《台灣之愛：盧俊義牧會筆記》

| | | 轉寄

小小貼心ê愛

作者 盧俊義 2006.03.19

十外年前，台東縣延平鄉巒山村國小有來一個姓張ê新校長。伊上任無偌久就發現有一個怪現象︰下課ê時，每pái有學生kap老師講話，有ê老師會thiau工kap學生保持一kóa距離。問詳細了後，chiah知影講是有ê學生頭毛生蝨母，koh chapo͘ chabó͘ lóng有。

為tio̍h beh了解原因，伊利用無課ê時去探視kuiê部落社區，chiah發現hia無kah一間剃頭毛店ah是美容院，若beh去到對面鄉公所所在ê街á，tio̍hài落山、行過吊橋、liâu過花東縱谷ê溪水。所以村民除了買必要ê日常用品，平時無閒山裡ê sit頭，就罕有機會chhōa gín'á去整理頭毛，若是無家長吩咐、責督，學生gín'á tiāⁿ失覺察無去整理有流真chē汗ê頭毛。

有一工，我接tio̍h張校長ê批，希望我kā伊tàu想看māi á怎樣解決學生頭毛生蝨母ê問題。收tio̍h伊ê批幾工後，我去台南一間「東寧教會」ê青年團契演講。順帶提起chit位校長hō͘我ê批，請chiahê大多數是高中生ê青年同齊tàu想看有siáⁿmih解決ê可能性。想bē到chitê團契ê會長隨tō講in會設法負責。

幾工á過，hitê會長sa一個盒á來辦公室chhōe我，講ē tàng將he盒á寄hō͘ hit位校長。我phah開盒á看，內面有一張卡片寫講︰「張校長你好，阮聽tio̍h你有chit款需要，阮團契契友有ê出五十箍ah是一百，同齊買chiahê kesi hō͘你ē tàng替學生gín'á剃頭。上帝祝福你。」盒á內面是兩支電動ê剃頭刀、四支loa̍h'á、兩支剃頭用ê鉸刀、兩支手動ê剃頭刀、兩條白色ê圍巾。我無法度理解chiahê青年thài會用chit種方式表示關心，總是有kā chit盒禮物轉寄hō͘張校長。

張校長真細膩，接tio̍h hit盒禮物了後，半聲半就想beh試看māi，隨chhōe一個chapo͘學生來，叫伊坐leh，校長the̍h一張舊報紙，tùi中央剪一個khang，套tī學生ê頷頸，就開始用電動剃頭刀做「剃頭師」lo͘h。伊是以家己二十外年前去做兵tī新兵訓練中心hông剃光頭ê經驗，用來替學生剃頭。因為無kā人剃頭ê經驗，不時夾tio̍h頭毛，看學生嘴齒根咬leh，就問講「kám會痛」？Taⁿ是校長leh替伊剃頭，學生m̄敢hìⁿhaiⁿ，kantāⁿ敢細細聲á講一句「校長bē痛」。頭毛剃好勢，koh chhōa學生到洗手檯去chhiâng頭鬃，洗後看tio̍h無整齊ê所在，koh再修一下。張校長發現學生kuiê頭chám然光chn̂g，真滿意leh想︰若是ē tàng請全校ê九個老師，每工lóng tio̍h替一個學生剃頭，發現有生蝨母ê，一律剃光頭。

校長to親身chhōa頭替學生剃頭ah，做老師ê也想beh跟tòe，tō ánne每工放學ah是中晝下課ê時間，in就扮演臨時ê「剃頭師」。

部落ê村長知影chit件tāichì了後，真正感心，校長kap老師是hiahni̍h'á愛護in ê序細! tō動員全村村民每工早起到山頂去做工經過學校ê時，入去四kè看māi，mā替學校拚掃。無偌久，chit項校長、老師替學生剃頭ê tāichì就傳到台東剃頭公會ê師傅hia，in開會決定每個月公定ê休假日，也beh派師傅到chit間所在tī半山腰ê國小去做義工替學生整理頭毛。

因為有部落家長參與拚掃校園ê環境，koh有剃頭師傅tàu整理學生儀容，kuiê校園jú來jú整齊有美感，風聲真緊oannā傳到縣政府教育局。in派督察去看，確實無仝款就是無仝款，學校已經變kah真清氣、整潔。教育局tō特別以專案補助ê方式撥一筆經費hō͘ hit間學校，校長就用chit筆經費來táⁿtia̍p教室ê地板kap門窗，koh將一間無leh用ê教室改做「懷恩剃頭毛店」，壁頂有寫感謝台南東寧教會青年協助ê經過。「懷恩剃頭毛店」m̄ nā hō͘學生有剃頭ê所在，部落ê村民oannā ē tàng享受。

一年過了，巒山國小成做全縣siōng清氣、mā是環境siōng súi ê國校á，縣教育局koh評定做山地示範國小。更加特別ê是hit間學校mā是全縣kap部落村民互動最bātàu ê學校。校長kap老師lóng真疼惜學生ê關係，會替學生整理儀容；村民ê回應是替學校tàu khoán校園環境。學校老師kā學生當做親生ê看待，家長是kā學校看做是家己ê厝仝款leh愛護。

微細ê愛心行為，tō ē tàng改變kuiê學校kap社區，mā改變學校kap家長以及社區之間ê互動。真實ê愛m̄免chē，小小切貼人心ê愛oannā有法度改變生活環境。（原文刊tī自由時報2004年5月23第15頁）

盧俊義牧師的個人網站。