《台語chit條路》

 | | | 轉寄

《台語chit條路》建立台語文ê文學批評─林央敏訪問(二)

作者 謝瑞華 2008.10.26

教育非教育
林：差不多離chitmá十冬左右，台灣ê作家，不管老e、少年e、我bate、m̄ bate攏chiok驚e，紅色、白色、烏色ê恐怖攏iá留tiâu leh。hit chūn我心內真痛苦，理想、正義、良知、良心kap現實生存teh phún、teh掙扎。hit時chūn我對社會、對政治ê看法iá koh m̄敢反映tī作品內底，看著台灣人受壓迫ê痛苦，koh m̄敢反映，所以家治太痛苦，只有tī痛苦ê情形下ta̍uhta̍uh仔寫。起初寫了m̄敢發表，尤其政治性e khah m̄敢發表，m̄是政治性e，譬如講教育我著直接寫，寫評論，無想著連教育e，國民黨著叫人批評。我khah早iá teh讀輔大ê時chūn，輔大辦一ê雜誌叫做《益世》雜誌，bat做過教育專題，叫我寫一篇，無外久雜誌出來。 有一工校長chiok緊張，我看伊ê面色bōe輸人beh掠iah是ànnóa。本來若有話beh講攏公開tú著tō講，hit遍伊私下kā我叫去樓頂講：『林老師，你有公開發表文章，、評論啥麼hòe，公開批評教育？』我tō講：『我頂個月tī一本雜誌寫一篇千外字ê文章，批評咱教育填鴨式lah！a講著內面ê意識形態，批評教育ê錯誤，應該ànnóa khah好。』阮校長講：『可能就是那篇，有別的學校的校長被老師攻擊。』hitê校長無言以對，煞投lah！像小學生投老師按呢，校長投對教育局去，教育局一查，寫chit篇文章ê人本身ànnóa是老師，查落去是桃園縣e，tō khah電話hō͘阮校長，叫我愛寫一篇悔過書，hit chūn雖然真驚惶，但是伊叫我寫悔過書我感覺che是chiok失人格ê代誌。ná會使寫悔過書？校長叫我尚無愛交一ê啥麼hòe去，表示伊有處理，kiâu伊chitê校長無關係。既然校長夾tī中央，我tō寫一篇短短仔，講：『我寫hit篇文章完全是憑著教育ê良心，照我所認為e寫，恁若認為錯誤歡迎公開，看是beh口頭iá是beh文字公開辯論。』寫一張che hō͘校長the̍h去教育局啥麼單位報hō͘我知，he離chit má十三年hit teh仔。

自chit件代誌以後我發覺教育非教育，hit chūn tiāⁿtiāⁿ teh講中共啥麼政治干涉啥麼，我想講咱mā是按呢！


「蔣經國是大壞蛋」

林：因為發覺著台灣ê代誌逐項攏hō͘政治干涉，尾a對政治khah認識，chiah khah熱心去參加人e政見發表會，尤其黨外人士e，印證家治思考e、chia ê政治人物講e，iá是ùi中國冊讀著e，印證愈chē對政治愈關心。譬如講我chit本冊{註：【睡地圖的人】詩集};內底有一首khah政治性ê詩─自由，講台灣人失去自由，自由去hō͘人壓tiâu leh！因為hit chūn會驚惶，政治性ê詩iá amamkhàmkhàm m̄敢chiok明顯表現出國民黨ê錯誤、伊ê壓迫自由。尾a因為個性kap hit種熱情，ta̍uhta̍uh仔ná寫ná che7na2明顯，雖然m̄敢用文字公開寫出來公開發表，但是我代先是用嘴落去講。任何時間，不管tī厝裡也好，生份人mā無要緊，tú著人tō講政治，tō講國民黨壓迫台灣、國民黨非法，有當時仔上課mā講，講kahgin2仔寫作文講：『蔣經國是大壞蛋！』，我改作文ê時chūn mā chhoah一tiô。