《台灣之愛：盧俊義牧會筆記》

 | | | 轉寄

心ê距離，chiah是真正ê問題

作者 盧俊義...台語翻譯: Chuniok 2005.09.25

有一個女指揮匆pōng趕公車beh去工作；伊為tio̍h beh hō͘合唱團所有團員看tio̍h伊真有精神，坐了一點鐘ê公車了後，就快步行到練習教室鄰近停tī路邊ê汽車邊，chhōe tio̍h一部車窗玻璃貼有遮陽紙ê車，然後對tio̍h窗á補妝抹胭脂一下。當伊補妝tehbeh結束，家己感覺真滿意á tú想beh離開ê時，chit時車窗突然間搖落來，車裡ê駕駛對tio̍h伊講︰「小姐，可以了pah﹗」Chit位女指揮嚇一跳，趕緊轉身快步離開。

Kanta隔一片窗á ê玻璃，女指揮是為tio̍h補妝，希望hō͘人看起來kohkhah有精神，á車裡ê男駕駛卻認為chit位女士可能有問題，怎樣就tī伊座位邊á ê窗á對tio̍h伊一直teh抹胭脂、化妝，這iáu無啥要緊，怎會tī胭脂抹好了後，iáu用頂下嘴唇對tio̍h伊bih了幾pái，hō͘伊jú看jú m̄是滋味，iáu真正認為chit位小姐對伊有意思neh。

其實，女指揮是為tio̍h beh hō͘伊ê團員看起來真有精神，唱起歌來kohkhah好聽，因此，伊無希望經過一段搭車路程了後看起來有厭倦ê面色，因此，想tio̍h chhōe一個「鏡」補妝一下。Á chit位就tī玻璃窗內ê駕駛，坐tī車內看tio̍h有人對tio̍h窗á the̍h起化妝品、口紅，一直向「伊」teh抹，而且kohkhah誇張ê是tī抹完了後，iáu將嘴唇bih了兩pái，然後chiah收起化妝品khǹg入手提包，koh帶tio̍h滿意ê表情對tio̍h「伊」微笑一下，hō͘伊認為chitê女子可能對伊有「意思」，但伊認為即使是ánne，也m̄免ánne做作ah﹗

人kap人之間心內ê想法kap認知若是無仝，即使是kanta隔一層玻璃，或是面對面照teh看，心內ê距離也是hiahnih'á遙遠。台語就有一句俗語話︰「隔一層肚，khah遠北路。」Chit句話本來是古代接生婆經常teh用ê話句，當一位產婦iáu未生落來gín'á ê時chūn，大家lóng tùi懷孕腹肚ê外表形狀猜測胎兒是男或是女，但往往猜錯了性別。後來漸漸將chit句俚語用來形容外表ê了解kap認知，kap實際ê狀況完全無仝款。

但是，如果是同心，即使是雙方ê距離有ná天地之間ê隔閡，或東kap西ê遙遠，也會聽tio̍h對方ê心聲，會經常有心靈ê感應出現tī生命中。

久長以來，真chē散居tī世界各地ê台灣同胞，雖然kap故鄉台灣ê距離真遙遠，但希望台灣成做一個新而獨立之國家ê心卻是hiahnih'á相近。因此，每pái有tùi台灣去ê民主運動或獨立運動人士到外國去演講時，lóng會看tio̍h當地台灣同鄉hit種熱情kap期待，大家雖然手中the̍h ê m̄是kài歡喜ê國旗，但心中所期待ê就是︰只ài有一工台灣獨立了，換一個新旗á、唱新ê國歌就tio̍h了。

Tī台灣，有真chē所謂ê新住民，in是比較khah慢到台灣來ê，in當中也有ê是外國kiáⁿ婿，也有kóa是外籍bó͘，但也有ê已經tī chia khiā起真久，甚至是tī chia出生、長大ê新世代，只因in tī chia khiā起、生活，講chia ê口音，食chia ê物件，對台灣chit塊土地帶有深厚ê愛，對chia ê人民有難分ê感情，甚至有kóa人連tī chit塊土地上lóng無任何姻親關係，但卻也因tī chia工作而有一份特殊ê感情，因此，in雖然出生ê背景無仝，甚至膚色、語言、文化lóng無相仝，但in ê心真是kap台灣chia ê人民、土地交織到ná親像只有一顆心ê連體嬰一般，分bē開，也bē sái分開，完全無「心距」。

但是有kóa人卻m̄是ánne，是完全相反；in長久khiā起tī chia，也生tī chia、成長tī此地，對chia ê一切lóng真熟悉，甚至有姻親關係，也有算bē完ê親朋好友，但in卻是ná親像上述ê hit位女指揮kap車裡ê駕駛仝款，kanta隔一層薄薄ê玻璃窗，想ê、做ê、看tio̍h ê是完全無相仝，「心距」之大，明明就是天地之間一般ê遙遠。

猶太人tùi西元前586年被巴比倫帝國亡國了後，雖然in當中有人經過了幾nā世代，也因為kap外族人通婚而bē記得家己ê語言、生活文化，但in ê心卻是永遠ânân相連作伙，終於hō͘ in tī西元一九四八年建國了後，成做一個相當有活動力、lóng無驚鄰近阿拉伯人威脅ê國家，chitê民族就是靠tio̍h一股堅定ê信心以及忠實ê宗教信仰，鞏固了整個以色列民族。台灣社會最欠缺ê，就是chit種ê宗教情操，原因是宗教信仰經常被政客所操弄，不但宗教已經lahsap、污穢，而且變了質ê信仰內涵jú來jú明顯。真是可惜﹗（華語原載於自由時報2004年12月26日第15頁，台語翻譯：Chuniok）

盧俊義牧師的個人網站。