《綠色短評》

 | | | 轉寄

Chit款ê柯文哲講伊是深綠ê，m̄驚笑破人ê嘴！

作者 李南衡, ChoânTâijī/全台字 by Chng Hūiphêng 2023.12.24




Choânbîn Tâioânjī pán/全民台灣字版簡稱ChoânTâiJī


《 Le̍ksek toánphêng 》　 Lí Lâmhêng

　Chitkhoán ê Koa Bûntiat kóng i sī chhim le̍k·ê, m̄ kiaⁿ chhiò phòa lâng ê chhùi!

Cha̍pjīgoe̍h chhela̍k pòchhut ê Hôasī sinbûn choanhông tiong, Bînchiòngtóng chóngthóng chhamsoánjîn Koa Bûntiat kóng "góa lāisim púnchit iûgoân sī chhim le̍k· ê!" chin chē lâng thiaⁿliáu lóng gāng·khì.

　　2014 nî cha̍pitgoe̍h chhechhit, Tâipakchhītiúⁿ soánkí tiānsī piānlūn hōe, Tiongkok Kokbîntóng hāusoánjîn Liân Sèngbûn chitgî bô tóngphài hāusoánjîn Koa Bûntiat kòekhì bat kóng kakī sī "kimkule̍k", chitmá khiok kóng beh têng khuiki, chhiauoa̍t Nâle̍k, thāitō͘ péngkhí péngtó. Koa Bûntiat hoánpo̍k kóng "góa kóng kòe góa sī kimkule̍k, hit tongsî sī ūitio̍h hiòng chitê siāhōe chèngbêng lí ê chhèng siong sī chin·ê, góa ánne kóng sī ūitio̍h Tâioân siāhōe ê hôhâi, lí kináji̍t kóng góa sī kimkule̍k, lí sī teh thiahli̍h chitê siāhōe, ūitio̍h lí kòjîn ê chèngtī līek!"Koa Bûntiat sī kóng 2010 nî cha̍pitgoe̍h jīla̍k, Gō͘ to͘ soánkí chêng chi̍t àm, Liân Sèngbûn tī Énghôchhī chō͘soán, hông khui chhèng gō͘ siong tio̍h sàngkhì Tâitāi pēⁿīⁿ, ū lâng hoâigî Liân Sèngbûn tio̍hsiong sī ké·ê, tongsî Tâitāi Chhòngsiong Iha̍kpō͘ chújīm Koa Bûntiat chhut bīn tēngchheng "góa sī chhimle̍k·ê, góa sī siōng tōa ê chèngjîn, chitê bôkhólêng chō ké". Ta̍kê oló Koa Bûntiat, hit piàn Tâipakchhī tiúⁿ soánkí chin chē Tâipak chhībîn tâuphiò soán hō͘ Koa Bûntiat.

2014 nî Koa Bûntiat tòngsoán chhītiúⁿ liáuāu, itchài sengbêng i sī chhēng pe̍hphâu ê iseng, tāipiáu Pe̍ksek le̍kliōng, chhiauoa̍t Nâ Le̍k ok tàu. Chin chē chhībîn siongsìn Pe̍hsek mā bē bái. 2015 nî pehgoe̍h cha̍ppeh, Koa Bûntiat chhītiúⁿ tē it piàn khì Siōnghái chhamka Siangsiâⁿ Lūntôaⁿ, khuibō͘ tìsû kóng i chichhî "兩岸一家親" ê chengsîn kah "sìê hō͘siong" goânchek, ta̍tkàu chhiokchìn kaulâu, chēngka siānì ê bo̍kphiau. Hông tōa kiaⁿ chi̍ttiô ê sī, 2013 nî cha̍pgoe̍h chhela̍k, Tiongkok kokka chúsek 習近平 tī Ìnnî Bâlîtó chèngsek thêchhut "兩岸一家親" ê kónghoat liáuāu, Koa Bûntiat sī tēitê tòe 習近平 ê chhùibóe kóng "兩岸一家親" ê Tâioân chèngtī jînbu̍t, 習近平 thiaⁿliáu liông sim tōa hí, Tiongkok kín kā Koa Bûntiat tòngchoh "kakī ê lâng". Chhúāu, Koa Bûntiat itchài hoatpiáu pô͘ Τiongkiōng khachhng ê giânlūn. Tâipak chhībîn kā Koa Bûntiat kóng choh sī "Italíah kok kî"— le̍k, pe̍h, âng saⁿ sek, khólêng ū lâng thiaⁿ khah bô, kóng Koa Bûntiat sī pinⁿ̂g khah chhengchhó, gōapiáu sī le̍k·ê, lāité pe̍h·ê, pō͘ pō͘ chi̍tē kui chhùi sī âng·ê. 2019 nî pehgoe̍h chhela̍k, Tâioân Bînchiòngtóng sêngli̍p, kiaⁿ hông kóng kah Le̍kiâⁿ jú kiâⁿ jú hn̄g. Káugoe̍h chhesaⁿ, Koa Bûntiat chiapsiū 《POP Tōakokbîn 》choanhóng ê sî, bat pióthài kòe sī chhimle̍k ê Koa Bûntiat kóng i kakī ê tések bô piàn, iûgoân sī le̍kté·ê.

　　 Koa Bûntiat káⁿ ūiáⁿ sī chhimle̍k· ê? i nā chinchiàⁿ sī chhimle̍k·ê, bôkhólêng tī gō͘goe̍h hoatpiáu kokchèng pe̍hphôesu, lāṳông the̍h kàu Nn̄ghōaⁿ tio̍h tiôngsin khétāng Hòeba̍uh kah Ho̍kba̍uh tâmphòaⁿ; Koa Bûntiat nā chinchiàⁿ sī chhimle̍k·ê, bôkhólêng ē khì kah Nâsek ê Tiongkok Kokbîntóng tàukhang soán chóngthóng hùchóngthóng, siūⁿ beh ián tò le̍ksek ê Bînchìntóng; cha̍pitgoe̍h cha̍pgō͘, ū lâng mn̄g kóng, Koa Bûntiat kòeóng bat kóng chhutsì kàu taⁿ kakī siōng thóià ê sī bángá, kachoa̍h kah Tiongkok Kokbîntóng. Kináji̍t khiok beh kah Tiongkok Kokbîntóng chéngha̍p? Koa Bûntiat nā chinchiàⁿ sī chhimle̍k·ê, bôkhólêng ìn kóng, kakī chin thóià Kokbîntóng, tānsī koh khah thònghūn Bînchìntóng; Koa Bûntiat nā chinchiàⁿ sī chhimle̍k·ê, bôkhólêng ē tī cha̍pjīgoe̍h chhepeh kóng Bînchìntóng chúse̍k, chóngthóng hāusoánjîn Lōa Chhengtek "lâng chhengho͘ i sī Tâito̍k kimsun, góa khòaⁿ i chitmá íkeng sī Tâito̍k kusun".

Chitkhoán ê Koa Bûntiat kóng i sī chhimle̍k·ê, m̄ kiaⁿ chhiò phòa lâng ê chhùi! (231215)

Chù, 兩岸一家親 　習近平 chhiáⁿ liām Hôagí



Pe̍hōejīpán/白話字版




《 Le̍ksek toánphêng 》　 Lí Lâmhêng

　Chitkhoán ê Koa Bûntiat kóng i sī chhim le̍k ê, m̄ kiaⁿ chhiò phòa lâng ê chhùi!

Cha̍pjīgoe̍h chhela̍k pòchhut ê Hôasī sinbûn choanhông tiong, Bînchiòngtóng chóngthóng chhamsoánjîn Koa Bûntiat kóng "góa lāisim púnchit iûgoân sī chhim le̍k ê!" chin chē lâng thiaⁿliáu lóng gāng khì.

　　2014 nî cha̍pitgoe̍h chhechhit, Tâipakchhītiúⁿ soánkí tiānsī piānlūn hōe, Tiongkok Kokbîntóng hāusoánjîn Liân Sèngbûn chitgî bô tóngphài hāusoánjîn Koa Bûntiat kòekhì bat kóng kakī sī "kimkule̍k", chitmá khiok kóng beh têng khuiki, chhiauoa̍t Nâle̍k, thāitō͘ péngkhí péngtó. Koa Bûntiat hoánpo̍k kóng "góa kóng kòe góa sī kimkule̍k, hit tongsî sī ūi tio̍h hiòng chitê siāhōe chèngbêng lí ê chhèng siong sī chin ê, góa ánne kóng sī ūi tio̍h Tâioân siāhōe ê hôhâi, lí kin'áji̍t kóng góa sī kimkule̍k, lí sī teh thiahli̍h chitê siāhōe, ūi tio̍h lí kòjîn ê chèngtī līek!"Koa Bûntiat sī kóng 2010 nî cha̍pitgoe̍h jīla̍k, Gō͘ to͘ soánkí chêng chi̍t àm, Liân Sèngbûn tī Énghôchhī chō͘soán, hông khui chhèng gō͘ siong tio̍h sàngkhì Tâitāi pēⁿīⁿ, ū lâng hoâigî Liân Sèngbûn tio̍hsiong sī ké ê, tongsî Tâitāi Chhòngsiong Iha̍kpō͘ chújīm Koa Bûntiat chhut bīn tēngchheng "góa sī chhimle̍k ê, góa sī siōng tōa ê chèngjîn, chitê bôkhólêng chō ké". Ta̍kê oló Koa Bûntiat, hit piàn Tâipakchhī tiúⁿ soánkí chin chē Tâipak chhībîn tâuphiò soán hō͘ Koa Bûntiat.

2014 nî Koa Bûntiat tòngsoán chhītiúⁿ liáuāu, itchài sengbêng i sī chhēng pe̍hphâu ê iseng, tāipiáu Pe̍ksek le̍kliōng, chhiauoa̍t Nâ Le̍k ok tàu. Chin chē chhībîn siongsìn Pe̍hsek mā bē bái. 2015 nî pehgoe̍h cha̍ppeh, Koa Bûntiat chhītiúⁿ tē it piàn khì Siōnghái chhamka Siangsiâⁿ Lūntôaⁿ, khuibō͘ tìsû kóng i chichhî "兩岸一家親" ê chengsîn kah "sìê hō͘siong" goânchek, ta̍tkàu chhiokchìn kaulâu, chēngka siānì ê bo̍kphiau. Hông tōa kiaⁿ chi̍ttiô ê sī, 2013 nî cha̍pgoe̍h chhela̍k, Tiongkok kokka chúsek 習近平 tī Ìnnî Bâlîtó chèngsek thêchhut "兩岸一家親" ê kónghoat liáuāu, Koa Bûntiat sī tē itê tòe 習近平 ê chhùibóe kóng "兩岸一家親" ê Tâioân chèngtī jînbu̍t, 習近平 thiaⁿliáu liông sim tōa hí, Tiongkok kín kā Koa Bûntiat tòngchoh "kakī ê lâng". Chhúāu, Koa Bûntiat itchài hoatpiáu pô͘ Τiongkiōng khachhng ê giânlūn. Tâipak chhībîn kā Koa Bûntiat kóng choh sī "Italíah kok kî"— le̍k, pe̍h, âng saⁿ sek, khólêng ū lâng thiaⁿ khah bô, kóng Koa Bûntiat sī pinnn̂g khah chhengchhó, gōapiáu sī le̍k ê, lāité pe̍h ê, pō͘ pō͘ chi̍tē kui chhùi sī âng ê. 2019 nî pehgoe̍h chhela̍k, Tâioân Bînchiòngtóng sêngli̍p, kiaⁿ hông kóng kah Le̍kiâⁿ jú kiâⁿ jú hn̄g. Káugoe̍h chhesaⁿ, Koa Bûntiat chiapsiū 《POP Tōakokbîn 》choanhóng ê sî, bat pióthài kòe sī chhimle̍k ê Koa Bûntiat kóng i kakī ê tések bô piàn, iûgoân sī le̍kté ê.

　　 Koa Bûntiat káⁿ ūiáⁿ sī chhimle̍k ê? i nā chinchiàⁿ sī chhimle̍k ê, bôkhólêng tī gō͘goe̍h hoatpiáu kokchèng pe̍hphôesu, lāiiông the̍h kàu Nn̄ghōaⁿ tio̍h tiôngsin khétāng Hòeba̍uh kah Ho̍kba̍uh tâmphòaⁿ; Koa Bûntiat nā chinchiàⁿ sī chhimle̍k ê, bôkhólêng ē khì kah Nâsek ê Tiongkok Kokbîntóng tàukhang soán chóngthóng hùchóngthóng, siūⁿ beh ián tò le̍ksek ê Bînchìntóng; cha̍pitgoe̍h cha̍pgō͘, ū lâng mn̄g kóng, Koa Bûntiat kòeóng bat kóng chhutsì kàu taⁿ kakī siōng thóià ê sī báng'á, kachoa̍h kah Tiongkok Kokbîntóng. Kin'áji̍t khiok beh kah Tiongkok Kokbîntóng chéngha̍p? Koa Bûntiat nā chinchiàⁿ sī chhimle̍k ê, bôkhólêng ìn kóng, kakī chin thóià Kokbîntóng, tānsī koh khah thònghūn Bînchìntóng; Koa Bûntiat nā chinchiàⁿ sī chhimle̍k ê, bôkhólêng ē tī cha̍pjīgoe̍h chhepeh kóng Bînchìntóng chúse̍k, chóngthóng hāusoánjîn Lōa Chhengtek "lâng chhengho͘ i sī Tâito̍k kimsun, góa khòaⁿ i chitmá íkeng sī Tâito̍k kusun".

Chitkhoán ê Koa Bûntiat kóng i sī chhimle̍k ê, m̄ kiaⁿ chhiò phòa lâng ê chhùi! (231215)

Chù, 兩岸一家親 　習近平 chhiáⁿ liām Hôagí


《綠色短評》　李南衡

　　　　　Chit款ê柯文哲講伊是深綠ê，m̄驚笑破人ê嘴！

十二月初六播出ê華視新聞專訪中，民眾黨總統參選人柯文哲講「我內心本質猶原是深綠ê！」真chē人聽了lóng gāng去。

　　2014年十一月初七，台北市長選舉電視辯論會，中國國民黨候選人連勝文質疑無黨派候選人柯文哲過去bat講家己是「金龜綠」，chitmá卻講beh重開機、超越藍綠，態度反起反倒。柯文哲反駁講「我講過我是金龜綠，hit當時是為tio̍h向chitê社會證明你ê銃傷是真ê，我ánne講是為tio̍h台灣社會ê和諧，你今á日講我是金龜綠，你是teh拆裂chitê社會，為tio̍h你個人ê政治利益！」柯文哲是講2010年十一月二六，五都選舉前一暗，連勝文tī永和市助選，hông開銃誤傷tio̍h送去台大病院，有人懷疑連勝文tio̍h傷是假ê，當時台大創傷醫學部主任柯文哲出面澄清「我是深綠ê，我是上大ê證人，chitê無可能造假」。逐个oló柯文哲，hit遍台北市長選舉真chē台北市民投票選hō͘柯文哲。

2014年柯文哲當選市長了後，一再聲明伊是穿白袍ê醫生，代表白色力量，超越藍綠惡鬥。真chē市民相信白色mā bē bái。2015年八月十八，柯文哲市長第一遍去上海參加雙城論壇，開幕致辭講伊支持「兩岸一家親」ê精神kah「四個互相」原則，達到促進交流、增加善意ê目標。Hông大驚一tiôê是，2013年十月初六，中國國家主席習近平tī印尼巴厘島正式提出「兩岸一家親」ê講法了後，柯文哲是第一個tòe習近平ê嘴尾講「兩岸一家親」ê台灣政治人物，習近平聽了龍心大喜，中國緊kā柯文哲當作「家己ê人」。此後，柯文哲一再發表pô͘中共尻川ê言論。台北市民kā柯文哲講作是「意大利國旗」—綠、白、紅三色，可能有人聽khah無，講柯文哲是檳榔khah清楚：外表是綠ê，內底白ê，哺哺一下歸嘴是紅ê。2019年八月初六，台灣民眾黨成立，驚hông講kah綠營愈kiâⁿ愈遠。九月初三，柯文哲接受《POP大國民》專訪ê時，bat表態過是深綠ê柯文哲講伊家己ê底色無變，猶原是綠底ê。

　　柯文哲敢有影是深綠ê？伊若真正是深綠ê，無可能tī五月發表國政白皮書，內容提到兩岸tio̍h重新啟動貨貿kah服貿談判；柯文哲若真正是深綠ê，無可能會去kah藍色ê中國國民黨鬥khang選總統副總統，想beh ián倒綠色ê民進黨；十一月十五，有人問講，柯文哲過往bat講出世到taⁿ家己上討厭ê是báng'á、kachoa̍h kah中國國民黨。今á日卻beh kah中國國民黨整合？柯文哲若真正是深綠ê，無可能應講：家己真討厭國民黨，但是koh khah痛恨民進黨；柯文哲若真正是深綠ê，無可能會tī十二月初八講民進黨主席、總統候選人賴清德「人稱呼伊是台獨金孫，我看伊chitmá已經是台獨龜孫」。

Chit款ê柯文哲講伊是深綠ê，m̄驚笑破人ê嘴！ (231215)

註：兩岸一家親　　習近平　　　請唸華語