《Kah陳小小做伙讀台語》

 | | | 轉寄

目chiu hō͘啥人phah開

作者 陳小小，台譯：Lîm ChùnIo̍k 2024.09.08



目chiu hō͘啥人phah開

聖經內底第一个kah目chiu有關ê故事，記載tī創世記第三章「蛇kah亞當、夏娃（註1）ê對話」。蛇奸巧，講話技巧高段，牠用疑問句開場：「上主kám是真正講m̄准lín食園中所有樹á頂ê果chí ？」聽ê人chiah bē tī第一時間to̍h 起疑心。

夏娃to̍h一屑á都無防備來回答：「園中樹á頂ê果chí，咱thang食，獨獨園中hit叢樹á頂ê果chí，上主bat講：『Lín bē sái食，mā bē tàng摸，免得lín ē死。』」蛇to̍h順勢漸漸收網，對夏娃講：「Lín無一定ē死；因為上主知影，lín食ê日子目chiu to̍h ē光iàⁿiàⁿ，línto̍h親像上主ē tàng知影善惡。」

Siōng厲害ê白賊是真中有假、假中有真正ê白賊！咱來詳細地分析蛇所講ê chit三句話，「Lín無一定ē死」（假ê）、「Lín食ê日子目chiu to̍h ē光iàⁿiàⁿ」（真正）、「Lín to̍h ē親像上主ē tàng知影善惡」（假ê）。

蛇講ê第一句，和合本翻譯做「Lín無一定ē死」，希伯來文 לֹאמוֹת תְּמֻתוּןê意思是「Lín一定bē死」（註2），也to̍h是「Lín絕對bē死」。蛇講ê kah上主ê話「你bē sái食，因為你食ê日子定tio̍hē死！」（2:17）一百八十度完全倒pêng。

蛇kah夏娃講話ê現場，亞當to̍h tī邊á。和合本無kā עִמָּהּ「kah她做伙」翻譯出來，應該譯做：「她to̍h挽果chí來食，koh hō͘ kah她做伙ê翁婿，伊mā食à。」（註3）（3:6）這mā是是án怎蛇對夏娃講ê話lóng是使用「Lín」。講起來，亞當chiok有心機，伊tī邊á看tio̍h夏娃食，看她有死去無？Ih，竟然無死，ánne to̍h ē tàng安心tòe teh食。

上主ê話一定是真正ê，是án怎chit兩人食ê日子無死？聽過一个玫瑰花ê譬喻，siōng óa意傳神。玫瑰花種tī土裡，它hông剪落來插tī矸á ê hit時，它已經死去à；m̄ koh ài二禮拜了後chiah ē完全lian去。Á亞當、夏娃食ê hit時已經死去à，m̄ koh ài過幾百年chiah ē生機全無。阮chiahê亞當ê kiáⁿ孫，mā lóng是死人，tio̍h過七、八十年á是一百年，chiah歸tī土粉。

食了後，「兩人ê目chiu to̍h開」（3:7）蛇講ê第二句真正應驗！M̄ koh兩人並無親像蛇講ê第三句，ē tàng親像上主知影善kah惡。「ē tàng hō͘人有智慧」（3:6），m̄是上主講ê，mā m̄是蛇講ê，卻是夏娃kakī ê頭腦補充ê。In目chiu hông phah開，kantaⁿ有看tio̍h kakī是赤身露體，to̍h the̍h無花果樹ê葉á為kakī編裙，這m̄是辨別善kah惡ê能力，mā m̄是所謂ê智慧。

台灣ê園藝界，目前thang看tio̍h無花果樹盆栽teh賣；ē tàng去摸無花果樹ê葉á看māi，to̍h ē知影這是非常爛ê衫á料，容易破去，穿起來koh bē爽快。Chit兩人náē有智慧，有辨別善kah惡ê能力？原本亞當kah夏娃免穿衫褲，伊甸園應該是溫度適宜ê環境。M̄ koh目chiuhông phah開，卻注意tio̍h ài穿無必要ê衫褲，就ánne tio̍h加開時間kah工夫去製造衫褲。另外，in mā chhòng無清楚kakī究竟m̄ tio̍h tī tó位，相連續對上主ê回答，兩人互相推卸責任，lóng teh說明in並無智慧。

創世記另外一个所在mā有目chiu hông phah開ê故事，夏甲chhōa kiáⁿ以實瑪利tī曠野迷路，飲用水lim盡，夏甲出聲大哭，耶和華phah開她ê目chiu，to̍h看見一口井。（21:19）夏甲無失明，她目chiu真好，看ē tio̍h一切，m̄ koh無看tio̍h活命用ê水井。「上主開她ê目chiu」וַיִּפְקַח אֱלֹהִים אֶתעֵינֶיהָ，hō͘夏甲ê目chiu注意tio̍h chìn前無注意tio̍h ê tāichì。

信主幾nā年，我直直tútio̍h「目chiu hō͘上主phah開」，看見kakī是一个罪人，內面帶有各種ê驕傲、競爭、敗壞。生活中mā tiāⁿtiāⁿ經歷tio̍h chiahê恩典。最近iáu有一个「目chiu hō͘上主phah開」ê實例，上主hō͘我注意tio̍h take官ê厝ê延長線插座舊laklak。無想tio̍h，teh換ê 時，發見舊插座已經hông phah thàng過，koh有chi̍tchūn chi̍tchūn ê臭火ta味，kachài無引起火災。我hō͘上主恬恬ê保守震撼tio̍h！

「目chiu hông phah開」，beh了解是hō͘啥人phah開？Chit世界mā ē phah開目chiu，hō͘ 咱浪費一生tī追jiok無必要ê tāichì，to̍h親像亞當kah夏娃注意tio̍h無穿衫褲ê小事。我ê目chiu一pái hō͘上主phah開，jú明白啥物是重要ê tāichì，á我tī其中享受tio̍h疼ê幸福，而且持有永遠ê性命。

註： 1.hit時她iáu未有名，hō͘亞當稱做chabó͘人。為tio̍h讀者理解方便，用夏娃稱呼。 2.《新譯本》、《環球聖經譯本》、《呂振中》、《NET聖經》lóng翻譯做「Lín一定bē死」。 3.《和合本修訂版》、《新譯本》、《環球聖經譯本》、《回復本》lóng翻譯做「kah她做伙ê翁婿」。