《台語kah魔術》

 | | | 轉寄

元宵節0115

作者 蘇晏德 2023.02.05

元宵節(台語文) 蘇晏德

正月十五元宵節 Chiaⁿgoe̍h cha̍pgoō Goânsiaucheh
廟口搬戲人真濟 Biōkháu poaⁿhì lâng chinchē
全家備辦圓仔粞 Choânke pīpān îⁿ'áchhè
手攑鼓燈來遊街 Chhiú gia̍h kóoteng lâi iûke

正月十五是上元 Chiaⁿgoe̍h cha̍pgoō sī Siōnggoân
全家團圓真溫暖 Choânke thoânîⁿ chin unloán
大大細細來下願 Tōatōasèsè lâi hē goān
祈求上帝佑台灣 Kîkiû Siōngtè iū Tâioân

正月十五來平溪 Chiaⁿgoe̍h cha̍pgoō lâi Pêngkhe
十分老街有夠kheh Cha̍phunlāuke ūkàu kheh
下願天燈四界飛 Hē goān thianteng sìkè pe
平安喜樂元宵暝 Pêngan hílo̍k Goânsiaumê

正月十五來鹽水 Chiaⁿgoe̍h cha̍pgoō lâi Kiâmchúi
鹽水蜂炮像霆雷 Kiâmchúi phangphàu chhiūⁿ tânlûi
元宵暗暝有夠媠 Goânsiau àmmê ūkàu súi
親像大開的花蕊 Chhinchhiūⁿ tōakhui ê hoelúi