《綠色短評》

 | | | 轉寄

台灣人hông háⁿ bē驚！hông騙bē行！

作者 李南衡, ChoânTâijī/全台字 by Chng Hūiphêng 2023.04.30



Choânbîn Tâioânjī pán/全民台灣字版簡稱ChoânTâiJī

《 Le̍ksek toánphêng 》　 Lí Lâmhêng

　　　 Tâioân lâng hông háⁿ bē kiaⁿ! hông phiàn bē kiâⁿ!

Chhòa Engbûn chóngthóng chhōa thoân thiánkhui 10 kang ê "Bînchú tâng phōaⁿ kiōng iông chi lú", hôe têng kòekéng Bíkok Lo̍ksanki, Bí sai sîkan sìgoe̍h chhegō͘ chákhí kah Bíkok Chiònggīīⁿ gītiúⁿ 麥卡錫 hōetâm. Sìgoe̍h chhechhit, Chhòa Engbûn chóngthóng tńglâi kàu Tâioân. Tējī kang, Tiongkok to̍h tī Tâioân sìkho͘ûi chìnhêng saⁿ kang tōa kuibô͘ kunián. Ná chhiūⁿ kūnî (2022) pehgoe̍h chhejī chhesaⁿ Bíkok liânpang Chiònggīīⁿ gītiúⁿ 裴洛西 (Nancy Pelosi) chhōa chin chē ūi Bíkok kokhōe tāngliōng kip gīoân lâi Tâioân hóngbūn. Tńgkhì ê tējī kang, Tiongkok tī Tâioân sìkho͘ûi phah huitôaⁿ. Iáu koh ū ta̍kê chiok se̍ksāi ê Tiongkok kunki kunlām, saⁿ gō͘ tâi, cha̍p gōa tâi, sīmchì ū sî ū kúi cha̍p tâi, lâi lán Tâioân sailâm pêng ê Hângkhong sekpia̍t khu, kah Tâioân háikiap tiongsòaⁿ hūkīn jiáuloān, ēsái kóng sī làng sî bô làng ji̍t. Che tio̍h sī ēng bú·ê lâi khiónghat uihia̍p lán Tâioân.

　　 Ū sî, Tiongkok ē káiōaⁿ chi̍tê bô kâng ê hongsek, ēng bûn·ê lâi iúkoái khiphiàn lán Tâioân.

　　 Má Engkiú chêng chóngthóng khì Tiongkok "chè chó͘ hôpêng chi lú" ê tô͘tiong, saⁿgoe̍h jīpeh, Koktâipān chújīm Sòng Tô choankang khì Kangso͘ séng Khunsan chhī kah Má Engkiú chêng chóngthóng, Tâi khì, Tâi chheⁿ chō tâm. Ū lâng mn̄g kóng,"nn̄g hōaⁿ thóngit ū siáⁿ hóchhù?" Sòng Tô kóng chíiàu tī "chi̍tê Tiongkok goânchek" khengkè ēbīn, Tâioân tôngpau hibāng tit kàu siáⁿmi̍h lóng ēsái chhamsiông. Saⁿgoe̍h jīkáu, Koktâipān hoatgiânjîn Chu Hōngliân, tī chi̍tê lēhêng kìchiáhōe téngbīn chìn chi̍tpō͘ kóng,"thóngit liáuāu, Tâioân tôngpau ētàng hióngsiūtio̍h si̍tsi̍t chāichāi ê hóchhù."

　　Chu Hōngliân kóng,"thóngit liáuāu, Tâioân ētàng si̍thêng kah Tāilio̍k bô kâng ê siāhōe chètō͘. Tī khakpó kokka chúkoân, anchoân, hoattián līek ê chiântê hā, Tâioân tôngpau ê siāhōe chètō͘ kah sengoa̍h hongsek téng lóng ē tittio̍h chhionghun ê chuntiōng, Tâioân tôngpau ê sujîn châisán, chongkàu sìngióng, ha̍phoat koânek lóng ē tittio̍h chhionghun póchiòng. Tâioân ê châichèng siuji̍p lóng chóng ēsái ēng tī káisiān bînseng."

　　Chu Hōngliân kóng thóngit liáuāu, Tâioân lâng ē tittio̍h ê hóchhù, Tâioân lâng chitmá tio̍h sī ánne, ná tio̍h tán kàu thóngit? chin túhó i kóng chiahê mā lóng sī Tiongkok só͘ bô ê. Beh kóng m̄tio̍hkóng chi̍t kóa Tiongkok ū ê, lán Tâioân hiānsî bô ê, jîchhiáⁿ chiok kîthāi, chiok ǹgbāng ū ê, chhiūⁿkóng bo̍kchêng lán Tâioân "jînkin só͘tek" sī bíkim 32,811 kho͘, i nā kóng thóngit liáuāu, Tâioân ētàng kah Tiongkok kāngkhoán "jinku só͘tek" bíkim 5,000 kho͘. Ū lâng thiaⁿtio̍h chîⁿ ba̍kchiu tio̍h kim·khílâi, kekiám ū iúhe̍k sèng. Khósioh Chu Hōngliân kóng bē chhut chhùi, inūi bo̍kchêng Tiongkok " jinku só͘tek "bíkim 12,741 kho͘, sī Tâioân ê 38.9%," jinku só͘tek "choân kok tē 1 miâ ê Pakkiaⁿ chhī sī bíkim 25,789 kho͘, sī Tâioân ê 78.6%.

Chu Hōngliân kóng,"thóngit liáuāu, Tâioân ê châichèng siuji̍p lóng chóng ēsái ēng tī káisiān bînseng."i bô kóng bêng, sūsi̍t siōng i sī àmsī thóngit liáuāu, Tâioân bô pitiàu khui hiah chē chîⁿ bé kunhóe bé búkhì. I káⁿ m̄chai iáⁿ, Tio̍h sī ū Tiongkok chitê pháiⁿ chhùpiⁿ, chi̍t ji̍t kàu àm phài kunki kunlām lâi loān Tâioân, koh kóng bô beh hòngkhì ēng búle̍k káikoat Tâioân, Tâioân chiah suiàu khai hiah chē chîⁿ bé kunhóe bé búkhì!

　　 Hòngsim, Tâioân lâng hông háⁿ bē kiaⁿ! hông phiàn bē kiâⁿ! 　　 (230421)

Chù, 麥卡錫 　裴洛西 chhiáⁿ liām Hôagí


Pe̍hōejīpán/白話字版

《 Le̍ksek toánphêng 》　 Lí Lâmhêng

　　　 Tâioân lâng hông háⁿ bē kiaⁿ! hông phiàn bē kiâⁿ!

Chhòa Engbûn chóngthóng chhōa thoân thiánkhui 10 kang ê "Bînchú tâng phōaⁿ kiōng iông chi lú", hôe têng kòekéng Bíkok Lo̍ksanki, Bí sai sîkan sìgoe̍h chhegō͘ chákhí kah Bíkok Chiònggīīⁿ gītiúⁿ 麥卡錫 hōetâm. Sìgoe̍h chhechhit, Chhòa Engbûn chóngthóng tńglâi kàu Tâioân. Tē jī kang, Tiongkok to̍h tī Tâioân sìkho͘ûi chìnhêng saⁿ kang tōa kuibô͘ kunián. Ná chhiūⁿ kūnî (2022) pehgoe̍h chhejī chhesaⁿ Bíkok liânpang Chiònggīīⁿ gītiúⁿ 裴洛西 (Nancy Pelosi) chhōa chin chē ūi Bíkok kokhōe tāngliōng kip gīoân lâi Tâioân hóngbūn. Tńgkhì ê tē jī kang, Tiongkok tī Tâioân sìkho͘ûi phah huitôaⁿ. Iáu koh ū ta̍kê chiok se̍ksāi ê Tiongkok kunki kunlām, saⁿ gō͘ tâi, cha̍p gōa tâi, sīmchì ū sî ū kúi cha̍p tâi, lâi lán Tâioân sailâm pêng ê Hângkhong sekpia̍t khu, kah Tâioân háikiap tiongsòaⁿ hūkīn jiáuloān, ē sái kóng sī làng sî bô làng ji̍t. Che tio̍h sī ēng bú ê lâi khiónghat uihia̍p lán Tâioân.

　　 Ū sî, Tiongkok ē káiōaⁿ chi̍tê bô kâng ê hongsek, ēng bûn ê lâi iúkoái khiphiàn lán Tâioân.

　　 Má Engkiú chêng chóngthóng khì Tiongkok "chè chó͘ hôpêng chi lú" ê tô͘tiong, saⁿgoe̍h jīpeh, Koktâipān chújīm Sòng Tô choankang khì Kangso͘ séng Khunsan chhī kah Má Engkiú chêng chóngthóng, Tâi khì, Tâi chheⁿ chō tâm. Ū lâng mn̄g kóng,"nn̄g hōaⁿ thóngit ū siáⁿ hóchhù?" Sòng Tô kóng chíiàu tī "chi̍tê Tiongkok goânchek" khengkè ē bīn, Tâioân tôngpau hibāng tit kàu siáⁿmi̍h lóng ē sái chhamsiông. Saⁿgoe̍h jīkáu, Koktâipān hoatgiânjîn Chu Hōngliân, tī chi̍tê lē hêng kìchiáhōe téngbīn chìn chi̍tpō͘ kóng,"thóngit liáuāu, Tâioân tôngpau ē tàng hióngsiū tio̍h si̍tsi̍t chāichāi ê hóchhù."

　　Chu Hōngliân kóng,"thóngit liáuāu, Tâioân ē tàng si̍thêng kah Tāilio̍k bô kâng ê siāhōe chètō͘. Tī khakpó kokka chúkoân, anchoân, hoattián līek ê chiântê hā, Tâioân tôngpau ê siāhōe chètō͘ kah sengoa̍h hongsek téng lóng ē tit tio̍h chhionghun ê chuntiōng, Tâioân tôngpau ê sujîn châisán, chongkàu sìngióng, ha̍phoat koânek lóng ē tit tio̍h chhionghun póchiòng. Tâioân ê châichèng siuji̍p lóng chóng ē sái ēng tī káisiān bînseng."

　　Chu Hōngliân kóng thóngit liáuāu, Tâioân lâng ē tit tio̍h ê hóchhù, Tâioân lâng chitmá tio̍h sī ánne, ná tio̍h tán kàu thóngit? chin túhó i kóng chiahê mā lóng sī Tiongkok só͘ bô ê. Beh kóng m̄ tio̍hkóng chi̍t kóa Tiongkok ū ê, lán Tâioân hiānsî bô ê, jîchhiáⁿ chiok kîthāi, chiok ǹgbāng ū ê, chhiūⁿkóng bo̍kchêng lán Tâioân "jînkin só͘tek" sī bíkim 32,811 kho͘, i nā kóng thóngit liáuāu, Tâioân ē tàng kah Tiongkok kāngkhoán "jinku só͘tek" bíkim 5,000 kho͘. Ū lâng thiaⁿ tio̍h chîⁿ ba̍kchiu tio̍h kim khílâi, kekiám ū iúhe̍k sèng. Khósioh Chu Hōngliân kóng bē chhut chhùi, inūi bo̍kchêng Tiongkok " jinku só͘tek "bíkim 12,741 kho͘, sī Tâioân ê 38.9%," jinku só͘tek "choân kok tē 1 miâ ê Pakkiaⁿ chhī sī bíkim 25,789 kho͘, sī Tâioân ê 78.6%.

Chu Hōngliân kóng,"thóngit liáuāu, Tâioân ê châichèng siuji̍p lóng chóng ē sái ēng tī káisiān bînseng."i bô kóng bêng, sūsi̍t siōng i sī àmsī thóngit liáuāu, Tâioân bô pitiàu khui hiah chē chîⁿ bé kunhóe bé búkhì. I káⁿ m̄ chai iáⁿ, Tio̍h sī ū Tiongkok chitê pháiⁿ chhùpiⁿ, chi̍t ji̍t kàu àm phài kunki kunlām lâi loān Tâioân, koh kóng bô beh hòngkhì ēng búle̍k káikoat Tâioân, Tâioân chiah suiàu khai hiah chē chîⁿ bé kunhóe bé búkhì!

　　 Hòngsim, Tâioân lâng hông háⁿ bē kiaⁿ! hông phiàn bē kiâⁿ! 　　 (230421)

Chù, 麥卡錫 　裴洛西 chhiáⁿ liām Hôagí




蔡英文總統chhōa團展開10天ê「民主同伴共榮之旅」，回程過境美國洛杉磯，美西時間四月初五早起kah美國眾議院議長麥卡錫會談。四月初七，蔡英文總統轉來到台灣。第二工，中國tio̍htī台灣四箍圍進行三工大規模軍演。Ná像舊年（2022）八月初二初三美國聯邦眾議院議長裴洛西（Nancy Pelosi）chhōa真chē位美國國會重量級議員來台灣訪問。轉去ê第二工，中國tī台灣四箍圍拍飛彈。猶koh有ta̍k个足熟似ê中國軍機軍艦，三五台、十外台、甚至有時有幾十台，來咱台灣西南旁ê航空識別區、kah台灣海峽中線附近擾亂，ē sái講是làng時無làng日。Che tio̍h是用武ê來恐嚇威脅咱台灣。

　　有時，中國ē改換一個無仝ê方式，用文ê來誘拐欺騙咱台灣。

　　馬英九前總統去中國「祭祖和平之旅」ê途中，三月二八，國台辦主任宋濤專工去江蘇省昆山市kah馬英九前總統、台企、台青座談。有人問講：「兩岸統一有啥好處？」宋濤講只要tī「一個中國原則」框架下面，台灣同胞希望得到啥物lóng ē sái參詳。三月二九，國台辦發言人朱鳳蓮，tī一個例行記者會頂面進一步講，「統一了後，台灣同胞ētàng享受tio̍h實實在在ê好處。」

　　朱鳳蓮講：「統一了後，台灣ē tàng實行kah大陸無仝ê社會制度。tī確保國家主權、安全、發展利益ê前提下，台灣同胞ê社會制度kah生活方式等lóngē得tio̍h充分ê尊重，台灣同胞ê私人財產、宗教信仰、合法權益lóngē得tio̍h充分保障。台灣ê財政收入lóng總ē sái用tī改善民生。」

　　朱鳳蓮講統一了後，台灣人ē得tio̍hê好處，台灣人chitmá tio̍h是ánne，ná tio̍h等到統一？真tú好伊講chiahê mā lóng是中國所無ê。Beh講m̄ tio̍h講一kóa中國有ê、咱台灣現時無ê，而且足期待、足ǹg望有ê，像講目前咱台灣「人均所得」是美金32,811 kho͘，伊若講統一了後，台灣ētàng kah中國仝款「人均所得」美金5,000 kho͘。有人聽tio̍h錢目睭tio̍h金起來，加減有誘惑性。可惜朱鳳蓮講bē出嘴，因為目前中國「人均所得」美金12,741 kho͘，是台灣ê 38.9%，「人均所得」全國第1名ê北京市是美金25,789 kho͘，是台灣ê 78.6%。

朱鳳蓮講：「統一了後，台灣ê財政收入lóng總ē sái用tī改善民生。」伊無講明，事實上伊是暗示統一了後，台灣無必要開hiahchē錢買軍火買武器。伊敢m̄知影：Tio̍h是有中國chitê pháiⁿ厝邊，一日到暗派軍機軍艦來亂台灣，koh講無beh放棄用武力解決台灣，台灣chiah需要開hiahchē錢買軍火買武器！

　　放心，台灣人hôngháⁿbē驚！hông騙bē行！　　 (230421)

註：麥卡錫　　裴洛西　　　請唸華語