《胡文池牧師kap布農族》

 | | | 轉寄

偉大ê山地人－亞伯蘭

作者 胡文池 2009.11.01

講tī一九八六年玉山神學院畢業典禮
創世記十二章１－9節
今á日早起ê題目就是「偉大ê山地人亞伯蘭。」亞伯蘭是離開咱現在大約有兩千多年時代ê人物，但是上帝特別愛伊，因為伊是一個非常有信仰並且真善良ê人。所以上帝就有了藉tio̍h伊beh來拯救全世界人ê計畫，因此上帝就kā伊ê姓名tùi亞伯蘭改為亞伯拉罕。亞伯蘭chitê姓名原來ê意思是「高大」，但是亞伯拉罕chitê姓名ê意思就是「萬民之父」;上帝beh將伊以前hit種高大、高傲ê心情除去，hō͘伊成做萬民之父。不管是tùi回教、猶太教或基督教ê觀點來看，每一個宗教lóng稱亞伯拉罕為in ê信仰之父，伊mā是以色列人ê父。以色列民族被全世界ê人尊敬為非常富有，並且是siōng有知識ê一個民族。伊是一個非常偉大ê人。但是伊雖然chiahni̍h偉大，真chē ê人lóng m̄ bat伊為一位山地人，因為伊離開自已ê故鄉哈蘭到所khiā起ê地－山地並tī he個地方khiā起一百年之久。人家雖然自稱家己為山地人，但是我相信無一個人tī山地tòa過一百年pah!但是亞伯拉罕tòatī山地超過一百年，所以伊比大家kohkhah山地人。

到底伊ê偉大tī叨?
第一，伊相信上帝ê話。亞伯拉罕本來tòatī迦勒底ê吾珥，chitê所在tī古代是貿易ê中心點。Tùi醫學、藝術、商業來講lóng比其他地方iáubeh發達，所以tòatī chitê地區ê人，lóng充滿了一種歡樂kap高度物質享受ê生活。但是非常可惜ê就是chitê地區mā就是偶像崇拜ê中心地。上帝為tio̍h beh賜hō͘亞伯拉罕重大ê使命，所以就託付了一個艱鉅ê工作，伊kā亞伯拉罕講:「你tio̍h離開你ê本地」。對tī一個人來講，tio̍h離開本地是一件非常痛苦ê tāichì，咱tòa慣了ê所在就是siōng好ê所在。Ē tàng kap家己ê親戚眾朋友tòa作伙是siōng自然siōng快樂ê事。要離開家己ê本地本鄉，離開chiahê人tio̍h往伊所m̄ bat ê所在去，是一件非常艱苦ê tāichì。這是一件犧牲，mā是冒險。但是亞伯拉罕突破了chiahê困難，伊前往上帝所指定ê所在，這是伊偉大ê信心。M̄ koh無論伊到什麼地方去，甚至進入來了迦南之地ê山區，伊絕無bē記得建立祭壇來敬拜上帝，並且mā獻上伊十分之一hō͘上帝。

第二、咱來看亞伯拉罕ê愛心。咱知影伊帶tio̍h伊家己ê姪兒羅得kap伊同行，羅得是已經失去了父親ê孤兒，所以亞伯拉罕疼愛羅得kahná家己ê gín'á一般。In兩個lóng是牧人。

為tio̍h beh爭取餵羊ê草地，in ê僕人bat起爭論，亞伯拉罕無因為伊是一位長者，所以認為有權利先選擇好ê七地。伊反tńg hō͘家己ê姪兒羅得優先去選擇好ê土地，卻寧願家己選擇比較無好ê山區。但是亞伯拉罕無因此á怨恨家己ê姪兒。

咱知影有一pái敵人來攻phah平地羅得所khiā起ê所在，攻佔了所多瑪城並且kā羅得kap in所有ê人俘擄了。亞伯拉罕無記恨以前所發生ê hit件事情，煞帶了一二百十八位屬tī伊家己ê人來解救羅得。咱mā知影亞伯拉罕是一位真會善待人客ê人，所以咱看tio̍h伊bat接待過大使。當亞伯拉罕知影上帝boeh毀滅所多瑪kap俄摩拉城ê時chūn，伊bat為chitê城祈禱六次。

第三、咱知影亞伯拉罕疼愛上帝所賜hō͘伊ê山地。當伊進入來迦南ê時chūn，tāi先入去ê所在就是示劍，其次就是伯特利，最後chiah到希伯崙。伊一面到死lóng tòatī希伯崙chitê所在。Chiahê地區lóng是屬tī山地，m̄ nā是伊自已，連伊自已ê kiáⁿ兒、孫á mā lóng tòatī chitê地方。

為什麼講山地真好neh?有真chē人看bē起山地，但是真聰明ê詩人bat講過chit種ê話，「上帝創造了山，魔鬼卻創造了都市。」我相信chit句話是對ê。tāi先tī山地內面咱看tio̍h真chē美好ê事，但tī平地裡卻充滿了真chē ê罪惡。咱知影聖經裡面，咱所看tio̍h ê第一個都市是「巴別」，in lóng是高傲ê人民，現在tòatī都市ê人lóng是屬tī chit種類ê人。

咱山地ê交通無啥好，所以大家lóng認為山地跟不上平地文明ê流行。In lóng認為山地人lóng無學問，但是我認為人無論到什麼地方去，只要有上帝ê恩惠，伊就是好人，巴別chitê地方ê人有技術、有知識，所以in ē tàng建築真高ê塔。我相信巴別塔無論起ê多高，mā不比現在紐約ê摩天樓kohkhah高。但是如果紐約ê摩天樓boeh kap上帝所創造ê喜瑪拉雅山脈比較，根本就比bē起。大自然tùi ánne是上帝所創造ê偉大ê傑作，咱一到山地就ē tàng看tio̍h。咱若到都市去，所看tio̍h ê椅子mā好、桌á mā好或是水泥房lóng是人所造ê。看起來mā可能真súi。但是上帝所創造ê山、野地ê花，lóng tio̍h比人所造ê物件iáu卡好。人造花雖然是非常好、非常貴， 但是比bē起hiahê自然ê花。Hiahê敬畏上帝ê人，會tùi上帝得tio̍h知識(箴言一：7)。現在ê以色列人boeh比世界其他ê人有kohkhah高ê知識，tùi亞伯拉罕崇拜耶和華上帝以來，這是上帝所賜hō͘ in ê。

其次咱看tio̍h都市是真chē人聚集ê所在，因此都市ê生存競爭非常利害，為tio̍h生活、為tio̍h生存會發生真chē無好ê事。當chhōe們看tio̍h所多瑪、俄摩拉ê記事時，咱就會知影chiahê罪惡。我相信上帝將亞伯拉罕tùi平地移居到山地ê一個目的，就是beh hō͘伊離開平地ê罪惡，á不被平地ê罪惡所污染。所認為了宗教kap道德上ê理由，上帝hō͘亞伯拉罕tùi平地移居到山地。Tī加拉太冊三：7有chit種ê一句話:「有了信ê人就亞伯拉罕ê真子孫」。所以，咱每一個人lóng ē tàng kā伊稱做亞伯拉罕ê真子孫。因此咱lóng tio̍h向chit一位偉大ê信仰前輩學習，學習伊非常熱心敬拜上帝ê信仰。只有有信仰ê人才ē tàng蒙上帝ê祝福。

今á日臺灣ê原住民到底tùi什麼地方來到臺灣，iáu有真chē無仝ê學說。M̄ koh tī使徒行傳十七章26節講:「上帝創造人並且hō͘ in散居tī kuiê地球上。」因此咱ē tàng講所有ê歷史lóng tī上帝ê手中。我相信上帝是為tio̍h beh祝福真chē ê人，所以boeh hō͘各位tòatī山地，然後boeh藉tio̍h lín來祝福別人。Lín iáu無信基督教chìn前，lín ê祖先lóng知影上帝。Lín tī食飯前iáu是會謝飯ê，雖然lín m̄知影耶和華上帝ê名稱，但是tī lín ê心內面lóng知影有一位上帝，上帝賞賜chiahê美好ê食物hō͘咱。

我mā看tio̍h tī山地裡面tī信仰上有真chē美好ê事蹟。我發現在山地內底無poa̍hkiáu chitê現象是siōng大ê特色，tī道德上是一個非常優良ê所在。如果咱tī平地和平地人tòa作伙，mā可能咱mā學會曉poa̍hkiáu、殺人等屬tī都市裡面ê罪惡。

當然tī山地mā有真chē ê問題，有ê人講山地真sànchhiah，ē sái講是三十幾年前我tī山地傳道ê時chūn，無一個人對我講in是sànchhiah ê，因為in lóng過tio̍h仝款ê生活。In tī仝款ê田地裡工作，in食仝款ê小米或玉蜀黍。所以我無聽過in講，阮是sànchhiah ê。In bat對hiahê比較有財富ê人講:「lín真富有，因為lín ê小米真chē。」

雖然現在真chē人講山地sànchhiah，但是現在山地人ê生活比以前ê生活boeh好十倍。儘管咱已經比以前富有了，但是tī心理上咱煞認為家己是sànchhiah ê，這是因為互相比較chiah會有chit種ê心理。因為咱kap平地人比較，咱認為咱比in無錢，所以造成自卑ê心理。平地人蓋了水泥房，咱就感覺山地ê茅屋無好。但是你聽聽hiahê tòatī臺北水泥房裡面ê人講:「Ah!chitê水泥房無好，太燒熱了！ 」因此in m̄ nā是用電扇，iáu用冷氣機iáu感覺無夠涼爽neh!如果咱boeh學習平地chit種ê生活，咱就需要kohkhah chē ê金錢。

但山地有真chē ê樹木，所以氣候真涼快。為什麼咱又ài特別去蓋hit種水泥房neh？這是m̄是為tio̍h咱家己ê面子á蓋ánne好ê厝?咱看tio̍h邊á ê人己經蓋了水泥房，á咱iáu無水泥房，所以就賣chabó͘kiáⁿ來蓋水泥房。因此tī山地內底咱看tio̍h有真chē美麗ê厝，但是hitê代價是一個koh一個美麗ê小姐流落到都市裡面去。我常常感覺山地ê小姐boeh比平地ê小姐美麗多了，m̄ nā小姐，連男人也tio̍h比平地ê男人iântâu。Siōng大ê特點就是tī lín ê鼻á，鼻á高ê，tī日本人ê觀點是非常優秀ê，伊m̄ nā是美麗，mā表示聰明。

為什麼有人會認為山地tio̍h比平地落伍neh?因為山地人tùi古就一直teh lim酒，lim了以後就倒tī路邊。咱從來無好好á用過咱ê頭腦，若咱一直m̄用咱ê頭腦，chitê頭腦就會一直退化落去。我tī中學時代常常歡喜phah網球，因此我ê正手boeh比倒手ióng，當你使用伊ê時chūn就會生khah ióng。Lim酒hō͘山地人ê頭腦成做愚笨ê頭腦，為tio̍h lim酒mā用了真chē ê金錢，因此無錢koh再hō͘ in ê眾細kiáⁿ教育。In一有錢就買酒來lim，一lim酒就顛顛倒倒。伊mā m̄知影字是怎樣寫ê，寫什麼款ê內容，就隨便the̍h家己ê印á蓋了，結果連伊家己ê gín'á、厝lóng賣出去了。因此就發生了真chē ê問題。

但是我相信，咱ē tàng藉tio̍h信仰來解決chiahê問題。咱如果像亞伯拉罕仝款完全服從上帝，來遵守上帝ê命令，有chit種信心，咱ê生活就得tio̍h上帝ê祝福，mā得tio̍h改善。但如果boeh以現在ê潮流大家kā家己ê chabó͘kiáⁿ賣出去ê話，山地ê男青年就chhōe bē tio̍h家己ê太太，將來山地mā bōe koh再有子孫留tī山地，ánne山地就會消失了。聽講現在約有八萬名ê山地同胞tī都市內底，雖然chiahê人是為tio̍h beh thàn錢chiah到都市，但是我知影in所過ê生活lóng非常辛苦。真chē人成立一個團體到都市包工從事建築，in做完了工，老板煞已經走了。像chit種ê情形發生真chē。

我相信上帝hō͘ lín ê山地，就是上帝賜hō͘ lín ê迦南地。Lín必須tio̍h真重視，好好á ê愛惜上帝所hō͘ lín ê山地。tio̍h知影tòatī臺北ê人只有hiahê真有錢ê人才ē tàng kā in ê厝建tī山頂。有真chē ê人無錢ē tàng買厝，所以只ē tàng sòe厝，每一個月付房租只為tio̍h boeh tòatī臺北。但是lín每一個人lóng有家己ê厝，如果咱好好á發展上帝所hō͘咱ê知識， ánne咱ē tàng改進山地，以後有真chē ê人ē tàng tòatī山地。

比如來講，以前ê人in無知識使用肥料來務農，因chitê田地ê收成boeh比一般人差一半。Tī chia ê學生除了研究神學以外，mā學會曉了農業知識。如果咱ē tàng kā tī chia所學習ê知識運用到山地，我相信必定ē tàng提高山地內底ê生活。咱知影梨山出產真chē好ê果子，我相信tī臺灣ê山地有真chē所在ē tàng種ánne好ê果子。我mā知影南投信義鄉有真chē山地種高山菜蔬，然了後賣到臺北市。有人tī山地飼養山羊，in賣山羊ê奶，來改進健康。我iáu知影台東利稻hitê地區種了bē少高山菜蔬。總來講之，咱必須善用上帝所賜hō͘咱ê山地。咱mā beh為ē tàng tòatī山地á感謝上帝!

願上帝kohkhah賜福每一位畢業生，好好á學習偉大ê山地人亞伯拉罕，有信心、有愛心ê為山地ê一切獻上心力!