《媒合也可以尋著真愛》

 | | | 轉寄

「殺手」ê怪招

作者 劉峯松 2011.10.23

因為會員增加，各種狀況mā就增加；為tio̍h beh應付各種狀況，koh ài加訂一一kóa規約。其中siōng使人好奇、siōng hō͘人煩惱ê，就是「拒絕五次無仝對象，就bōe koh提供媒合服務」一項新規定。理由已經寫tī泰瑞薩觀點「tiāⁿtiāⁿ『相親』m̄是好事」─「拒絕一pái像射出一槍，hông彈tio̍h ê人無死iah重傷。」勸人m̄ thang tiāⁿtiāⁿ做愛情「殺手」。不過「上有政策，下有對策」，á是有人「閃規定」，一直出怪招。

有一kóa會員teh「相親」了後，真tio̍h急寫email來表示意見，chit時通常用「同意」khah chē；chit種tī「第一時間」就表達好bái ê，大多數無啥物心機，性情單純可愛。

但是有一一kóa會員就無chiahni̍h單純可愛，其中有ê暗爽在心內，明明非常佮意對方，soah m̄敢或者boài先講，chit種心理若m̄是因為矜持，to̍h是刁蠻。

Mā有一種攻防心理，無願意先kā底牌掀開，橫直等伊方先出招chiah koh講。而且，先kā底牌掀開tio̍h先輸，因為事後發現雙方lóng願意「交往」，chē當然是雙方lóng歡喜；比如對方先表示「同意」底牌，另外一方soah踢tio̍h鐵枋，家己空歡喜，ánne面子m̄ tio̍h sià了了啊？「相親」雖然會有淡薄仔緊張，但是歡喜ê成分khah chē；但是「相親」了後ê回應，soah心肝頭不安，講mā m̄是，m̄講mā m̄是，非常躊躇矛盾。

有一一kóa心肝善良ê會員，當然了解拒絕人真無好，尤其kap一個好好ê紳士或者淑女，先是期待見面期間就已經擾亂家己ê生活kap情緒有一睏啊，雙方終其尾用心準備、撥工見面，至少mā講有一、兩個點鐘，雖然無來電，但是mā無啥物無好，尤其種種條件事前已經知影，事後koh證明非常bā，一旦拒絕驚siuⁿ傷人，因此非常為難。擋bē tiâu阮不斷the kā催，終其尾chiah kā「No」講kah非常pháiⁿ勢、非常細jī，若有一位羅貝會ánne講：「松丘老師，真失禮、真失禮，我真正m̄知影beh án怎？真pháiⁿ勢、真pháiⁿ勢，你kám ē tàng幫我安慰伊一下？」

將心比心，松丘當然知影其中滋味，但是mā無啥物方法thang替lín排除或者紓解chit種狀況。Siōng害ê是，有一一kóa寶貝「同意」會講，「無同意」就m̄出聲，出現一種鴕鳥ê心態。為tio̍h beh hō͘作業順利，bōe去耽擱，當然一禮拜了後就lóng看做「拒絕」，阮叫做「清理戰場」；chit時若是遇tio̍h一個「同意」，對方「拒絕」，就算五次舉黃牌警告中ê一次。

Chitê戰場變kah複雜、有難度，因為chit時出現了職業「殺手」。

有一次真無簡單chiah安排好ê「相親」中，瑪麗忽然接tio̍h一通電話，kā家己告辭；無gōa久tio̍h替chit位瑪麗koh再安排另gōa一場派對，好好ê對談中，koh接tio̍h一通手機，然後koh告辭，兩pái lóng是急kah不得了ê模樣，另gōa一頭soah留落m̄知頭m̄知尾ê可憐羅貝。Chē m̄ nā一pái，有一位羅貝mā有仝款毛病，接tio̍h手機á頭lóng m̄ oat就棄sak瑪麗，hō͘瑪麗一個人tī hitpêng。

本來第一次發生chit種妙事ê時，mā 無感覺有啥物奇怪，因為天有不測風雲，人生好bái照輪，一定會tú tio̍h料想bē到ê tāichì，就講：「無要緊，你去，我來陪伊。」但是一直teh發生，感覺無對，松丘開始研究牌局，果然發現這是怪牌、怪招，chitmá就來解牌、解招：

一、算準kap對方見面差不多15分鐘了後，串通好ê朋友khà手機á入來，若是貴方kah意對方，雙方講會落去，就mài有任何動作，繼續koh講；若是m̄ tio̍h味，teh接tio̍h手機á了後隨表現出緊張ê款，懇求因有急事一定ài隨走。

二、當對方hō͘貴方擲tī hitpêng ê時，一定非常bōe爽，絕對無同意進入「交往」階段，所以隨kā講「NO」，to̍h是表明「拒絕」ê意思；to̍h是講，貴方已經料準伊方會tâu、會無歡喜，koh會先拒絕。

三、看有佮意，講kah真投機、真歡喜，to̍h先mài講；但是無佮意、m̄ tio̍h味，就chhōe機會脫身，這mā是人間妙計中ê三十六計先soan khah緊；不過高明ê所在teh脫身了後，並無馬上kā所方講，是teh接近一禮拜期限前chiah答覆，存心hō͘他方致命ê一掌，選擇「OK」─用「願意」答覆；to̍h是beh hō͘他方bōe赴準備，貴方soah平安好勢，bōe hō͘人扣分。若是ánne繼續sńg落去，他方永遠是輸ê人，貴方贏kah穩taktak。

簡單講：「相親」ê時若是無佮意他方，就串通別人、藉機會脫身，留hō͘他方一個真pháiⁿ ê印象；他方氣kah蹔腳蹔蹄、氣tī心肝內，一時腦筋轉bōe過來，馬上掀牌講「NO」，tio̍h落入去陷阱內先失分啊；然後貴方koh算準時間，反常出牌「OK」，hō͘他方死一個khah有剩，貴方tio̍h koh贏啊。

若是松丘解牌、解招無m̄ tio̍h，這真正是本世紀siōng大ê騙局之一。堂‧吉訶德傳說：「惹人氣惱，無算the講sńg笑；得失人，恥笑就m̄值得笑。」(Ⅱ62) koh講：「hō͘ 人chhòngtī ê固然戇，chhòngtī in ê mā仝款戇。」(Ⅱ70)

不過今á日有天才phah出chit種怪牌、怪招，一定是因為泰瑞薩hit項「拒絕五次無仝對象就無koh提供媒合服務」ê規定ê驚惶kap煩惱，有驚惶、煩惱chiah有怪牌、怪招，這是求生本能，松丘mā m̄忍心kā伊責備；不過詭計已經hông拆破，千萬bē tàng koh再犯，而且以後任何人只要讀過本篇文章，詭計kám iáu ē tàng成功mah？手機kám iáu會giang mah？人生重要關鍵ê「相親」時刻，kám iáu敢m̄關機mah？

本文出自玉山社出版《媒合也可以找到真愛》