《《白袍．白杖》盲人醫師自傳》

 | | | 轉寄

《白袍．白杖》第七章 盲人約會

作者 Dr. David Hartman,MD, 台譯：宋麗瓊、林俊育 2018.09.02

Tùi Overbrook盲校轉人公立初中，siōng hō͘ 人不安，m̄ koh mā hō͘ 人歡喜ê是，有真chē機會kah chabó͘ gín'á接觸。Overbrook盲校m̄准男女生同齊sńg，in ê chhitthô場所是隔開ê；校方主管認為盲人無應該受誘惑去kah其他盲人結婚。

M̄ koh，chit種誘惑極難避免。經過一段sùsī爽快，koh受接納ê盲校生活了後，一个少年人會有一種強烈ê需求，想beh避免明眼社會ê威脅，想beh chhōe一个ē tàng分享失明ê避難所。M̄ koh，盲人kah盲人結婚，常常hông證明是無實際ê。若是雙方各有無仝ê殘障，親像盲人kah臭耳聾，á是盲人kah肢障者，ánne，無理由講in ê婚姻會無美滿，因為in其中一个人ē tàng提供目chiu，另外一个人ē tàng提供耳á á是肢體。我同意Overbrook盲校ê觀點，盲人無應該受鼓勵kah盲人結婚；m̄ koh，我並無贊成in ê hàm古做法；in想beh hō͘ chapo͘ gín'á假做chabó͘ gín'á無存在，á是hō͘ chabó͘ gín'á假做chapo͘ gín'á無存在。

Tī Overbrook盲校，tī男女隔離ê歇睏時間，chapo͘ gín'á會私下講耳孔話來吸收關係chabó͘ gín'á ê不可思議kah禁忌ê秘密，比cha bó͘ gín'á tī邊á ê時所ē tàng收集ê koh khah chē。看過老母á是姊妹thǹg腹the̍h，á是看過老爸kah兄弟黃色雜誌ê弱視chapo͘ gín'á，in會kā in秘密發現ê稀罕部分kā其他同學講。In講ê笑話雖然無gōa好笑，m̄ koh，tiāⁿtiāⁿ會hō͘ 人tio̍h驚。阮三、四、五年級生無啥物thang好貢獻ê，m̄ koh，阮tio̍h phah拚掩飾（iámsek）阮無想beh漏聽六、七年級生任何一句臭tōaⁿ ê智慧話ê切望。

有一个年紀khah大，叫做Alex ê烏人學生，伊意愛用老大哥ê身分關心我，m̄ koh，為tio̍h beh保護我，免得陷入去伊ê同伴危險言論ê陷阱，伊家己to̍h透露一kóa非常hō͘ 人困惑ê秘密。伊講，有時chūn，chapo͘人會對其他chapo͘人發展關係，伊勸我tio̍h盡全力抵擋chit種罪惡。伊kahná非常清楚同性戀ê刺激，伊對我透露講，「準講是神父」mā無法度拒絕hit種hō͘ 人神魂顛倒ê引誘。伊hō͘ 我ê印象非常深刻。

Tī來到chiahê「校園研討會」chìn前，我對性並m̄是全然無知。有一pái，我hō͘ 老父一个關係性ê秘密ê考試，結果發見我知影ê比伊koh khah chē。

「阿爸，chabó͘人是án怎有娠ê？」當時我chiah七歲，而且iáu未失明；老父tú下班tńg到厝，連外套to̍h iáu未thǹg掉。伊慎重思考我ê問題真久，最後宣布講：
「上帝hō͘ chabó͘人有娠。」
「Ánne，是án怎gín'á生出來會sêng父母？」

Koh一pái思考久久了後，伊講：「當兩个人結婚ê時，上帝kā in ê索á結tī空中，就hō͘ 老母有娠。He是gín'á sêng父母ê原因；因為hiahê索á。」
「若ánne，是án怎有一kóa chabó͘ 人無結婚mā有娠？」 老父ê態度kah語氣teh kā我講，伊ê立場已經開始搖動。伊講：「Ánne，chitmá，我想he是上帝ê失誤。」
「Ellen有娠ā，是án怎她會感覺hiahni̍h見笑？若是he是上帝ê失誤，並m̄是她ê？」
「啥人是Ellen？」
「你知影ā，電視連續劇《世界轉變ê時》（As The World Turns）hitê Ellen ā。」

老父無kā我回答，伊細聲nga̍uhnga̍uh念講：「我無看過hit齣連續劇，所以，我無法度kā你講。」

我tú失明，tùi波士頓ê病院tńg來到厝了後無gōa久ê一个暗時，老父出去phah牌á，老母一定是下決心，感覺hit時是她應該ài回答老父chìn前bat想beh kā我講，卻一直拖延無講ê問題ê時chūn ā。她開始含含糊糊講一kóa關係嬰á，kah in án怎出世ê tāichì。我想我並無學tio̍h啥，m̄ koh，he對老母來講是一个嚴峻ê考驗。幾nā年後，老母kā我講，她ē tàng完成hit項tāichì，是因為她知影我無法度看入她ê目chiu，而且，因為ánne，她mā m̄免直接看我ê目chiu。

事實上，我是tī幾年了後chiah開始我ê性生活，講khah準確一點á，是三年了後。Tī六年級ê時，我頭一pái戀愛，她ê名叫做Helaine，我無法度解說Helaine是án怎kā我點to̍h戀愛之火；她並m̄是我意愛ê類型。Tī走廊lòng tio̍h她ê時，我發見她ê手股頭kah我ê大腿仝款粗，m̄ koh，她ê笑聲ná親像香檳ê泡沫，hiahni̍h活潑、快樂；她講話ê時，會不時流露出hit種笑聲。除了這以外，她小khóa有視力，地位比我khah koân。她歡喜chhōa我四界行，其中siōng好ê一點是，她一定tio̍h牽我ê手。

老師隨時禁止阮交往，m̄ koh，Overbrook盲校ê一个走廊邊á有一个凹入去ê壁孔，tī hia ē tàng閃避老師ê視線，而且只要有腳步聲óa近，你隨時ē tàng聽tio̍h；chitê所在hông稱做「相chim角」，來記念tī hia所進行ê邪惡koh禁忌ê tāichì。Tī Overbrook校內，siōng hō͘ 人興奮ê比賽是，一个chapo͘ gín'á kah一个chabó͘ gín'á，tī腳步聲逼近，兩人oattńg身逃走，假做無辜chìn前，in ē tàng tī「相chim角」相chim幾pái。

Helaine用「相chim角」ê故事來引誘我，阮決定tī聖誕節了後beh試食禁果。我等bē得thang tńg去厝裡kā老母、老父kah Bobbie講―當然m̄是關係阮ê全盤計畫，m̄ koh，至少是關係Helaine kah「相chim角」ê tāichì。

「你kám會tī hia chim Helaine？」老母有一點á bē放心，ánne問我。
「Oh！我絕對bē ánne做。」我緊狂向她保證。到taⁿ我iáu無了解老母是擔心我犯tio̍h校規，á是擔心我hō͘ Helaine煽動，soah陷入享樂主義ê人生，á是老母kantaⁿ是teh kah我kún笑。M̄ koh既然答應她ā，我認為家己應該禁止去做hit件tāichì。

Tī聖誕節了後，我kā Helaine講我對老母ê承諾，這並無hō͘ 阮ê關係改變siuⁿ大。當她猶原kah意我，雖然確實有一kóa陰影存在ê時，Helaine koh對一个khah chē歲，大約十五歲ê人感覺有興趣。伊真gâu弄她歡喜，這是我做bē到ê。伊宣稱（她ánne kā我講）伊tiāⁿtiāⁿ強暴伊ê叔伯小妹。一位舍監tī無意中發見chitê浪蕩子kah Helaine之間ê一堆phoe，phoe內in潦草寫一kóa全盤ê約會計畫。結局，hitê人 hông退學，Helaine hông停學。我看bē出ánne ê趕逐ē tàng阻止in koh犯罪，m̄ koh，至少ē tàng避免in tī Overbrook校內犯罪。有真長ê一段時間，我感覺家己對Helaine ê墮落有責任。若是我kah她tī「相chim角」做有限度ê試探，她可能就bē kah hitê拖她誤入歧途ê chapo͘人有任何牽連ā。

我準備好勢beh第二pái戀愛，對方ê名叫做Ramona。Teh kah Helaine交往期間，我已經to̍h注意tio̍h Ramona，她細粒籽koh伶俐，是我意愛ê特質，而且她ê面貌迷人―弱視ê朋友kā我講ê，當時he kahná（chitmá猶原是）真重要。阮ê六年級老師ài阮班裡ta̍k人寫一篇短篇戲劇，一禮拜後交，siōng好ê劇本beh tī班裡表演。我得tio̍h chit 場比賽ê勝利，因為kantaⁿ我一个人完成劇本，其他ê人lóng無法度面對創作ê苦惱。我ê戲劇是關係一个國王kah王后去訪問in國內一个離奇koh有趣味ê城市，以及一隻可愛koh好笑ê驢á án怎kā皇家ê出巡舞kah亂chhauchhau。我m̄管Ramona ê抗議，指派她演hit隻驢á。Kah大多數六年級ê小情人仝款，我分bē清嘲（sau）弄kah調情；我想講只要對她態度惡質，她to̍h會注意tio̍h你。到七年級，我chiah了解，chabó͘ gín'á意愛chapo͘ gín'á對in友善。所以，再會lah，Ramona。

儘管chiahê小事件hō͘ 人心碎，m̄ koh，直到初中第一年過了ê暑假，遇tio̍h Estelle了後，我chiah知影啥物是痛苦。Hit時，我去拜訪老母ê另外一个小弟―Hoppy阿舅，in tau是tī New Jersy ê海邊，我tiāⁿtiāⁿ真期待去in hia。Estelle mā是Haverford學校ê學生，tī校內真出名，她仝款tī hitê海邊城市teh過暑假。Tī海邊tòa幾工了後，我大膽邀請她暗時去遊樂園sńg，她竟然接受！

黃昏時刻，阮一面大嘴pō͘ 食特別hiam ê pizza，一面沿海邊ê柴枋步道散步。Tī步道散步真正美好；她hōaⁿtiâu我ê手股，m̄ nā hō͘ 我感覺家己有chapo͘人氣概，同時mā thang引chhōa我。當阮óa近一个歡樂kah驚叫聲hōahōa嚷ê所在，Estelle大聲hoah講：「He看起來真趣味！」她真興奮解釋講，每兩个人坐tī一台細台車裡，chiahê細台車是koânkoân掛tī一个真大teh se̍h ê摩天輪頂面。當摩天輪 chhèngkoân，se̍h過頂面，koh下降ê時，細台車就tòe teh亂hàiⁿ。Tùi尖叫ê聲來判斷，he kahná是一種冒險，好lah，來去試看leh。

這確實是一个冒險。當阮一達到siōng kôan速kah完全khi斜ê時，因為看bē tio̍h，我就完全失去方向感，分bē清是向頂面á是向下腳；無一下á感覺直直lak落來，koh無一下á soah變成失重（tāng）ê狀態。胡椒pizza tī我墜落來ê時溢起來。我會kā kui个游樂園吐kah滿四界，mā會kā Estelle吐kah kui身軀！我一再kā pizza吞落去，盡全力beh避免毀掉Estelle對我ê印象。我hō͘ 忽然間領悟tio̍h ê人生法則所淹ba̍t：吐tī女朋友ê身上，實在是siuⁿ無chapo͘人氣概lah！

雖然我勉強克制家己kah pizza，m̄ koh，hit晚iáu是一場災難。儘管ánne，續落來ê幾工，我滿心ǹg望Estelle猶原kah意我；事實上，我tī海灘tú tio̍h她ê時，她iáu是hiahni̍h'á歡喜koh友善。M̄ koh，我期待kah Estelle發生羅曼史ê火星，結局並無引發熱烈ê戀情。（真chē年來，我kah Estelle有時iáu會連絡，她kah我差不多同時進入醫學院，chitmá已經是一个醫生。）

無gōa久了後，我成做Haverford學校ê小英雄，á是起碼是一个罕得有ê人物；我是擁有相ián比賽六勝一負記錄ê hitê盲人，而且真gâu壓制對手。記憶中，Haverford學校ê學生，甚至其它學校ê學生，頭一pái開始去觀看相ián比賽kah我。有人傳話hō͘ 我講，有一个真súi，名叫做Vicki ê啦啦隊隊員想beh見我，我掩khàm我強烈ê切望，盡量保持冷靜，ia̍t手講：「當然ē sái得。」

阮ê紹介人tī一條走廊頂面紹介阮相bat。我kah意她講話若音樂ê聲音，歡喜她受我吸引ê明顯氣氛，mā kah意她ê細粒籽。Hit禮拜chhun落來ê幾工，每一个暗時我lóng全心思teh想講beh án怎kah她交往。Siōng尾，老父鼓勵我講：「若beh不時tī阮面前為她煩惱，是án怎你無beh去約她出來？」我khà電話hō͘ Vicki，用一貫溫柔優雅ê語氣提議講：「咱拜五去看電影kám好？阮老父會開車送咱去。」Aiiah！講了soah thutchhê去，m̄ koh，我隨時to̍h想tio̍h，阮hit陣人中間，有真chē人因為年紀細無法度考駕照，所以lóng是靠父母開車chhōa in去約會。 我真m̄敢相信，她kahná是求之不得。
經過hō͘ 人痛苦ê沉悶時光，當拜五暗時teh beh來臨ê時，我計畫tio̍h án怎進行阮ê約會。我bē tàng，絕對bē tàng，ài阮老父chhōa我行到in厝ê門口，兩人khiā tī hia等她開門來迎接我，he實在是有夠pháiⁿ看。M̄ koh，我有啥物妙策leh？我kah老父事先安排好，伊會chhōa我行過一段真長ê人行道，了後走tńg去停車ê所在，koh pōng一聲關車門hō͘ 我聽tio̍h，了後我chiah chhi̍h電鈴，ánne chiah有夠光彩。

一切進行kah真順利，電影一定mā是真好看，因為我無會記得它真pháiⁿ看。老父已經開車來ā，tī戲院頭前等阮。我kah Vicki溜入去車ê後座，我lámtiâu她ê肩胛頭，外表盡我所能（ē）表現自信koh鎮定，心內卻teh期待她會驚叫一聲，chông出去車外。Tī我ê意料之外，她óa身tī我ê脇下（hia̍pē，華語ê「腋下」），無停teh談論電影，歡喜koh多情，kahná我ánne做是非常自然ê。Chit種美妙ê tāichì nà會有可能發生tī我身上leh？一个啦啦隊隊員靠tī我ê胸前。當車來到in tau，kah城裡所有ê chapo͘ 人仝款，我kah她落車，準備beh護送她到in tau門口。我警覺koh驚惶；beh行tńg去停車ê所在會真費氣。M̄ koh，我總會想出辦法。老父並無陪阮行到in tau門口。

行到門口，真不可思議，她kahná teh等待hitê意義非凡ê時刻。我kā家己講，一定tio̍h冒chitê險！我kā她chim，祝她晚安。到taⁿ我iáu m̄知當時我ê嘴唇是chim tio̍h啥物；她若m̄是kā頭oa̍t過去，to̍h是她ê面生嘴鬚。到taⁿ我iáu是霧sàsà。

無論是生嘴鬚á是án怎，第二工我iáu是gôngchhiachhia，幻想kah她ē tàng穩定發展。到拜三，我the̍h出勇氣，koh一pái khà電話hō͘ 她。 「我禮拜五無法度出外，」她真遺憾講：「我tio̍h照顧我ê小弟，m̄ koh，你ē tàng來阮tau。」

真正是oh得相信！我ê幻想有一點á hō͘ 人擔心，因為我十五歲hit時iáu堅持婚前tio̍h保持貞潔，m̄ koh，她明明是teh邀請我進入中學生神祕koh迷人ê「lā舌」（華語ê「舌吻」）世界；Harford學校ê學生kā它稱做「teh親熱」。

當我去到in tau ê時，頭一个悲慘ê暗示隨時出現；有一个chabó͘ gín'á已經tī in tau ā。我想我無應該為tio̍h一箭雙雕來受氣，m̄ koh，她應該tī電話中nauh一下，kā我講mā會有朋友beh來。過一下á，有人來phah門，了後散散á行入來ê是一位hō͘ 人gê神ê人，Vicki紹介講伊是她ê男朋友。

我知影chit个人；chē少知一kóa。我知影kah chiok清楚，所以有一點á無想beh認bat伊。伊一直無出去運動，m̄ koh每工lóng會帶一本無仝款有關舉重ê冊來。伊落第過一pái，koh不時hông停學，終其尾soah hông退學。Tùi ta̍k方面來看，伊lóng kah我bē比得，Vicki nà會kah意伊leh？我深深感覺受侮辱、厭氣，而且伊koh做kohkhah過份ê tāichì，to̍h是完全忽視我ê存在。In隨時開始談論學校ê舞會、in ê約會計畫，kah其他有ê無ê，hō͘ 我感覺家己ná親像是一个竊（chhiap）聽者，甚至kohkhah不如。

她ná會beh kā阮lóng bat ê朋友講她beh見我？Kám kantaⁿ是為tio̍h beh滿足一種好奇心？Kám是為tio̍h ē tàng免費看一齣荒唐戲―一个盲人相ián手來chhōe她chitê啦啦隊隊員？她ná會beh chhōa我陷入chit種對她迷戀ê痛苦情境？He是我一定tio̍h ài忍受而且單獨去安tah ê孔嘴。我到底是有做啥物，á是無做啥物，致使hō͘ 她對我chiahni̍h無情？是啥物hō͘ chitê人hiahni̍h有信心，認為我無可能是一个有潛力ê情敵？

Tī hiahê時刻裡―以後mā bat koh發生過―我發見我竟然感激家己是一个盲人。她會ánne對待我，kā我當做無感覺ê物件，親像pùnsò，親像啥物lóng m̄是，一定是因為我是盲人。若是無法度責怪失明，ánne就kantaⁿ ē tàng責怪我家己，he會hō͘ 我無法度忍受。

Hitê痛苦ê暗時beh結束ê時，Vicki用雙手握tiâu我ê手，kahná teh談情說愛，輕聲講：「Dave，我真正想beh kah你做朋友，咱來做伙做tāichì。」我親像一个戇大呆，kā he當做是ǹg望ê信號。Kiámchhái她chiah tú開始了解我……kiámchhái我ê一个朋友kah她ê一个朋友有teh交往，因為ánne，一兩pái á阮ē tàng雙雙對對tī in tau附近手鉤手，á是手牽手散步。我想beh愛她。雖然我無確定她真正是我想beh愛ê人，m̄ koh，我真積極想beh phah入去學校ê社交kho͘'á內；她tī社交kho͘'á內ê地位極koân，若是她開始kah意我，我to̍h有機會參加siōng好ê聚會，好事to̍h會toèleh來ā。
M̄ koh，我ê計畫無成功。

Hit段時問裡，tī我八年級hit年tahtah，Helaine不斷tùi Overbrook盲校khà電話hō͘ 我。Beh抗拒hitê引誘真oh，因為我切望有人kah意我，而且Helaine顯然是teh kah意我，m̄ koh，我koh khah切望ē tàng證明家己tī公立學校有成功ê社交生活。我一直聽tio̍h Reinhold女士ê「我kā你講過à」ê chhoh罵聲；我bat ê一位 tùi Overbrook盲校tńg去讀公立學校ê學生，當伊tńg去拜訪Overbrook盲校ê時，Reinhold女士kā伊刺激講：「我敢kah你相輸，你一定想beh koh tńg來chia，beh kah你仝款ê人做伙。」伊ê精神受tio̍h打擊。Reinhold女士有達tio̍h她ê目的，因為幾禮拜了後，伊tńg去à。了後，伊試beh對我解釋，講：「外面ê gín'á bē親像chia ê gín'á對你hiah好，iáu是Overbrook盲校比較khah好。」伊ê意思是講，tī盲人世界稱王，比tī真實世界中用殘障ê身分kah人競爭會khah自在。

我無beh指責伊khah意愛好過日，m̄ koh，我無想beh ánne；我ài beh tī公立學校，tī每一个人ê世界有所成就。若是我無法度通過Vicki來完成，我mā會chhōe其他ê人來達tio̍h我ê目的；m̄ koh，Helaine代表我一定tio̍h ài謝絕ê引誘。

請容允我koh講一个恐怖ê故事，he是發生tī九年級ê時chūn，是Joyce ê故事。Joyce kah一个相ián隊員Eddie McConnal teh交往。Eddie是我ê好朋友兼隊友，m̄ koh，伊不時去參加hiahê真chán ê舞會，我卻lóng無受邀請；我一直期待有一工伊會幫贊我去kah hit群人做伙。Tī學校ê一个大型舞會來臨chìn前，Joyce kah Eddie起冤家soah分手，Joyce並無掩khàm她ê心碎kah感情創傷。La̍ktiâu chitê好機會（表面上看起來是teh同情她），我講：「我kah妳交往。」

我戀愛ê消息傳到阮年輕ê相ián教練Dale Bonsall hia。對校內真chē學生來講，伊是一个大兄，koh差不多ná親像老父，我非常尊敬伊。「聽我講，」教練敦促我講：「Kah chitê chabó͘ gín'á斷絕來往，她無適合你，她會傷害你，mài kah她交往。答應我，有一工我會紹介一个空中小姐hō͘ 你。」我m̄知tio̍h án怎chiah跳會出情網，我想我可能mā無真正想beh跳出來；Joyce是一个大家相爭beh ài ê chabó͘ gín'á。 Tùi我提出邀請到舞會來臨ê hit段時間，我聽講Eddie kah Joyce重新和好，m̄ koh，我無計較，照常手the̍h胸花，興chhihchhih來到in tau門前。Tī舞會裡，她一直講她tio̍h去洗手間，一去to̍h久久無koh tńg來，留我一个人面對無言ê壁堵。

我無確定我是hit時to̍h想tio̍h，卻iáu容允chit款tāichì發生tī我身上，á是事後chiah想tio̍h。M̄ koh，我懷疑Eddie mā有來參加舞會，伊可能有chhōa舞伴，mā有可能根本都無。In兩人tī hia見面，kiámchhái甚至同齊跳舞，我只是hông利用來填補làng縫ê人。

Siōng慘淡ê tāichì發生tī舞會了後ê小派對（party），he是我一直切望beh參加ê派對之一，是大約五對男女同齊亨受美食ê小聚會。我坐tī一隻koân背ê椅á頂，就tī Joyce ê邊á。當柔和ê氣氛漸漸轉成莫名ê寂靜ê時，Joyce惡作孽對我講耳孔話：「你kám知其他ê人teh chhòng啥物？」其他ê人lóng teh chhòng好khang ê tāichì―我一定tio̍h強調，這tī Haverford學校是teh指kahná是愛撫ê舉動，m̄ koh，我卻親像一个牧師坐tī hia。Joyce ê耳孔話無憢疑是teh誘拐我。我壓制我瞬間ê興奮kah緊張，伸出一支手beh去kā她攬。

「Aiiah！」她真有技巧來應付講：「我tio̍h去chhōe一kóa物件食。」然後就tùi椅á頂消失去。

我確定ta̍k人lóng teh金金看我kah我hit支lám無物件ê手，koh強忍tiâu.leh，無大笑出來。我感覺家己親像一个大阿西，tī chit群人ê面前受盡侮辱。我真想beh un落去土腳啼哭，á是鑽入去土腳消失，á是死去，á是永遠lóng mài koh tī學校露面。

我一再kā家己講，tńg到厝了後mā一再kā父母講，這一切lóng是因為我是一个盲人。我一定tio̍h ài ánne相信。 約會是一件難事，需要計畫、注意細節，mā需要堅持kah耐心。若是我tú tio̍h一个家己感覺可能有趣味ê人，koh譬如講我知影我kah她後學期會上仝一門課，我to̍h會開始計畫beh án怎安排我kah她tú好坐做伙。我一定tio̍h ài想出冷淡ê方式，來chhōe出是tó一位心適ê chabó͘ gín'á坐tī我邊á，然後想看beh án怎開始對話；每一項kiámchhái lóng tio̍h用一工到兩工ê時間來計畫。Tī深入發展chìn前，我lóng tio̍h問我ē tàng相信ê人：「她生做kám有súi？」In大部分lóng會照實kā我講。 另外一種計畫是設法了解我想beh認bat ê chabó͘ gín'á tang時會經過tó一个走廊，我chiah ē tàng想辦法kah她相tú。親像講，若是tī第四節課kah第五節課之間，我kah意ê chabó͘ gín'á會經過一个角落去換教室（意愛一个chabó͘ gín'á ê代價to̍h是ài會記得她ê功課表）；ánne，第四節下課ê時，我一定tio̍h盡速離開教室，koh使用手杖趕緊行到hitê角落，thang好tī她經過ê時tú好khiā tī hia。了後，我kantaⁿ ē tàng期待她講一聲：「Haih，Dave。」只要她叫我ê名，我ê心內就會癲狂，開始一chūn極端ê興奮。我可能會用預先細膩（sèjī）準備好勢ê「自然」ê話語來回應她，其中有一kóa是她一定tio̍h回覆ê字句，ánne to̍h ē tàng kah她輕鬆交談，而且同齊行幾公尺ê路。有時，我kantaⁿ聽tio̍h「Haih，Dave。」to̍h會感覺心滿意足，bē無chhái工。

若是隨意交談過幾pái，我感覺應該是ē sái提出邀約ê時，我khah意愛khà電話提出邀請。Tī電話中，我kah對方khiā tī平等ê地位，我m̄免擔心眼神接觸ê問題，á是她到底是tī我頭前，á是已經恬恬á行來到我ê邊á。

Kui个約會過程，我會擔心家己是m̄是有注意tio̍h所有必要ê tāichì，親像講我褲ê thoah鏈á kám有thoah好勢？我發展出一个緊速檢查ê動作；一直到真久了後，我chiah知影明眼人mā不時ánne teh做。另外一件一定tio̍h ài記tiâu ê是，m̄ thang談論任何人ê tāichì，尤其是chabó͘ gín'á ê tāichì，因為in可能會出現tī附近。

總講一句，約會絕對m̄是一件輕鬆、享受ê tāichì，顛倒是tio̍h ài下真大ê工夫。M̄ koh，我iáu是決心beh成功。我不時kā前－pái ê約會經驗掛tī心內，做為改進下pái約會ê參考。我tiāⁿtiāⁿ kā Cheri講，我一直到結婚了後，chiah開始欣賞chabó͘ gín'á；忽然間，我終其尾自由ā，ē tàng放鬆家己，kantaⁿ單純kah chabó͘ gín'á做朋友to̍h好。

我厝裡ê人幫贊我度過chit段探索、痛苦kah學習ê青春期。Tú親像以往，我ê父母支持我往一个方向，Bobbie卻tiāⁿtiāⁿ真可靠，kā我sak去倒反（tòpéng）ê方向。Ta̍k pái當一个chabó͘ gín'á拒絕我ê邀約ê時，m̄管她ê理由是啥物，我lóng認為她是因為m̄知beh án怎kah盲人做伙，á是對盲人bē感覺有興趣。因為ánne，我soah感覺hō͘ 人貶低、挫折、無助kah受氣。老母會同情我，講「He siuⁿ過分lah。阮kám ē tàng kā你tàusaⁿkāng？」Kantaⁿ是ánne ê同情to̍h ē tàng對我有幫贊。老父會koh khah直接而且積極，講：「Chhōe別人好lah。」Bobbie往往會tī chit時插入來，講一kóa非常實際kah顧人怨ê話：「Dave，你tio̍h ài會記得，每一个人lóng仝款，nà有人ê約會邀約無受拒絕ê leh？」Koh khah慘ê是，她iáu會補充講：「我tiāⁿtiāⁿ ǹg望chapo͘ gín'á khà電話約我，m̄ koh lóng bē tàng達tio̍h願望。」Chit句話大大kā我打擊，因為Bobbie是學校ê風雲人物之一，我tiāⁿtiāⁿ感覺她ê約會日程表排kah滿滿，而且無啥物麻煩。

Bobbie tī我ê父母無條件ê溫暖同情頂面phoah冷水，而且mā是teh phoah醒我ê自我憐憫，he對我其實是有真大ê助益，雖然當時我並bē tàng明白chit點。親像講，我tī Lansdale kah一个chabó͘ gín'á約會，hia離厝約有一點鐘ê車程；老母kah老父會講：「Ánne，阮會開車送你去hia。」M̄ koh，Bobbie會跳出來講：「Dave，你應該家己想辦法去hia，m̄ thang tiāⁿtiāⁿ想beh麻煩父母。」 吸塵器事件koh重演à，我翹嘴koh面àu面臭。

父母會對她非常受氣，講：「Bobbie，妳應該對Dave khah體貼一點à。」


「伊應該對lín khah體貼一點à。伊tiāⁿtiāⁿ ài麻煩lín，kiámchhái iáu有其它方法ā。」我並無認為Bobbie當時所關心ê kantaⁿ是án怎改進我ê狀況，á是保護父母而己；無啥物thang懷疑，她是tī無意識中teh爭取我tùi父母得tio̍h ê注意，因為he往往是以犧牲她做代價ê。M̄ koh總體來講，結果是正面ê；她ài我有防衛ê心理準備，ài我認bat chitê世界（hō͘ 我ê父母人性化去ê世界）並m̄是lóng會照我ê意思；tī我要求別人幫贊chìn前，我一定tio̍h ài先努力走chhōe自助ê方法。同時，Bobbie mā提醒父母，in（kah其他盲童ê父母仝款）siuⁿ過頭kā我當做嬰á看待，in應該ài防止koh ánne做。我kah我ê父母lóng m̄ bat確定過，是án怎in會無親像大多數ê盲童父母ánne過頭保護我，致使hō͘ 我避免成做情感上ê殘障；m̄ koh，我確信Bobbie對這有真大ê功勞。

雖然hō͘ chabó͘ gín'á拒絕會hō͘ 人chhìn心，m̄ koh，我十分堅持固執。有一pái，我khà名單中間ê十一个chabó͘ gín'á ê電話了後，chiah chhōe tio̍h一个舞伴去參加舞會。厝內氣氛緊張，差不多beh hō͘ 全家起狂；老母連飯都食bē落去，她恐驚每khà一pái電話to̍h會增加一pái我ê失敗感。

有一工，老母知影我khà電話是tùi學校siōng受歡迎ê chabó͘ gín'á開始，她感覺真痛苦，問我講：「Dave，你ná會beh看koân無看kē？Kám講無一kóa善良、溫柔ê少女會ài你khà電話邀請她？」 Kiámchhái有，m̄ koh，我ná會知影？受歡迎ê人通常lóng是因為in外向chiah受歡迎；in容易kah生份人講話，hō͘ 大家知影in ê存在，所以我kantaⁿ可能知影chiahê chabó͘ gín'á nātiāⁿ。我當然mā可能會kah意tī安靜ê角落家己一个行來行去ê chabó͘ gín'á，m̄ koh，我beh án怎知影她tī tó位？所以，我無其它ê選擇，kantaⁿ ē tàng加入激烈ê競爭。

除了這以外，我的確mā比其他chapo͘ gín'á koh khah無願意勉強接受khah低ê標準；我tio̍h ài請別人幫忙確認hitê chabó͘ gín'á是m̄是有súi―用in ê標準來看。Wayne Hey是我siōng好ê朋友，我設計出一種評分系統，ē tàng hō͘ 伊用緊koh bē hō͘ 人知ê方式，kā我講hitê chabó͘ gín'á ê分數；阮ê評分等級是零到五，我tùi五方面來為teh beh去見面（á是已經見過面）ê chabó͘ gín'á phah分數：迷人ê頭毛kah面容得一分，其它胸坎á、khachhng斗、khachhngphoé、腳腿各一分。Chit種遊戲hō͘ 我感覺家己真有chapo͘ 人氣概，m̄ koh，當然啦，事實上是我忽略一件事：其他chapo͘ gín'á無一定了解chiahê chabó͘ gín'á kah in ê體格。

有一工ê演講課，我hông指定辯論色情ê問題。我tio̍h ài辯論講色情是罪惡ê，而且一定tio̍h受禁止。這kah我ê想法bē合，m̄ koh，我iáu是利用chitê機會來成就一件好事。我說服一个朋友，kah我ê老母，因為我感覺我一定tio̍h ài得tio̍h她ê許可。我kā她講，tī無用第一手方式了解啥物是色情chìn前，我無法度辯論反對它。我ê論點chiok有說服力，所以，我ê朋友kā《Fanny Hill》chit本色情小說錄做錄音帶hō͘ 我聽。Hit本冊hō͘ 我驚喜無soah，它敘述kah非常生動，而且chhōa你進入無止境ê探險。後來，我偷偷á kā siōng精彩ê部分濃縮tī一捲（kńg）錄音帶，而且藏tī一个秘密ê所在，ná親像大多數同學kā一兩本色情雜誌藏起來仝款；而且，親像in會直接掀開中央kui頁áu起來ê圖片仝款，當我開始做chapo͘ gín'á愛做ê tāichì ê時，我to̍h會開始聽《Fanny Hill》，hō͘ 它點to̍h我ê慾望。

Tī我高中時期ê一個熱天，老母kah老父用in粒積（lia̍pchek）ê一大部分錢chhōa Bobbie kah我去歐洲旅行；hit pái ê旅行無意中深化了我ê性教育。Tī堂皇ê博物館裡，當厝裡ê人欣賞古典裸體圖畫ê時，我就學習欣賞雕像。一開始我有一點á驚見笑，料想其他ê遊客會因為看tio̍h我ê行為來抓狂，後來我開始撫摸雕像，ài摸gōa久to̍h摸gōa久。

Tī Florence有真chē Michelangelo ê作品，包括David王（原作品koânkoân陳列tī基座頂，我摸bē tio̍h)，我發見我kah意hiahê完美ê chapo͘ 人ê雕像，kah kah意hiahê chabó͘ 人ê仝款。當時―chitmá mā仝款—我hō͘ hitê筋肉結構所感動；kiámchhái是因為筋肉是teh暗示相ián ê成功；kiámchhái是因為我bat phah拚練舉重hit類ê運動來鍛鍊家己ê筋肉；mā kiámchhái是因為我看bē tio̍h，而且無人教我抑（at）制同性戀ê傾向，he是人人chē少lóng有，mā hō͘ 人認為一定tio̍h抑（at）制ê行為；不管án怎，我kantaⁿ知影我意愛hiahê雕像。

Hiahê博物館iáu有提供另外一个值得回憶ê學問，he比較是khah屬tī人類學，m̄是性教育。Tī號稱浪漫之都ê巴黎，博物館ê守衛一看tio̍h我伸手去摸hiahê珍貴ê大理石胸坎，in to̍h隨時向我衝過來，ná親像警察衝向銀行搶劫犯。「M̄准摸，m̄准摸！」，in ánne命令。相比之下，tī意大利，守衛仝款會衝過來，m̄ koh一旦in發見我是盲人，in to̍h苦bē得趕緊掠我ê手去摸siōng精彩ê所在，驚我kiámchhái會làukau某一kóa物件。意大利chiah會堪得hông稱做浪漫ê國度。