《媒合也可以尋著真愛》

 | | | 轉寄

分數chhiâu bōe好

作者 劉峯松 2011.07.03

我ê瑪麗、羅貝像考卷仝款，lóng各有一個分數，只是分數家己phah，難免會khah koân；一般父母mā會替囝兒phah分數，分數kohkhah koân。作媒人ê時，媒人會koh phah，但是分數pháiⁿphah，若phah siuⁿkoân，有人尾溜就翹起來，tùi beh牽紅線來講是真不利；若phah siuⁿ低，to̍h是死當，mā bōesái ánne做人。媒人為tio̍h thàn紅包錢，甘願低分koân phah，但是結局是媒人，講話無公信力、分數mā無公信力。

當事人án怎替家己phah分數？實際上ê分數koh是án怎算neh？講起來mā hō͘人真pháiⁿ相信。有一kóa人身材真好、面貌真好、學歷真好、khangkhòe真好、家世真好......，就kā家己phah一百分，但是可能有一項零分，to̍h會當做無看tio̍h，掩khàm起來m̄講。媒合chitchâng tāichì siōng怪奇ê to̍h是若有一項零分，to̍h算其他ê加起來滿分，á是零分，因為是用乘ê，m̄是用加ê。Tú親像有一kóa考試若是有一科零分，或者無達tio̍h高標就boâi錄取仝款。有一kóa當事人替家己phah分數，用一套算法，但是teh替phah別人分數，koh是用另外一套算法；有嘴講別人、無嘴講家己，永遠lóng是家己ê分數比人koân，ánne to̍h會有真大ê差別，siáng lóng chhâiu bōe好勢。

大家慣習用家己phah ê分數去chhiâu，結果是浪費性命，一事無成。有一個羅貝kā我講，伊tùi廿幾歲開始chhiâu，chitmá已經有歲啊，至少mā chhiâu了有五百個，分數lóng chhiâu bōe好勢，到taⁿ iáu一kho͘人liùliù。講tio̍h chhiâu幾十個、chhiâu一兩百個ê，mā是有人tī咧，真普遍。有人替家己phah分數，十年前phah一百分，十年了後á是一百分，一分lóng無減mā無降，ánne mā chhiâubē落。Siōng有趣味ê是，有一kóa羅貝竟然提一、廿年前ê相片來，有一kóa瑪麗kohkhah離譜，提二、三十年前ê，真pháiⁿ想像目chiu前ê紳士kap淑女，少年ê時竟然lóng是俊男美女；哎ah，年華消失去，實在hō͘人有夠感慨！但是in iáu意志堅定、絕對bē退讓。若是分數m̄改，是beh án怎繼續chhiâu落去neh？

這一年半來，我暝日傷腦筋，有時睏bōe去，iáu m̄是用in ê分數tàu來tàu去chhiâu bōe好勢，有夠煩。講到用我phah ê分數來tàu，mā仝款狀況百出。有一次替一位瑪麗紹介一個羅貝，事後伊怨嘆講：「老師，我ê分數kám hiahni̍h低mah？」但是另一個瑪麗soah講：「我期待對方有七八十分，soah kanta配hō͘我五六十分ê人，chiok失望！」che lóng hō͘我真pháiⁿ勢。當然mā有倒píng過來ê，一位羅貝講：「我siōng佮意到夜市食担á麵，你soah配hō͘我beh chhōa我到國賓大飯店ê人。」有講：「siuⁿsúi、siuⁿsúi啊，我承擔bōe起。」mā有真chē。我時常hō͘噴kah m̄知頭、m̄知尾，感覺真莫其妙；ánne tàu m̄ tio̍h、ánne chhiâu mā m̄ tio̍h，無法度tàu kah準。

松丘是務實派ê媒人，bōesái kanta叫苦、kanta吐大氣，總是ài替家己、替大家想一kóa對策。對家己，了後ài kohkhah細膩phah分數；對大家，就只好提供無辦法ê辦法比，如下面：

第一、hō͘家己phah khah低一點，ánne人氣指數會chhèngkoân。

第二、hō͘別人phah khahkoân一點，ánne就真chē 對象thang chhōe。

第三、chhōe比家己低ê khah緊，chhōe比家己koân ê khah慢。

第四、chhōe比家己低ê，事後發現並無低，就會真歡喜。

第五、chhōe比家己koân ê，事後發現無hiahni̍h koân，chiah知影家己算m̄ tio̍h，chit時to̍h由在伊啊，mā無hiahni̍h重要啊。

第六、發現兩人分數相當，siáng mā無佔tio̍h便宜，阿彌陀佛，sùphuè就好，千萬m̄ thang koh再tàu落去。

第七、m̄好koh tàu啊，看合目就好。

第八、chhōe命理師合八字，有合就好。

第九、媒人講ê準算。

第十、食愛情仙丹。

第十一、搏杯。

Mā可能iáu有kohkhah chē ê辦法。

尾暗á ê時，tiāⁿtiāⁿ看tio̍h雁á一隻tòe一隻列隊向南飛，假使講各人hō͘伊一個分數，siōng頭前ê一百分，最後面ê一分，除非這兩隻chìn前lóng無人、後來mā無人tòe伊之外，其實lóng是頭前jiok頭前、後面有人jiok；分數接近，soah無仝。除非願意接納了後面hit隻，無to̍h會全部落空。咱每一個人mā lóng ē tàng有一個分數，先mài講是m̄是家己phah、別人phah或者上帝phah，lóng ài照序像雁á仝款排kah真整齊；雖然jiok bōe tio̍h頭前ê人，但是越頭一看，一大堆人當辛苦teh jiok你。Chit時siōng好掠tio̍h後面ê任何一隻，然後脫離雁群、雙宿雙飛，早日結束he無目標ê走chông。若m̄是ánne，tú親像堂‧吉訶德傳所引用ê一首詩：

「我追求無可能ê tāichì，可能ê事mā就落空啊。」(Ⅰ33)

M̄ koh感謝上帝，雖然tàu來tàu去tiāⁿtiāⁿ tàu bōe好，兩年gōa來soah mā有tàu好廿幾對，koh有一百gōa對密切交往中。

本文出自玉山社出版《媒合也可以找到真愛》