《主編e5話》

 | | | 轉寄

台語聖詩伴奏MP3 免費下載

作者 陳鳳翔 2006.11.12

常有其他教會機構或出版業界ê朋友對我講：「Lín信望愛資訊koh ánne全義工拚落去，chhòng一kóa免費ê信仰資源出來khǹg tī網路頂四界送，kám講阮lóng boài活loh。」

我總是笑笑á oló in講：「lín ê物件lóng tī專業水準以上，阮toh位kap lín能比得。阮ê內容有一半只有業餘ê水準。」續落來koh無bōe記得「激勵」in：「lín專業ê若無做kah比阮業餘ê khah好，hit種lín thàn bē tio̍h錢也是應該ê lah！」

不過，我卻無希望信望愛ê存在會威脅tio̍h其他教會機構，但我koh同時認為應該tio̍h滿足信望愛資訊成立當初設定ê對象ê讀者：非基督徒、慕道友，以及經濟匱乏但又koh需要信仰資訊ê基督徒。

關於chitê問題，我是非常慎重帶入祈禱，希望上帝ē tàng hō͘我明白關於信望愛資訊ê未來行向kap定位。特別是阮已經具有法人機構ê身分將近一年loh。阮是m̄是iáukoh boeh繼續維持全義工型態？á是比照其他教會機構模式，也聘請全職同工、有辦公室接電話ê職員neh？

但是一想tio̍h人事經費固定龐大支出，身為執行長ê我就tio̍h用時間tī募款頂面，就無時間thang投入內容經營，無經過思考ánne kám算會合？畢竟目前信望愛資訊一年只要一百萬就就ē tàng存活，何必自chhōe麻煩寫企畫案、拜訪金主，只為求有全職行政同工，但實際上對網頁內容無真大ê助益，讀者也無法度感受tio̍h有什麼差別。

有一工暗時，kap幾個tī大學裡工作ê朋友聊天。一位tī教務處工作ê朋友講：「hitê『五年五百億元邁向頂尖大學計畫』突然tàn落來一堆錢tī頭頂，根本m̄知該án怎用，時間又koh真趕，最後就只ē tàng亂開一場。真是kā阮chiahê承辦人員chhōe麻煩。」另外一個比較khah積極思考ê講：「妳mài ánne講lah！第一年m̄知án怎用，第二年就知影án怎用tī重要ê所在lah。這也是一種學習，阮iáu是tio̍h感謝教育部。」

我聽了，突然想tio̍h kám bē有一工上帝感動大家、或是某一個有錢人努力奉獻，信望愛資訊突然湧入一堆錢。但是因為平時預算編列小錢、省錢習慣ê阮，無規劃大錢 ê經驗，便像我he tī大學工作ê朋友仝款，m̄知án怎用，便亂開了起來。我便想tio̍h我該好好á預備心，承接隨時可能來ê大恩典，thang hō͘大錢來臨ê時chūn，也ē tàng照上帝ê心意來使用，無浪費。

一工暗時chhiapéng睏bē去，兩個問題tī腦中lìnlòng叫，忽然間上帝hō͘我一切lóng明白loh，如何tī在兩者張力中間chhōe tio̍h平衡點。這實在tio̍h感謝「長尾理論」。

所謂ê「長尾理論」，簡單來講就是一件商品若順利推出，tú開始tī廣告行銷ê助力下，真chē人購買，甚至以量販ê形式賣出。但跟tòe時間，漸漸退了流行，伊ê銷售曲線漸漸滑落，後面ê交易量就是lânlânsansan、散戶khah chē。到後面chit段，就是所謂ê「長尾」。Tī過去，hiahê商人只會曉把握tòa頭前熱銷ê時段，大賣特賣，盡量交易，後面lânsan ê「長尾」時段，boài koh加浪費時間、人力成本落去。但現在ê商人，思考怎樣繼續得tio̍h「長尾」時段ê商機。
Á我boeh講ê就是chitê「長尾」時段。Tùi基督信仰ê角度來看，「長尾」時段應該tio̍h留hō͘ sànchhiah人。Ná親像tī舊約聖經《路得記》咱會知影以色列人ê麥田，tī收割phah捆chhun落來了後，會留一kóa麥穗hō͘ sànchhiah人去拾(khioh)。因此，對tī營利ê教會機構，in總是ē tàng盡量thàn取頭前熱賣ê時段，但是後面lânsan ê「長尾」時段，應該回饋社會。

基本上，信望愛資訊一半ê文章內容，已發表tī其他刊物上。因為著作權屬tī作者本人，作者等待其他刊物刊登過其文，便thang the̍h來捐hō͘信望愛資訊koh再使用，這就是非常典型ê長尾理論運用。另外，網頁設計、撰寫程式、網站管理、翻譯、朗讀、校對……等義工也雷同。In tī家己ê專業上獲利，會得thang謀生，tī下班了後，將上帝所賞賜ê專業kap才情，透過參與信望愛網路服事，回應上帝恩典。

Ná親像chitpái信望愛資訊新ê好康提供，由杜謙遜牧師提供台語聖詩投影片，以及李瑞雄長老提供台語聖詩伴奏MP3檔案。Khǹg tī http://taigi.fhl.net/song/ 。台語聖詩出版已經超過五十年，按照現行ê著作權法規，會得thang釋放還hō͘社會大眾。這也是一種長尾理論，無什麼人或機構組織有權一直霸佔上帝hō͘咱人類ê智慧，無boeh分享出去。Chia再次感謝杜謙遜牧師kap李瑞雄長老in兩人ê慷慨kap辛苦製作ê奉獻。Hō͘ hiahê世界各地缺乏司琴ê弱小台語教會，thang得tio̍h幫助。

也因此，即使信望愛收tio̍h一大筆奉獻，阮也bē去侵犯tio̍h其他相關基督教出版業ê生存空間。相反ê，阮會致力tī一kóa基礎工作，hiahê非常重要、[叫好不叫座]，出版業thàn bē tio̍h錢、或真難thàn tio̍h錢ê部分。好比講， 聖經希臘文、希伯來文字彙分析parsing。又如，[珍本聖經典藏計畫]

因為新約聖經《以弗所書》ánne寫：「用和平彼此聯絡，竭力保守聖靈所賜[合而為一]ê心。……連tī元首基督，全身lóng靠伊聯絡得合式，百節各按各職，照各體ê功用彼此相助。」

執行長 陳鳳翔敬上