《《陳夫人》日譯台e5台灣小說 第二部》

 | | | 轉寄

《陳夫人》第二部 親子 第一章（更新版）

作者 庄司總一　著 楊東傑 指導 林俊育 台譯 2016.10.23

人力車tī鳳凰木並排ê道路teh跑走，陳清文坐tiàm車頂搖來搖去。

放射形道路之一ê chit條路，樹木並排，ē sái講是久年來受污染ê南島舊都ê肺臟，tùi都市ê嚨喉流入去芳氣。春天到夏天之間，hō͘ 人感覺爽快ê綠色中間有散散ê紅點，chiahê艷麗ê鳳凰木chitmá已經謝，烏ta有尺gōa長ê筴lak落來樹腳ê路面，看起來已經是冬天。總是，燒lō ê微風引誘附近ê仙丹、檨á樹、蓮霧等等ê樹木，想beh趕緊tī春天醒起來。星辰滿天ê恬靜暗暝，街路ê目chiu皮mā已經kheh起來à，m̄ koh車輛猶原來往不斷。

Tī車頂搖來搖去ê陳清文，tī hō͘ 人無爽快、無刺激koh hō͘ 人麻醉ê暗暝空氣中，無一時á就起愛睏，soah陷落去茫茫渺渺ê氣氛。總是，tùi頭前來ê人力車燈ê火影，hō͘ 伊ê頭殼忽然清醒起來。

伊想講事業到底beh tùi tó一方面開始chiah好？「你無法度親像智慧kah財富兩全ê所羅門王lah。」安子bat ánne kā伊滾sńg笑過。實際上，清文已經開始teh起罐頭工廠。對chit件tāichì，伊家己mā是有小khóa感覺好笑；做senglí等等是小弟景文á是類似ê人ê領域。

雖然是ánne，景文chitê人....。
Hit暗，幾位股東聚集，beh談論kah chit pái事業相關ê tāichì。Tāichì是早to̍h決定好勢，m̄ koh，股東之一ê景文忽然講伊beh退股。

伊ê理由是講最近日本內地景氣無好，漸漸會波及台灣，所以對chit pái ê事業將來ê發展性，伊無把握。起初大家是tùi想beh協力來做ê希望kah熱情出發。總是，事到如今，家己beh抽腳，大家mā是無辦法。

景文投出ê chit粒石頭並bē引起啥物波紋，m̄ koh，大家看伊beh逃走，就會感覺不安，mā想beh來改變決定。正面反對伊ê kantaⁿ王肇基醫生一人。王肇基是景文ê bó͘ ê小弟，tī街á teh開業，伊對in姊夫有抱恨tī.leh。Hit當時王家面臨破產ê時，景文lóng無kā伊關心，mā無tàu出半sián開業費，koh聽講in阿姊玉簾一直罵景文是一個無血無目屎ê人，tiāⁿtiāⁿ為chit項事流目屎。所以tī chitê關鍵時刻，伊久長以來ê鬱卒就一時爆發。
「你講因為景氣bái，就beh退股，你kám kantaⁿ會曉想beh thàn錢？我早to̍h知影你真凍霜。我掠準你對chit pái ê事業，已經有充分了解lín阿兄ê宗旨，想bē到你到chitmá chiah透露弱者ê聲，ánne，你起初ná會來加入投資neh？你真正hō͘ 人感覺真bē爽快！」

景文聽tio̍h王肇基激烈ê語氣，感覺真困惑。伊用手抓（jiàu）剃平頭ê頭殼，m̄ koh無抵抗，只是露出卑鄙無膽ê微笑，kā對方激動興奮ê講法潑冷水。
「M̄是lah，我對阿兄ê想法真了解，m̄ koh....」
「你只不過是用投機ê心情來參加，到中途漸漸了解阮真正ê理想kah目的，你認為bē sái，就khachhng pōaⁿpōaⁿ leh，想beh làngkáng做你soan。你無啥路用lah，kantaⁿ想beh thàn錢，若無thàn錢to̍h....。」
「Mài koh講我ài thàn錢、thàn錢lah！M̄ koh，創業bē sái無考慮利純，若經濟上無順利，無論gōa大ê理想mā會變成水泡。講實在話，肇基君，chitmá m̄是創業ê好時機，我早to̍h想beh向你kah阮阿兄提出忠告。」
「你免假有心lah！你對chit項事業ê想法，kah阮根本都無仝，án怎講都無chhái工lah。」

清文真無奈teh聽in兩人ê對話。王肇基不時teh觀察清文ê面色，想講做阿兄ê對景文無信用ê行為應該tio̍h嚴格責備；大家mā認為清文chit時會受氣來譴責in小弟，所以心頭不安ê視線lóng集中tī清文ê面上。總是，清文並無責備小弟ê款式，最後kantaⁿ ánne講一句話：
「對我ê宗旨kah今後ê方針感覺不安ê人，ē sái退股，而且是jú早jú好。」

Chit句話m̄是kantaⁿ對小弟景文講ê niāniā，mā是對因為景文退股，就信心動搖ê人講ê。

清文心內感覺真奇怪，當初伊beh設立水果罐頭製造事業，lóng有kā伊ê動機、抱負á是經營方針講hō͘ 投資者知影，伊想講大家lóng已經有相當ê理解kah共識。M̄ koh，chitmá看起來，大多數ê人iáu是認為小弟景文ê財力kah經營才能chiah是唯一可靠ê，in mā是kantaⁿ想beh thàn錢；總講一句，to̍h是kah景文仝黨ê lah。

無論如何，景文chitê腳siàu是家己ê小弟，講起來是一個hō͘ 人bē爽快ê人。以伊chitmá ê財產kah收入，投資兩萬三萬kám是啥物冒險ê tāichì？To̍h準講是kā chiahê錢hiat落去水溝á，chitê時chūn目chiu激khehkheh，恬恬mài講beh退股，ánne chiah是男子漢氣慨，kám m̄是？講起來，清文是chitê事業ê發起人，家己ê親兄弟soah先beh逃走，kā好好ê計劃破壞，tī外人ê面前做出chit種無體統ê tāichì，無顧慮大局teh ánne做ê景文，實在是厚面皮koh無智慧。

清文tī股東會議中，心內非常憤慨，m̄ koh，tī眾人面前不得不控制感情，想講tńg去厝裡chiah好好á kā伊教示；若無kā伊siàn嘴phóe，chit口氣吞bē落去。總是，真不可思議，伊行到外口，坐起lih人力車頂ê時，冬（譯註：原文是「春」）天暗時吐出柔軟神秘ê絲，纏tiâu肉體，憤怒ê感情soah tī內面結繭。清文並m̄是有意beh製造寬大ê心胸，其實是伊已經陷落tī一種無氣力ê虛無感。

Chit時亡父阿山ê靈魂hō͘ 一種kahná無所作為ê霧包圍leh，忽然罩入清文ê心中，hō͘ 伊感覺真奇妙。

伊tī人力車頂仰望天空，tī hia有無限ê空間kah永遠ê時間。總是，無限是啥物？咱活leh顯然m̄是為tio̍h he；kah無限量ê來比，咱日常所思考kah所使用ê數量，一或一千，相差到底有gōa chē？Chitê世界是有定量ê，kah馬戲團ê技藝仝款，咱以危險ê款式khiā tī限定ê球頂面，kantaⁿ ǹg望mài tùi球ê頂面lak落來；頭尾若順利表演結束，就會得tio̍h觀眾ê pho̍k'á聲。若kah天頂悠久無限ê星光比起來，地上teh爬ê人力車ê燈影是何等ê微細，ē sái講是短暫ê光芒niāniā。M̄ koh，這to̍h是人生，人不得不tī chit內面生活。準講水果罐頭製造ê行動是笑詼ê舞蹈，該做ê tāichì mā tio̍h徹底來做。
「頭家。」

人力車夫忽然teh kā伊叫，hō͘ 清文tùi眠夢中醒起來。
「頭家是陳清文先生ho͘ⁿh？」
「你ná會知？」
「是ánne lah，阿山老爺葬式ê時，我hông chhiàn去扛棺材，而且我ê小妹mā hō͘ 人賣去貴府做chabó͘kán'á。」
「Chitmá kám iáuteh做？」
「無lah，已經過身ah。Tī貴府做chabó͘kán'á ê時，有kah主人生一個kiáⁿ。Hit時m̄知啥物原因，soah hō͘ 陳家趕出去。」

人力車夫無意中ê話，hō͘ 清文忽然起懷疑。伊是老父阿山kah chabó͘kán'á所生ê kiáⁿ，hitê卑賤ê chabó͘kán'á kā伊生落來了後，無gōa久就hō͘ 陳家趕出去。伊想講若ánne講起來，chitmá所講ê chabó͘kán'á to̍h是家己ê老母loh？....應該無hiahni̍h bái ê tāichì，因為第一，照年代算起來，hitê懷疑bē成立。因為暗時看bē清楚，而且tùi背後來看，無法度正確判斷hitê chapo͘人ê年歲kah體型。總是，tùi伊講話ê聲kah形態，以及伊無啥有氣力ê拖車款式來推斷，伊確實m̄是真有威勢ê少年人。總講一句，清文想講chitê人無老kah講有一個小妹ē tàng來生已經四十歲ê我。

Tùi chit點來講，已經無疑問ê餘地，m̄ koh，無論如何，清文感覺無問伊一kóa問題bē sái，因為伊kah車伕之間並m̄是完全無關係；清文忽然陷落tī chitê單純ê感情。總是，這m̄是社會性ê關係，是人類自然ê牽連；是kā貼tī kha脊phiaⁿ頂面ê鋁板登記號碼the̍h掉ê車伕，kah the̍h掉陳清文社會性記號ê家己之間，普通ê性命關係。
「請問你叫啥物名？」
「你是beh問阮小妹ê名？」
「M̄是，我是beh問你ê名。」
「我叫李萬丁lah。」
「看起來你已經年歲bē細，請問貴庚？」
「講實在，我m̄是拖人力車ê年歲à，因為已經四十八歲loh。」

李萬丁講話ê聲聽起來有小khóa pháiⁿ勢ê款；其實，五十歲iáu teh做苦力ê mā是真chē。Tùi普通ê苦力來看，街裡ê車伕算是相當高等koh收入chē。總是，李萬丁hō͘ 人有小khóa懷疑，因為túchiah伊有講伊做工人ê bó͘ 先死，留落來五個iau餓ê kiáⁿ，ē sái講伊ê家境非常慘淡，而且koh講伊家己ê年歲已經大ah。台灣人ê車伕差不多全部lóng是thǹg赤腳，無論是石頭á路，á是熱kah beh熔去ê打馬膠路頂面，in mā kahná有穿皮鞋ê款，腳底lóng無感覺，照常teh走。李萬丁昨昏殘殘（chhânchhân）買一雙樹乳底ê thabih (譯註：足袋；日本式分趾鞋襪)。伊自覺體力衰退kah對勞動ê不安，tùi使用其他人lóng無teh用ê thabih hit瞬間開始，成做一種決定性ê起頭。

行無幾步路，伊就流汗phīⁿphēⁿ喘，kah人客講話mā三聲無奈；李萬丁感覺真見笑，清文mā感覺會出來。
「Lín小妹受委屈，是啥物原因？是m̄是tī厝裡hông苦毒？」
「無無無....」車伕氣喘bē離，連講話都無容易，後悔無應該講chiahê話。伊真無簡單koh講落去：「Mài講是hông phah，顛倒是受tio̍h好款待，kah主人生一個細姨á kiáⁿ。」
「對方是啥人？她是服侍啥人？」
「阿山老爺ê小弟lah。」
「是阿傳，hitê阿叔已經死去à。」
「頭家，你有去日本內地ê學校讀冊，久長無tī.leh。總是，阮小妹並無啥物無幸福。她所生ê kiáⁿ真精光，有發展，無啥物特別ê無好。阮小妹是一個超過厚情ê chabó͘人，kiáⁿ死去mā無怨嘆。總是，了後無gōa久，頭殼就變怪怪。」
「Bih起來to̍h好ā。」
「無啥物thang好bih起來；精神變怪怪是因為kiáⁿ死去，她時時刻刻講hit項事，m̄ koh並m̄ bat聽她講貴府ê pháiⁿ話，kantaⁿ tiāⁿtiāⁿ都一口氣吞bē落去。」

M̄知是氣接bē落去，á是有啥物躊躇講bē落去，李萬丁停頓一時á chiahkoh講：
「橫直to̍h是起siáu，m̄知啥物原因，她不時都ánne講：Koh再出世mā是beh koh做sànchhiah人，是án怎leh？戇大獃，是án怎無beh出世做有錢人？Ánne講起來，她ê意思to̍h是：Chit世間有銀牛kah水牛兩種，是án怎會ánne？chitê謎無人知。若是知影hitê原因，水牛chitpêng會講一kóa奇妙ê tāichì。」

清文忽然想講beh針對chit項事講幾句á話；chitê車伕事實上kám完全照siáu chabó͘ ê話teh講？這是m̄是伊家己借題發揮所編出來ê故事？無論如何，chitê銀牛 (有錢人) kah水牛 (勞動者) ê對立關係，mā是清文本身永遠無解ê謎題。

富有kah sànchhiah是創造主耶和華所定ê；hō͘ 伊發光ê是耶和華。
Chit句聖經節ē sái當做chitê宿命論一時性ê說明kah解決；銀牛可能想講chit句話講了真好，m̄ koh，水牛kantaⁿ有chit句話kám會滿足？拚命拖人力車ê人kah坐tī車頂ê人ê關係，就是講已經到無適合勞動ê年齡，mā iáukoh teh流汗phīⁿphēⁿ喘拖人力車ê chapo͘人，kah hitê kah伊倒反，坐tī車頂ê chapo͘人ê關係，chit款tāichì用頭殼一想，就知是實際上無法度改變ê現實狀態。結局，in兩人之間kám ē tàng互相hō͘ 人光，kám ē tàng親和kah融合？

這對今後beh創設ê事業，是m̄是tiāⁿtiāⁿ會出問題？Tio̍h如何來克服困難？真無簡單！真無簡單！清文本來想講充滿希望kah歡喜ê船，chitmá已經擱（khò）tio̍h暗礁（ta）。