《《陳夫人》日譯台e5台灣小說 第二部》

 | | | 轉寄

《陳夫人》第二部 親子 第八章

作者 庄司總一著 賴永祥指導 林俊育台譯 2016.12.25

玉簾生一個chapo͘ kiáⁿ。

因為隔十年無生，生產有khah困難，嬰á有救起來，m̄ koh發育無好。虛弱ê性命連suh母奶ê積極性都無，一日到暗睏kah ná死人，護士kā伊ngiau腳底，真無簡單hō͘伊發出微微ê哭聲，suh一兩嘴奶，m̄ koh無一時á to̍h koh倦tahtah睏去。

因為嬰á hiahni̍h'á虛弱，產後第三日，醫生mā無贊成kā嬰á抱出房間，玉簾mā無意願，m̄ koh，take阿嬌重視慣例，kantaⁿ形式mā好，堅持kā嬰á抱來大廳。

「阿母，危險，危險！若跋落土腳，beh án怎chiah好？」 縛腳行路hián來hián去ê阿媽想beh抱嬰á，玉簾bē放心。她tī生產中面皮消瘦，面色蒼白，kantaⁿ ná龍眼核ê兩蕊目chiu teh不安sih一下sih一下。

「你ná會講pháiⁿ吉兆ê話，因為伊真kó͘chui，hō͘我抱一下看māi。安子，你....」

阿嬌kā玉簾ê嬰á交hō͘安子，安子接過來抱，因為siuⁿ輕，抱tī手裡無重量ê感覺，安子感覺有一點á可憐。總是，take kā嬰á交hō͘ 她抱，安子非常歡喜。Take阿嬌以前m̄ bat有過chit款tāichì, 可能因為年齡ê關係，尤其是家長阿山往生以後，她明顯老落去，氣勢衰弱。她kah in翁阿山tùi起初to̍h感情無好，為tio̍h小khóa tāichì to̍h冤家kah彼此怨恨，kahná是為tio̍h冤家來結合ê一對男女。Taⁿ一旦減少一個對手，阿嬌忽然siàu念in翁，心內湧起疼惜ê念頭。既然ánne, tī伊iáu tī.teh ê時ná會無beh彼此和睦做伙，kám講這to̍h是人生？In翁在生ê時，她真少提起阿山，伊一下死了後，阿嬌常常講伊án怎，講伊ánne, lóng是做善意ê解說kah oló。為伊chhiaⁿiāⁿ辦理葬式，以後每tú tio̍h春秋節期，去廟裡燒香、poe̍h墓，她lóng誠心誠意teh做。Tī黃泉地下ê阿山看了mā會苦笑，kám m̄是？總是，她以前hit款chhiahpêpê ê性格，tòe年齡ê增加變khah柔和是事實，對清文kah安子mā比以前khah親近。這是因為年紀大心變軟ê關係，另外一點是時代ê演變—尤其是殖民地ê社會條件之下，認識劇烈變化ê時代形勢，對潮流到底無法度抵抗有覺悟。

安子抱嬰á，後壁續接阿嬌、景文kah gín'á阿仁、美圓lóng行出產房。
「Chitêchapo͘ 嬰á若是你ê to̍h好，你ná會無beh koh生？」
「M̄知什麼原因....可能是因為我ê身體無好。」

Hō͘ take ánne意外問起，安子kā她小khóa看一下。阿嬌ê目chiu流露出慈愛ê目神，這hō͘ 安子感覺意外。她認為take無願意m̄是親生ê清文當做繼承人，安子無生chapo͘ kiáⁿ tú ha̍h take ê意思。清文夫婦無chapo͘ kiáⁿ早to̍h成做chitê家族之間ê大問題，既然清文無chapo͘ kiáⁿ，陳家直系繼承人自然而然移hō͘ 次男景文。阿嬌應該歡喜ánne, chitmá忽然講出chiahê hō͘ 人不安ê話，安子驚一tiô。
「無chapo͘ kiáⁿ真傷腦筋，清文koh是新派ê人，無beh娶細姨，無辦法只好去pun 一個kiáⁿ好lah。」

自túchiah一直無ài講話ê景文，chit時反常講：「我有四個kiáⁿ, m̄ koh無kah一個值得hō͘ 阿兄。」
景文自我消遣ánne講，伊kā chabó͘kiáⁿ美圓ê手牽teh。 美圓遭遇意外ê災難，因為治療無效soah一蕊目chiu失明，前幾工chiah出院。她穿淺水色ê súi衫，有刺繡ê kó͘chui紅襪á，帶金手環，雖然kā她打扮kah真súi, m̄ koh, 可憐ê模樣iáu是無變。Tùi景文ê目chiu看起來，她ê白色眼帶是伊心肝ê痛。 「M̄ koh, 你看án怎？阿嫂，chitê嬰á kám飼會活？....看伊chit款ê面容。」景文看嬰á ê面ánne講。 安子想beh回答ê時，take阿嬌「不以為然」講：「我生你ê時，你koh khah瘦。因為chiah八個月，未足月，kahná猴山á kiáⁿ, mā是大kah真好勢。」 「Hit時，hitê猴山á kiáⁿ若死去，我chitmá m̄免活kah chiah辛苦。」景文koh ánne自我消遣。

「你講啥物話？景文！我kah你生活四十年，m̄ bat看過像你chitmá hiahni̍h凊心。Ah, ná會ánne no͘h, 可憐ê孫女一蕊目chiu失明，你koh損失一大筆錢。所以，我kā你講，m̄ thang poa̍hkiáu。」
「He是股票，股票kah poa̍hkiáu無仝。....無m̄ tio̍h, mā ē sái講是chit種poa̍hkiáu。」

今年，景文ê股票虧損bē少。伊一向凡事謹慎ê人，做tāichì小心koh再小心，hiahni̍h謹慎ê伊，這是真少有ê失敗，想起來有夠見笑。總是，伊有自信，損失ê破孔隨時ē tàng彌補，ē tàng得tio̍h koh khah chē，伊to̍h是有chit種鬥志ê男子漢。Túchiah老母所形容伊ê「凊心」，m̄是金錢ê緣故。

Chabó͘kiáⁿ ê失明hō͘ 伊真大ê衝擊。
「醫生，kám無醫治ê方法？有啥物好辦法？....ná會是我ê chabó͘kiáⁿ....」
景文對醫生哀求，m̄ koh, kám講lóng無免去失明ê方法？堅持「貿然」採用消極ê治療，會引起交感性眼炎，有可能雙眼失明。所以，醫生講siōng好是kā受傷hit蕊the̍h掉。

Tú好tī眼球手術hit日，證券行ê人來病院，勸伊kā手中ê股票賣掉。景文持有相當投機性ê股票約有一千股，hit當時明明知影是teh投機。Hit工伊無心chiâⁿ講錢ê tāichì, 無法度就kā證券行ê人趕出去。結果第二工一工損失chiâⁿ萬。

總是，kah chabó͘kiáⁿ失去一蕊目chiu比起來，he只不過是物件ê數字。為tio̍h chabó͘kiáⁿ ê目chiu, 投入千金mā bē m̄甘。M̄ koh, 儉koh khiû ê景文儘管有chit款獻出ê想法，災難以上bē koh生災難。

即使投入全部ê財產mā bē tàng買tio̍h kahná玻璃珠ê一粒眼球，這是真清楚ê tāichì, 景文感覺非常不可思議。這是一種甚麼經驗leh？經驗m̄是指tú tio̍h ê tāichì, 是指tùi 所tú tio̍h ê現實來思考tāichì。景文一pái tú tio̍h ê災難，實在是新奇ê大經驗。

「禍不單行」，第二夫人ê龍mā破病倒tī眠床。她原本kahná牛hiah勇壯，對第一夫人玉簾ê刻薄對待lóng忍受tiâu.teh, mā不管對她ê指點，恬恬á做khangkhoè，生四個gín'á了後soah忽然身體衰弱。她koh真無ài去看醫生，kantaⁿ tùi廟裡求得藥籤，去開中藥店ê後頭厝kap藥á，kā蟬殼、乾柿葉kah動物ê骨等等煎（choaⁿ）來食，身體一直虛弱落去。因為她固執拒絕醫生ê診斷，身體到底tó位有koh樣，景文lóng無法度知影。

Iáu有koh khah hō͘景文煩惱ê是長男阿仁ê tāichì。阿仁自細漢to̍h因為小聰明惹過麻煩，景文掠準伊是一個聰明ê gín'á, 心內不止歡喜。M̄ koh, 入去學校了後，成績是料想bē到ê bái。中學一年級勉強升級，到今年升三年級ê時soah落第，而且因為食薰被發見，受tio̍h停學ê處分。
「真傷腦筋，玉簾，chitê gín'á ê將來，你想án怎chiah好？」

阿仁受停學hit日，景文kah in bó͘ 參詳。伊認為chitê世界除了金錢，無有koh khah貴重ê物，面臨長男受tio̍h停學ê處分，iáu是bē sái無操心。

「今á日我hông叫去學校，受tio̍h恥笑。—Lín kiáⁿ大概有帶不良ê性質，學校ê人ánne講。Hō͘ 人ánne講，實在無伊法。二年級to̍h食薰，大概mā常常去看電影。我bē了解，像我chit種規規矩矩ê人會生出chit種pháiⁿ kiáⁿ。」

景文想beh小khóa kā她khau洗，所以ánne講，玉簾無回答。若是以前，她會隨時反駁講：「你講什麼意思？你kám講伊sêng我？」Koh會連續piàⁿ出五六句罵話。總是，最近她真少對in翁開砲，mā全然無變khah親密。Tùi tang時起變成ánne？無聽她lôlílôso, 景文顛倒感覺khah輕鬆。總是，景文最近發見她ê態度變kah ná親像生hūn人。Hō͘ 她棄嫌，她有表示反感，景文iáu ē tàng忍受。Taⁿ完全無kā伊看在眼內，景文就擋bē tiâu。

「操行是操行，算術bē曉，到底是án怎？伊自細漢to̍h ài sńg錢，mā真gâu算錢，我料想伊將來一定是一個senglí人。M̄ koh, 伊去學校了後，算術lóng無及格。其它學科免講，算術ê成績無好....。Oeh, 玉簾，你ná會恬恬m̄出聲？」

景文迫切注視in bó͘ ê面，玉簾卻冷淡鎮靜。M̄是內心有啥物意識ê鎮靜，是lóng無反應kahná火灰ê冷淡。Tī做月內中間，面siuⁿ過蒼白無氣色，kui身軀lóng是臭ta瘦ê影跡，蒼白ê瘦面無抹紅粉，目眉毛lak kah稀疏，準講koh畫眉，mā無koh像以前thang形容做「蛾眉」。景文頭一pái看tio̍h失色ê玉簾，為甚麼？景文實在bē明白，kám會是因為去教會chiah變成ánne？
「你變à, 信仰神真好，m̄ koh, 你hiahni̍h'á宗教味....」
「我ê āichì, 你kám m̄是lóng無teh要緊。」
「Ná會無要緊？無論如何，翁ábó͘ 總是翁ábó͘。」
「我ê身軀已經奉獻hō͘ 神ā」
「無lah, 你kahná是講你離開我chia tńg去外家厝，去嫁hō͘ 神ê款。」
「可能真正是ánne。」
「聽講有聖神投胎ê tāichì....。Mài滾sńg笑lah, 你chitmá腹肚生出來ê kiáⁿ, 到底是啥人ê kiáⁿ？....玉簾，信神信佛lóng無要緊，m̄ koh, mā tio̍h思考咱大kiá阿仁ê tāichì。」

「阿仁ê tāichì我想tio̍h to̍h胸坎á起痛。總是，想無辦法，只有向神祈禱。」
景文感覺實在無她法，以前為tio̍h chitê bó͘ ê愛打扮、浪費kah硬性操煩過，chitmá她變kah ánne, 失真kah kahná teh眠夢。人kám講會有hiah大ê改變？無可能會ánne。橫直這是chabó͘人ê膚淺，反覆無常，只不過是熱心宗教ê一時tek現象....。景文ánne想，m̄ koh伊感覺bē tàng hiahni̍h簡單來處理，ná會有chit種ê感覺leh？我ná會bē tàng kā它放bē記得？景文bē明白。伊chitê bó͘因為無疼ê夫婦生活真苦惱，soah想bē開來吊tāu自殺，景文想bē到hit暗會發生chit款tāichì。
「玉簾，請聽我講，自結婚hit工起，我to̍h一直hō͘ 你看bē起，chitmá mā仝款。M̄ koh, 我有我ê看法。」

景文真難得有chit款ê認真講話態度，ē sái講結婚以來m̄ bat有ê認真態度。認真是指精神上ê意函，以前m̄知痛苦之味ê硬性心靈，chitmá開始痛起來。

「無論我chitê人án怎，我m̄是土豆á是檳榔，m̄是kantaⁿ咬錢á是食銀票。我積聚錢是為tio̍h beh hō͘ 家己有力量，堂堂做一個人ê力量。Mā ē sái講是—我家己對chit點無明確ê做法—mā有可能是一種ê對抗意識á是報復心態。大兄學問koân, 人格高尚，風度phiauphiat，我真欣羨，怨恨家己kā伊bē比得。所以，我做一koá阿兄做bē到ê tāichì，kahná馬車ê馬一直跑teh無停工作。別人對我ê觀感án怎我無所謂，我一點á都無感覺家己ê做法無好，我無後悔。....我認為家己ánne做無m̄ tio̍h, 若是ánne做致使別人....像講你，玉簾....。假使hō͘你無幸福，he to̍h實在真失禮！真傷腦筋。我近來有ánne teh想。」
「一屑á都bē傷腦筋。」
「Oeh, 你ná會hiahni̍h無同心體貼？你想看māi leh, 我實在盡心盡力teh工作，累積ê錢差不多已經滿足，想講今後thang清閒過日子，你ē tàng隨意做你ài做ê tāichì, 買你ài買ê物件。」

「多謝，m̄ koh, 我已經m̄是以前ê我。人總是有一工會死，景文，你kám有想過死亡ê tāichì？」
「啥物，你ná會講chit款奇怪ê話？」
「我有teh思考死亡ê tāichì, mā有經過一pái ê死亡。你kám知我已經m̄是以前ê我？」

玉簾憂愁ê微笑teh咬景文ê心坎。He m̄ nā是笑笑leh而已ê一時tek情緒「低潮」，看起來kahná有一種深沉ê心思kā心靈纏絆teh—就是看bē tio̍hê神祕ê神。

產後做月內kantaⁿ簡單厝內ê人做形式上ê儀式。
大廳內只有三四個近親ê chabó͘人來參加，景文無ài奢華鬧熱是顧慮tio̍h近來家己厝內連續發生不幸ê tāichì。可能是因為心理作用，伊感覺hiahê chabó͘親chiâⁿ雖然講是來恭喜，mā是來探訪美圓ê不幸遭遇。事實上，目chiu帶保護蓋ê美圓ê可憐款比嬰á ê出世koh khah引起注目，而且，chiah十六歲ê阿仁比老父koân一寸，四肢發達，卻受tio̍h學校停學ê tāichì，大家已經lóng知。

「你免出去，tiàm內面to̍h好。」景文用強制ê口氣kā伊hat。 「Siuⁿ過無講道理lah, 我ê小弟出世，我去kah大家做伙祝賀chiah tio̍h ā。」阿仁ánne反駁了後就tòeteh入去大廳。

當做阿媽ê阿嬌抱嬰á teh拜神佛ê時，阿仁伸手beh the̍h桌頂ê紅龜粿，景文tī眾人面前pháiⁿ勢出聲，就恬恬á kā in kiáⁿ伸出ê手股poe̍h開。總是，阿仁靠勢chitê場面，出力kā老父ê手sak開，大pān大pān the̍h三四塊紅龜粿lok入去lak袋á。景文心內火to̍h, 看hitê比家己khah koân大ê kiáⁿ, 知影家己ê手股力輸伊，忽然有輸人一把ê感覺。 拜神了後，嬰á由chabó͘kán抱入去產房。

「Ánne, beh號甚麼名？」阿媽chē落去椅á就問景文。
「號名oh, 阿母，你想有甚麼適當ê名？」景文有氣無力ánne講。莫怪伊連號名都無氣力想，因為嬰á發育不良，連哭聲ê氣力都無，連suh奶ê氣力mā無。醫生講tio̍h過一禮拜chiah有法度保正嬰á ê生死。因此真oh得想像，iáu有滿月á是度chè等等ê慶祝。

「真正若是阿山iáu tī.teh....」阿嬌目chiu ǹg神主牌位三聲無奈講：「阿山一定會號一個好名。伊真有學問，無m̄ bat ê字，清文、景文、瑞文，每一個lóng是出色ê名。」
景文kah安子參詳問講：「阿嫂，你kám有啥物好主意？」
「Ah, 我bē sái lah, 無學問。M̄ koh取你ê名ê景，kā伊號名景行kám好？」
「景行oh, 是bē bái, m̄ koh, 台灣無號kah老父仝名ê習慣。」
「Ánne, 景....仁ná會？」
「這是破例，已經往生ê阿公kā伊號ê名，大家lóng知阿公萬事無beh受束縛。總是，世間事無啥改變，ta̍k項照一般來做khah好。像阿仁ánne kantaⁿ好名無khahchoa̍h, 出kah chitê pháiⁿ kiáⁿ。」 景文ánne遺憾講，in kiáⁿ the̍h tio̍h紅龜粿，m̄知tang時已經溜出去。
「阿仁chitê名kahná日本人teh講ê名不副實ê猴死gín'á。....Á無chitê嬰á kā伊號做乞食....陳乞食。」

景文微微á笑ánne講，阿媽無反對。台灣ê風俗，若是tú tio̍h嬰á身體虛弱看起來無容易養飼長大ê情況，為tio̍h避邪，為tio̍h gín'á ē tàng平安長大，會thiau故意kā嬰á號一個pháiⁿ聽 ê名。乞食ê名iáu算bē bái, 有ê號做畜生、豬屎、羅漢、阿呆等等。