《主編e5話》

 | | | 轉寄

得勝ê鼎金教會─回應教會公報2866期宋信樂牧師文

作者 Chuniok 2007.04.15

真歡喜讀tio̍h宋信樂牧師ê「年輕人+母語禮拜=教會有未來」，這是我2001年跟tòe李勤岸教授開始台語文運動以來，siōng興奮ê時刻，終於有教會用實際行動來行向有ǹg望koh得勝ê母語禮拜。 我參與以台灣羅馬字協會為主ê台語文運動，一開始lóng以本身是長老教會會友來展講：白話字是咱長老教會ê傳承落來ê。有一工受一位m̄是長老教會ê白話字前輩指責講：「Lín長老教會siōng無效，kanta一位鄭兒玉牧師，其他lóng無效！」

我深入去探討chit句話ê來龍去脈，原來有一陣疼惜母語ê人，in為tio̍h beh學台語，挨挨陣陣去台南神學院鄭兒玉牧師開設ê白話字班認真上課。了後in koh成立「台灣羅馬字協會」來推動白話字，kā台灣羅馬字傳承落去。根據鄭兒玉牧師ê講法，現此時台灣羅馬字協會ê會員有95% m̄是基督徒；若根據創會會長ê講法，有98% m̄是基督徒。Tī hit中間，我teh展「我是長老教會」，莫怪ài hō͘人指責。

Chit句話對我ê刺激真大，我無受氣，tńg去檢討長老教會ê實況：tùi總會、神學院開始到各地教會，一直向迫害咱母語ê「國語」投降，出版品kap網站大部分lóng無母語版，台語聖經iáu是75年前hit本巴克禮修訂ê白話字聖經，無現代台語譯本聖經，教會也一直開設「華語禮拜」等等悲慘ê狀況。

母語tī台灣社會強強beh hō͘華語淹死，堅持本土意識ê長老教會iáukoh用華語beh來kā咱ê母語淹死，教會外ê人teh hoah救人，咱kám無聽見？

我chitê人bē堪得人刺激，為tio̍h無ài hō͘人講「長老教會siōng無效」，我暝日phah拚整理白話字文獻數位化，提供人光出版社出版《平民ê基督傳》、《紅皮聖經》、《荒漠甘泉》、編輯台灣公論報台語文專刊─蕃薯園，等等。2005年四月開始koh kap信望愛網站合作開設「台語信望愛」( http://taigi.fhl.net )，將紅皮聖經、巴克禮聖經全羅、漢羅上網，hō͘咱台語聖經ē tàng kap其他語言版本對照讀。我ê努力奮鬥過程並無孤單，長老教會各機構也有支持，但iáu有真大ê進步空間！大家tio̍h koh再努力phah拚！

宋牧師文中提起現今少年人聽無一kóa「教會語言」，這是咱長老教會ê嚴重問題，也是咱需要趕緊積極解決ê問題。75年前出版ê巴克禮白話字聖經，對咱母語禮拜ê貢獻無話講，但也有一個「後遺症」，就是造成約有10%「教會語言」kap一般社會語言無仝。因為語言是活ê,各種語言ê聖經lóng有teh不斷更新修訂，獨獨咱台語聖經，75年來無新版本出版。我將紅皮聖經、巴克禮聖經全羅、漢羅上網ê目的，是boeh呼籲大家緊來更新出版台語聖經。

總會聖經小組努力十四年久ê《聖經現代台語譯本》新約tehboeh出版，請大家來kā in鼓掌。我有參與漢羅翻寫兼校對ê工作，tùi頭到尾一字一字kā伊讀落來，用現代台語讀聖經，實在有夠爽快，有夠chán!

Taⁿ現代台語譯本聖經(白話字版)tehboeh出版à,當事者soah煩惱出版了後，若無人會曉讀白話字，kám賣會出去？當事者有想boeh發起「白話字新運動」，把握2006年九月二十九日教育部公布「台羅拼音方案」(90% kap教會羅馬字仝)ê好機會，將咱信仰前輩留hō͘人ê寶貝文化資產─白話字救活起來。阮當teh想boeh án怎著手ê時，感謝主！鼎金教會就是現成ê模式，呼籲全國ê教會向in學習to̍h無m̄ tio̍h lah。

得勝ê鼎金教會ē sái講是「母語流失」狂流中ê「中流砥柱」，宋牧師文中詳細寫出in ê實際行動，值得咱大家來學習。Ǹg望長老教會總會ē tàng以鼎金教會做模範，向各教會推廣chitê「年輕人+母語禮拜=教會有未來」模式，腳踏實地，回復咱信仰前輩留hō͘咱ê三代同堂「母語禮拜」，教會ê興旺也tio̍h tùi chia開始，感謝主！