《歷史上ê主耶穌》

 | | | 轉寄

第三章_2 以色列簡明史（含舊約對耶穌基督ê預言）

作者 杜英助, 台譯：Lîm Chùnio̍k 2020.02.09

1）話講：公元前60～53年，羅馬帝國tāi先制定三巨頭共同執政ê體制，由龐貝／龐培、凱撒kah克拉蘇三位將軍主管政事，來制衡元老院共和時代ê勢力，m̄ koh，chit三位將軍掌權了後卻彼此爭奪權力。公元前59年，元老院委任凱撒做執政官；克拉蘇tī公元前54年tī一場戰爭中陣亡；龐貝tī公元前48年率軍東征小亞細亞（土耳其），揮兵南下敘利亞、偤太地，soah tī南征埃及ê時，hō͘ 凱撒kah埃及豔后克麗奧佩特拉聯軍攻敗，被追殺來死。

了後，凱撒kah克麗奧佩特拉戀愛，生一个王子。當凱撒帶兵tńg來羅馬了後，克麗奧佩特拉 mā帶王子去羅馬，受tio̍h盛大ê歡迎。凱撒將軍tī受tio̍h羅馬市民熱烈歡呼中自稱做「帝」獨攬大權，實施專制獨裁政治；此舉無受元老院ê貴族kah護民官ê完全同意，當時有兩人（to̍h是布魯特斯kah卡西斯）就tī凱撒宣布稱帝後，到元老院ê門口kā伊刺殺，當時其他ê元老mā續接用刀kā伊鑿死。了後，埃及豔后就chhōa她kah凱撒所生ê王子tńg去埃及。

2）凱撒皇帝tī公元前44年3月15日受殺害，隔年羅馬koh tńg來到第二pái ê三巨頭：由屋大維（凱撒ê養子）、安東尼（凱撒手下ê將軍）kah肋比多共同執政。

3）關係希律ê老父是以東人（以掃ê kiáⁿ孫）安提帕特（Antipater)；早年bat tī偤太地哈斯摩政府任職，m̄ koh，tī羅馬凱撒追殺亡命逃到埃及ê龐貝ê時，伊bat協助凱撒ê軍隊打擊龐貝來表示效忠，因為ánne，soah得tio̍h凱撒頒hō͘ 伊羅馬公民ê特殊身分，而且任命伊擔任偤太地ê總督來掌理哈斯摩王室ê政務。所以，哈斯摩ê偤太人國王許爾堪ê王權、王位被架空。

安提帕特為tio̍h堅固家族ê地位，任命伊ê大kiáⁿ法賽爾管理偤太kah約旦河東岸ê比利亞，á第二kiáⁿ希律去管理加利利；tī公元前44年凱撒受刺殺身亡ê時，安提帕特選m̄ tio̍h pêng khiā，khiā tī行刺者布魯特斯kah卡西斯貴族chit pêng。M̄ koh公元前42年，屋大維kah安東尼tī馬其頓ê腓立比phah倒卡西斯ê部隊ê時，希律忽然醒悟伊ê老父選擇錯誤，就用大筆錢kah大量ê財物o͘se安東尼kah屋大維，藉chitê理由來向in賠罪。Chitê明智ê做法提升希律tī加利利ê地位，甚至有一kóa偤太人ê代表，mā要求安東尼beh廢除希律ê父兄tī偤太地ê統治權。

後來，希律ê父兄tī波斯人侵入偤太地ê時被波斯人殺害，á希律kah伊ê厝裡ê人以及哈斯摩公主米利暗，卻逃到死海西岸ê馬撒大要塞高地避難。無gōa久，希律kā厝裡ê人留tī安全ê馬撒大堡壘，坐船前往羅馬向安東尼kah屋大維求救。安東尼kah屋大維認為波斯人佔領偤太地了後，真緊ē koh再攻打埃及。為tio̍h保護埃及hō͘ 羅馬ê糧食，而且確認希律對羅馬ê效忠，隨時協助而且利用希律反制波斯人ê軍隊；希律前後用三年ê苦戰chiah收復耶路撒冷kah加利利。

希律tī公元前37年掌握控制偤太地kah加利利ê統治權，為tio̍h扶tháⁿ偤太人，伊koh娶偤太人哈斯摩公主美麗清秀ê米利暗做bó͘；而且前往羅馬得tio̍h安東尼kah屋大維ê推薦，由元老院任命希律為「偤太人ê王」，歷史上稱做希律王á是稱大希律，簡稱希律王。