《綠色短評》

 | | | 轉寄

美國chhōe tio̍h失散chē chē年ê gín'á—中國

作者 李南衡, ChoânTâijī/全台字 by Chng Hūiphêng 2022.08.21


Choânbîn Tâioânjī pán/全民台灣字版簡稱ChoânTâiJī

《 Le̍ksek toánphêng 》　　 Lí Lâmhêng

　 Bíkok chhōe tio̍h sit sòaⁿ chēchē nî ê gín’á— Tiongkok

Bô jōa kú chìnchêng, Tiongkok chiâⁿ liûhêng ēng " Pahtō͘ tētô͘" chhiau chhōe Tâioân, paukoat í Tiongkok siâⁿchhī miâ hōmiâ ê kelō͘, chhiūⁿkóng Lâmkiaⁿ lō͘, Kńgchiu ke, á·sī kah Tiongkok tēmiâ siongkoan ê chhanthiaⁿ, chhiūⁿkóng Hok chiu hîoân tamī, Sòaⁿthâu hóeko, lóng hō͘ Tiongkok bāngiú kámkak chiâⁿ chhùbī, chiâⁿ hikî, chhiau chhōe liōng tōatōa chēngka, sīmchì chē kah tìsú " Pahtō͘ tētô͘" chi̍t sî "pang khì" bô hoattō͘ súiōng.

Pehgoe̍h chhechhit, hiānjīm Tiongkok gōakaupō͘ pō͘tiúⁿ chō͘lí, gōakaupō͘ hoatgiânjîn 華春瑩 lúsū chi̍t sî chhiú giauⁿ, ēng Engbûn tī “Twitter” téngbīn hoatpiáu kolūn, i tī kolūn tiong ū tah chi̍t tiuⁿ "Pahtō͘ tētô͘" ê chia̍t tô͘, i kóng, tī " Pahtō͘ tētô͘" hiánsī, Tâipakchhī ū 38 keng Soaⁿtang chúikiáu koán, 67 keng Soaⁿsai mī koán. Bīkak bē phiàn lâng, Tâioân itti̍t sī Tiongkok ê chi̍tpō͘hūn. Sit sòaⁿ chēchē nî ê gíná kuibóe chóng·sī tio̍h tńglâi chhù·ni̍h.

I ê bûnchiuⁿ chi̍tē chhut·lâi, chhiò tò kúi pahbān lâng. Kantāⁿ chhiò iáu bô kàu, chin chē lâng chin phahpiàⁿ kā i thíchhiò á·sī kā i chiàⁿ khau tò siah, putchí lāujia̍t, mā chēngka ta̍kê chhiàutâm ê chuliāu. Tâioân chuchhim kiûphêng Chio̍h Bêngkín tī bīnchheh téngbīn piáusī, kinkì thóngkè, Tâioân ū 9,000 keng Ji̍tpún liāulí tiàm, bīkak bē phiàn lâng. Tâioân chokka Chu Iūhun kā華春瑩ê bûn choán hoat kàu bīnchheh, mn̄g kóng,"lí kámkáⁿ sǹg Tâioân ū kúi keng Bíkok sek, Ji̍tpún sek, Hânkok sek chhanthiaⁿ? iáu ū Ìtāilī mī?" ū chi̍t ūi Tiongkok bāngiú mā khòaⁿ bē lo̍hkhì, piáusī kóng "góa hāi ah, goán chhù hūkīn 麥當勞, 星巴克, 肯德基lóng chóng ū, goânlâi góa sī tī Bíkok!" lēnggōa chi̍t ūi Tiongkok bāngiú mn̄g kóng, góa ta̍k kang lim Tâioân ê 珍珠奶茶, khòaⁿ beh ánchóaⁿ?

Ji̍tpún 《 Sánkeng sinbûn 》 Tāipak chikio̍ktiúⁿ Yaita san（矢板明夫）tī bīnchheh hoat bûn kóng, i tī Tāipak tòa nn̄g nî pòaⁿ, kámkak Tāipak ê Ji̍tpún lamī tiàm, súsih tiàm, 居酒屋 ūiáⁿ bē chió. Tānsī i chaiiáⁿ, choa̍ttùi bô jīmhô chi̍tê chèngsiông ê Ji̍tpún lâng, ē liânsióng kàu "Tâioân ê Ji̍tpún chhankoán chiahnī chē, Tâioân tio̍h engkai sio̍k tī Ji̍tpún. I koh chhâliáu, tī Tangkiaⁿ kèngjiân ū 9,000 gōa keng Tionghôa liāulí. Chitê pílē engkai sī choân sèkài chúiàu siâⁿchhī tiong siōng koân ê. Siatsú ū chi̍t kang, Τiongkiōng gōakaupō͘ ēsái koattēng kokchè tia̍tsū, khióngkiaⁿ Ji̍tpún ê siúto͘ tio̍h ē sûisî piàn choh Τiongkiōng ê o͘h.

Tâioân ū chi̍t ūi bāngiú khòaⁿ pòtō liáuāu kóng,"chin hóchhiò, 華春瑩 sī ēng Engbûn hoat ê, chinchiàⁿ piàn choh kokchè chhiòōe. "Ūiáⁿ to̍h tio̍h, inūi i ēng Engbûn siá ê koh sī tī “Twitter” téngbīn hoatpiáu ê, chiah ē ínkhí Bíkok Kokbūīⁿ chêng hoatgiânjîn Otagusu（Morgan Ortagus） lúsū mā kāngkhoán tī “Twitter” téngbīn, seng kā華春瑩ê PO bûn chia̍t tô͘, chiah koh ēng 華春瑩ê khùi kháu kóng,"Tiongkok ū chhiaukòe 8,500 keng Kenthaki chhanthiaⁿ, bīkak bē phiàn lâng, Tiongkok itti̍t sī Bíkok Kenthaki chiu ê chi̍tpō͘hūn. Sit sòaⁿ chēchē nî ê gíná kuibóe chóng·sī tio̍h tńglâi chhù·ni̍h."

Bôìtiong, Bíkok Kenthaki chiu soah chhōe tio̍h sit sòaⁿ chēchē nî ê gín’á— Tiongkok ．(220812)

Chù,華（Húa）春瑩 麥當勞 星巴克 肯德基 珍珠奶茶 居酒屋 　 chhiáⁿ liām Hôagí

Pe̍hōejīpán/白話字版


《 Le̍ksek toánphêng 》　　 Lí Lâmhêng

　 Bíkok chhōe tio̍h sit sòaⁿ chē chē nî ê gín'á— Tiongkok

Bô jōa kú chìnchêng, Tiongkok chiâⁿ liûhêng ēng " Pahtō͘ tē tô͘" chhiau chhōe Tâioân, paukoat í Tiongkok siâⁿchhī miâ hōmiâ ê kelō͘, chhiūⁿkóng Lâmkiaⁿ lō͘, Kńgchiu ke, á sī kah Tiongkok tē miâ siongkoan ê chhanthiaⁿ, chhiūⁿkóng Hok chiu hîoân tamī, Sòaⁿthâu hóeko, lóng hō͘ Tiongkok bāngiú kámkak chiâⁿ chhùbī, chiâⁿ hikî, chhiau chhōe liōng tōatōa chēngka, sīmchì chē kah tìsú " Pahtō͘ tē tô͘" chi̍t sî "pang khì" bô hoattō͘ súiōng.

Pehgoe̍h chhechhit, hiānjīm Tiongkok gōakaupō͘ pō͘tiúⁿ chō͘lí, gōakaupō͘ hoatgiânjîn 華春瑩 lúsū chi̍t sî chhiú giauⁿ, ēng Engbûn tī “Twitter” téngbīn hoatpiáu kolūn, i tī kolūn tiong ū tah chi̍t tiuⁿ "Pahtō͘ tē tô͘" ê chia̍t tô͘, i kóng, tī " Pahtō͘ tē tô͘" hiánsī, Tâipakchhī ū 38 keng Soaⁿtang chúikiáu koán, 67 keng Soaⁿsai mī koán. Bīkak bē phiàn lâng, Tâioân itti̍t sī Tiongkok ê chi̍tpō͘hūn. Sit sòaⁿ chē chē nî ê gín'á kuibóe chóng sī tio̍h tńglâi chhù ni̍h.

I ê bûnchiuⁿ chi̍tē chhut lâi, chhiò tò kúi pahbān lâng. Kantāⁿ chhiò iáu bô kàu, chin chē lâng chin phahpiàⁿ kā i thíchhiò á sī kā i chiàⁿ khau tò siah, putchí lāujia̍t, mā chēngka ta̍kê chhiàutâm ê chuliāu. Tâioân chuchhim kiûphêng Chio̍h Bêngkín tī bīnchheh téngbīn piáusī, kinkì thóngkè, Tâioân ū 9,000 keng Ji̍tpún liāulí tiàm, bīkak bē phiàn lâng. Tâioân chokka Chu Iūhun kā華春瑩ê bûn choán hoat kàu bīnchheh, mn̄g kóng,"lí kámkáⁿ sǹg Tâioân ū kúi keng Bíkok sek, Ji̍tpún sek, Hânkok sek chhanthiaⁿ? iáu ū Ìtāilī mī?" ū chi̍t ūi Tiongkok bāngiú mā khòaⁿ bē lo̍hkhì, piáusī kóng "góa hāi ah, goán chhù hūkīn 麥當勞, 星巴克, 肯德基lóng chóng ū, goânlâi góa sī tī Bíkok!" lēnggōa chi̍t ūi Tiongkok bāngiú mn̄g kóng, góa ta̍k kang lim Tâioân ê 珍珠奶茶, khòaⁿ beh ánchóaⁿ?

Ji̍tpún 《 Sánkeng sinbûn 》 Tāipak chikio̍ktiúⁿ Yaita san（矢板明夫）tī bīnchheh hoat bûn kóng, i tī Tāipak tòa nn̄g nî pòaⁿ, kámkak Tāipak ê Ji̍tpún lamī tiàm, súsih tiàm, 居酒屋 ūiáⁿ bē chió. Tānsī i chaiiáⁿ, choa̍ttùi bô jīmhô chi̍tê chèngsiông ê Ji̍tpún lâng, ē liânsióng kàu "Tâioân ê Ji̍tpún chhankoán chiahnī chē, Tâioân tio̍h engkai sio̍k tī Ji̍tpún. I koh chhâliáu, tī Tangkiaⁿ kèngjiân ū 9,000 gōa keng Tionghôa liāulí. Chitê pílē engkai sī choân sèkài chúiàu siâⁿchhī tiong siōng koân ê. Siatsú ū chi̍t kang, Τiongkiōng gōakaupō͘ ē sái koattēng kokchè tia̍tsū, khióngkiaⁿ Ji̍tpún ê siúto͘ tio̍h ē sûisî piàn choh Τiongkiōng ê o͘h.

Tâioân ū chi̍t ūi bāngiú khòaⁿ pòtō liáuāu kóng,"chin hóchhiò, 華春瑩 sī ēng Engbûn hoat ê, chinchiàⁿ piàn choh kokchè chhiòōe. "Ūiáⁿ to̍h tio̍h, inūi i ēng Engbûn siá ê koh sī tī “Twitter” téngbīn hoatpiáu ê, chiah ē ínkhí Bíkok Kokbūīⁿ chêng hoatgiânjîn Otagusu（Morgan Ortagus） lúsū mā kāngkhoán tī “Twitter” téngbīn, seng kā華春瑩ê PO bûn chia̍t tô͘, chiah koh ēng 華春瑩ê khùi kháu kóng,"Tiongkok ū chhiaukòe 8,500 keng Kenthaki chhanthiaⁿ, bīkak bē phiàn lâng, Tiongkok itti̍t sī Bíkok Kenthaki chiu ê chi̍tpō͘hūn. Sit sòaⁿ chē chē nî ê gín'á kuibóe chóng sī tio̍h tńglâi chhù ni̍h."

Bôìtiong, Bíkok Kenthaki chiu soah chhōe tio̍h sit sòaⁿ chē chē nî ê gín'á— Tiongkok ．(220812)

Chù, 華（Húa）春瑩 麥當勞 星巴克 肯德基 珍珠奶茶 　居 酒屋 　 chhiáⁿ liām Hôagí


無jōa久進前，中國chiâⁿ流行用「百度地圖」搜chhōe台灣，包括以中國城市名號名ê街路，像講南京路、廣州街，抑是kah中國地名相關ê餐廳，像講福州魚丸乾麵、汕頭火鍋，lóng hō͘中國網友感覺chiâⁿ趣味、chiâⁿ稀奇，搜chhōe量大大增加，甚至chē kah致使「百度地圖」一時「崩去」無法度使用。

八月初七，現任中國外交部部長助理、外交部發言人華春瑩女士一時手癢（giauⁿ），用英文tī“Twitter”頂面發表高論，伊tī高論中有貼一張「百度地圖」ê截圖，伊講，tī「百度地圖」顯示，台北市有38間山東水餃館、67家山西麵館。味覺bē騙人，台灣一直是中國ê一部分。失散（sitsòaⁿ）chēchē年ê gín'ákui尾總是tio̍h轉來厝裡。

伊ê文章一下出來，笑倒幾百萬人。干單笑猶無夠，真chē人真拍拼kā伊恥笑抑是 kā伊正刨（khau）倒削，不止鬧熱，mā增加逐个笑談ê資料。台灣資深球評石明謹tī面冊頂面表示，根據統計，台灣有9,000家日本料理店，味覺bē騙人。台灣作家朱宥（iū）勳kā華春瑩ê文轉發到面冊，問講：「你kámkáⁿ算台灣有幾間美國式、日本式、韓國式餐廳？猶有義大利麵？」有一位中國網友mā看bē落去，表示講「我害ah，阮厝附近麥當勞、星巴克、肯德基lóng總有，原來我是tī美國！」另外一位中國網友問講，我逐工lim台灣ê珍珠奶茶，看beh按怎？

日本《產經新聞》台北支局長Yaita san（矢板明夫）tī面冊發文講，伊tī台北tòa兩年半，感覺台北ê日本拉麵店、壽司店、居酒屋有影bē少。但是伊知影，絕對無任何一個正常ê日本人，會聯想到「台灣ê日本餐館chiahnīchē，台灣tio̍h應該屬tī日本。伊koh查了，tī東京竟然有9,000外間中華料理。這個比例應該是全世界主要城市中上koânê。設使有一工，中共外交部會使決定國際秩序，恐驚日本ê首都tio̍h會隨時變作中共ê o͘h。

台灣有一位網友看報導了後講：「真好笑，華春瑩是用英文發ê，真正變作國際笑話。」有影to̍h tio̍h，因為伊用英文寫êkoh是tī“Twitter”頂面發表ê，chiahē引起美國國務院前發言人Otagusu（Morgan Ortagus）女士mā仝款tī“Twitter”頂面，先kā華春瑩êPO文截圖，才koh用華春瑩ê氣口講：「中國有超過8,500間Kenthaki餐廳，味覺bē騙人，中國一直是美國Kenthaki州ê一部分。失散chēchē年ê gín'ákui尾總是tio̍h轉來厝裡。」

無意中，美國Kenthaki州soah chhōe tio̍h失散chēchē年ê gín'á—中國．(220812)

註：華（Húa）春瑩 麥當勞 星巴克 肯德基 珍珠奶茶　居酒屋　請唸華語