《台語chit條路》

 | | | 轉寄

《台語chit條路》建立台語文ê文學批評─林央敏訪問(七)

作者 謝瑞華 2008.11.30

凰：你一篇線文差不多外長、外短？

林：我的散文mā有三千字、四千字無一定。我尚短ê台語線文差不多一千字左右，尚長＝e三千外字，目前teh寫ê若無切做幾ā段可能愛六千字才會凍寫好，寫我一日遊，目前已間寫三千外字。

凰：你koh來chit本冊beh用你家治ê音標？

林：hit時到iah無一定，無的確有一部份會教羅kap家治ê音標，我解說ê時chūn附錄chit ê音ê注解無一定用toh一款，其中大部份仝款。

江：正文內底是漢字？

林：正文目前攏漢字，我本身主張希望將來台文全部攏羅馬字。

凰：你道主張按呢soah無寫按呢？

林：chitmá我感覺tī開創ê階段，呣是干taⁿ咱做niâ，咱koh希望其他ê人會讀也會凍看，受著影響以後chiah會來做台文ê khangkhòe、來寫作。beh用toh一種來做咱語言ê符號m̄是chitmá尚介重要ê代誌。chitmá尚重要ê問題是逐家攏無接觸甚至koh輕視，咱著愛hō͘伊恢復信心，有咱台灣人ê民族尊嚴，趕緊來做，我認為che尚重要。chitmá先用漢字hō͘伊看，目前chit ê階段過去＝a，需要辯論思考toh一種形，我是認為愛用羅馬字母來做台文，拼法無一定是台灣教會hit種拼音法，愛儘量符合英語ê形式，按呢以後gín仔teh學，iah是新學ê人學著khah緊，可能kap教羅會小部分無仝。

台文ê khangkhòe道是hō͘逐家知影chit ê khangkhòe ê重要性

卵：做chit ê台語文iah是寫台語文，理論上為啥麼beh寫，講了較少，老師頂一kái tī金山{註：台大台語文社辦hō͘高中生ê台語生活營，93年7月}講著啥麼叫做代表性，chit方面講了介精彩，m̄ koh講了無介完整。

卵：老師chit擺會講koh khah完整，為啥麼咱愛用台文，為啥麼當初按華文創作改做台文創作ê過程，配合著chit ê理論，chit擺kám會凍講khah清楚？

林：beh講che以前我愛補充我tú chiah本來beh講煞拍斷去ê部分，著是我chitmá認為台文ê khangkhòe道是愛hō͘大多數ê人知影chit ê khangkhòe ê重要性，所以我teh寫，評論性ê物件，teh宣揚台文iah是台灣文學理論ê時chūn，大部分攏用中文寫，準做無用中文寫，我oanná會翻做中文，chit ê目標著是beh hō͘逐家攏看有，包刮無學過台文ê人mā會凍看，看了chiah知影有chit種代誌、chit種感覺。

che是一ê咱beh傳播ê理念，伊chitmá無排斥台文，咱用台文直接寫伊根本連看都bōe看，所以chit ê理念道無接觸著，無接觸著伊道bōe去思考，按呢效果道khah bái。理念性ê傳播我無用台文寫，目的是按呢，m̄是我無法度用台文寫，也m̄是認為mài用台文寫。理念性ê物件用台文寫oanná真好，因為咱若無法度用台文寫理念性ê物件，台文ê功能oanná無法度健全，是為著hia看無台文ê人，我chiah用中文寫關係台文理論性ê物件。