《受恩蒙福的一生》

| | | 轉寄

新ê機會

用西結十八:2024、3032

人一生ê成敗kap機會有極密切ê關係。因為機會存在tī人生中間,人一生ê成敗,決定tī是m̄是掌握機會。真chē成功ê人,通常是真gâu利用時間,把握機會。因為光陰ná箭,sut一下tio̍h過去啊,bōe等人。希臘人bat有chit種ê傳說:「機會ê前擴有兩條辮子,後腦光溜溜,一枝頭毛lóng看無無」,這teh說明機會來ê時,每一個人lóng有可能kā伊掠tiâu,因為伊ê前擴有兩條辮仔,真簡單to̍h掠會tiâu。一旦錯失良機,m̄管你用toh一種方法,lóng無法挽回。

希臘人ê傳說真有道理,當機會來臨ê時,真簡單掌握,beh共伊掠tiâu m̄是真困難,若錯失機會,beh挽回就oh了。咱tiāⁿtiāⁿ聽tio̍h「Ài把握機會,bē tàng錯失良機」,可見機會kap人生關係jōani̍h'á密切ah!

咱lóng知影,人ê一生是tùi「機會ê累積」,機會決定人ê成敗。所以俗語講:「時間to̍h是金錢」,有ê時「時間比黃金kohkhah值錢,kohkhah貴重」。因為黃金若是失去thang koh再得,但是機會soah 無法度。一旦失去機會,永遠無可能koh tńg來。「把握良機」非常重要,若無「失之交臂」就可惜了。

維也納有一位名醫叫勞爾貝斯,醫術非常高明,因為手術bōe流血,名聲透全球。有一pái,伊到美國講學,順續做美西一日遊,當伊家己一個人tī 人tòa ê社區散步ê時,狠狠落大雨,伊馬上走ùi siōng近ê一間厝,請求hō͘伊避雨,結果女主人應門了後,真bōe耐性ê講:「請到別位去,阮tau麻煩已經有夠chē啊。」,然後kā門關起來。Chit位醫生真無奈ê沃雨行tī路上,tú tio̍h一台車,chiah載伊tńg去旅館。過幾工,新聞刊出勞爾貝斯tńg維也納ê消息,紹介伊ê醫術kap相關醫療相片。Hit位拒絕伊請求避雨ê夫人看tio̍h了後,非常後悔,無接待chit位不速之客,因為chit位醫生to̍h是伊致重病ê chabó͘kiáⁿ siōng好ê救星。上帝送伊上門,伊soah bē曉把握機會。

Tùi頂面這則故事,hō͘咱了解tio̍h箴言第三章27節ê真理,伊講:「你ê手若有行善ê能力,bē tàng推辭。」傳道書九章十節mā ánne講:「你ê手該做ê事,ài盡力去做,因為陰間無khangkhè,無計畫,無知識,無智慧,但是你beh去ê,to̍h是chitê所在」續落來koh講「Tī這個世上,真gâu走siojek ê人無一定得獎,勇敢ê人無一定相戰to̍h贏,聰明ê人,無一定有飯食,機智ê人,無一定好額,khiàng腳ê人,無一定tī koân位,時運左右一切」。(傳道書九:11)時運to̍h是機會。

上帝hō͘人ê機會lóng是平等ê,無論貧賤富貴lóng仝款,無對誰較好。差別ê是人對機會ê處理態度是m̄是積極、謹慎。Tiāⁿtiāⁿ聽tio̍h有人怨嘆講「無機會」。Kahná the怨嘆上帝無公平,無hō͘伊機會,其實m̄是ánne,上帝hō͘任何人ê機會lóng相仝,無偏心。拿破崙講:「『怨嘆無機會』是弱者ê藉口。」一般來講,各人所處ê環境,mā可能有所無仝,但是若態度積極,真gâu把握機會,無一個bōe成功ê。

社會上一kóa成功ê案例,研究in成功ê原因,lóng是真gâu把握時機。當然mā有一kóa是靠祖先ê庇蔭,繼承了一kóa本底to̍h有ê基礎,chiah好額成功。但是chiahê人若無kā良機把握hō͘ tiâu,mā會栽tī失敗ê洪流,毀掉先人所hō͘ in ê恩澤。

Chitmá咱同齊來反省咱ê信仰生活,基督徒應當以上帝hō͘ in ê信仰機會,去提昇基督徒屬靈生活ê層次。上帝hō͘人ê機會是仝款ê,但是往往因為基督徒ê態度無仝,所表現出ê信仰層次mā有差別。

信仰生活ê重點,tī基督徒如何面對上帝所賜ê信仰機會,如何掌握問題,進一步koh有新ê屬靈造就,mā to̍h是靈命更新。基督徒對上帝所hō͘ in ê機會ê態度,往往決定in ê信仰生活ê品質好bái。咱ùi下腳幾方面來看:

(一) 淨化ê人生
基督徒ê時常生活tī宗教氣氛十分厚ê環境中,tī chit種氣氛薰陶之下,hō͘伊成做符合上帝旨意ê人,沐浴tī chit ê環境ê基督徒,當然是上帝所喜樂ê。

若是有ê人久長浸tī chiok厚ê宗教氣氛中,soah失去了信仰ê警覺性,結局無法度表現出基督徒美好ê一面,無法度hō͘家己ê行為,達tio̍h如聖經頂面所描述ê「作光kap作鹽ê境界」。甚至比非教徒iáu khah hâmbān,kohkhah hō͘人討厭,chit種基督徒ê存在,m̄ nā bōe榮耀上帝,顛倒會hō͘上帝ê名聲受tio̍h侮辱。Chiahê人雖然身穿基督外衫,soah無基督ê真道tī伊ê內心,對上帝ê救贖無清楚,對聖經中ê真理mā m̄是真了解,普通時仔做禮拜mā只是應付應付,完全無接納主耶穌tī伊ê心中,kohkhah無像哥林多後書五章17節所講ê「無論siáng,一旦有了基督ê性命,to̍h是新造ê人;舊ê已經過去,新ê已經來臨。」Chit種信仰體驗。

Chiahê kanta有外表ê基督徒,心kap人ê無一致,伊ê信仰是無真實ê,in無徹底ê把握上帝所hō͘ in淨化人心ê機會。Ná親像主耶穌批評當地ê法利賽人仝款,講in ê人生比如粉飾ê墳墓,外表美觀,但是內面soah藏tio̍h臭骨骸。只有虛偽ê外表,上帝所要求ê公義,仁義tī in身上lóng chhōe未tio̍h。完全是假仙假ta̍t。In ê心思意念無hō͘上帝所賜hō͘人ê機會所代替,靈命無更新,舊我無去除。雖然chiahê法利賽人tī當時ê社會地位非常koân,但是實質上in ê存在是完全無價值ê。主耶穌形容in是青盲ê嚮導,是毒蛇、毒蠍之流(馬太23章33節),in是無法度逃避上帝ê審判ê。Kahná馬太廿一章,主耶穌咒懺hit叢無花果樹仝款。只有美麗ê外貌,soah無實質ê內容。

Tī信仰生活中ánne是一件真驚人ê tāichì。信仰好ê人,伊是承受了上帝賜hō͘人,有淨化人心,改變人性恩典ê機會。所以基督徒若bōesái成做新造ê人,就失去了做基督徒ê意義。Tio̍h會hông當做廢物tànsak,由人蹧躂。有一個源潔流清ê故事,ánne講:古早時某部落,有一口公用井,有一工,忽然臭氣沖天,無法度lim,經由開會討論,認為是鬼怪作祟,道士作法無效,用消毒劑消毒mā無效,最後派一個人落去井內探勘,結果發現死貓tī內底,將伊撈起來並淘井,徹底清潔tio̍h有效。人心mā仝款,人若無上帝所賜ê機會淨化,伊ê心思意念有可能是濁濁lahsap ê。

(二) 新ê機會,hō͘人看見上帝
主耶穌tī八福中講著心肝純潔ê人有福lah!因in àibeh看見上帝,這to̍h是上帝賜hō͘人機會,siōng具價值ê事實。舊約聖經記載,人bōesái看tio̍h上帝,因為看tio̍h ê人必死。M̄ koh tī上帝賜hō͘人ê新機會,耶穌基督降臨ê chit件tāichì頂面,hiahê人lóng ē tàng藉chitê事實看見上帝。Tú親像八福中主耶穌所講ê。另外耶穌teh面對十字架ê道路中,bat向伊ê學生講過:M̄免擔憂、煩惱,ài確信上帝,祂只是先去預備地方。我beh去ê所在,hit條路lín是知影ê。多馬問講:「主ah!阮m̄知你beh到toh位去,怎樣會知影hit條路neh?」,耶穌講:「我to̍h是道路、真理、性命;若m̄是藉tio̍h我,無人ē tàng到老父hia去」(約翰十四章)。腓力iáu要求主耶穌ē tàng「將天父顯現hō͘阮看,ánne阮就心滿意足啊」。對腓力所提出ê問題,主耶穌講:「腓力,我kap lín作伙已經chiahni̍h久啊,你iáu m̄ bat我mah?」Siáng看見我,就等於看tio̍h天父。這kap舊約所講ê lóng仝款,上帝將伊ê孤kiáⁿ賜hō͘世人,目的是hō͘人藉tio̍h chitê事實去體驗天父ê存在。這是上帝ê恩典。To̍h是新約ê恩典。因為世人本身滿是lapsap,無可能親近上帝,需要靠主耶穌所流ê寶血來洗清氣,chiah ē tàng得tio̍h救贖。主耶穌ê降世,to̍h是上帝賜hō͘世人唯一ê機會。人ài藉chitê機會,去建立kap上帝關係;經由信心去承接上帝賜hō͘咱ê,用真實ê信仰kap主耶穌契合了後,內心ê罪惡lapsap lóng會hō͘伊洗清氣,chiah成做心肝純潔ê人。Tīchia有福了,必ē tàng看見上帝。

主所賜ê機會,完全屬於每一個人,無像當時ê猶太人所講ê諺語:「老爸食酸葡萄,連kiáⁿ兒ê嘴齒lóng感覺酸。」(以西結十八:1)teh信仰ê領域內底,每一ê人面對上帝賜予ê機會ài家己負責,bōesái父子互相影響,互相牽累。以西結十八章二十節講:「好人thebeh因為行善得tio̍h報賞;Pháiⁿ人beh因為作惡受懲罰」。Chit點基督徒應當認bat清楚。Tī教會的確mā有chit種案例,老父信仰值得oló,受人景仰,但是kiáⁿ兒soah無視上帝hō͘ in ê信仰機會。Tī舊約聖經內底以利kap撒母耳ê故事to̍h是。Chit種因為看見上帝chiah做上帝囝兒ê事實,是ài建立tī人對上帝所賜ê機會,表現tī個人ê信仰生活內底。這是做一個基督徒ài嚴肅面對,而且ài kā伊深思。信仰雖然是一個人ê問題,但是做人老父老母iáu bōesái推卸責任,自細漢就ài教育kiáⁿ兒認bat上帝,hō͘ in成做心肝純潔。俗語講:「父母不保kiáⁿ兒賢」。Tio̍h是講,tio̍h算父母ê品德kohkhah án怎koân,mā bōetàng保證每一個kiáⁿ兒lóng會像父母仝款。所以,做人父母ê千萬bē tàng疏忽kiáⁿ兒ê宗教教育。

(三) 用美好ê見證生活來回應上帝所賜予ê機會
當一個人面對上帝所賜予之機會ê時,並m̄是用伊ê身分地位或者先祖對信仰ê貢獻來回應,是用伊本身是m̄是真誠來決定。馬太福音第三章,施洗約翰對當時ê社會領導人,亦to̍h是法利賽kap撒都該人發警語就thang知影。Chiahê人有不哩仔自負,認為靠tio̍h社會kap宗教信仰ê地位,就thang優先進入上帝國。因此,約翰提出忠告,嚴厲責備。警告世人,人kap上帝ê關係m̄是決定tī外表或者傳統,是決定teh個人ê實際行為。先知以西結tī舊約聖經內底,mā特別強調這一點。

以西結強調,有信仰ê人,必須用美好ê見證去回應上帝所賜ê機會。M̄是靠外表或者世襲。先知用二種人來比喻,to̍h是義人kap惡人。上帝ài ê是態度真誠,生活上koh有美好ê見證,chiah m̄是身上hiahê稱呼。義人e所以hông叫做義人,是因為伊ê行為符合上帝ê要求,良善美好。若是義人m̄ koh做善事,盡做一kóa pháiⁿ人所做會hō͘人怨恨ê pháiⁿ tāichì,ánne伊過去所做ê善事,就無koh hông紀念,伊ài因為犯罪來死亡,以西結十八:24 chit句話有真發人省思。

人ài不斷來結出符合上帝美旨ê果子。這是咱信仰生活ê重點。先知bat用惡人做例來告誡咱,人若ē tàng真心改過完全歸向上帝,上帝就boe7ka7伊過去所犯ê過錯記leh。只要伊誠心悔改,上帝會赦免伊,bōe koh去追求伊。這to̍h是上帝ê恩典。

就提掃羅kap大衛王來講!大衛王ê手段殘忍殺害人ê翁婿,奪取部屬ê bó͘(撒母耳記下十一:12),但是掃羅是犯了無順從上帝旨意ê錯,自作主張(撒母耳記上十五章),兩者比較起來,若用現代司法量刑,應該是大衛王罪khah重,但是大衛王soah khah受tio̍h上帝悅納,原因tī 二人對上帝所賜ê機會,表現出無仝ê態度。掃羅認為家己無m̄ tio̍h;大衛王soah是誠心悔改認罪。這兩人ê故事,時常hō͘神學家提來講。上帝所喜樂ê是憂傷痛悔ê心靈(詩篇五十一:17),咱若讀詩篇五十一篇,就會明白大衛王為啥物會hō͘神喜樂ê原因,tī伊ē tàng用懺悔ê心,去回應上帝所賜hō͘伊ê機會。

咱koh來看新約時代ê保羅kap猶大。保羅對基督hō͘伊ê機會,伊會用真誠悔悟ê心去面對;但是猶大soah無。這to̍h是猶大敗亡ê原因。保羅mā因此成做基督教史上非常重要ê人物。

總講一句,tī人生ê旅途中,上帝不斷ê賜機會hō͘人,面對機會,咱ê表現可能有m̄ tio̍h,但是失敗ê時,ài有憂傷痛悔ê心靈,真誠悔改。因為上帝是無希望任何人滅亡ê。(以西結十八:13)