萊『苦毒』她，她就tùi撒萊面前逃走à。」ê「苦毒」是仝一个字，所以16章9節kui句原文直譯是：「耶和華ê使者對夏甲講：『妳tńg來妳ê女主人hia，受她苦毒。』」

是án怎聖經翻譯者無kā「苦毒」、「虐待」翻譯出來？有一个原因是感覺上主無可能chiahni̍h殘忍，ài使者發出ánne ê命令，hō͘夏甲tńg去繼續hō͘女主人苦毒、虐待，就ánne thiau故意淡化處理ê。M̄koh，tī這chìn前，頭前創世記16章3節有一个字「bó͘」是m̄ tio̍h ê翻譯，致使撒萊成做拗蠻koh虐待女婢ê烏心嫉妒chabó͘。

耶和華聽見

頭前ê故事情節是，撒萊bē懷孕，無法度為亞伯蘭生gín'á。她用hit時代ê傳統方式，叫kakī ê女婢kah尪婿chiūⁿ床，hō͘ kakī tùi女婢得gín'á。撒萊比其他ê女主人koh khah好款待kakī ê女婢夏甲，她hō͘夏甲做亞伯蘭ê「妻」！也to̍h是古早時代華人社會所謂ê「平妻」。創世記16章3節êאִשָּׁה是「妻」，卻m̄是「細姨」פִּלֶגֶשׁ。

M̄koh，夏甲無心存感恩，一見tio̍h kakī懷孕，顛倒輕視她ê女主人。撒萊真受氣koh痛苦，原本beh同齊做好姊妹服侍翁婿ê女婢，顛倒kā kakī踏tī腳下。她ǹg望公義ê上主看見kakī ê苦情，hō͘ in公平ê審斷，就ánne對翁婿亞伯蘭講：「我所受ê委屈，lóng是因為你！我kā我ê 女婢khǹg tī你ê懷中，她見kakī懷孕，就ánne我hō͘ 她看輕。願耶和華tī你我之間做判斷。」亞伯蘭mā知影是夏甲m̄tio̍h，所以對撒萊講：「看ah，妳ê女婢tī妳ê手裡，妳看án怎好，就án怎對待她。」

耶和華是公義ê。夏甲hō͘女主人撒萊苦毒，是她驕傲ê後果，所以耶和華ê使者對她講，她一定tio̍h tńg來女主人hia，tī女主人腳下接受她ê苦毒。M̄koh同時，耶和華是大有憐憫koh恩典ê上主，所以使者kā夏甲講腹肚內ê胎兒是chapo͘ gíná，她ē透過chitê gín'á生湠真chē ê kiáⁿ孫，chē到bētàng算得。Chitê gín'á mā hō͘上主親身號名叫做「以實瑪利」，יִשְׁמָעֵאל意思是「上主聽見」，也to̍h是耶和華聽見夏甲ê苦情，聽見她hō͘女主人撒萊苦毒ê時所發出ê 聲聲哀哀哮。

耶和華看顧

夏甲聽了耶和華使者所講ê，續落來ê回應真關鍵，m̄koh創世記16章13節無簡單翻譯。和合本翻譯做：「夏甲就稱hit位對她講話ê耶和華做『看顧人ê上主』。因為ánne，soah講：『tī chia我kám mā看見hit位看顧我ê？』」呂振中譯本翻譯做：「就ánne夏甲稱hit位對她講話ê永遠ê主叫做『祢是看見萬事ê上主』，因為她講：『kám講連tī chia我竟然mā看見hit位看tio̍h我ê？』」

耶和華是亞伯蘭ê上主，夏甲原本ê觀念認為耶和華應該tī亞伯蘭tòa ê希伯崙附近幔利橡樹hia。Á她已經逃離亞伯蘭ê所在一千gōa公里遠，上主竟然出現tī óa近埃及ê書珥曠野。容允我chit種翻譯創世記16章13節：「夏甲就稱hit位向她講話ê耶和華名做『祢是看顧人ê上主』，因為她講：『甚至tī chia，我竟然看tio̍h hit位看顧我ê！』」Gín'á ê名叫「以實瑪利」kah夏甲稱頌耶和華「祢是看顧人ê上主」，兩者綜合起來thang知影──耶和華m̄nā是「聽tio̍h」夏甲ê上主，祂mā是「看顧」夏甲ê上主。M̄koh，耶和華mā是「聽tio̍h」撒萊、「看顧」撒萊ê上主，祂知影撒萊受tio̍h ê委屈，生bē出gín'á soah hō͘眾人看bē起，iáu koh hō͘ kakī捧做平妻ê有娠女婢看bē起。

Thang講，kui件家庭悲劇ê起因在tī夏甲kakī ê驕傲，不幸soah致使亞伯蘭kah撒萊lóng成做pháiⁿ人。M̄koh耶和華介入chitê家庭，祂是化咒詛為祝福ê上主，祂免去夏甲kah gín'á可能因為離家soah孤單生活困苦ê運命，koh賞賜「以實瑪利」ê名提醒女婢夏甲，耶和華無teh看人ê地位koânkē，無teh看人是m̄是犯m̄tio̍h，祂lóng ē「聽」。根據聖經記載，卑微ê女婢夏甲竟然是頭一位稱頌耶和華某一个特質ê人！她稱頌耶和華「祢是看顧人ê上主」。Á咱chiahê平凡ê人，人生ê路chiūⁿ tú tio̍h各種苦境，lóng ē tàng透過夏甲ê故事來知影，耶和華是teh聽咱、看顧咱ê上帝！

Hitê拜五透早，電話聲linliang 叫；hitê禮拜日透早，電話聲linliang 叫，過了二十gōa分鐘，電話聲koh一pái linliang 叫。我所遭受siōng驚惶m̄知án怎chiah好ê兩場苦境，上主lóng tī leh。耶和華當teh聽我，tng teh看顧我，我無孤單。