《歷史上ê主耶穌》

 | | | 轉寄

第一章_1 聖地以色列古今簡介

作者 杜英助, 台譯：Lîm Chùnio̍k 2019.12.22

一、宗教︰
1、迦南地原住民︰信奉巴力(農業風暴之神)、亞舍拉(繁殖女神)、多神教。
2、亞伯拉罕ê kiáⁿ孫︰以實瑪利、以撒、雅各，lóng是一神教。
21 以撒之大kiáⁿ以掃，to̍h是以東人。信奉迦南地ê神明；以撒之第二kiáⁿ雅各，to̍h是以色列人。信奉耶和華上帝，通稱猶太教；少數人信耶穌做彌賽亞。
22 以實瑪利是由埃及女婢夏甲kah亞伯拉罕所生ê大kiáⁿ，信奉埃及人ê神明á是伊斯蘭教ê阿拉真主。M̄ koh mā有真chē人信耶穌。
23 巴勒斯坦人（阿拉伯人），信奉伊斯蘭教／回教，mā有少數人信基督教。In iáu稱in是亞伯拉罕ê kiáⁿ孫，屬以實瑪利ê後代。
24 亞伯拉罕tī撒拉往生續絃，娶基土拉做bó͘。伊ê眾子往東方之地去，to̍h是現今ê阿拉伯人，信奉伊斯蘭教ê阿拉真主。政府用法律嚴禁人民改信其它宗教，若無，處死；無宗教自由，tiāⁿtiāⁿ殺害基督徒。

綜觀頂面所講，tòa tī以色列聖地人民ê宗教thang分做︰
1、唯一神教︰猶太教、基督教、伊斯蘭教，敬拜真神上帝á是稱呼阿拉。
2、多神教︰迦南地原住民ê宗教，崇拜男女神明等等多種偶像。

二、民族︰
1、Τī中東地區主要ê民族thang分做以色列人kah阿拉伯人。Tī中東，阿拉伯國家有22个，其中有3个民族m̄是阿拉伯人，to̍h是以色列（希伯來人á是稱偤太人）、土耳其（奧圖曼人á是稱突厥人）、kah伊朗（波斯人）。
2、以色列人︰回顧以色列人ê民族淵源，tùi耶穌ê家譜中ē tàng chhōe tio̍h siōng早ê祖先之一，名叫希伯（路加3︰35），伊是希伯來人ê先祖；in一家人tòa tī今á日敘利亞ê西北部，地名叫做巴旦亞蘭ê艾伯拉（Ebla)，所以in ê家族koh叫做亞蘭人。到耶穌時代，耶穌所講ê母語to̍h是亞蘭話，耶穌教門徒ê祈禱文（to̍h是主禱文）ê原文kah十架七言mā是亞蘭語，以色列人ê「國語」叫做希伯來語，是tùi亞蘭語演變過來ê。

現今tòa tī以色列ê人口中間，以色列人有600萬，另外非猶太人mā有170萬人，chiahê少數民族包括︰穆斯林阿拉伯人約佔 100 萬人；貝都因阿拉伯人，mā是穆斯林ê遊牧民族約有17萬人；基督徒阿拉伯人約有 11.7 萬人；德魯茲人約有12萬人；切爾卡西亞人約有3,000人；撒瑪利亞人kantaⁿ有200人，因為in lóng屬近親通婚，所以人口減少；另外有外國勞工約近20萬人。

三、宗教生活kah派別︰
以色列自1948年5月14日復國以後，政府保證宗教信仰自由，tú親像約書亞帶領in進入應允之地ê時，向當時ê以色列人民講ê︰「若是lín掠服事上主做m̄好，今á日lín tio̍h揀選lín所beh服事ê：看是lín祖先tī大河（幼發拉底河）hitpêng所服事hiahê神明，á是lín所tòa in ê地ê亞摩利人hiahê神明？講tio̍h我kah我ê家，阮絕對beh服事上主。」（《全民台語聖經》約書亞記24︰15）

今á日tī以色列境內宗教ê比率，猶太教佔76.1％ lóng ē tàng遵守安息日（禮拜六）；伊斯蘭教（回教）佔16.2％，tī禮拜五敬拜阿拉真主；基督教佔2.1％（2018年統計已經增加到10%），基督徒（彌賽亞信徒）tī禮拜日守主日禮拜。這以外iáu有少數人信奉德魯茲教kah巴哈伊教（大同教），各宗教聚會地點ê名稱如下︰
1）偤太會堂︰有10名以上ê chapo͘人聚會to̍h thang成立會堂，由一位拉比（老師、教師）主持、領唱詩篇。會堂內ê約櫃khǹg妥拉（摩西五經）經卷。Khǹg約櫃ê所在tio̍h ǹg耶路撒冷，ta̍k禮拜teh聚會ê時ài讀一段指定ê經文。一年中一定tio̍h kā妥拉讀完。In除了遵守安息日以外，koh守聖經ê節期。偤太人ê chapo͘ gín'á tī 13歲做成年禮；chabó͘ gín'á tī 12歲做成年禮。Tī做成人禮chìn前，父母tio̍h陪gín'á讀妥拉；成人禮後in變成年人，to̍h是thang家己閱讀妥拉。
2）基督教教堂（禮拜堂）︰凡若kah聖經歷史故事相關ê地點，被考古學家發掘、發見出來，而且被聖經學者確認證實ê原址，大多數地點lóng有建教堂kā它保護。親像︰拿撒勒ê報喜堂、加利利ê迦百農聖彼得khiā家懸空教堂、彼得被主授職元首教堂、八福山教堂、五餅二魚教堂、伊泊山變像教堂、伯利恆主誕教堂、奶洞教堂…等等。Tī耶路撒冷kah耶穌相關ê記念教堂mā有真chē，tī以後ê章節中lóng ē向大家一一紹介；chiahni̍h chē ê教堂，它ê主要ê目的lóng是teh見證聖經ê歷史事實，而且供朝聖者做懷古禮拜ê路用，真少有在地ê信徒á是會友；偤太人基督徒聚會ê所在叫做彌賽亞教會。
3）清真寺︰伊斯蘭教（中國人稱做回教，因為是新疆tńg來紇族（突厥人）teh信奉ê宗教，顧名思義稱做回教】。穆斯林（回教徒）ta̍k工lóng到清真寺祈禱5 pái；有人tī公共場所面向麥加（回教聖地）跪leh祈禱。進入清真寺lóng tio̍h先洗腳、tio̍hthǹg鞋，因為寺內ê土kha lóng用貴重ê地毯鋪leh。Ta̍k座清真寺內lóng有一座米哈拉布（mihrab)ê指示標誌tī正壁頂面，指向麥加ê方向，由一位主持祈禱ê主禮人，帶領信徒做伙跪落來祈禱；禮拜五是伊斯蘭信徒ê禮拜日，信徒lóng ē遵守教規去參加禮拜，聽主持人（á是主禮人）宣講可蘭經ê教義。
4）巴哈伊教堂會所︰世界總部tī迦密山phiâⁿ ê波斯花園，面向地中海ê海法港。

四、土地︰應允之地
1、範圍︰西臨地中海、東鄰約旦、南接埃及、西北為黎巴嫩、東北是敘利亞，chitmá kantaⁿ kah約旦、埃及有邦交；tī以色列本土內koh劃出巴勒斯坦自治區（約旦河西岸kah迦薩走廊），全國面積共有22,072平方公里，比台灣小真chē，世界排名第154位。

2、四个海︰東南pêng是死海、西pêng是地中海、東北pêng有加利利海、南邊有紅海。





3、七个山︰Τī以色列境內有七座山：to̍h是聖殿山（摩利亞山）、錫安山（Tabi̍t城）、橄欖山、迦密山、他泊山、八福山kah烏門山；其中聖殿山、錫安山kah橄欖山lóng tī今á日ê耶路撒冷。西奈山（tī埃及西奈半島）kah尼波山（tī約旦）mā是聖經ê名山，m̄ koh lóng tī以色列境外。







4、五个地勢︰北部高地、西部平原、中部丘陵地、東部谷地、南部曠野地（m̄是沙漠）。






5、氣候︰炕旱；寒天落雨、熱天炎熱，屬地中海型氣候。滴滴清水lóng是珍寶，乾地親像得tio̍h水灌ak, to̍h變成綠色農園，盛產農作物kah果籽。

以色列ê疆域雖然無大，m̄ koh伊ê地形氣候ê變化卻非常大。親像tùi耶路撒冷到耶利哥之間，相距kantaⁿ有27公里，兩城地勢之高kē竟然相差900公尺，所以，tī耶利哥谷地ê農業區收成農作物ê時，耶路撒冷聖城可能已經teh落雪à。

尤其ta̍k年冬末初春三月ê時，耶路撒冷親像遇寒流來襲，一工ê氣候變化koh khah大，綜合四季ê變化，有時寒冷、落雨koh下雪；日頭光出現，初雪溶去變成水，氣候koh變燒lō，無koh冷à。所以出門ê時，冷暖衫褲lóng tio̍h隨身帶chiah bē致使感冒。熱天日頭炎熱，m̄ koh bē流汗。