《草地囝仔做牧師》

| | | 轉寄

教會Tī曠野

啟示錄十二章1~17節

教會無論是tī新約或者舊約,古代或者現今ê時代,lóng是上帝所特別揀選、珍重ê一個團體,是上帝所聖別ê團體,是上帝ê選民、上帝所喜樂ê,mā是上帝特別保守照顧ê團體。

因此若照人ê觀點來看教會,伊是光榮ê團體,有上帝特別ê安排kap祝福,充滿tio̍h完美kap理想ê現象,因為伊hō͘全能ê天父上帝有特殊ê關係。但是咱看現實ê教會,自舊約時代開始到耶穌時代,中世紀教會,或者近代教會,咱所看tio̍h chiahê kap上帝有特別關係ê教會,ē tàng用tī水深火熱中來形容,咱若tùi舊約時代開始看以色列ê民族史,以及新約時代ê教會史,咱ē tàng了解ê to̍h是一部受苦史。Tī舊約時代ê狀況,自以色列人出埃及ê時tī迦南地ê生活,kap列王時代了後hō͘人掠走tio̍h亡國,到現今以色列kap中東ê問題,lóng是非常悲慘ê生活史。一直到新約時代了後ê教會,經過二千年來,雖然teh迫害了後得tio̍h保護,成做國教,但是無論任何時代一直處tī苦難中,tī近代ê宣教史上,真chē宣教師teh國外傳道、建立教會,lóng忍受無數ê迫害kap攻擊,甚至有教會受難ê事件發生,tī台灣或者中國大陸lóng有chit種現象。

雖然現代人對基督教無過去hit種ê敵視,但是教會到taⁿ iáu hō͘人批評、誤會,hō͘人輕視、討厭,這是咱所ē tàng了解ê。當咱想tio̍h教會ê現象,以及上帝對教會ê應允ê時,咱會問:為何上帝ê教會會受tio̍h ánne ê對待?伊kámm̄是上帝所特別珍重,所賜福ê團體mah?咱mā會問,教會ê主kám是全能ê主?確實,tī咱ê信仰生活中,咱會體驗tio̍h真chē tāichì是真pháiⁿ理解ê,ná親像世界kap惡ê問題,信仰kap苦難ê問題,chiahê問題,有時用信仰去請問上帝,mā是無法度得tio̍h肯定ê答案。尤其tī教會生活中,時常體會tio̍h真chē熱心事奉,有為可敬ê基督徒,伊ê一生,充滿tio̍h坎坷不平、無限ê苦難,為啥物上帝會將chiahê苦難成做伊ê負擔?通常咱khah ē tàng了解ê是上帝ê恩典kap祝福,會tī祂所疼ê基督徒身上,但是對上帝所疼ê教會或者基督徒,soah生活tī不幸、悲哀ê情景中,通常chiahê khah chiap hō͘人疏忽。

因此,基督徒必須ài建立正確信仰價值觀。咱ē tàng體會tio̍h上帝豐盛ê恩典,施tī祂所疼ê人身上,以及引chhōa、保守祂ê教會。但是同時咱mā必須了解,主所疼ê人mā會破病、受苦;mā會生活tī水深火熱惡劣ê環境中。

Chiahê是咱信仰ê現實,tú親像咱人生現況仝款。人生充滿tio̍h各種無仝ê情感,起起落落tiāⁿtiāⁿ是人生ê真實景況,比如傳道書所講ê,事事有定tio̍h、生kap死、健康kap病痛、歡樂kap憂愁、幸福kap不幸。Chiahê現象一直是人生ê狀況,基督徒或者教會mā是處tī人生或者社會中,因此難免mā會有chiahê感受,thang tùi下面三個問題來思考:

一、 上帝ê教會kap魔鬼
通常beh了解信仰kap苦難ê先決條件,必須ài先了解上帝kap惡ê問題;tī神學上ê教義學方面代先提出ê,to̍h是神觀問題。一般ê情形是tùi神存在ê證明開始,通常tī哲學立場上論證神ê時,thang tùi ○1宇宙論○2目的論○3本體論或者○4道德論等多多證明,chiahê是用人ê理智beh來證明上帝ê,當然kap基督徒信仰ê立場無仝。通常基督教信仰ê神觀,m̄是tùi人ê研究chiah來ê,是tī耶穌基督ê啟示,因此基督教信仰ê神觀,必須以耶穌基督ê 事實,主耶穌向學生講:「看tio̍h我,to̍h是看見父神,若無經由我,就無人ē tàng到上帝hia」lóng是說明耶穌基督ê啟示,是人認bat上帝ê主因。Tùi chia講tio̍h活ê人格神,創造者上帝,三位一體ê上帝,然後講到上帝ê創造kap世界,tīchia就會出現上帝ê攝理(預見或者預知);照基督教信仰ê立場,上帝對世界ê攝理是咱所了解ê事實,上帝對世界ê統治、支配,對世界kap人類ê目的以及上帝國ê實現,上帝ê全能慈愛,保護kap關心,to̍h是上帝ê攝理。

Tùi以上所講ê,咱就ē tàng體會tio̍h一個真確實ê問題,to̍h是惡ê問題,mā to̍h是創世記第三章,亞當kap禁果ê問題,是人tiāⁿtiāⁿ討論ê主題,就是為何tī上帝所創造美好ê世界中,會有惡ê存在?Ài如何去了解上帝ê全能?這是基督教史上siōng chiap爭論ê主題,mā to̍h是信仰kap苦難ê問題。

為啥物上帝允准撒但tī祂所創造安置亞當ê樂園中?為啥物歷代教會lóng會面對tio̍h chit種魔鬼勢力不斷ê破壞kap攪擾?為啥物上帝ê教會tī百般苦難中經營?Chiahê問題,是tī教會中時常提出來討論ê嚴肅課題。

咱thang發現,上帝ê教會出現ê時,惡ê勢力mā同時出現,進行破壞ê khangkhè,因此,自有教會史以來,教會就時常面對tio̍h惡魔ê挑戰。Tī教會內to̍h是有不斷ê困難kap迫害,但是chiahê是tī上帝ê應允之中,伊是有限,m̄是無限ê。Tī啟示錄十二章已經暗示chitê真理,若照正統ê解釋,婦人iáu指上帝ê教會,身揹日頭、腳踏月娘,掛上十二粒星,日、月、星tī聖經中,tiāⁿtiāⁿ是表示榮耀ê記號,因此上帝ê教會伊ê本質是榮耀ê存在,「十二」tī啟示錄中tiāⁿtiāⁿ看做是舊約ê十二支派kap新約十二使徒,包括了舊約kap新約ê教會。

教會雖然是地上人所設立,但是伊ê起源或者本質ê意義是屬於天。 Chit種屬於上帝ê教會,tī地上歷經真chē患難kap痛苦,而且是歷經奮鬥kap phah拚chiah產生人類ê救主耶穌基督,祂是tùi教會出來ê,祂是亞伯拉罕ê後代,大衛ê kiáⁿ孫,馬太福音第一章第一節耶穌ê家譜thang查出。但是咱若看啟示錄十二章2節「伊有身啊,teh生產ê艱難中痛kah大聲叫」to̍h ē tàng了解,婦人是指教會,上帝ê教會beh產生救贖ê主,chitê過程是相當艱苦,伊用疼kah真艱苦ê叫來形容伊ê過程。

Tùi chia thang知影kuiê教會是一個戰鬥ê教會,是負擔tio̍h真chē苦難ê教會,但是教會iáu tī苦難中,期待tio̍h拯救ê來臨,另gōa一方面惡魔用各種方法beh消滅教會,雖然惡魔是專門teh破壞上帝ê khangkhè,自創世記到啟示錄kui本聖經中,咱ē tàng看tio̍h ê to̍h是伊無時無刻teh kap上帝作對,用各種方法抵制上帝ê意旨。咱若看歷代教會史上真chē可悲ê事實,通常lóng kap惡魔有關,雖然有時伊非常直接ê,但是soah時常利用教會ê人物,尤其是有影響力ê人物,當做工具來進行破壞上帝ê計畫。

主耶穌ê生涯中,mā tiāⁿtiāⁿ受tio̍h chit種引誘,siōng典型就有三pái,tīchia咱ē tàng了解,惡者連榮耀ê主lóng會想出所有ê辦法beh引誘伊,何況咱chiahê無完全ê人?啟示錄十二章4節「龍khiātī beh生kiáⁿ ê婦人面前,等待伊出世,就beh kā伊拆食落腹」這是teh寫惡魔對待上帝ê教會ê情形。伊ê本質是殘忍、狼毒ê象徵,是pháiⁿ ê,雖然有文雅、美麗ê外貌,但是伊ê內心所充滿ê是狼毒ê作為。伊所siàu想e5toh8是歹代,比如保羅tī羅馬人書三章12節:「Lóng是偏離正路,做伙變做無路用,連一個mā無」所形容罪ê性質仝款。

二、 教會tī曠野
惡魔雖然用盡一切方法,beh破壞消滅上帝ê教會,但是上帝ê教會soah受tio̍h上帝ê保護,tùi十二章5節咱ē tàng了解救主耶穌已經出世(tio̍h用鐵枴á治萬邦,然後ài hō͘人chhōa到神ê寶座),十二章6節婦人to̍h逃去曠野,tīhia有上帝所預備ê所在,hō͘伊tīhia得tio̍h 照顧1260工(1260相當三年半,是七ê半數代表無完全)。雖然咱lóng了解曠野kap城市ê生活是有真大ê差別ê,tī曠野是無方便,而且有背後ê危險,khah無適合人生活,因此tī曠野ê生活to̍h是代表ài歷盡真chē艱苦,因為無方便,就會帶hō͘人真chē問題,ná親像四十年代,台灣ê生活方式kap現今有真大ê差別,hit時tú tùi神學院畢業,用柴做燃料,需要特別買一支斧頭,了後就用番仔油爐代替,到現今1997年使用瓦斯燃料。為啥物美國hiahni̍h仔關切科威特hō͘伊拉克侵佔?伊主要ê原因,tī石油。全世界有五分之一ê油量tùi hia生產,美國又koh是siōng浪費石油ê國家,che對現代人來講,石油實在是bē tàng欠缺ê能源。咱ē記主耶穌講tio̍h末日來臨ê時bat講,hiahê好額人必定khah無法度承擔,咱自困苦ê人生,進入富裕ê生活khah簡單,若是tùi富裕ê人生,beh進入困苦生活khah困難。因此人無歡喜生活tī曠野,伊ê人生必須ài增加付出,伊是無方便、辛苦kap有阻礙ê所在。M̄ koh,咱看聖經寫上帝ê教會tī曠野:

(一) 是上帝ê安排,「婦人就逃去曠野,tī hia有上帝hō͘伊ê預備地」(十二章5~6節)教會tī曠野,這是事實,但是咱必須ē記這是tī上帝ê安排之下,有時咱體會tio̍h教會ê真chē問題kap困境,但是咱必須了解chitê 事實,是有上帝ê美意,既然是上帝ê安排,祂一定bōe放棄咱來離開,「Bōe hō͘ lín做無老父ê kiáⁿ」是主耶穌向學生所講ê,一定有上帝ê同在,有上帝ê同在,to̍h是榮耀ê所在。

(二) hō͘伊tīhia,得tio̍h照顧:人會驚tī曠野,是驚會影響tio̍h生存,既然tī曠野會得tio̍h適當ê照顧,ánne就無需要驚惶曠野,咱若看以色列人tī曠野生活了四十年之久,就kohkhah ē tàng了解四十年ê歲月,實在是上帝teh養育in,因為in無耕作或者飼動物,完全流浪tī曠野,但是soah得tio̍h上帝完全ê養育。教會ê事實mā是tī曠野,但是上帝teh養育伊,因此生存並bē有問題,雖然歷代教會受tio̍h苦楚,但是soah有上帝完全ê養育。

(三) 受苦是有期限ê:tī曠野1260工(四十二個月、三年半、七ê半數),時間若到,問題就會解決;真chē困難中ê教會,有一日會變做榮耀ê教會,這是教會屬天ê性格,因此現實ê教會,siōng迫切需要ê問題,to̍h是忍耐、等待、期望上帝榮耀ê來臨,che mā是基督徒信仰生活真正ê內容。


三、 撒但ê破壞永遠bōe停
雖然咱了解,教會tī曠野有時間性,但是咱必須ē記,惡者破壞ê khangkhè是永遠bōe停ê!Tùi啟示錄十二章6~8節大龍tī天頂無khiā起ê所在,就到地上來,tī十三節hit條龍就tī地上迫害教會,但是教會得tio̍h上帝ê照顧kap安排。雖然iáu tī曠野,但是一直得tio̍h照顧kap保守,惡勢力,永遠bōe停止迫害上帝ê教會,kohkhah去用各種ê方法beh破壞教會,但是教會有上帝ê照顧kap保守,thang用「有驚無險」來形容伊。

雖然教會因為蛇(龍)無放棄迫害,hō͘人遷到曠野甚至是無人所到ê所在,惡靈iáu無放棄迫害,koh tùi後面(15節)吐水像水災,ài kā伊沖走,(m̄是正面,hō͘人料想bōe tio̍hê,hō͘伊看bē tio̍h)beh消滅這婦人,(這是真惡毒ê手段,tī聖經中,水災有時hông形容是惡ê意思)但是tùi 16節thang知,上帝soah幫助婦人解決chitê問題,m̄ koh教會是tī上帝ê國之中,永遠受tio̍h上帝ê照顧kap保護,這是教會ê事實。

雖然歷代ê教會,lóng經過了相當大ê風險kap苦難,無論是tī任何地區、任何時代lóng ánne;因為教會生存ê本質,是tī曠野,因此,教會必須ài有chit種認同,雖然tī苦難中,但是惡魔ê攻擊kap破壞,永遠bōe停。Tùi啟示錄十二章17節「龍向婦人發性地,去kap伊其他囝兒爭戰,to̍h是he守上帝誠命,替耶穌作見證e5」,tsitê節聖經真清楚看出惡魔án怎對敵上帝ê教會,chit種實況,mā hō͘基督徒真大ê警告,只要你遵守上帝ê誠命,有基督ê見證,就會受伊ê攻擊kap迫害,這點是基督徒必須覺悟,同時認清chit種迫害是永遠bōe停ê。

咱若看聖經,tùi創世記到啟示錄,四界lóng有撒但破壞上帝ê旨意,而且永遠bōe停ê,主耶穌hō͘人試探ê時,雖然三pái lóng得勝,但是路加福音四章13節soah記講:「魔鬼用盡各樣ê試探,就暫時離開耶穌」這暫時離開to̍h是表示有機會就會koh來。

所以咱ài認清惡魔ê真面目,同時ài了解咱教會或者個人信仰生活ê限時性,期待咱ê教會,雖然tī曠野,但是soah是榮耀ê教會,惡魔雖然橫逆,但是上帝ê保守kap照顧kohkhah大,這是每一個基督徒siōng大ê安慰。