《台灣之愛：盧俊義牧會筆記》

| | | 轉寄

真無仝款ê生命觀

作者 盧俊義 2006.04.23

Tī西班牙有一間創辦tī十七世紀中葉、koh tī基督教界享有名譽ê「托拉畢斯特」（Trappist）修道院，該院除了因為歷史悠久來出名外，也因訓練kap差派出去ê神父lóng有相當傑出ê成績á名聲遠播，後來koh因為創辦者也是該院長藍塞（Rance 1626∼1700）對該院師生ê嚴謹要求á名聲轟動一時。該院之所以名聲會tī基督教界響亮，並m̄是因為訓練出身ê神職人員lóng是學有所成，或是tī學術領域獨據一方，卻是in tī傳道ê工作上確實lóng真拚命、盡責，從來m̄ bat退卻，特別tī十八世紀中葉ê中南美洲kap非洲開拓福音事工上，tùi chit間修道院出身ê神職人員siōng受oló。

該院院長藍塞神父tī訓練學生日常起居生活上有一個真特別ê所在，就是規定tī院內師生彼此相tú時ê請安用語tio̍h講「Memento Mori」，chit句拉丁語，意思就是「記得你會死」。Chit種ê用語實在真特別，m̄是咱一般人想像會tio̍h，但卻是chit間修道院每工chia起hia落、四界thang聽tio̍h ê請安話，這kap咱台灣人tī相tú時請安、phah招呼時所講ê「你食飯bē」，確實是真無仝款。

為甚麼藍塞院長會想tio̍h用chit種「記得你會死」ê請安句來訓練該院學生neh？原因kap基督教信仰對生命ê瞭解有密切關係。當一個人想tio̍h家己ê生命有限時，就會明白家己是人，是受造ê人，有生命ê極限，以及各種能力ê限制，並且tī真chē方面，人所表現出來ê行為現象lóng是真軟弱ê。當人有chit種ê自我認識時，chiah bē kā家己當作「偉人」看待，因為所謂「偉人」，往往lóng是hiahê bē記得家己是人ê人tī自我麻醉時所想tio̍h ê用語。

Á這又kap修道院有甚麼關係？為甚麼tio̍h用chit種方式來做為訓練ê功課neh？原因就是chiahê被訓練有一工lóng是beh擔當tio̍h「神職」工作ê傳道者，比一般人kohkhah需要謙虛、卑微家己，如果無chit種ê心境，真可能就會藉tio̍h「神意」，欺壓信徒，甚至假借「神旨」，圖謀滿足家己ê慾望。這就是為甚麼耶穌會對伊ê門徒講︰「lín知影，世上hiahê被認為是統治者ê有權管轄人民，領袖也有權支配人民。但是，lín卻m̄是ánne。Lín當中誰beh做大人物，誰就tio̍h做lín ê僕人；誰beh居首，誰就tio̍h做大眾ê奴僕。因為人子m̄是來受人服侍，卻是來服侍人，並且為tio̍h救贖眾人á獻出家己ê生命。」（馬可福音十︰42∼45）耶穌ài伊ê門徒kā家己定位tī「奴僕」ê角色，就是boài伊ê門徒興起做領袖ê念頭，á bē記得家己是「會死」ê人。

奴僕，這是隨時ē tàng被主人賣掉、甚至凌虐致死ê卑微者。Á奴僕iáu有另一個重要ê職責，就是當主人有危險需要保護ê時，奴僕就必須無顧性命來拚命去保護主人。如果傳道者無注意tio̍h chit點，真可能因為擁有「神職」，bē記得家己卑微僕人ê角色，竟然扮演起「神明」ê樣式，ánne就一定會出問題。因此，當藍塞院長用chit句「記得你會死」ê話做為院內彼此相互請安ê話時，其實就是teh kā學生講，必須記得ài時刻保有卑微ê心靈，知影家己真軟弱、有限。Kohkhah重要ê，謹記隨時thang為tio̍h福音ê緣故奉獻家己生命﹗

世界上有真chē自命是偉大ê人，一心一意想beh做偉大ê事，tùi ánne，為tio̍h beh完成自認為偉大ê功業，常kā別人ê生命看成ná親像草芥一般ê踐踏；有ê人為tio̍h beh達到目標，會不擇手段、百般走行chông、欺騙、恐嚇，甚至ná親像吸血鬼一般，只要hō͘伊掠tio̍h，絕對bē鬆手，搾壓到底。為甚麼會有chit種ê人？原因真簡單，in lóng m̄承認家己是人，是有限á而且軟弱ê人，chit種ê人往往tī事業或地位達到顛峰狀態ê時chūn，認為家己對生命有掌握ê能力，有時iáu會扮演tio̍h「神明」ê角色，這是基督教信仰中siōng忌諱ê一件事。

「記得你會死」，chit句話如果能成做咱台灣政治人物ê信仰觀念，一定ē tàng hō͘ in有無仝ê形象出現。如果咱台灣工商界人士也能有chit種ê涵養，有可能咱社會就會減少抗爭、紛爭ê鏡頭。
（原載tī自由時報2004年11月14日第15頁）

盧俊義牧師的個人網站。