《趁iau2日時》

 | | | 轉寄

教會kap盲人事工

作者 林俊育 2008.04.20

前言
「新ê誡命」chitmá太福音二十二章39節：「你tio̍h愛鄰人，如愛家己」，這是基督徒lóng熟練ê經節，但真少人ē tàng以行動表現出來，kohkhah m̄知影聖經上所講ê「鄰人」就是tī咱周邊siōng需要關懷kap幫助ê弱勢團體 ，而盲人又koh是弱勢中ê弱勢。若用眼罩蓋tòa目睭去生活一工，你一定會體會出；kohkhah àn怎to看bē tio̍h世界ê盲人是何等需要關懷kap鼓勵ê「鄰人」。

約翰福音第九章中耶穌講：青瞑ê m̄是伊或伊ê父母有罪，卻是上帝ài tī伊ê身上顯明伊ê作為。視障朋友雖然肉眼看bē tio̍h，心靈ê目睭卻是明亮ê，其他ê潛能kohkhah是豐富，只要咱伸出關懷kap鼓勵ê手，in ê成就bē輸hō͘明眼人，tī某一kóa方面kohkhah贏一坎，海倫凱勒kap雙連教會西羅亞合唱團便是真好ê例。


台灣教會盲人事工ê發軔
1991年底，我有機會到賴永祥長老府上作客，伊將伊ê著作「教會史話」hō͘我看。我掀開一看，tú好是第211頁ê「盲人事工ê發軔」，當時正為雙連教會盲朋友聯誼會忙得bē tàng開交ê我，有一種怎樣ánne湊巧ê感覺。Chit段有關台灣長老教會盲人事工ê記事，hō͘我真大ê鼓勵。

聖經tùi舊約開始就有關於盲人ê記載，新約kohkhah有耶穌醫好chheⁿmê ê神 蹟。台灣盲人教育ê開拓者是英國長老教會宣教師甘為霖牧師 (Rev. William Campbell)，大約tī一八八二年to̍h開始，據伊估計當時台灣kap閩南地區，大約有二萬五千個盲人，其中台灣就有一萬七千人。甘牧師十分同情盲人，伊認為教育thang改善in ê悲慘處境，所以，決心致力tī盲人教育事工。伊大約tī一八八五年就準備好廈門音羅馬字淨凸活字，但beh製作一本聖經需六十二本巨冊，成本mā真高。後來；伊改用波金斯點 字(Perkins Braille)，祇需四十九冊，而費用折半。Tùi傳教ê觀點來講，有盲人用冊to̍h是thang啟開盲人接近福音書而進得救之門，對盲人ê福祉來講，消除文盲，知識之門mā開了。

甘為霖牧師tī一八八九年開始展開創設盲校ê事工，tī府城(台南)洪公祠設立訓瞽堂盲校，這是台灣盲人特殊教育ê先驅，mā啟開台灣基督長老教會ê盲人事工。


雙連教會ê盲人事工
雙連教會tī 1988年成立超教會ê盲朋友聯誼會。Tī未成立ê當時，我任服務委員會主委，看tio̍h主日崇拜中有二､三位盲朋友獨來獨往，只有真少數ê會友kap in phah招呼，我感覺十分gônggia̍h。據陳溪圳牧講，tī雙連老教堂ê時期，每周有二､三十位盲朋友來參加禮拜，為何教會改建十一層大樓後，hiahê盲朋友漸漸離開了雙連教會?

當時服務委員會大多做些對會友ê服務，其實會友來教會lóng想服事別人，何需服務委員會來服務neh?我tī一pái清早整理庭院獨處時，kahná有tùi天起來ê信息kā我講 應該tùi服務目前教會內ê盲人會友開始，幫in籌組盲朋友聯誼會，hō͘ in選出幹部來計畫in家己喜愛ê活動，由服務委員會發動會友來接觸in､關懷in､幫助in，共同為弱勢團體創造一個公平ê無障礙環境。有了chitê構想，服務委員會就開始同卓忠輝牧師kap教會幹事主任蔡芳文長老去探訪常來教會ê盲朋友，koh再由in紹介或同齊去探訪kohkhah chē ê盲朋友，tùi探訪中知影in來過雙連教會，但每pái坐上椅子；就發現原來坐tī同條椅á頂ê會友；馬上離開到別條ê椅子去坐，禮拜完後，mā無會友向in phah招呼，in感覺雙連教會一年四季lóng真冷。我詢問in有關籌組盲朋友聯誼會ê意見，一拍to̍h是合，真緊to̍h進行籌備並訂定章程､選舉幹部､正式成立聯誼會。

服務委員會向長執會提案得tio̍h多數通過，第一pái舉辦陽明山郊遊，一百gōa位盲朋友kap三十幾位義工參加，大家lóng感覺真有意義。盲朋友慶祝聖誕節大會kohkhah有四百gōa人參加，in家己安排節目；家己表演，熱鬧滾滾，為in服務ê義工無不感動萬分。尤其是一kóa kah意唱歌ê盲朋友自組一個合唱團，受tio̍h全體會友ê肯定，這是西羅亞合唱團ê開始。

西羅亞合唱團tī李鳳珠老師認真而有耐心ê指導下，每位團員kohkhah無辭in夜間按摩工作ê辛勞，每禮拜一kap禮拜五；上午十點到十二點lóng到教會來練歌，in tī教會獻詩，mā應邀到各地教會詩歌見證kap學校或機關團體去演唱。In事奉主ê熱情kohkhah hō͘ in tī一九九一年起成做詩歌佈道團，達到以「西羅亞」 (奉差遣) 為團名ê使命。

盲朋友聯誼會mā家己成立查經班，集合各教派ê基督徒，每週六上午十點到十二點聚會，平均lóng有二十幾人參加。Iáu有每二週一pái ê家庭小組聚會；mā lóng有二、三十人參加。每週ê主日崇拜mā tùi二、三人增加到一、二十人，in追求信仰ê熱心，會hō͘真chē明眼人感覺慚愧，我個人mā tùi in中間學tio̍h真chē。

期待
Tùi雙連教會盲人事工ê例ē tàng看出，教會ē tàng，mā應該扮演關懷盲人ê先驅者角色，進一步koh關懷其他殘障人士，來實踐上帝ê愛。

雙連教會盲朋友聯誼會有一個目標，希望邀請有所感動ê教會，tī其所在地區籌組盲朋友聯誼會，鼓舞全體會友來關懷盲人事工。一九九○年ê聖誕節，台中市美村教會 (盲人石賢哲牧師) tī chit種模式下成立盲朋友聯誼會。今年八月，新竹教會邀請西羅亞詩班舉行佈道會，以盲人為主要對象，效果真好，牧師長執mā講beh發動夫婦團契來關懷盲人事工。

西羅亞詩班計畫今年kap伊甸殘障福音中心，共同舉辦全島六場以百萬殘障人士為主要對象ê福音佈道大會，配合二○○○年福音運動，透過各地教會ê協辦來宣導對殘障人士ê福音關懷，希望也ē tàng喚起全島ê教會來關心殘障福利事工，秉tio̍h「上帝是愛」ê崇高信仰，hō͘阮/咱同齊來為主作好ê見證，榮神益人。

﹝台灣教會公報 2136 期，1993.2.7﹞