《BONG報bong2選》

 | | | 轉寄

烏貓kap 水雞

作者 甘露 2008.08.17

Tī 熱人ê 暗暝，蓮花池邊á 有幾十隻水雞teh「oa̍h！oa̍h！oa̍h！」，tòpêng hit 隻叫kah tng siakphah，nah會hiônghiông 停落來？Ō͘o͘h，原來是一隻睏bē 去ê 烏貓ùi 邊á 行過。

烏貓：「Miau~miau~，今á 日日時nah會熱chit 體ê leh？Tio̍hài 趁暗時á 出來行行laulau leh，若無，我chit 隻體材瘦thio ê 烏貓liammi就變肥貓lo͘h。

Chit 個時chūn，tú'á 好有一陣涼風吹來，kā 蓮花葉siàn kah phihphih pha̍hpha̍h、搖來搖去。

水雞á：「Ah，我苦a，nah會ánne?M̄ 知有hō͘ 烏貓看著無？緊kā 頭àⁿ khah低leh……」

「Ha~ha~ha~，涼lah，涼lah，風ah，繼續吹、繼續吹，m̄ thang 停。」烏貓ná 享受涼風，ná teh chhōe bih tī 蓮花池邊á ê 水雞。

「正pêng 有四隻，tòpêng 73隻，上óa 近我ê hit 隻上無膽，驚kah phīphīchhoah，頭á koh lêlê，好！今á 日就chhōe伊做伴，hi~hi~hi~」烏貓心內teh 偷笑。

就ánne，胡鬧kā 頭前腳kap 頭kiu tńg來，後腳翹kah koânkoânkoân，圓滾滾ê 尾溜káná 釣魚ê 浮筒，hàiⁿ chi̍tē、tiuh chi̍tē，hàiⁿ chi̍tē koh tiuh chi̍tē，伊歡喜ê 心情看尾溜就知。

「He~he~，看我一號ê khut 勢！水雞ah，好膽mài 走！」

水雞á:「我苦a，我苦苦苦lo͘h，chit 聲苦bē 了a。烏貓大ê，你kā 我放開lah，kā 我放開lah……」

「好ā，kah 你to 開嘴ko͘chiâⁿ a，好，放你走。」烏貓雖bóng 嘴nih 講beh 放水雞走，m̄ koh 身軀soah ná 徙ná 去，kā 水雞beh tńg 蓮花池á ê 路擋起來。

「Chit 隻烏貓講一套做一套，講beh 放我走，koh kā 路擋leh，chitmá 水路bē tàng soan，kantaⁿ chhun 草á 路niâ。好！無kap伊拚chi̍tē，soah lia̍h做我好欺負。」水雞á 心內ánne 想。

烏貓：「Hi~hi~，gâu 跳o͘，oah，跳chi̍tē尺外遠，好sńg、好sńg，m̄ thang 停、m̄ thang 停落來。」

無論水雞ánchóaⁿ 跳，烏貓總是tòe tī伊後壁。過無jōa 久，水雞就跳kah phìphè 喘a。

水雞：「Hè~hè~hè~，chiok 喘ê、chiok 喘ê，chit 隻烏貓無tāi 無chì lia̍h 我kúnsńg 笑，伊是sńg kah 真心適，我是兩支後腳跳kah kiōngbeh thih 腿去，用跳ê 我nah 跳會贏伊？若無想一個á 好辦法，liammi'á thih 腿就變做chhun 骨頭ê 白骨腿lo͘h。」

Chit 個時chūn,tú'á 好koh 有一chūn風tùi 蓮花池邊á 吹過，m̄ koh kap túchiah 無仝ê，是所有ê 水雞lóng 驚kah m̄ 敢出聲，kantaⁿ chhun 烏貓jiok 水雞，kā 草á phah kah phīpha̍k 叫ê 聲。

水雞á:「有a,無聲ê 暗暝…無聲ê 暗暝，我有救a!」

烏貓：「你講煞bōe？無聲ê 暗暝，he~he~，你走無路a。」

原來，水雞想著éng 過細漢經過雨傘節ê siū ê 時，mama lóng會特別交代伊bē sái 出聲；chitmá伊想著一個好辦法：趕緊跳tùi 雨傘節ê siū hia 去。

水雞：「Koa̍h…koa̍h…koa̍h…」勇敢ê 水雞拚性命叫，koh 愈叫愈大聲，想beh kā 雨傘節siâⁿ出來。

「Toh一隻m̄ 驚死ê 水雞敢來goán 門腳口chhiàng 聲？今á 日chi̍tkóa 水雞m̄ 知ánchóaⁿ lóng m̄ 出聲，害我提早歇睏，腹肚chiah tng teh iau niâ，隨有點心走來。」本底就iau kah 大腸告小腸ê 雨傘節，siu̍h chi̍tē，ùi 蛇孔sô出來，nah 知面頭前m̄ 是水雞，是烏貓。

烏貓：「臭水雞，你koh會曉用chit 招！雨傘節，我無teh 驚你，看一號khut 勢！」

烏貓kui 身軀毛lóng chhàng起來，雨傘節本chiâⁿ 想講有料thang sut，想bē 到m̄ tāⁿ 食bē 著，koh ài 拚老命，愈想愈m̄ 值，頭oa̍t leh sô tńg 去蛇孔。

勇敢koh 冷靜ê 水雞就tī 烏貓kap 雨傘節對相ê 時，跳入去蓮花池á。

水雞á:「Koa̍h…koa̍h…koa̍h…，人講好khang ài 報人知，歹khang mài sio 害，想bē 到tī 緊急ê 時chūn，歹khang ê mā ē tàng 救人命，hi~hi~。」