《台語kah魔術》

 | | | 轉寄

阿蓮果城

作者 蘇晏德 2015.12.27

阿蓮果城(台語文)~蘇晏德

阿蓮城 果子城 菝仔賣甲叫阿娘
棗仔龍眼排有名 檨仔甘甜共人唌

阿蓮城 蜜蜂城 飼蜂事業上出名
蜂蜜品質好名聲 金銀趁甲規大廳

阿蓮城 羊肉城 放山羊仔走山坪
羊肉口味真有名 發展經濟全民贏

阿蓮城 運動埕 生態園區真出名
園區內底自由行 藝術表演的大埕

阿蓮城 兵仔營 戰車雷達顧門埕
保護家園的兵營 人民安全望你成

阿蓮城 交通城 阿蓮交通迵京城
一高二高南北行 高鐵車頭結親情

阿蓮城 關懷城 主的教會有好名
兒童教育大本營 社區營造作伙行

阿蓮城 佛教城 超峰佛寺有留名
出家人的大廟埕 有閒請來阿蓮行

Alian kósiâⁿ

Aliansiâⁿ koéchísiâⁿ, Pa̍t'á bē kah kiò aniû,
Chó'á gênggéng pâi ū miâ, Soāiⁿ'á kamtiⁿ kā lâng siâⁿ.

Aliansiâⁿ bi̍tphangsiâⁿ, Chhīphang sūgia̍p siōng
chhutmiâ,
Phangbi̍t phínchit hó miâsiaⁿ, Kimgîn thàn kah
kui toāthiaⁿ.

Aliansiâⁿ iûⁿbahsiâⁿ, Pàngsoaⁿ iûⁿ'á cháu soaⁿphiâⁿ,
Iûⁿbah kháubī chin ū miâ, Hoattián kengchè choânbîn
iâⁿ.

Aliansiâⁿ ūntōngtiâⁿ, Sengthài hn̂gkhu chin chhutmiâ,
Hn̂gkhu lāité chūiû kiâⁿ, Gē su̍t piáuián ê toātiâⁿ.

Aliansiâⁿ peng'áiâⁿ,Chiànchhia luîta̍t koò mn̂gtiâⁿ,
Póhoō kahn̂g ê pengiâⁿ, Jînbîn anchoân bāng lí chhiâⁿ.

Aliansiâⁿ kauthongsiâⁿ, Alian kauthong thàng kiaⁿ
siâⁿ,
Itko jīko lâmpak kiâⁿ, Kothih chhiathâu kiat chhin
chiâⁿ.

Aliansiâⁿ koanhoâisiâⁿ, Chú ê kàuhoē ū hómiâ,
Jîtông kàuio̍k toāpúniâⁿ, Siākhu êngchō chòhoé kiâⁿ.

Aliansiâⁿ hu̍tkàusiâⁿ, Chhiauhong hu̍tsī ū lâumiâ,
Chhutkelâng ê toābiōtiâⁿ, Ū êng chhiáⁿ lâi Alian kiâⁿ.

Choktsiá：Soo Iàntek 2011.0914