《主編e5話》

 | | | 轉寄

用ㄅㄆㄇ輸入台語漢字kám會輕鬆？

作者 Chuniok 2006.04.02

br> 敬愛 ê 田媽媽有講過：「母語運動 ê 成功，就是每人 lóng ē tàng 隨時隨地自由講母語。」台語文運動最大 ê 瓶頸就是台語漢字輸入法，用完全無仝發音系統 ê ㄅㄆㄇ輸入來 phah 台語漢字，kám 會自由輕鬆？

2001年九月，應聘來Harvard大學教台語ê李勤岸教授，mā 來阮Boston 台灣基督教會成人主日學教阮台語。 我 tam tio̍h 母語 ê súi 了後，就決心放棄寫過百萬 gōa 字 ê 華語寫作，tī 李教授 ê 指導下，真緊就[欲罷不能]，mā 開始寫台語詩。李教授 mā 有教阮蘇芝明先生開發 ê HOTSYS 輸入法，但 hit 時我 iáu 是習慣用華語ㄅㄆㄇ ê 自然輸入法。

有一工李教授提醒我講，用ㄅㄆㄇ輸入台語漢字，tī 腦中 tio̍h 經過翻譯，若用台語輸入就 ē tàng kā 想 beh 講 ê 話直接寫出來，加真順暢爽快。我緊 kā HOTSYS學會曉來輸入台語漢字，白話字就phah數字了後koh用劉杰岳先生開發 ê TP來轉做調號。Oah!真正加 chiok 爽快 koh 輕鬆。

李教授講ê確實無 m̄ tio̍h,寫作時 ê 文思 lóngbē 斷節，siahsiah叫一直去，擋 bē tiâu ê 輕鬆。本來 bē 曉寫詩 ê 我，mā kap人寫詩，一篇koh一篇，kahná 有詩人 ê 款式kap感覺。Hit當時 ê 台灣公論報、太平洋時報 kap 台灣教會公報社 lóng 有 teh 刊我ê詩作。

想起用ㄅㄆㄇ輸入台語漢字 ê 痛苦時間，明明 beh phah「我」(góa)，頭腦底 tio̍h 想「ㄨㄛˇ」來phah「我」，hitê 腦海中 ê 「急轉彎」，hō͘ 我 ê 文思 m̄ 知 tńg 到 toh 位去，真無簡單 kā 文思 chhōe 倒 tńg 來，soah bē 記得 m̄ 知 beh án 怎續落去。所以 beh 用電腦 phah 台語文，tio̍h 使用台語系統 ê 輸入法，chiah 會自由輕鬆。

大家 lóng 嫌李登輝前總統台語演講，比用華語或日語 lóng khah 差。台語是伊 ê 母語 neh, thài 會 ánne? 伊 ê 母語是台語 neh! 原因出 tī 伊 ê 演講稿是用華語寫 ê,伊 ê 頭腦 tńg bē 過來 lah。我 kap 台語信望愛共同開發 ê 「華台主動轉換」軟體，需要 ê 人 ē tàng 上網 ( http://taigi.fhl.net )試看bāi,希望台語演講者 lóng 有台語 ê 演講稿 thang 用。

Bat tú tio̍h 主日崇拜 ê 司會者講：「我 chitmá 使用現代中文譯本聖經用台語來讀。」當伊讀到「我們」 ê 時，真輕鬆 kā 伊用台語讀做「咱」；但 koh 讀續落去 hit 句 ê時，伊 chiah 發見m̄ tio̍h, pháiⁿ 勢 kah 講：「失禮，『阮』 chiah tio̍h。」可見 beh kā 華語 ê 文章讀做台語是無法度自由輕鬆 lah。

XP電腦上市了後，我隨買來使用。害 loh! HOTSYS bē tàng 用，倒 tńg 去用ㄅㄆㄇ注音方式 phah 台語漢字，jú phah jú 痛苦，只好舊電腦留落來 phah 台語漢字用。但 tńg 來台灣總 bē tàng 帶兩台電腦，我就去劉杰岳先生 in tau 請教，伊教我用微軟 ê 「通用輸入法編輯工具」，詞庫是用當時免費下載 ê 「蓋讚」， 我有將 chitê 輸入法 tī TGB 網路頂報大家知。使用一段時間了後，我將詞庫修訂增補，kā 安裝步數整理出來，thang hō͘ 大家方便使用。 今年 koh 得 tio̍h 蕭平治老師 ê 支援，開發 KKS( kài 輕鬆)台語漢羅詞庫輸入法，有縮寫(abbreviation) ê 速寫功能，ē tàng hō͘ 咱電腦書寫台語文，m̄ 但速度贏過ㄅㄆㄇ輸入法，koh自由自在 kài 輕鬆。Siōng 重要 ê 是，KKS輸入法 ē tàng 鍛鍊你 ê 台灣羅馬字，幫贊你 ê 台語大進步，因為咱是用台灣羅馬字輸入，m̄ 是用無仝系統 ê ㄅㄆㄇ輸入。