《Kah陳小小做伙讀台語》

 | | | 轉寄

凡事lóng ētàng做，可能kah你想ê無仝款

作者 陳小小，台譯：Lîm ChùnIo̍k 2026.07.19




凡事lóng ētàng做，可能kah你想ê無仝款


圖片提供／123RF


保羅tī腓立比書4：13講：「我靠tio̍h hitê加hō͘我力量ê，凡事lóng ētàng做。」Chit句話常常hông the̍h來勸勉基督徒mài驚chhoah，若有耶穌所賜ê力量，任何事lóng ētàng做，á是個人自我期待，贏過超出kakī原本能力ê挑戰；有時mā用tī教會建堂á是進行大型事工。M̄koh咱mā看tio̍h chit句話hông亂使用，親像當疫情嚴重kah進入三級管制ê時，有教會傳出chit種講法：「基督徒kah其他人無仝，有耶穌保護kah聖靈保守，無需要掛嘴om，無需要注疫苗，凡事lóng ētàng做，bē染病。」Kám真正是ánne？

無入而不自得

Taⁿ咱先tńg來保羅寫ê腓立比書，了解書信ê原始意義。保羅當時ê處境是hō͘人監禁，tú tio̍h捆鎖ê苦楚，m̄koh伊書信ê一起頭，竟然對腓立比教會ê信徒講：「我所遭受ê tāichì koh khah ē喚起福音興旺！」保羅感謝上主透過伊個人ê苦難，hō͘福音進入羅馬首都ê軍隊 — 御營軍。只要出tī上主ê心意，tio̍h算遭受苦難，保羅lóng掠這感覺足榮耀，掠ánne感覺足快樂。

保羅tī書信ê結尾講，伊tī主裡大大喜樂，因為腓立比教會koh一pái關心注意tio̍h伊ê經濟需要。其實腓立比教會過去一直關心保羅ê經濟，伊tī帖撒羅尼迦ê時，腓立比教會m̄nā一pái供應伊，m̄koh後來in to̍h chhōe bētio̍h機會幫贊伊。保羅續接講：「我並m̄是因為欠缺chiah講chit句話；我無論tī啥物景況lóng ētàng知足，這我已經學ē曉à。我知影án怎過卑賤，mā知影án怎過豐富；á是飽足，á是iau餓；á是冗siōng，á是欠缺，任何狀況lóng安然無事，我lóng有得tio̍h祕訣。我靠tio̍h hitê加hō͘我力量ê，凡事lóng ētàng做。」（腓立比書4：11～13）

「加hō͘我力量ê」是teh指主耶穌基督，á「凡事lóng ētàng做」ê原文，其實無「做」chit字，卻是「凡事lóng ētàng」。希臘文ἰσχύω ê意思是「有能力」「ētàng擔當、適應」，意思是tī所有ê景況中，lóng有能力á是ētàng擔當、適應。

現代中文譯本2019版真óa意來表現chit句話ê原意：「我ánne講，m̄是因為我欠缺啥物；我已經學ē曉對現狀滿足。我知影án怎過貧困ê生活，mā知影án怎過富裕ê生活。我已經得tio̍h祕訣：飽足mā好，iau餓mā好；豐富mā好，欠缺mā好，隨時隨地，我lóng知足。藉tio̍h基督所賜ê力量，我ētàng適應任何景況。」

保羅無希望腓立比教會信徒誤會。前一句伊講，因為腓立比教會ê奉獻，伊tī主裡大大喜樂，這kahná ē hō͘人錯覺，掠準保羅是因為錢來大歡喜無停。所以保羅隨時補充講，伊tī各種ê狀況下lóng ētàng過日子，暗示tio̍h算腓立比教會無奉獻，伊mā ētàng因為基督所賜ê力量，適應任何景況──á是富裕、á是貧困、á是飽足、á是iau餓、á是豐富、á是欠缺。M̄koh保羅koh感覺kakī chit種kahná有kóa àu梨á假蘋果，就ánne隨時說明：「M̄koh，tī我困難ê時，lín來幫贊我，我真感激。」伊算過以往腓立比教會對伊ê好，尤其是tī帖撒羅尼迦hit段日子。Siōng尾保羅kā奉獻ê話題轉到koh khah重要ê關心注意上：「我並無求啥物等路，所求ê to̍h是lín ê果chí漸漸增加，歸tī lín ê賬頂面。」（腓立比書4：17）

耶穌賜力量

講起來，神職人員接受奉獻，真正是無簡單ê功課！一方面beh向奉獻者致謝，表達kakī因為對方ê支持kah代禱來喜樂，一方面koh bētàng hō͘對方感覺kakī siàu想錢財。「我靠tio̍h hitê加hō͘我力量ê，凡事lóng ētàng做。」to̍h是tī chit種感謝奉獻ê筋脈中，所以我koh khah kah意chit種翻譯：「我靠tio̍h hitê加hō͘我力量ê基督，ētàng擔當、適應各種景況。」

Chit句是m̄是ētàng伸長應用tī教會á是個人面對挑戰ê時？我個人認為ētàng。藉tio̍h主所賜ê力量，基督徒m̄nā ētàng擔當各種「物質」ê狀況，mā ētàng擔當其他「非物質」ê狀況。有時別人ê幫贊m̄是金錢，親像信望愛聖經網站ê志工團隊，in ê幫贊是奉獻專業能力。身為執行長，我代表信望愛向chit陣志工致謝，表達我因為對方ê委身來喜樂，m̄koh bētàng hō͘志工感覺我是teh貪圖對方ê能力，所以我thang講：「信望愛過去靠tio̍h hitê加hō͘阮力量ê，ētàng擔當、適應各種狀況（凡事lóng ētàng做）。」

真有福氣，ē tàng接觸tio̍h chit kóa疼主ê志工，in ê性命hō͘人感服，無論致tio̍h癌症、鬱症、類風濕性關節炎、龍骨性筋肉倒kiu症、自律神經失調á是視力將近是全盲，lóng bē因為身軀ê病痛kah性命ê無確定性來限制kakī，總是kā榮光歸tī基督：「我靠tio̍h hitê加hō͘我力量ê，凡事lóng ētàng做。」in óa靠耶穌，適應身軀健康ê欠缺，用軟chiáⁿê身軀擔當服事，連續發揮恩賜，做kah比身軀健康ê人koh khah chē，koh khah好。

所以，擔當、適應各種狀況ê前提是：基督tio̍h賜力量！若符合上主ê心意，基督自然to̍h ē賞賜夠用ê力量。因為ánne祈禱走chhōe tio̍h省察、分別是m̄是出tī個人á是教會集體ê私慾，á是出tī上主ê計畫á是對上主疼ê回應？