《陳雷文選》

 | | | 轉寄

Pháiⁿ嘴

作者 陳雷 2009.03.15

萬a tī黎明國小教音樂，人是bē bái，tō是hit枝嘴bái。特別bealuh lim落去了後，hit枝嘴bē輸he屎ha̍k á空，見講tō是臭ko͘ⁿko͘ⁿê，定定按呢得失人。這日來tī 『阿秋鵝肉』食鵝配biluh。Lim了差不多a，peh起來beh去便所放尿。Hoa̍h一步顛二步，無細字踏著人客ê腳，差一sut á poa̍h倒。受氣罵hit個人客：「你這個死人！別位m̄去死，死tī chia tìn路，kā恁pē koāiⁿ腳。」拳頭母gīmleh tō beh cheng。Hit個人客坐tī壁角家己一個，面sánsán，嘴薄薄，目眉tn̂gtn̂g，看起來紳士紳士，穿一su khóng色ê西裝，結一條紅色ê nekhutái，khoaⁿkhoaⁿ'á應伊：「你來踏我ê腳，koh罵我pháiⁿ嘴。」khiā起來，chiah大漢，lòlò比伊koân一粒頭。萬a無lún伊，chhîⁿ óa去：「恁pē罵你tō按怎？！你好死m̄死。…幹！你看，恁pē這枝腳…」「我也無踏著你ê腳，…」「無踏著？…你看，踏一下折去a，痛kah beh死。」一腳giâ起來桌á頂，ná比ná hoah：「幹！比死khah艱苦！」Hit個人客本來猶好禮teh講，聽伊罵這句「比死khah艱苦」，雄雄面白死殺，目睭chheⁿchin一直kā gîn，烏仁反綠chiah大蕾，講：「少年ê，你m̄ bat死過，thài會烏白講這款pháiⁿ聽ê話？」萬a mā氣kah面紅kiki:「幹！恁pē m̄ bat死過，ah你tō bat死過hioh？！…外pháiⁿ聽？死外艱苦你敢知？」Hit個人客想beh koh應，壁頂時鐘khiang一聲，tú好六點半。一句話吞落去無講，嘴念：「失禮，我ài趕時間。」oatleh作伊去。萬a ná罵：「好死m̄死，緊去死hō͘恁pē看。」

小停尿放了，biluh lim ta，鵝肉食飽，氣猶未消。問頭家娘：「Túchiah hit個人客是啥人？」阿秋應：「生份人客，m̄ bat來過。」萬a念：「幹，來chia欠恁pē教示。」車駛leh走。酒醉chhìnchhái駛，chia chông hia chông，紅燈綠燈也無teh看。來到十字路口，雄雄m̄知按怎，目睭小寡起花，一堆人圍tī hia，相爭teh看車禍，一台西美lòng kah歪哥chhihchhoa̍h。另外路中央一台救護車，風螺hīⁿhō͘ⁿ叫，燈火lia̍plia̍p sih。Tú好隔壁阿泉in老pē ùi hia過。奇怪a，這個春木伯，斷腦筋成半冬a，倒tī眠床bē tín動，thài會chitmá soah好起來，穿一su睏衫tī大路行？Tō kā叫：「春木伯a，ah你m̄是teh艱苦，beh tó去？」老人應：「Bē lah，攏bē艱苦lah。」koh講一句：「失禮，我ài趕時間。」oa̍t頭作伊行。斟酌看，aiioôe，邊a tòe一個查甫人，sánsán lòlò，khóng色ê sebiloh，紅色ê nekhutái，注死m̄死，tō是túchiah阿秋hia hit個人客。Tō kā tòe去，ná講；「幹！你這個好死m̄知死。恁pē來教示你。」

二個作前lú行lú緊，去到一位天橋tō peh起lih，beh過大路。萬a也tòe in起lih。Ná知雙腳踏一chàn，人soah Ńg骨強beh un落去。規身軀ê khùi力bē輸水道水無關，放leh一直lāu，身魂teh beh流無去。

Tok強peh到天橋頂，突然間人足看活，輕鬆浮浮teh beh飛，阿秋a hia bealuh lim有夠khùi hit款。才注意著橋腳大路頂，車kap人攏無去，tiām chiuhchiuh一大片，青ê､紅ê…，熱人ê公園花teh開。有聽著輕聲ê音樂，幼秀清亮，ùi hn̄ghn̄g ê天頂飛落來。He音樂伊有熟悉，tō是Mo͘chato͘h ê小提琴奏鳴曲。M̄知啥人演奏ê，真正好聽。He小提琴kap鋼琴一句來一句去，bē輸高尚ê天使歡喜teh對話。也bē輸teh kā伊講，萬a，你一世人真chē歡喜kap福氣。伊想，我知，我beh kā真chē人說多謝。天橋hit旁光起來，闊曠曠，天teh出大日。時間一目nih概成停tī hia，無teh tín動變作永遠，一時心內底真正和平，罕得這款無煩無惱。又koh bē輸he天頂ê光彩kap音樂tō是伊ê祈禱，一世人第一回，chiahni̍h虔誠謙虛，oló伊ê生命。M̄ kú he Mo͘chato͘h ê音樂，雖罔是天頂ê，伊知影總是也是人寫ê，有lām著淡薄á數念ê人情、無彩、可惜。有影lah，chiahni̍h好ê所在，咱chia阿秋ê鵝肉、bealuh，…。失禮ho͘ⁿh，定定kap英a冤家，罵pháiⁿ嘴。

音樂停去，hit二個已經到天橋hit頭，teh beh落去。萬a趕緊jiok去，kā叫：「小等一下。春木伯a，我kap你來去。」春木oa̍t頭過來，kā講：「萬a，你無teh趕時間，先轉去。厝裡英a teh等你。」Hit個穿sebiloh ê人客，行óa來，雄雄出大力腳尾kā chàm一下，萬a hoah一聲：「我腳痛kah beh死！」tō精神過來。

有人teh kā ji̍h胸坎，hoah講：「轉來a，…轉來a，…」目睭peh金，tō是倒tī救護車內底，人teh kā伊急救。風螺ò͘ⁿò͘ⁿ tân，救護車sùsù走。原來m̄知tiâng時，也m̄知按怎出車禍，tōng一下m̄知人，心臟定去，人死去。好得佳哉，koh救活轉來。送去病院，kanna腳尾小傷，chhunê攏好勢，tō hō͘伊轉去。

轉來到厝，in某英a tō kā叫：「Ah你是走tó去？隔壁春木伯a過身去a。你緊去kā in看一下。」萬a講：「我túchiah路裡才遇著伊，行路好勢溜溜，thài有過身去。」In某講：「敢是你認m̄ tio̍h人。六點半腳tau過身去a。」萬a m̄信：「明明我有kā叫。伊講，萬a，你無teh趕時間，先轉去。」Koh kā in某講，m̄知按怎出車禍，hit台西美lòng kah歪哥chhi̍hchhoa̍h。英a念伊：「早tō kā你講，lim酒m̄通駛車，攏m̄聽。…你明明是teh chhōe死！」萬a走去隔壁看，成實泉a in規厝內人攏teh khàu。春木伯a已經平安過身去a。Lú想lú奇怪，khah想to想無，心內giâu疑不安。

隔轉工，koh來阿秋chia食鵝肉lim bealuh，siàⁿsiàⁿ hit個人客又koh來tī hia。仝款紳士hit扮，khóng色sebiloh，紅色nekhutái。萬a想著前日春木a奇怪ê代誌，心內膽膽，好禮óa去kā講：「人客，hit日我lim酒醉，踏著你ê腳，pháiⁿ嘴罵你，khah失禮。」人客也好禮問伊：「你腳敢猶會痛？」萬a應：「痛是猶會痛，…」人客koh問：「Ah敢會痛kah比死khah艱苦？」萬a心頭chhia̍k一下，hit日pháiⁿ嘴講一句「痛kah比死khah艱苦！」Hō͘人客罵：「少年ê，你也m̄ bat死過，thài會烏白講這款 pháiⁿ聽ê話？」趕緊kā伊chhē:「Bē lah，bē lah，死攏bē艱苦。」人客ná笑，khiā起來，sánsán lòlò koân伊一粒頭，講：「少年ê，若是你，chitmá講這句話，才khah有理。」雄雄會記得hit日òaⁿ晡天橋頂ê景緻，原來tō是死ê安排！原來伊tō是死！驚一下面青súnsún，差一sut á siàm尿，直直kā chhē m̄ tio̍h，ná講：「失禮，ài趕時間，ài趕時間......。」趕緊作伊走leh lōng。

青狂chông轉來厝，喘phēⁿphēⁿ kā in某講：「英a，我看著死！」英a罵伊：「又koh這枝嘴！…Taⁿ你看著死，he死生作啥款？你講來聽。」「Sánsán lòlò，穿一su khóng色sebiloh，結一條紅色nekhutái，…」英a起愛笑：「Hit個o͘h？伊tō是死o͘h？…Ah你m̄ khah早講，túchiah猶tī咱門腳口行來行去，…敢是teh等你？」萬a oa̍t頭看門口，aiioôe，成實是伊！Tī亭á腳行來行去。Tú想beh去kā趕，in某哀一聲大大聲：「我頭殼痛kah beh死，…」一句話講猶未soah，phiâng一下倒tī土腳，tō m̄知人去a。kā看，亭á腳hit個查甫人也無去。