《BONG報bong2選》

 | | | 轉寄

寫hō͘我上kài siàu念ê三姊

作者 李文正 2006.11.05

親愛ê三姊，當goán接著講妳發生車厄ê電話，goán趕到佳里綜合病院kā妳看ê時，妳已經離開世間a，goán實在bē tàng接受妳hiônghiông過往ê事實，因為妳lóng無kap goán相辭。

當goán去到學甲分局交通處理小組ê時chūn，chiah知iáⁿ講妳是tī八月十三禮拜日epo͘六點五十左右，開車落南經過學甲急水溪橋，因為橋有siókhóa tńg彎落kiā，車速緊，失控，soah péng tùi對面ê車道，lòng著橋頂ê護欄水銀燈，車chiah tòkhap，妳choaⁿ'á去hō͘ teh tī車內ê駕駛座，當吊車、救護車去kā你救出來ê時，你已經無性命ê現象a。

後來我chiah知iáⁿ妳lóng利用hiohkhùn時á去做chi̍tkóa關心動物、有疼心ê khangkhòe，照nisang ê推測，hit一日妳可能是趕緊beh載chiahê狗á、貓á ê屍體去岡山火化、超渡，妳驚時間bē赴，chiah會駛hiah緊soah來發生車厄。

過去我chhiângchāi去工廠chhōe妳開講，妳lóng飼真chē狗á，我mā chhiângchāi kā妳講lán teh開工廠無閒無工，而且衛生mā無好，koh會kā人吵著，ta̍kpái去chhōe妳坐，我lóng會kā妳唸，m̄ kuh妳lóng kā我講「無lah，ah to無koh khioh tńg來飼a，bē koh增加a lah」，妳lóng顛倒會kā我講，chiahê狗á chiok有感情ê，chiok sek ê，你對i好，i lóng mā知iáⁿ neh。三姊，妳就是一個chiahni̍h'á好性，chiahni̍h'á有疼心，chiahni̍h'á善良ê人。

雖然工業區hām安平真近，m̄ kuh自從a母á過往去了後，妳就khah少teh tńg來a，除了選舉ê時妳khah chia̍p來kā我tàu腳手以外，lán姊弟á就是隨人無閒kakī ê tāichì。我會記得tī妳出tāichì ê chiâⁿ個月前，我koh去chhōe妳開講，妳lóng mā會講chi̍tkóa委曲、心聲hō͘我聽，我lóng mā kā妳苦勸，tio̍hài想想khah開leh，khangkhòe m̄免做kah hiahni̍h'á辛苦，衫á褲sio̍ksio̍k a，tio̍h去買chi̍tkóa khah súi ê衫來穿，tú著a就去做chi̍tê'á身體健康檢查，妳lóng mā kā我講「好、好」，妳lóng顛倒khah會關心我，講我食kah瘦pipa，mā tio̍h去hō͘醫生檢查看māi leh。我lóng mā kā妳講lán過去tòa tī海墘á，食bái穿bái生活艱苦，做粗重lán to lóng會堪得a，何況lán chitmá已經做議員a，雖然khah無閒siókhóa，m̄ kuh若kah過去比起來是加真khùiⁿ活leh lah。Lán姊弟á若做夥ê時，話lóng講bē煞。後來有1日妳koh khà電話hō͘我，講有chi̍tkóa話beh kā我講，我kanna kā妳講無要緊lah，我chit 2日á若khah閒leh chiah koh過妳hia開講，想bē到我chitmá連beh koh聽妳講話ê機會mā無a。

親愛ê三姊，妳自細漢就去做女工，kā apa、a母'á tàu thàn錢，閒ê時tio̍hài koh tńg來kā apa、a母á tàu做khangkhòe，我會記得妳thàn ê錢lóng hō͘ apa the̍h去買魚栽，妳lóng無為kakī設想，apa、a母á 無嫁妝hō͘妳，妳mā無計較，無分財產hō͘妳，妳kāng款對apa、a母á chiahni̍h'á養孝，妳m̄ nā對goán chiahê小弟、小妹真照顧、真疼thàng，妳對兄哥、大姊mā真有情義，妳若做會到ê，lóng bē計較。

親愛ê三姊，妳離開goán了後，goán若beh koh去看秀梅，ah是beh去kā apa、a母á探墓厝，車頂就減妳l個a，我聽A秋講，妳lóng chhiângchāi kakī 1個人，車駛leh去新化仁愛之家看秀梅，因為妳知iáⁿ我khah無閒；tú著á lán兄弟姊妹lóng會相招做夥去看秀梅，tī車頂lán兄弟姊妹有講有笑，甚至mā有爭執，chitmá我kā回想起來，he是lán上快樂ê時chūn。我相信妳chitmá一定kap apa、a母á做夥tī天國、tī佛祖ê身軀邊，母ákiáⁿ有講有笑chiok快樂ê。

親愛ê三姊，tī我讀小學beh升國中ê時，apa、a母á無kap lán tòa做夥，我印象chiok深ê，tī我讀金城國中一年ê時，etàu時á妳lóng kōaⁿ chiok好食ê便當kap果子去學校hō͘我食，hit時是我感覺上幸福ê時chūn，che mā是我chi̍t世(sì)人to無法度放bē記得ê tāichì。妳chhiângchāi kā我講妳若tī外口聽著人teh oló我，lóng chiok歡喜ê。雖然我今á日已經做議員a，m̄ kuh妳mā是hiahni̍h'á疼我，體貼我，關心我，妳mā m̄敢麻煩我。三姊，妳是我心目中上好ê a姊，若準講有後世人，妳koh做我ê a姐，好無？

親愛ê三姊，妳雖然無讀jōachē冊，m̄ kuh妳tī我ê心目中比hiahê高學歷ê khah有學問，khah有是非觀念；雖然妳自細漢就食頭路，無像真chē人受政府ê照顧，koh嫌政府，若siókhóa影響著in ê利益，in就批評政府chit項、hit項。幾nā pái teh kap妳開講，妳lóng真會tàng體貼政府，體貼A扁á總統，因為妳知iáⁿ beh hōaⁿ 1個家庭to chiok艱苦a，何況beh hōaⁿ 一個國家？Koh再講，台灣iáukoh有真chē無公平ê所在。

親愛ê三姊，雖然妳真好性，真善良、真有疼心，m̄ kuh妳對性命ê積極實踐是無人thang kap妳比ê，妳kā妳ê愛心化做行動，m̄ tiāⁿ是對家庭ê付出，對序大人ê養孝，對兄弟姊姊ê情份，lóng hō͘人真感動。妳m̄ tiāⁿ疼親人，妳mā疼chiahê精牲動物，甚至妳人生ê最後就是為著chiâhê狗á、貓á來犧牲性命！可能有真chē人會笑妳gōng，過去我mā chhiângchāi為著chiahê tāichì kā妳唸，m̄ kuh chitmá我chiah瞭解：妳是一個不管時用疼心來實踐性命、偉大ê女性！親愛ê三姊，雖然妳chiah五十七歲就離開goán，m̄ kuh妳ê精神永遠教示goán，mā活tī我ê心肝底。