《台灣之愛：盧俊義牧會筆記》

| | | 轉寄

牧師，請hō͘我修女

作者 盧俊義 2005.11.13

In是一群tùi瑞士「聖十字架寶血會」來ê修女，五十年前來到台灣東部，tùi醫療服務工作開始，tī台東市kap關山鎮開設醫院，並tī成功鎮設立醫療站，tī尚武村則開設教養院收容腦性麻痺兒童（目前已經搬遷到台東市郊）。In主要服務ê對象原本lóng是為tio̍h原住民，因此收費相當低廉，但受惠ê對象卻是所有進入該院求助ê每一個人。In會曉講阿美族話、布農族語，也講排灣kap比努悠瑪雅呢話（以前稱之為「卑南族」），當然in ê華語真溜。Chit群修女lóng是學有專長ê醫藥工作者，卻各自擁有專長手藝，會木工也挨(e)小提琴、修車、油漆、破柴、落灶腳煮飯等等，因為經費有限，in訓練原住民婦女協助護理ê工作。每個禮拜六，lóng會進行大piàⁿ掃，醫院總是保持潔淨亮麗。

一九八六年以前，in lóng是tùi瑞士差會呼召年輕醫師前來協助醫療工作。In kā瑞士年輕醫護人員講，tī台灣東部山區有真chē貧困原住民真迫切需要醫療工作者來協助。同時，in也坦白講明差會因為經費困難，只ē tàng hō͘ in siókhóa ê生活需要而已。每pái lóng會有年輕ê醫師報名志願前來，有ê chhōa bó͘kiáⁿ，有ê單身，停留兩年或三年。In無時間學習語言，來到台灣後隨時就開始投入醫療服務ê工作。每工就是無閒醫治透早就tùi山頂落來排隊thèng候ê原住民病人。透過修女ê翻譯，chiahê年輕ê醫師lóng非常詳細診斷治療每一位病人。

雖然只有簡單ê醫療設備，但卻擁有一流ê機動能力，每pái聽tio̍h有原住民tī厝裡病況垂危，chiahê修女就會手the̍h急救用ê醫療器材趕緊開車前往幫忙，有時也開車將病人tùi山頂載落來住院並hō͘ in細膩照顧。Tī he iáu無全民健保ê時代，對原住民來講，chiahê修女明明是就是kap天使仝款，隨時會出現在in身邊，擋止in流血ê傷口，也清理in he因為延誤就醫致到潰爛或壞死ê肌膚。Tī尚武村教養院ê門口，有時也會看tio̍h被父母棄sak ê嬰兒。

跟tòe經濟ê發達，台灣thàn錢ê醫院kap醫生也jú來jú chē，但醫療資源ê分配iáukú嚴重不均。Tùi一九八○年了後，每pái chiahê tùi瑞士來ê年輕醫師beh tńg去chìn前，lóng會問我chitê問題︰「為甚麼lín台灣年輕ê醫師lóng無想beh下鄉去幫助家己ê同胞？如果lín家己lóng無想beh彼此幫助，阮hiah遠tùi瑞士來幫台灣人又有甚麼意義？」每pái聽tio̍h來關山服務ê醫師ánne問，我lóng會有舌頭打結ê見笑感。

一九八七年，當馬偕台東分院設立了後，chit群修女認為應該hō͘馬偕醫院擔落來台東地區ê醫療工作，因為馬偕醫院是基督教ê醫院，有chit種ê責任kap義務。因此，in就將原本tī關山鎮ê小型醫院改成老人養護中心，專門收容hiahê家境困難ê年老病人，in kā我講講︰「Hō͘阮來照顧hiahê sànchhiah ê老人pah﹗」 時間過得真緊，一下á就是半個世紀，chiahê當年tùi世界最美麗ê國度遠渡重洋來到咱台灣ê修女，tùi當年chiah只有二十幾歲，年輕、活潑、美麗又可愛，如今都已經是一頭白髮，一個一個漸漸老邁。In無koh像以前hit種真有機動力，也無koh像過去hit種一個人就好抱起一個病人，有ê已經無力再the̍h起斧頭破柴燒大灶煮大鍋飯，但in iáu是繼續盡in所有chhun落來ê能力、teh看護咱台灣貧困而且年老ê同胞，飼in食飯、替in洗澡、做復健等工作，in講台灣人實在真可愛，台灣chit地方ná親像瑞士仝款美麗，in深深teh愛台灣。

每年我去探望chit群修女，舊年我順口講了一句︰「如果有我ē tàng幫忙ê事，請m̄免客氣kā我講。」一位奧地利籍裴姓修女回答講︰「盧牧師，請hō͘阮修女﹗」其他修女聽了了後lóng大聲笑起來，á我聽了卻有無限ê感慨，是ah，in m̄ nā缺乏各種資源，in也需要kohkhah chē願意放落身段去幫助in ê青年。In已經kā生命中最精華ê歲月都奉獻hō͘咱台灣，但咱卻差不多bē記得in iáu teh繼續燃燒生命中僅存ê一段燭心。

「盧牧師，請hō͘阮修女﹗」我ē tàng mah？當然無辦法。但我想咱lóng ē tàng伸出手來對in講︰「親愛ê修女，多謝lín ê愛，阮永遠bē bē記得lín﹗這是咱ē tàng hō͘ in ê。」 （自由時報2004年6月13日第15頁）

盧俊義牧師的個人網站。