《陳雷文選》

 | | | 轉寄

Thâi好a

作者 陳雷 2009.05.31

已經破病冬外a，醫bē好，lú來lú厲害。這個進前，人好好ê時，súi有出名，阿富時常來tshuē 伊，對伊有意思。Tsitmá看著tō走，概成刁工teh閃伊，驚hō͘伊uè著病。M̄ kú這點明星心內明白，有一個解說。M̄是阿富m̄愛伊，是伊人細字，驚人看著ê關係。Kanna伊知影，阿富原在定定來tshuē 伊，攏是伊家己一個tī厝裡ê時陣，別人無看著，老母mā無看著。見來tō oló伊衫súi，所以hit su白衫紅裙，穿規個月m̄甘換。頭毛也m̄剪m̄洗，因為阿富有講，伊ê頭毛上tn̂g上súi。老母罵伊lasap臭kô͘kô͘，gīgī笑，kā老母講，阿富緣投，伊beh嫁阿富。老母罵，查某gín'á m̄通家己烏白想！人阿富已經有查某朋友，無愛tshap伊。明星無受氣，原在gīgī笑，因為kanna伊知影這個秘密，阿富有愛伊，定定來tshuē 伊。

大熱這日，下晡阿富koh來厝裡tshuē 伊，oló伊súi，叫伊thǹg衫thǹg裙hō͘伊看。明星聽了心肝頭熱，hīⁿ'á筋燒，笑bibi:「你tshuā我去tshitthô，我kap你相好。」阿富講：「我bē tàng kap你相好，tshuā你去tshitthô。」 「為啥物？」「你身軀邊有一個惡魔，不時tuè tiâuleh。」「Tó一個惡魔? 我thài無看著？」阿富比hō͘伊看：「這個！…這個紅目睭、白身軀、khiû頭毛ê ?…」明星驚一tiô:「伊？！…伊是阿娟…」阿富tìm頭，講：「Tō是伊！伊是惡魔來化身。」明星斟酌看，成實ê，he阿娟，…發二枝鬼á角，拖一枝魔神尾，pok二tsuā青燎牙，teh beh咬伊。「你先kā惡魔thâi好，斬作三kue̍h，頭殼tsûi落來，血流hō͘ ta，…」阿富hāhā笑:「我kap你相好，tshuā你去坐火車，台南tshitthô。」無等伊應，tō koh走無去。

明星驚koh受氣，無想著惡魔假作阿娟來害伊，害阿富bē tàng愛伊，kap伊相好。大力雙手kā惡魔掠leh，beh催hō͘伊死！罵：「Tō是你！…你這個惡鬼！」拖去灶腳，桌頂一枝菜刀，gia̍h起來tō kā phut！Aiioh，紅phàphà若水道一直phū，血tsuāⁿ bē停，àu koh臭tsho，惡魔ê味。照阿富吩咐，斬作三kue̍h，頭tsûi hō͘斷，血流hō͘ ta，按呢算作thâi好a。Tsông出來街á路，看無阿富，ná hiu:「我thâi好a。」沿路tshuē，一腳掛一粒鈴á，gingin gianggiang。來到火車頭，碰著老母，kā老母講：「我thâi好a。」老母看，aiiouê，雙手紅kiki，衫裙攏是血！是啥貨thâi好a?！敢是明星tī厝裡家己thâi雞，bē曉thâi，舞一身軀？明星gīgī笑，講：「我beh嫁阿富，kap阿富坐火車，台南tshitthô。」腳鈴á gingin gianggiang，uatleh tō行。這時火車beh入車站，明星走去jiok火車，ná jiok ná ia̍t手，huah講：「我thâi好a。」老母有看著，火車慢落來，車門開，阿富khiā tī車門邊，teh等明星。伸手來牽伊peh上車。二個歡歡喜喜，笑gīgī，teh kā伊ia̍t手。

車門關好，火車khinkhōng khinkhōng teh起行。雄雄頭殼gông tshiatshia，親像作龜怪ê夢tútsiah精神。目睭皮垂垂，hīⁿ空筋hōnghōng，有聽著明星teh吩咐；「…斬作三tè，…攏總三tèlah，…」來花bē放心，若是thâi雞，thài kanna斬作三tè?…趕緊轉來去厝裡看māi。

後來調查結果，m̄是駛火車ê m̄ tio̍h。這個火車禍，新營火車站30冬來第一回。現場jûtshiángtshiáng，亂糟糟。有看著ê人講，查某gín'á teh jiok火車。白衫紅裙，bak kah全血，ná ia̍t手ná huah:「我thâi好a。」這班落南ê快車tī新營站無停，過月台ê時駛真緊，無慢落來。查某gín'á jiok uá去，一下tō跳落去。火車bē赴擋，規個人拖leh tshê，拖去到月台koh過去hn̄ghn̄g，上無一百公尺才停。Kauh作三kue̍h，iā作三位。看ê人一人一句：「可憐lah，猶tsiah少年。…」「夭壽a，thâi人才家己自殺，…」尾a有調查詳細，是查某gín'á家己去tsông火車，m̄是駛火車ê司機m̄ tio̍h。

來花轉來到厝，哀一聲「aiiouê｣，taⁿ死lah，規間厝紅kiki ê血。入去灶腳，天公a，看一下強beh吐。倒tī土腳，tok作三tè，一粒頭liàn tī椅á腳，僥倖，嘴á開開，目睭金金，tō是in阿娟！這隻古錐ê貴賓狗，紅目睭、白身軀、khiû頭毛，tsīng細隻明星tī路邊khioh轉來，上疼伊。二個上蓋相好，不時tuè作伙。Thài會thâi好斬作三tè?…走去kap阿富坐火車tshitthô?

當teh想無，m̄知beh怎樣才好，著急灶腳khokkhok se̍h。隔壁雲a喘phèⁿphèⁿ tsông入來，hiu:「緊！來花a!…緊來去！…」青狂無顧看，一腳踏著血，差一sut á滑一倒。慘a，目睭teh作怪，規土腳紅kiki ê血，一隻狗斬作三tè，…。驚一下ua̍t倒頭tsông出去，來花khatshng後jiok，一手kā tsangleh，m̄ hō͘走。這個雲a，tō是厝邊阿富in老母，食菜人心肝清氣，bē堪得看狗死，bē輸細漢嬰á分屍切作三tè，un tī hia直直吐。一時青tso̍h，雙手khokkhok比，講話suah大舌：「火…火…火車…」Tō是tútsiah新營車頭車禍，緊來teh報。Suah一句話咬tī嘴內，hō͘舌that tiâuleh，講bē出來。Tī hia thithi thūthū一晡久，雄雄人tshāitshāi bē tín動，目睭仁吊吊無teh nih，tō是驚一下身魂出竅，飛無去a。

來花看伊人tī hia，魂無tī hia，青狂拳頭母gīmleh，心肝窟大力tō tsing，一下koh一下，佳哉才精神，魂倒轉來，huah講：「…火…火車…kauh死…，恁…明…明…明星…」來花講：「阮明星tútsiah坐火車，kap恁阿富去台南tshitthô。」雲a講：「阮阿富下…下…下晡kap靜美牽…牽…手去看…看電影。」Kā來花講，thâutú'á tī火車頭有看著，明星jiok火車，ia̍t手teh huah:「我thâi好a。」一下tō跳落去。火車bē赴擋，kauh作三tè，拖去到月台外才停。來花講：「看著鬼！你烏白講。我thâutú'á tī火車頭親目看著。阮明星jiok火車，火車入來，停tī月台。車門開，明明恁阿富khiā tī車門邊teh等伊，牽伊peh上車。」一人講一款，二款bē對角。沿路ná tsèⁿ。來到火車頭，圍一陣人，hihi hèhè teh看鬧熱。「查某êlah，…tsiah十八、九歲niâ，…」「可憐，ah thài tsiah無細字，pua̍h落火車腳，…」「m̄是lah，家己刁工跳去hō͘車tsôngê，…」一人一句，tshitshi tshūtshū。Ee khehkheh，tsiⁿ來到月台邊，規tsuā鐵枝á路m̄是血tō是肉，tsia一位hia一位，衫一tè裙一tè，iāiā一四界。「你看，…」身邊hit個大kho͘查某人比hō͘看，頭前鐵枝路頂近近一堆肉掛骨，tshun二枝腳掛鞋á猶好好，一腳掛一粒鈴á。一陣風吹走，概成hīⁿ空內gingin gianggiang，hiu一聲「我明星a｣，昏昏m̄知人去。

無teh張持，m̄知tiâng時，查某gín'á uá來khiā tī伊身邊。Gīgī笑，kā伊講：「我beh嫁阿富。」白衫紅裙，清氣tamtam。Tn̂g頭毛烏sìmsìm，lua̍h kah súisúi齊齊，tō是in明星。實在講êlah，tsīng伊大siáu，一冬以來，m̄ bat看伊這款平安自在，笑kah tsiahni̍h歡喜滿足，m̄是teh gōng笑，概成雄雄病醫好a，無koh teh 起siáu，無koh家己一個人關tī房間，有時衫裙thǹg光光，家己講話家己笑：「你tshuā我去tshitthô…，我kap你相好，…」

歡喜一下，suah精神過來。人倒tī土腳，一陣人hò͘ⁿhiân圍leh看。「醒a!…醒a!…」「查某gín'á ê老母lah，…可憐，tsàn bē tiâu，…」又koh teh tshībútshītsū。這時雄雄才心肝內明白，伊看著ê tō是查某kiáⁿ頭殼內起siáu ê世界。火車慢落來，停tī月台，阿富khiā tī車頂teh等伊，beh牽伊peh上車。因為阿娟已經thâi好a，血流ta，斬作三tè。阿富beh tshuā伊去tshitthô。Tse tō是伊tōng車進前，上續尾一目nih，頭殼內ê經驗kap幕景，也tō是明星ê現實，kap別人看著ê無仝。概成仝一個舞台頂，仝hia ê演員teh演二齣無仝款ê戲，一齣別人看，另外一齣kanna伊kap查某kiáⁿ看。Tó一齣是現實，tó一齣是起siáu ê幻覺？一時suah分別bē出來。