《台灣之愛：盧俊義牧會筆記》

| | | 轉寄

甚麼樣ê人出現在甚麼地方

作者 盧俊義...台語翻譯: Chuniok 2005.09.04

台灣人有錢á無？有人講台灣人確實真有錢，若m̄信ê話，ē tàng到餐廳、飯店去看bāi，經常會看tio̍h有兩三個人搶帳單beh付款，有ê人則是tī櫃臺前擠過來、sak過去，lóng是為tio̍h beh搶付食飯ê菜錢。然後你會看tio̍h付了帳單ê人會真得意講︰「chit種小錢我來付，另工大攤ê換你來結。」也有ê會講︰「Aih，這小case，無甚麼，我來付就好，無問題。」無論如何，搶tio̍h付帳ê人lóng會露出一副得意ê表情，kahná真有成就ê款，因為伊請大家食飯。不過也bat發生過兄弟因為搶beh付帳，竟然出手相phah，甚至iáu因此結怨，理由真簡單，就是不滿面子hō͘別人搶去。看pah，有錢到chit種bē sái hō͘別人看輕ê地步，就可知影台灣人jōa有錢。

講台灣人真有錢mah？mā m̄ tio̍h，真chē人lóng tī hoah sàn，而且the̍h出一堆數據beh證明家己實在是sàn kah beh死。chiahê人經常是穿名牌西裝或洋裝，但卻tī國稅局辦事處向承辦員哭父哭母講︰「我thái有hiahnih chē錢付chiahnih重ê稅金？lín怎樣核算ê？阮/咱舊年虧損真chē錢，員工ê薪水lóng kiôngbeh發bē出來，lóng kiôngbeh無飯食了，iáubeh納chiahnih chē ê稅金，這明明是叫阮/咱要lim「泔水」（意指稀飯湯)過日子？請你做做好事，我真正無錢繳納chiahê稅金lah。」

若是講bē通，iáu會想盡辦法遊說稅務機構准予辦理分期繳納。tī台灣，經常會聽tio̍h有人ánne講︰最聰明ê人是設法漏稅。有人是漏了稅了後iáu會講加付hō͘政府iáu m̄是仝款被「歪」掉，阿西chiah會照付。若台灣像人家歐美國家社會福利chiahnih好，我一定照付。是mah？真chē移民到外國去ê台灣人，iáu m̄是照樣想盡辦法m̄納稅，而且iáu會想辦法為家己父母，或是家己the̍h tio̍h當地政府補貼ê養老金neh﹗當teh講「像人家歐美國家社會福利chiahnih好，我一定照付」chit句話時，chitê人可能忘bē記得，歐美ê國民就是照規矩納稅，不但bē想盡辦法去the̍h不該the̍h ê津貼，也bē想beh逃漏稅，因為in知影he是真「見笑」ê一件事。

誰講台灣人真壞？m̄ tio̍h，絕對m̄是ánne，這是誤解台灣人。台灣人chiah lóng是好人，若m̄信ê話，ē tàng到地檢處或法院去行一圈，tī hia，無論是檢察處開調查庭，或是法院開庭問案，所有因被告而遭傳訊ê人lóng會異口同聲講家己有jōa好，並且iáu會提出人證、物證，來證明家己確實是良人君子，只有行善、無做惡，請檢察官或是法官明鑑。

tī台灣ê法院，無論甚麼層級，lóng會發現承認家己是pháiⁿ人、罪有應得ê無chē，而願意承認家己罪該萬死ê kohkhah少。即hō͘是貪污了數以億計、百億以上而潛逃到外國去bih起來ê hiahê紅頂商人，也會tī被檢察官起訴了後，一再隔海放話申訴家己被冤屈ê苦衷，甚至lóng會講he是「綠色恐怖」ê迫害。連小學生lóng知影最基本ê是kap非，tī chiahê大人物ê腦海中根本就不存在。看起來台灣人應該全lóng是好人chiah對，真難chhōe tio̍h pháiⁿ人，若是有，也是非常少。m̄信ê話，去法院或地檢處行一趟就知影了。

真正是ánne mah？我iáu是m̄信，因為有一個地方，只要入去，就會看tio̍h所有ê人lóng m̄免別人講，就會先承認家己是罪人ê，he就是基督教會。進入教會裡面，無一個人敢講家己有jōa好，也不敢講家己m̄ bat犯過罪，大家lóng講家己罪真重，需要上帝ê寬恕、憐憫，並且祈求耶穌赦免伊、替伊贖罪。chit種承認家己罪重ê情景，m̄ nā是tī祈禱時ánne講，連所唱詩歌也lóng是chit種ê內容，kohkhah免講傳道者講道時會一再指責teh聽道ê信徒們，ài in一定tio̍h承認家己ê罪，否則就免想耶穌會救伊。因為耶穌講︰「健康ê人用bē tio̍h醫生，有病ê人chiah用會tio̍h。我來目的m̄是beh召好人，而是beh召pháiⁿ人悔改。」（路加福音五︰31∼32）看pah，就是chiahnih清楚，若是好人根本就不需要承認家己ê罪，只有pháiⁿ人chiah需要認罪悔改ah﹗無錯，pháiⁿ人siōng chē ê地方lóng tī基督教會裡。（華語原載於自由時報2004年9月19日第15頁）

盧俊義牧師的個人網站。