《BONG報bong2選》

 | | | 轉寄

Pe龍船

作者 Abon 2008.06.08

China人kā台灣人講「pe龍船」是teh紀念China古早ê「愛國詩人」，in講肉粽是beh khian落去水底hō͘魚á食，魚á chiah bē食「詩人」ê肉！

China人講ê tòpéng想就tio̍h a！我chiok認真想mā想無台灣人是ánchóaⁿ ài「pe龍船」，有飯m̄食tio̍hài縛做「粽」chiah甘願食。

想幾nā冬ánchóaⁿ想to想無。問gún母a,i mā講無路來，i kanna 知iáⁿ自古早就leh縛粽，m̄ koh gún chit庄m̄是5日節縛，是7月半縛。我害a，sa無cháng koh加1條！

有1 kái我the̍h肉粽做研究，kā縛好ê粽khian入去魚櫥á飼魚，粽tìm落去水底，魚櫥á浮1 iân油，魚á看著粽soah bih到櫥á邊去，過chi̍tē'á chiah有2隻khah好膽ê óa來tok。

我tī魚櫥á看kui暗，魚á粽tok bē行，就當做櫥á加1塊石頭，hit工了kui禮拜lóng真無閒，尾á mā bē記得hit粒粽tīleh櫥á內，尾á想著beh khǹg 1 隻船á hō͘魚á「pe」，驚iáubōe到就鼻著臭臊味，驚jú óa jú臭。死a！魚á lóng péng肚a！Kuikha魚櫥á臭mimo͘，我kā péng肚ê魚á hô͘起來，水làu hìⁿsak，內底nah會加1粒......M̄ tio̍h！hit粒粽koh tī hia hô͘hô͘。魚櫥á拚好，我決定無kā「肉粽」kap「pe龍船」ê tāichì bú hō͘通，無beh koh飼魚á。

我chah hit粒「粽」去chhōe Banda，kā講我學China人khian「肉粽」飼魚á，i 笑kah leh塗kha nòa。我講「tòpéng想」mā想無，i 笑kah拳頭母tǹg壁，tǹg kah隔壁ê死老猴chhohkànkiāu。

「你bē sái好好á講o͘h！m̄知chiah會來chhōe你a！」
「救人o͘h！寫台文ê信China人ê siáu話lah！」
「好lah！相信China人是我m̄ tio̍h，我kā你會失禮，緊kā我講lah！」
「台灣人真害，愛聽好聽話，連siáu話to信phakphak，hông拖去cheng to m̄知！」
「緊講lah！」
我tùi Banda ê頭殼siâu taiⁿ落去！
「Kán！Chiok疼neh！你kā我斟酌聽o͘！」
「好！」
「不管China有幾個詩人，詩人ánchóaⁿ死，kap台灣lóng無tītāi！」
「我知a！Tòpéng就是........ che lóng是台灣人本chiâⁿ就有ê！」
「講你gōng koh無iáⁿ jōa gōng neh。」
「Oh ye！」
「龍船kap Tao ê 1款船á kài sêng，上大隻會sái坐20~30個人，m̄ koh chitmá無柴無teh做a，古早in lóng kò船á去Philippines kap親chiâⁿ siochhōe，chitmá mā是koh有出海lia̍h魚á。」
「樹á lóng hō͘ China人chhò了了a！」
「Tī日本人iáubōe來chìn前，台灣ê大條港lóng無橋，tùi台南行bē到淡水，坐船á khah chē，hitchūn台灣人1塊枋á就會sái出海。等到日本人起ê縱貫線開通，大細條橋起好勢，台灣chiah chiâⁿ做1粒島，若無lóng是港kap港teh sio通。」
「我泅水lóng泅無siáⁿ會行kong！Ánne我beh ánchóaⁿ出海？」
「Bē hiáu坐飛行機o͘h！你kā粽tháu開！」
「無愛lah，臭mimo͘！」
「緊tháu，若無，無愛講a！」
「好lah。」
我kā粽tháu開，粽ha̍h'á hìⁿsak，外口層ê飯ùn著水siokhóa爛爛。
「Kā āⁿ peh出來。」
「OH NO！Mm......bē臭臭neh？」
「Ánne知a ho͘ⁿh。」
「Siáⁿ！」
我kā粽khǹg tī桌頂，Banda用箸kā peh做2 koeh。

「騙siáu ê！你kakī mā m̄敢bak著！Koh gia̍h箸peh！」
我笑iáubōe煞，Banda就kā三層ngeh ùi嘴nih。
「你teh chhòng siáⁿ！」
「Iáu koh好好，che粽siáⁿ人縛ê?真好食neh！Chitchām'á無現金thang食飯。」
Bangda kā粽sut了了。
「你害a！Eng暗你就知a！一定chhoah到bîn'áchài！」
「免驚，粽就是出海beh chah ê便當lah！」
「正(chiàⁿ)ê？浸水mā bē pháiⁿ去？」
「Tio̍h，粽tata khǹg會sái khǹg 2~3禮拜bē pháiⁿ，kiⁿ粽會sái khǹg個外月！」
「張錫銘kap in細hàn ê phāiⁿ 3 kōaⁿ粽就會sái tī山頂bih到賊頭lia̍h bē著。」
「Tio̍h a！照Tao ê經驗，1 chōa到Philippines ê Batan上緊半工就到a！Khah慢1工mā會到位。1隻船á 10個人半工食1頓，20粒就有夠，縛khah大粒ê 10粒就會飽。1 kōaⁿ 10粒會無chhái草索á，lín母a 1 kái lóng縛jōachē？」

「Gún母a chiok大心肝，lóng縛tàu大粒ê，1 kái lóng縛7~8 kōaⁿ！」
「7~8 kōaⁿ？1 kōaⁿ幾粒？」
「無斟酌算neh，kanna會記得縛好就sìkòe分人，koh會縛kiⁿ粽，mā是7~8 kōaⁿ。」
「你知iáⁿ巷á口賣肉粽ê Asáng 1 禮拜賣幾粒無？」
「我a̍h知，hit款粽pháiⁿ食kah beh死，chhap i 賣幾粒！」
「你hō͘ China人òe了真嚴重，kanna會hiáu食。」
「Nah有！我會hiáu寫台文neh！」
「我頂kái趣味去kā Asáng tàu縛，i 1工縛2 kōaⁿ，1 kōaⁿ 30粒，1禮拜14 kōaⁿ 420粒，賣bē了lóng會chhun。準講lín母a縛7 kōaⁿ，1 kōaⁿ 25粒，lóng總175粒，上無會sái hō͘ 100個人食1頓，lín tau 6隻人，會sái食5~8工。」

「I lóng縛hō͘人，m̄ koh mā有人會kōaⁿ來hō͘ gún，ta̍kpái beh食tio̍hài看粽ha̍h'á ioh是siáng tau ê粽。」

「若照Tao人ê速度，5工會sái kò到Philippines ê Manila，ǹg日本去會sái kò到Naha，lín tau ê船á真gâu走o͘h！」
「Tio̍h ah，大家lóng講gún母a是 '5 kha牛'，sìkòe phapha走。」
「Koh有，tùi 5日節過就開始好天，海頂平平平，無像kôaⁿ天hō͘鬼á風siàn kah ná壁崩落來hit款大湧，chitchūn出海上好！」
「Ánne我知a！5日節是teh歡喜台灣人beh出海，縛粽是船á頂beh食ê，台灣真正是海洋國家！」
「China人驚台灣人知iáⁿ台灣人自本就kap in無kâng，會hiáu peh山，會hiáu出海，kā台灣人山禁，koh chòaⁿ講 'pe龍船' kap粽是ùi in hia來ê，chit款pe̍hchha̍t害台灣人kap狗kāng款看著水就驚，關tī台灣toh位to bē sái去。」
「He我知lah，免上課a，lán mā來去kò船á，moa年kò來去日本chhitthô。」
「你ta̍uhta̍uh'á kò，我坐飛行機tiàm日本等你！」