《巫義淵台語常用字》

 | | | 轉寄

常用字_07....「石」

作者 巫義淵 2012.01.15

石有四个讀音：1.chio̍h (石) 2.*se̍k (席) 3.sia̍h (夕) (4).si̍p (習)。
這字四個讀音平常時社會有咧講的有三個，另外一個是專用名詞一般較bē曉，總是講歸講，真濟人卻不知影所講的話是這字，親像石榴[sia̍hliû]大家攏寫「榭榴」這是m̄ tio̍h ê。這四個讀音其中的se̍k是 chio̍h 的文音，猶一個si̍p是漢藥名的專用字，這就是使用漢字費氣ê所在。下面就將這四個讀音紹介來佮大家分饗。

重點字詞：
【石】1.chio̍h (石) 2.*se̍k (席) 3.sia̍h (夕) (4).si̍p (習)。
【石綿瓦】[chio̍hmîhiā](借八聲暝蟻)。
【石榴】[sia̍hliû](社硫)。
【石破】[se̍kphò](席冇)。石破天驚。
【秋石丹】[siusi̍ptan](收習單)。(***《台日大辭典》chhiuse̍ktan [秋石丹]＝[消食丹]）。

用例：新ê科技工業發達，真明顯的打擊着傳統工業，除了人才ê培養無共以外，薪資待遇差別mā足大，科技工業的師父(技師)，一個月薪水十數萬到數十萬，傳統工業ê師父大約二萬至五萬之間；工作環境mā差真濟，一爿是 GMP ê空調大廈，一爿是鐵厝石綿瓦[chio̍hmîhiā]ê工場，無形中造成一寡少年家對傳統工業無興趣，致使傳統工業續chhōa無師父。近來因時代變遷工業轉形，一寡人若欲chhōa頭路，若佮伊所學ê無對同，往往履歷表寄去攏親像石沉[chio̍hthiām]大海；若有一間科技公司欲倩人，風聲一下出來，石破天驚[se̍kphò thiankeng]，爭先恐後欲去應徵。猶有一寡大頭家為着欲《包二奶》將錢the̍h去中國投資，不專心做生理，卻甘拜於二奶ê石榴[sia̍hliû]裙下做情場孝子，為着欲征服紅顏費盡精力金錢，有真濟人因按呢、落得人財兩空，雙頭無一ngauh，氣到掠狂、虛火盡 giâ嘴齒岸全腫，kui尾愛倚靠這帖秋石丹[siusi̍ptan]來加滋陰降火。

常用字: 石 chio̍h 有四个讀音：1.chio̍h (石) 2.*se̍k (席) 3.sia̍h (夕) si̍p (習)。

(1).chio̍h：「石」原第八聲，做頭字tio̍h變調做第三聲
【石】[chio̍h](1).話音。例：巖石。(2).量詞。例：一石[chi̍t chio̍h]十斗也。

註：十升[cha̍pchin]= 一斗[chi̍ttáu] ，十斗[cha̍ptáu]= 一石[chi̍tchio̍h]。
【石頭】[chio̍hthâu]石的通稱。註：一般石頭是指卵石類。
【石版】[chio̍hpán]用光潔的石做ê，石印所用ê版。
【石印】[chio̍hìn]一種印刷ê方法，先將原稿翕像(照相)，再將影像製入石版頂面而成。
【石碑】[chio̍hpi]將文字刻tī石碑頂面豎立來做記念，或標誌。
【石灰】[chio̍hhoe]由石灰岩燒煉製成ê，加水則發熱，成做熱石灰，是工程重要原料。
【石英】[chio̍heng]一種親像水晶瑪瑙等堅硬ê礦物。
【石蠟】[chio̍hla̍h]一種有機化合物，將蒸餾石油餘澤製成ê白 色固體，會當做燭。
【石綿】[chio̍hmî]形親像絲ê一種礦物，有彈力，脆弱易破不著火，吸入肺部後果嚴重。
【石女】[chio̍hlí/lú]生殖器構造無完全，無法度生育ê女子。
【石油】[chio̍hiû]對油井抽出ê原油，是炭與氫ê化合物，可提煉塑膠汽油等石化原料。
【石墨】[chio̍hba̍k]一種會當做鉛筆心ê原料，或做機械潤滑劑的礦物，合煤當素體。
【石筍】[chio̍hsún]長條狀ê岩石，直立親像筍，用來做園藝飾物。
【石斛】[chio̍hha̍k]屬蘭科常綠草本，產岩石頂，生津止渴，強壯益精，滋陰益胃。
【石葦】[chio̍húi]水龍骨科乾燥全草，清熱消炎，收斂止血，治腎炎、膀胱、尿道炎等。
【石膏】[chio̍hko]含水硫酸鈣C2 SO4 H2 O 加熱後失去結晶ê水，成做白粉末可雕塑模型。
【石膏】[chio̍hko]含硫酸鈣之礦物，清熱降火，消炎利尿，治急性高熱，嚨喉腫頭痛等。
【石鹼】[chio̍hkiⁿ]＝肥皂＝雪文[soatbûn]用油脂合成ê棄污洗滌物。
【石鹼石】[chio̍hkiⁿchio̍h]屬滑石類，色暗灰或綠，軟而滑，真親像石鹼。
【石決明】[chio̍hkoatbêng]＝九孔螺殼，治視力減退，綠內障，高血壓所致ê頭痛頭暈。
【石壁掰】[chio̍hphekhông]＝鐵翻魂，消腫退掰，治一切無名腫毒，疔癤癰腫，肺炎。
【石菖蒲】[chio̍hchhiuⁿpô͘]藥名：明耳目，利九竅，補肝益心，除痰消積，消腫止痛。
【石蓮子】[chio̍hliânchí]睡蓮科植物，蓮子經風雨沈水浸而成，清心解煩，治食欲不振。
【石灰水】[chio̍hhoechúi]溶石灰在水裡所得ê無色透明液體。
【石灰岩】[chio̍hhoegâm]介類合珊瑚ê遺殼沈積海中而成ê岩石。
【石灰乳】[chio̍hhoejú]將石灰放在水裡，攪成白色，供消毒用途。
【石敢當】[chio̍hkámtong]傳說是晉力士人名；後世刻其名於長形石豎鄉里巷口做守護。
【石油苯】[chio̍hiûpún]石油熱到四十至七十度時，餾出ê部分，易揮發，做樹膠溶劑。
【石斑魚】[chio̍hpanhî]體狹長扁側，頭烏，脣紅，尻脊有斑紋。
【石首魚】[chio̍hsiúhî]體扁嘴闊，鱗細，色黃，頭中有二塊小石狀，俗稱：黃魚。
【石鯛魚】[chio̍htiauhî]硬鰭類，鱗細嘴大，脊鱗較大，齒強，腹有烏條紋，產太平洋。
【石器時代】[chio̍hkhì sîtāi]有史以前極古ê時代，用石製器具，有新舊石器時代之分。
【石門水庫】[chio̍hmn̂g chúikhò͘]桃園境內，長16.5公里，面積8.15平方公里，1963竣工。
【石獅裮鐵甲 chio̍hsai moathihkah】過頭勇ê款式。引申；錦上添花，假愛心。
【石獅亦驚人告 chio̍hsai iākiaⁿlângkò】形：訴訟真煩的事，勸勉人盡量不通較好。

註：古早舊官僚，若有人告與石獅有關係的事，愛將數千斤重的石獅扛去衙門做證物。

(2).se̍k：
【石】[se̍k]文音。
【石鐘乳】[se̍kchiongjú]泉水含有炭酸石灰，對巖縫滴落，其石灰質凝結，纍下垂而成。
【石炭系】[se̍kthànhē]地質學上古生界，地層構造ê一個時代。
【石投大海 se̍ktô͘ tāihái】將石頭擲落大海。引申：攏無回應。
【石火光陰 se̍khó͘ⁿ kongim】形：光陰ê迅速，目一下軟就欲過去。
【石爛海乾 se̍klān háikan】引申：永久不變的意思。鄭允端詩：石爛海枯，行人歸故鄉。
【石破天驚 se̍kphò thiankeng】極大的震動。或文字、議論ê出奇驚人。李賀詩：女媧煉石補天虛，石破天驚逗秋雨。

(3).sia̍h：原第八聲，做頭字愛變第三聲。
【石竹】[sia̍h]植物名。
【石竹】[sia̍htek]屬石竹科，多年生草本，葉狹，披針形，花有深紅、淡紅等色。
【石榴】[sia̍hliû]果子名：落葉灌木，初夏開紅花，結厚皮果實，破裂吐鮮紅種子可食。
【石榴皮】[sia̍hliûphôe (phê)]安石榴科植物乾燥果皮，收斂消炎，止瀉、止血、殺蟲。

(4).si̍p：
【石】[si̍p]藥名專用音。
【秋石丹】[siusi̍ptan]藥名：一種用童弱石膏秋露水等製成的，滋陰降火消腫的漢藥。

簡辭：chio̍h
石磐[chio̍hpôaⁿ]、石椅[chio̍hí]、石條[chio̍hliâu]、 石蠔[chio̍hô]、石螺[chio̍hlê] 、石蟳[chio̍hchîm] 、 石地[chio̍htē] 、石楯[chio̍htún]、石橋[chio̍hkiô]、 石路[chio̍hlō͘]、石埕[chio̍htiâⁿ] 、石坊[chio̍hhng]、 石磨[chio̍hbō]、石碖[chio̍hlún]、石崙[chio̍hlûn] 、石硃[chio̍hchu]、石趼[chio̍hlan]、石筆[chio̍hpit]、石花[chio̍hhoa]、石蛋[chio̍hnng]、石界[chio̍hkài] 、石紋[chio̍hbûn]＝石脈、石角[chio̍hkak]、石矔[chio̍hgîm]、 石磡[chio̍hkhàm]、石鏨[chio̍hchām]、石斧[chio̍hpó͘]、 石胎[chio̍hthai]、石洞[chio̍htōng]、石泉[chio̍hchôaⁿ]、石重[chio̍htāng]、石礦[chio̍hkhòng]、石龍[chio̍hlêng]、石柱[chio̍hthiāu]、石窗[chio̍hthang]、石草[chio̍hchháu]、石仙桃[chio̍hsianthô]、石藍花[chio̍hlâmhoa]、石頭狗[chio̍hthâukáu]