《趁iau2日時》

 | | | 轉寄

相攬真情

作者 林俊育 2008.08.03

五月十四日母親節，雙連教會舉辦“相攬真情音樂會”，由台裔德籍ê音樂家韓義明 ( DANIEL HEINRICH )kap伊ê德籍未婚妻依芙蘭 ( FRANZISKA EBER ) kap西羅亞盲人合唱團共同演出，身為籌辦ê我有無限ê感觸。

「真情難得，難得真情。」是現實社會siōng好ê寫照，尤其是物慾縱橫、人心不古ê工商社會，人人tī各自ê心坎頂築起高高ê牆，對牆外ê弱勢團体鄰居視若無睹，真理之神ê愛tī人心中kahná已秉燭難求，如海底撈針一般難了。

無怪乎現代人常埋怨講，聖經裏記載hiahni̍h chē耶穌行神蹟ê故事，如今怎樣lóng看bē tio̍h神蹟？現代真chē人沉溺tī物質ê追求，心中已容納不了「真理、生命、道路」ê真神耶穌基督，boeh看tio̍h或tú tio̍h神蹟當然比駱駝穿針iáu難。

M̄ koh，韓義明ê故事證明現代iáu是有神蹟，只要心中有真神耶穌基督ê存在，以行動表現出真情，那真情所在ê所在就一定有神蹟。神透過韓義明ê養父母kap未婚妻，彰顯神ê大能，mā就是大家所渴求ê神蹟。

人所遺棄ê，神揀選伊。二十七年前出生就無眼球而被生母拋棄tī義光育幼院ê韓義明，由當時德國惠明盲人基金會派來台中輔導惠明盲校ê韓牧師夫婦 ( CHRISTIAN & BRUNHILDE HEINRICH ) 領養，並帶tńg來德國苦心教養。二年前韓義明tùi Herford音樂學院畢業後，養父母就帶伊tńg來台灣尋根，並應邀tī國家音樂演奏廳演出小提琴、鋼琴kap管風琴。Che應驗了約翰福音第九章第三節，耶穌回答門徒講：「伊瞎眼kap伊家己或伊父母ê罪lóng無關係，而是beh tī伊身上彰顯上帝ê能力。」韓義明有今á日ê成就，m̄是真明顯ê神蹟mah？

二年前tī雙連教會舉辦ê「愛hō͘咱聚集做一伙」ê音樂見證會，由韓義明kap西羅亞盲人合唱團聯合演出，韓義明ê養母kap伊本身ê見證，流露出神ê大愛所產生ê真情，感動真chē現場觀眾目屎流落來。

今年應視障音樂基金會邀請來台做「關懷視障慈善音樂會」巡迴演出ê韓義明，由伊ê未婚妻伴行。韓義明二年前受西羅亞盲人合唱團ê感動而決定學聲樂，tńg去德國後就籌組四重唱，伊唱男低音，無久就kap唱女高音ê依芙蘭同譜戀曲，進一步koh訂婚。

接受大眾傳播訪問時，伊常被問道：「你生做chiahni̍h súi，身裁mā比韓義明高出半個頭，歌koh唱得chiahni̍h好，什麼力量促成hō͘你決定kap伊訂定終身大事？」依芙蘭lóng是面帶微微á笑lóng無做作地回答講：「韓義明kap一般人無什麼無仝款，阮有真chē仝款ê所在，真談得來，對未來有美好ê規畫，願神帶領阮。」

有ê人問伊父母是m̄是反對，伊講：「我ê父母tī未正式認bat kap了解韓義明chìn前，當然反對我kap一個盲人結婚。M̄ koh，in知影韓義明是一個有教養ê乖gín'á，koh tī音樂上有超過常人ê造詣，反對就變成認同kap接納。但是，我母親iáu是擔心我tī生活上會為照顧一個失明ê人而kohkhah辛勞。Ē sái講是韓義明是一個真獨立ê大男人，目前一個人tī伊服務ê教會附近租屋，無憂無慮地獨居生活，所以我不掛慮chit件事。阮真情ê相愛，tī神ê帶領下，一定有美滿ê生活。

五月十六日到高雄“關懷視障慈善音樂會”演出時，阮一落飛機就先去探訪陳博文牧師，伊是視障音樂基金會ê發起人之一，基金會成立了後就被聘為顧問，伊雖然破病tī眠床，iáu時時刻刻關心阮，支持阮ê事工計畫。伊一再叮嚀我boeh繼續推動“百萬殘障福音佈道巡迴演唱”，安排西羅亞盲人合唱團kap高雄手語教會詩班共同演出，由身体殘障者tùi心靈唱出福音歌曲，來拯救hiahê心靈殘障ê靈魂。陳牧師ê每句話，深深刻tī我ê心中，願神賜我有智慧kap力量來追隨陳牧師ê“殘障福音”腳步。

認bat陳牧師了後，我就對hit位推動“輪椅牧師”四界宣講“殘障福音”ê陳牧師娘林秀卿女士敬佩無停，tī神ê恩典裏相攬真情真愛。看了“跨越藩籬──陳博文牧師光kap鹽ê見證”了後，我感動得禁bē tiâu目屎流落來，he是陳牧師娘ê“相攬真情”hō͘我流目屎。伊欣然接納陳牧師ê肢障而kap伊廝守終生，m̄ nā照顧差不多bē tàng動 ê陳牧師生活起居，教養二個chabó͘kiáⁿ，iáu推動“輪椅牧師”，tī四界lóng是障礙ê台灣環境中，以愛化解礙，m̄驚辛苦為“殘障福音”而奔忙，hō͘咱chiahê身体健全ê人感覺慚愧無停。

Tùi以上親身接觸tio̍h ê“相攬真情”，我深深体會到只有神ê恩典kap愛chiah ē tàng產生chit股真情，mā只有相攬真情chiah ē tàng實踐神ê愛。願神是愛ê福音ē tàng hō͘每一個人tī家己扮演ê角色上相攬真情，神ê國度早日來到咱人間。

﹝台灣教會公報2259期1995.6.18﹞