《Tui3台語開始》

 | | | 轉寄

聖經百科全冊─十字架

作者 張德麟 2008.07.10

今á日咱基督徒lóng知影耶穌是被十字架釘死ê。chitê苦難ê記號，今á日反倒tńg成做少女ê裝飾品。Chitê十字架是tùi什麼時chūn開始ê？

根據歷史ê考查，全世界第一個使用十字架刑罰犯人ê人是波斯人。波斯人認為土地是神聖ê，bē sái tī土地上刑罰人，所以kā犯人giâ tī半空中處死。Chit種刑罰後來傳hō͘希臘人、伽太基人，然後傳到羅馬人。咱ê主耶穌就是hō͘羅馬兵丁用十字釘死ê。

講到十字架ê形狀mā有一kóa演變。伊原本干taⁿ是一條木柱，後來加上橫木是為tio̍h利便死刑chiah加ê。兩條木柱合起來ê形狀原來是「T」形，後來變成「十」形，chit種形狀hō͘人稱做拉丁形。Iáu有一種安德烈形，伊ê形狀是「X」，m̄ koh chit種形狀是西元十世紀ê時ê產物lah。

耶穌受釘ê十字架是拉丁形。根據約翰福音ê記載，這支十字架kap其他ê無仝。伊頂面釘一個牌á，牌á頂寫tio̍h：「拿撒勒人耶穌，猶太人ê王」。Chiahê字為tio̍h beh hō͘當時ê人lóng看有，所以同時寫chiūⁿ三種語文，分別是：希伯來文、拉丁文kap希臘文。

阿們 當咱吟聖詩，á是祈禱結束ê時，咱lóng會用「阿們」結尾。「阿們」到底是什麼意思neh？

「阿們」原來是希伯來文，後來變成希臘文、拉丁文kap一切ê語文。Chitê詞ê原意是：「是，上主」，或者是「ǹg望是ánne」。tī舊約聖經中，chitê詞ē tàng表示對某人同意，或者當作頌讚詞ê結尾，或者當作宗教禮儀ê閉幕詞。到了新約聖經，chitê詞用ê次數真chē，譬喻講，馬太福音用了三十次，馬可福音用十五次，路加福音用十六次，約翰福音用二十五次。Tī chiahê福音書中用「阿們」chitê詞ê時，lóng teh強調「實在、確實」chitê意思。

到了後來ê教會，祈禱詞後面用「阿們」，重點是khǹg tī「求上主成全祈禱者ê祈禱」ê意思頂面。

另外，有一項事愛講ê是，耶穌是第一個kā「阿們」khǹg tī講話開頭ê人。一kóa神學家kā咱講，這證明伊就是「實在、確實」本身，是「真理」本身。所以khah使你現在掀開啟示錄三章十四節，你會發現，tī hia直接稱呼耶穌是「阿們」。