《趁iau2日時》

 | | | 轉寄

趁 iáu日時

作者 林俊育 2008.06.01

路加福音十三章8~9節：Hitê園丁應伊講，主ah,今年請koh容允伊；thèng候我四圍掘鬆èng肥；後來若結果子，就好；若無，你chiah kā伊chhò起來。

我一生成長ê過程算是平坦koh無大波折，自細漢學到大學lóng保送直升，從來m̄ bat tam過聯考ê苦楚，預備軍官役結束後ê就業mā真順利，成家mā順家己意願kap基督徒結婚來成做基督徒。Chit時，我chiah會曉感謝神ê恩典，tùi ánne繼續追求基督教ê信仰，mā hō͘我體會tio̍h耶穌講：「我是真理、道路kap生命。」ê基督教要義。

結婚了後，tùi待遇bē bái ê日本商社離職，kap新婚ê太太共同創業，從事出口貿易，業績年年成長，thàn錢了後to̍h買車、買厝，jú買jú大，tī同輩中算是真難得ê。婚後二年ê聖誕節，mā是訂婚二週年紀念日，太太生寶貝chabó͘kiáⁿ，號名「佳恩」，to̍h是「聖誕佳節ê恩賜」。Chabó͘kiáⁿ可愛、乖巧，以後學校成績名列頭前，阮夫妻常常掠做驕傲。

鬆土kap施肥
Tī教會受洗一年了後，我就被選做執事，參與教會內事工，無閒kah額頭kho̍k壁，聚會ê時mā有時á見證講：「感謝神，賜我美滿ê家庭kap順利ê事業，koh有機會tī教會服事。」Chitmá想起當時會講chit種話，實在hō͘我面紅，其實當時心存驕傲，講話大聲，目中無人，尤其是對待公司員工ê高傲態度，有辱基督徒之名。講tio̍h教會服事mā只不過是參與聚會、主日崇拜收奉獻，kap參加教會ê幼稚園kap大樓出租ê事業經營。教會事業經營是thàn了bē少錢，但無結聖靈ê果子，反tńg成做傳福音ê障礙，對神ê恩賜實在是真見笑。

Chit種無結果子ê樹早to̍h應該hông chhò掉，但神tī公義ê審判chìn前iáu有慈悲kap恩典，ná親像路加福音十三章8~9節中，園丁向園主為hit叢三年無結果子ê樹求情，koh再hō͘伊一年機會，神知影信仰追求ê成長kap樹仝款是慢慢長大ê。咱每一個人lóng kap經文中ê hit叢樹á ê條件仝款，無法度kanta靠家己結果子， ài周圍環境ê幫忙，神安排有人挖鬆咱周圍ê土，iáu koh加上肥料。 當時做hip相機貿易出口ē tàng thàn錢，但感覺家己開工廠生產thang thàn kohkhah chē錢，tùi ánne貿然投資生產hip相機ê工廠。家己技術外行，聘請工廠經理koh用m̄ tio̍h人，一年落來負債累累，差不多boeh破產，佳哉來得及kā工廠叫停，m̄ koh四界欠債ài每工走三點半。有一位教會長老知影我ê情況了後，隨時由長老娘陪我到銀行用伊戶頭ê錢處理掉一kóa緊急ê大金額票據，hō͘我渡過難關。我一再感謝伊ê救急，但伊講m̄免感謝伊，á ài我以後用仝款ê精神來幫助需要幫忙ê人。

感謝神透過chit對長老夫婦來挖鬆我周圍ê土，mā kā我ak肥。經歷chitpái ê痛苦經驗，我深深體會tio̍h家己能力ê有限，無祈禱得神應允，就自不量力ê亂闖，一定有苦頭食。M̄ koh m̄是信了耶穌ê基督徒就bē有苦難，á是beh tī大難當頭ê時ē tàng óa靠神ê大能kap智慧，化阻力為助力，致使食古不化ê信仰根基會得thang被挖鬆來重新調整並施肥，chiah ē tàng結出聖靈ê好果子。

Hō͘盲朋友公平ê機會
後來我tī教會推動關懷盲人事工，感謝一位長老ê提醒：「什麼lóng m̄ bat,tio̍h beh從事盲人事工，ài慎重考慮chiah做。」Chit種ê鬆土施肥，hō͘我有所覺悟，tùi ánne每年參加美國盲人機構考察kap國際盲人事工交換計畫，mā hō͘我jú事奉jú甘甜。

殘障福利法規定私人企業至少tio̍h僱用百分之一ê殘障人士，tī教會辦ê並號稱世界上siōng大ê雙連幼稚園有一百人以上ê員工，我tī聚會中力爭僱用殘障人士，竟然有一位長老講：「我寧可hông罰萬gōa kho͘(元)，mā無願意開二萬kho͘僱用殘障人士。」Chitpái ê鬆土施肥，提醒我僱用殘障人士應該tùi我家己做起。Tùi那時chūn起，我tī只有四位員工ê迷你公司裡，增加一位視障者工作伙伴。對伊來講，m̄ nā每月得tio̍h一份kap非殘障人仝款ê薪水作生活費，iáu重新拾回kap非殘障人同工ê信心，kohkhah提供伊行入一般社交生活ê機會。

真chē人質疑講：「盲人行出算命就是按摩，行出按摩就是碰壁，怎樣有可能tī你ê貿易公司上班？」我ê回答lóng是仝款：「機會是你hō͘伊ê,只要你會曉教伊什麼，伊就會照你教伊ê去做。有時chūn做kah比明眼人kohkhah好，m̄信來我公司看看就知影，其實失明人、明眼人無什麼無仝，你用肉眼看，伊用觸摸kap心靈ê目睭看，常常比你明眼人看kah kohkhah清楚，請你多交幾個視障朋友就會明白。」

行出教會，進入社會
神tī人生中hō͘咱真chē鬆土施肥ê機會，tio̍h把握機會結好果子，hō͘你周遭需要人幫助ê厝邊得tio̍h利益，mā就是beh榮神益人。咱也tio̍h瞭解生命ê有限性，時時準備奉主差遣，做世上ê鹽kap光，行出教會，進入社會。只停留tī教會內ê基督徒，ná親像瓶內ê鹽，khǹg久了後就tâm濕to̍h倒bē出來；mā ná親像khǹg tī桌á下腳ê燈，照bē tio̍h需要光ê烏暗所在。 社會chiah是福音ê大工場，馬上就ē tàng做工， mài等到周圍ê土被挖鬆。約翰福音九章4 節耶穌講：「時iáu是日時，咱tio̍h做差我ê ê工；暝時beh到，hittia̍p就無人能做工。」﹝華語：曠野 67 期，1995 年 7 月號﹞