《陳雷文選》

 | | | 轉寄

PP基因

作者 陳雷 2008.05.18

這種人有一款特別ê氣味，牽豬哥ê財a上蓋瞭解。生出來tō有，人講是基因ê關係。這二個雙生出世ê時，in老pē看一眼、phīⁿ一下、hoah一聲「害」，頭oatleh出去，自按呢無koh轉來。In老母頭一胎生雙生，差一sut á難產生bē出來，血直直拚，據在嬰á khàu一晡，佳哉才返魂倒轉來。目睭peh金kā看，aiioôe,che嬰á一個禿頭光光，無半枝毛；另外一個，敢有影hahN，thán橫一撇嘴鬚，ùi chia到hia，bē輸gín'á作孽用烏筆畫ê｡總是作老母ê,khah講mā是家己ê嬰上蓋寶，心肝iⁿa ôe,這二個m̄是天使tō是天才。趕緊叫相命ê gín'á仙來，mā是看一眼、phīⁿ一下、hoah一聲、雞母ôe,大漢m̄是作總統tō是黨主席。隔壁hit個阿財a，牽豬哥出身也來看，hoah講：「紅豆嫂，bē m̄ tio̍hlah，這個味，我牽豬哥ta̍k日teh phīⁿ！這二個，生成是一世人ê政治家。」紅豆嫂歡喜，應：「Hiohlah，m̄是作總統tō是黨主席。」

不而過，beh作一世人ê政治家也無hiah簡單，自細漢tio̍h比人食苦têng倍。這個紅豆嫂，難產tio̍h產褥熱，無錢通買藥。二禮拜tō來過身去。這二個雙生soah tī世間無pē無母，hō͘阿媽抱轉去朴子io，khah早真草地ê所在，叫作猴樹港。後來猶是散赤人io bē起，姑不而衷未肚chè tō hō͘hō͘人去。Hit個大漢禿頭ê,hō͘姓施ê抱去，號作信良。猶hit個細漢ê一撇嘴鬚，hō͘姓許ê io去，號作明德。無彩一對雙生兄弟，m̄是天使tō是天才，自按呢tō來拆散分開，一直到大漢m̄ bat見面。

信良kap明德大漢了後，若相命kap牽豬哥ê講ê,攏成作政治家chhap政治。Hit chām,台灣政治單純，chhap政治m̄是入國民黨，tō是chhòng台獨，ah無tō是óa共產á｡明德a tòa tī南部，時行台獨，後來為著「台灣獨立聯盟案」hō͘人掠去關，判無期徒刑。

Tī監獄關khah無四冬，ta̍k日食糙米，睏柴pang，bē堪得受苦，暗時作惡夢。夢見一個老身ê,白嘴鬚紅目眉，m̄是真人tō是仙道。Gia̍h一枝牛sut ná ia̍t ná笑：「實在有夠gōng!」明德無歡喜，問伊：「你是啥人？」老身ê應：「我tō是風神，天下行透透，世事看到到。」「我是勇士兼義士，為啥物笑我gōng?」老身ê講：「勇士食拍，義士食虧，世間第一gōng｡…我問你，你tī chia四冬，ta̍k日食糙米，睏柴pang，受苦受難，敢有人oló你，講你gâu?」連續幾lōa暗作這個夢，流chhìn汗，自然心內思考，我tī chia食kiâm食苦，無人關心，無人oló,實在何必苦?！lú想lú有理，講：「請教真人仙道。」老身ê tō kā指點：「勇士、義士m̄通作，作永遠ê政治家，有名koh有利，上蓋風神。」Tú好hit幾日，伊人閉結，便所桶khû一晡，放bē出來，大力tèⁿ一下，雄雄大tháu,soah連頭殼也清去。一時覺悟知轉，khah早實在gōng｡趕緊褲lángleh peh起來，the̍h紙來寫。In某來探監，紙交hō͘伊，吩咐講：「這張紙你chahleh，去蔣介石in大厝門口kā跪。」In某問：「跪beh創啥？」「Kā伊求。」in某驚一tiô,你m̄是攏講，大丈夫，敢作敢當。怎樣chitmá叫我去跪蔣介石，kā伊求？「你m̄知，我chitmá關了艱苦，有理解真理。勇士食拍，義士食虧。…這張紙，你the̍h去kā蔣介石跪。」「Che紙寫啥物？」「寫我明德a，關了夠khùi,bē堪得，知錯悔改，求伊赦免，放我出去。我以前少年m̄ bat代誌，hō͘共產á騙去作台獨。伊若放我出去，我chiùchōa kap伊拍拚，作伙反共大陸。」明德看in某躊躇，緊講：「麗珠a，你m̄知，che監牢m̄好tòa,實在艱苦。」「你猶是家己去跪，khah有誠意。」明德緊講：「我明德大丈夫，ná會使去跪人求人？Hō͘人知，面子攏無去。…猶是恁查某人跪khah有效，人khah會同情…聽講伊是信教ê｡」Koh再kā麗珠吩咐：「這項代誌絕對m̄通hō͘朋友、有志知影，失我面主。」結果in麗珠a，帶念著幾冬翁某情，成實hit張紙chahleh，去蔣介石大厝頭前跪，三暝三日無peh起來，跪kah腳頭u chhê破皮流血水，無人chhap伊，無彩明德teh覺悟真理。一直等到hit年，蔣介石beh死，雄雄去想著，伊一世人pháiⁿ事作siuⁿ chē,thâi死太chē人，若是死了去閻羅王hia對chi̍h,問伊在生pháiⁿ事作hiah chē,有作啥好事，soah無話通應。所以臨時大赦政治犯，作好事hō͘閻羅王看。明德a關十冬，koh in某跪三暝三日攏無效，等到老蔣ê死，作功德才放出來。

放出來了後，朋友、有志攏替伊掩蓋，寫批叫in某去跪、求蔣介石赦免ê代誌攏無hō͘人知。明德koh chhiàng聲：「抗爭到底！犧牲到底！絕對無向獨裁者妥協投降！」成作反蔣第一大英雄，講話會歪嘴，行路會khau風，真是風神。心內不時會記得，監牢內底風神真人仙道kā伊教示：「勇士食拍，義士食虧。」時常家己自勉：「作永遠政治家，有名有利，上蓋風神。」

無外久桃園縣長選舉。國民黨有一個施信良，黨內提名無著，等bē tiâu,急beh作官。Hit 時情勢有teh變化，人心漸漸反國民黨。信良a利用這個機會，脫黨競選。結果當選桃園縣長，變作黨外大英雄。這個施信良是啥人？m̄是別人，tō是明德a另外hit個雙生á兄弟，chēng細漢禿頭，hō͘姓施ê io去。大漢了後，西瓜óa大旁，入國民黨，靠國民黨ê勢起身。

台灣kap美國斷交hit年，蔣經國取消選舉，又koh掠人。黨外人士tī高雄橋á頭集會示威。信良a tī hia遇著明德，kā伊展：「我是黨外第一英雄，台灣上蓋風神ê查甫人。」這句話上蓋傷著明德ê自尊心，真是不服。「幹，恁pē苦牢坐十冬，tō m̄是白關ê｡你也kap我爭風神！」Tú好無外久發生美麗島事件，黨外人士總掠。明德a會記得頂回坐監ê辛苦，驚hông掠去關，逃命走去bih。政府賞金幾百萬beh掠伊。Hit chām電視新聞每日報伊ê名、ta̍k時hip伊ê相，強強滾，一時變作台灣上蓋風神ê查甫人。15冬關出來了，伊kā信良a展倒轉：「我是台灣上蓋風神ê查甫人。」後來為著chia ê代誌，二人前後hō͘人選作民進黨ê黨主席。相命ê kap牽豬哥ê出世ê時tō有講過：「M̄是作總統tō是黨主席。」siàⁿsiàⁿ講kah tio̍h tio̍h｡

Hit chām黨內有一位奇妙秘書，姓陳名文西，親切叫作阿西。M̄是生作外súi,éé肥肥，有油有肉，特別是hit二粒奶bē細，可比屏東ê熱帶椰子。又koh作人大方，交際真gâu,會曉用奶á作社交ê工具。結果kap二位主席真投機會合，仝hit個氣味。上班tîⁿtîⁿ作一kōaⁿ，下班kōkō作一堆，社交來往，新聞媒體出風神。

Taⁿ這日三人又koh lim酒半醉teh社交，阿西a一目看明德，一目看信良，一個撇鬚，一個禿頭，一個勇士，一個英雄，目睭花花，心肝飛飛。無張持靈感來，講：「恁二個，bē輸生來親兄弟。」這句話無小心hō͘一個烏白日報ê記者聽著，報紙頂tō pòng｡講許主席、施主席，一個勇士，一個英雄，原來是親兄弟。有人食飽êngêng,走去調查。查出來aiioôe,二個攏是一歲ê時hō͘人khioh來作kiáⁿ。問來問去，hiahni̍h tú好，攏是ùi草地朴子，khah早叫作猴樹港hia分出來ê｡Taⁿ心適a。M̄ kú這時in hit個阿媽早tō過身無tī lah，beh去tó位問？結局喊來喊去，雖然聽起來有影有跡，總是也欠一個確實ê､科學te̍k ê證據。

佳哉咱中央研究院生物研究所有一位吳天光博士，研究人類基因專門。聽著這個消息，tī 報紙頂chhiàng講：是m̄是親兄弟，用基因分析會tàng證明。伊有這個技術。阿西a熱心kā in二個鼓舞，明德a、信良a一人抽一筒血，用先進科技，基因分析。結果tī二人ê染色體頂，發見新ê､真特別ê基因。天光博士kā號作PP基因，正式學術全名是永遠政治家(Permanent Politician ) 基因，一組三個，也tō是PP1，PP2 kap PP3. PP1基因ê功能是，一枝嘴雙個舌，烏ê講白ê,白ê講烏ê,tio̍hê講m̄ tio̍h,m̄ tio̍h講tio̍h｡PP2 ê功能是，pûn雞kui，出風神，顧面主，愛金錢。PP3 ê功能是，kā人跪，kā人求，好空ê óa來，pháiⁿ空ê走līlī｡Tútú好kap in二人合合。吳博士講，明德a、信良a二人這三個PP基因完全túchiàu對合，是天生ê永遠政治家。一般人口中間，若m̄是血親雙生兄弟，這款túchiàu ê機率是十億分之一，差不多無可能有。Tō是按呢，科學證明，許明德、施信良原本是雙生兄弟。有人講，最近明德tī總統府頭前凱達革蘭道倒扁，信良tī中正廟靜坐，mā是ham PP1、PP2、PP3有直接ê關係。表示PP基因mā有擾亂民主、破壞法制ê功能。

以上tō是永遠政治家PP基因發見ê經過。因為這個重要ê發見，吳天光博士差一sut'á得著No͘beluh (Nobel) 獎。不過有人建議，陳文西ê功勞mā真大，若無伊熱心社交，tō bē帶動這個研究。Che實在mā是台灣人ê光榮。