《媒合也可以尋著真愛》

 | | | 轉寄

《泰瑞薩觀點》推薦序 －好一個堂‧吉訶德

作者 翁金珠 2011.05.15

我師範畢業無gōa久、chiah二十一歲，就tī一場教師研習會上認bat峯松，koh tī伊ê甜言蜜語之下嫁hō͘伊。結婚第一年大漢to̍h出世，第二年生第二，隔七年koh生chabó͘kiáⁿ。當年ê我ē sái講是一位單純到有剩ê小學老師，講嫁to̍h嫁、講生to̍h生，lóng無啥物反抗；這to̍h是chabó͘人 ê命、家己ê選擇，當然mā相信一生thang平平淡淡、安安穩穩中度過。

　　但是，che真正hō͘人非常tio̍h驚，結婚三年了後，無啥物社會地位、無啥物錢koh生做普通ê伊，竟然登記參選員林鎮長，koh ài我做伊唯一ê助選員。Teh戒嚴時期高壓統治之下，我做警察ê take知影了後驚一tiô，koh氣kah不得了，mā對我非常無諒解，認為我無管好伊，甚至認定阮是共謀，所以ài我阻止伊參選，若無to̍hbeh趕我出門，但是to̍h真正無人有法度阻擋伊ah！

Tùi'ánni了後，有選舉伊就「上場」，一直到一九八〇年參加國大代表選舉，隔年以「煽動內亂罪」ê罪名hông判刑三年半，chiah來退出政壇。Chit時我除了照顧三個囝兒以外，iáu tio̍h走土城看守所，走完了koh再走龜山監獄，to̍h ánne繼續kúinā年ta̍k禮拜去探監一次，嫁chit種先生，真正有夠「歹命」。

峯松坐監ê時，有人弄慫我「代夫出征」，結果一出征，到taⁿ已經二十六年，「上場」ê次數竟然加伊kúinā倍。我選過省議員兩pái、國大代表一次、區域立法委員三次、縣長四次、無分區立委一次，總共十一次，可能是台灣自治史上siōng「猛」ê一個chabó͘ mā無一定。我自小學老師到國中老師，tùi國大代表到立法委員，甚至做過一屆縣長，但是chitpái捲土重來、勝負未卜，大半世人lóng teh選舉中度過，我chit種婦人家，m̄ nā「歹命」，而且「歹命」kah有淡薄仔離奇離譜。

　　二〇〇五年我競選彰化縣長連任失敗，一時間失去政治舞台，伊koh kā我chhōa入另外一個新境界。阮khêng好一筆錢，tī故鄉員林經營一間「賽凡提斯咖啡」，phah算to̍h ánne來離開政治，好好á共度餘生。伊自創西班牙海產飯，beh提供世界上siōng好ê佳餚；阮chabó͘kiáⁿ到台北後車頭向楊海銓老師學煮咖啡，beh煮世界上siōng好ê咖啡；á我to̍h專做捧咖啡、上菜ê「走堂」，一時成做大新聞，聽講有人知影我chit種下場竟然the流目屎。

　　「一門關，一門開」，後來出現一個轉機，我接任文建會主任委員，koh成了無分區立委，暫時結束「走堂」ê生涯。

　　我離開「賽凡提斯咖啡」了後，hit間店就轉型做「泰瑞薩婚姻紹介所」，伊竟然做起「媒人公」。伊beh做chit款tāichì時lóng無kap我參詳，tī員林鎮分幾萬份傳單了後chiah kā我講。Tùi我來講是真意外，非常唐突，這一次我koh gāng去啊！

　　我本來是一個無煩無惱ê小學老師，退休了後iáu thang享有十八趴，不幸嫁hō͘伊，行上政治chit條不歸路，ánne to̍h chúntú煞；to̍h算是做「走堂」，捧咖啡、上菜lóng iáu ē sái，但是ài我做「媒人公」ê bó͘，或者了後ài接伊ê手來做「媒人婆」，我是無願意。

　　峯松tehbeh七十歲啊，北、中、南lóng有伊媒合ê據點，伊時常揹tio̍h一個大背包南北奔波，聽講chitmá已經有二千gōa個「羅貝」、「瑪麗」chhōe伊，mā真正有人結婚，阮tau新娘餅食bōe完。這兩年gōa來，有時電視採訪，有時報紙會刊，有時雜誌tàu鬧熱，有時koh有電台廣播，峯松已經變成婚介名人，伊ê「泰瑞薩婚姻紹介所」，信譽真好，名聲遠播，甚至傳到美洲、歐洲、南洋、東瀛、華夏……，iáu koh teh傳播中。

　　Mā真正有ùi四面八方一直來chhōe伊，包括醫生、教授、老師、企業家、律師、司法官、建築師……，甚至iáu有電視主播、空中小姐、飛機駕駛員kap海陸軍官兵，講到鰥寡、孤獨、廢疾者，mā是照常接受，無任何分別。

　　天ah，「你ná有啥物飛天ê本事？你kám會kham？ánne kám真正ē sái mah？」我lóng替伊teh流凊汗。看伊騎虎難下，有時暗時péng來péng去，睏bōe去、睏bōe好勢！

　　有一工暗時，我發覺伊m̄ nā睏去啊，iáu睏kah真熟真甜，我畫筆一提，就kā伊畫落來。隔轉工，我問伊：「昨晚你睏kah有夠熟有夠甜，就幫你畫落來留一個紀念，但是你kám ē tàng kā我講做啥物好夢mah？」伊看我ê圖有一khùn，chiah笑瞇瞇講：「聽tio̍h會員結婚，就好夢連連，夢見羅貝抱tio̍h瑪麗睏，á我mā抱tio̍h我ê杜爾內西婭睏。」這準是烏白講，我to̍h kā伊chheⁿ，但是無清楚siáng是「杜爾內西婭」，有淡薄á疑騃。

　　媒合可能真困難，mā可能像桌頂ni柑hiah簡單，像我或者像真chē人仝款，講結婚就結婚，nah有啥物問題neh？但是結婚實在是一件大tāichì，而且的確ài冒真大ê風險，我to̍h是一個活活ê例。我若無嫁chitê狂熱份子，一生平平安安、歡喜kah不得了，早to̍h已經退休the io孫啊，四界遊山oansúi去啊，to̍h m̄免ánne四界走chông奔波、受苦受難；m̄ koh峯松soah講：「你若無嫁我，妳ê一生就無hiahni̍h chhiáⁿiāⁿ。」ánne講ê mā對，koh hō͘我有淡薄á矛盾。

　　我無jōa bat堂‧吉訶德ê故事，但是我先生應該是一個地道ê現代堂‧吉訶德騎士。伊tùi少年ê時就出面挑戰bōe公不義ê政權，雖然時常戰敗、輸kah kúi面全土，soah無放棄，繼續向前衝；chitmá koh kâⁿ tio̍h堂‧吉訶德ê餘威，帶tio̍h一群羅貝、瑪麗向前衝，衝！衝！衝！beh完成「無可能ê任務」；坦白講，一直到今á日我lóng m̄敢講lín lóng無贏面哩！

　　家己從事政治khangkhè實在夠無閒啊，雖然知影伊寫一大堆文章，但是lóng無時間看，只是時常一再苦勸伊、懇求伊：「政治人無lín hit款美國時間，只要咱互相相安無事to̍h好。千萬bē tàng惹事、hō͘人講閒á話oh，而且你寫文章kohkhah萬萬bē tang3ka7咱之間ê私事牽入去，好boh？拜託、拜託。」阮本來約法三章，chitmá伊ê冊hō͘玉山社出版啊，內面就算講tio̍h我，mā無辦法。Lóng已經慣習啊；真正是好一個堂‧吉訶德！

本文出自玉山社出版《媒合也可以找到真愛》