《綠色短評》

 | | | 轉寄

大選輸了，民進黨tio̍h按怎檢討！

作者 李南衡, ChoânTâijī/全台字 by Chng Hūiphêng 2022.12.11

Choânbîn Tâioânjī pán/全民台灣字版簡稱ChoânTâiJī

《 Le̍ksek toánphêng 》　 Lí Lâmhêng

　　Tāisoán su liáu, Bînchìntóng tio̍h ánchóaⁿ kiámthó!

Ji̍tpún ha̍kchiá, Tangkiaⁿ Gōakokgí Tāiha̍k Ogasawara Yoshiyuki（小笠原欣幸）kàusiū, tī 2020 nî chóngthóng tāisoán ê sî, īchhek Chhòa Engbûn chóngthóng tit phiò lu̍t 57.7%, kah si̍tchè tit phiò lu̍t 57.1% kantāⁿ chha 0.6%, chún kah ē hông kiaⁿ ·tio̍h. Chi̍t ūi sǹgmiāsian sǹg kah chiok chún, lán ē chunchheng i kiò choh"poànsian", nāsī ánne Ogasawara kàusiū ē khamtit chunchheng choh"3/4 sian". Kiⁿî cha̍pgoe̍h jīla̍k, chit ūi Ogasawara kàusiū tī bīnchheh téngbīn īchhek kiⁿî Tâioân káuha̍pit tāisoán kiatkó, 22 koān chhītiúⁿ soánkí, Bînchìntóng 5 se̍k, Kokbîntóng 15 se̍k, Bînchiòngtóng 1 se̍k, bô tóng chek 1 se̍k. Sīmchì kā múi chi̍tê koānchhītiúⁿ tòngsoán miâtoaⁿ lóng lia̍t chhutlâi. Tongsî ū chin chē lâng kóng Ogasawara kàusiū chit piàn bô chún ah! chin pháiⁿsè, 30 kang āu ê cha̍pitgoe̍h jīla̍k soánkí kiatkó, tûliáu Kagī chhītiúⁿ iân āu soánkí ígōa, só͘ū ê koān chhītiúⁿ tòngsoán miâtoaⁿ kah i īchhek ê oânchoân kāngkhoán, chi̍ttiám’á chengchha to bô.

Chit piàn soán su ê Bînchìntóng tio̍h ū suiàu iōngsim chaipôe chit khoán ê "soánkí chengsoànsu", tī pêngsî tio̍h bô thêng chò múi chi̍tê koān chhī jînbîn tùi kok chèngtóng ê chichhî tō͘, ētàng giánkiù chhut múi chi̍tê koānchhītiúⁿ kîkan ê piànhòa. Tējī, suiàu chaipôe ē hiáu chíntoàn kok chióng chèngtī pēⁿchèng ê pēⁿlísu, giánkiù chhut múi chi̍t koānchhī ê būntê chhut tī tóūi. Tēsaⁿ, suiàu chaipôe ē hiáu khui io̍hhong ê isu. Bián kúi nî, póchèng Bînchìntóng ētàng kā choân kok múi chi̍tê koānchhī tīlí hó. Lán ēng chit piàn soánkí ê kiatkó lâi chò kiámthó.

Chò liáu huisiông hó liân jīm ê koānchhītiúⁿ, chit piàn bētang koh chham soán, i só͘ thuichiàn kòa póchèng ê hāusoánjîn, chiàu lí kóng engkai ē tittio̍h koānbîn á·sī chhībîn ê chichhî chiah tio̍h, ná ē chhinchhiūⁿ Pîntong koāntiúⁿ Phoaⁿ Bōngan só͘ thuichiàn ê li̍phoat úigoân Chiu Chhunbí chiah iâⁿ bān gōa phiò niāniā, koh khah kîkoài ê sī, Kelâng chhītiúⁿ Lîm Iūchhiong thuichiàn ê li̍phoat úigoân Chhòa Sekèng, Thôhn̂g chhītiúⁿ Tēⁿ Bûnchhàn thuichiàn ê li̍phoat úigoân Tēⁿ Ūnpêng, Sintek chhītiúⁿ Lîm Chìkian thuichiàn i ê hù chhītiúⁿ Sím Hūikhēng, m̄nā lóng chóng lo̍ksoán, jîchhiáⁿ phiò chha chin chē. Che sī siáⁿmi̍h tōlí? Hō͘ lâng siūⁿ bô.

Chit piàn soánkí, ū chin chē ūi koānchhītiúⁿ kah koānchhī gīoân hāusoánjîn, iânsio̍k 2018 nî ê siûhūn giânlūn, o͘pe̍h mē lâng·ê lóng chóng koân phiò tòngsoán. Ánne, ē hō͘ chit chióng lâng tekì kah gō͘hōe kóng sòaⁿpò siûhūn giânlūn, o͘pe̍h mē lâng si̍tchāi chin hó ēng. Bînchìntóng tiongiong tio̍h hóhó giánkiù kái to̍k ê io̍hhng, tī siānliông ê Tâioân thó͘tē téngbīn si̍tchāi m̄ hó koh sòaⁿpò siûhūn giânlūn. Che sī chin giâmtiōng ê ùjiám!

　　 Chit piàn soánkí, Tâitiong chhītiúⁿ Lô͘ Siùiàn, Hûnlîm koāntiúⁿ Tiuⁿ Lēsiān, Gîlân koāntiúⁿ Lîm Chumiāu, Hoalian Koāntiúⁿ Chhî Chinùi, Tâitang koāntiúⁿ Jiâu Khènglêng gō͘ ūi lúsèng ê Tiongkok Kokbîntóng koānchhītiúⁿ lóng piàⁿ liân jīm, kîtiong ū chò liáu chiâⁿ hó·ê, ū chò liáu phó͘thong·ê, ū chò liáu chin chha·ê, tānsī múi chi̍t ūi lóng chóng koân phiò tòngsoán, tōa iâⁿ Bînchìntóng tùichhiú iâⁿ kah ū thang hóbē. Tàuté sī siáⁿmi̍h goânin?

　　 Chit piàn káuha̍pit tāisoán su liáu, Bînchìntóng tiongiong tio̍h kah Ogasawara kàusiū o̍h, siatkè chhut kui thò sin ê soánkí chheklio̍k, āupiàn soánkí chiah ū khólêng iâⁿ tò tńglâi. (221126)


Pe̍hōejīpán/白話字版


《 Le̍ksek toánphêng 》　 Lí Lâmhêng

　　Tāisoán su liáu, Bînchìntóng tio̍h ánchóaⁿ kiámthó!

Ji̍tpún ha̍kchiá, Tangkiaⁿ Gōakokgí Tāiha̍k Ogasawara Yoshiyuki（小笠原欣幸）kàusiū, tī 2020 nî chóngthóng tāisoán ê sî, īchhek Chhòa Engbûn chóngthóng tit phiò lu̍t 57.7%, kah si̍tchè tit phiò lu̍t 57.1% kantāⁿ chha 0.6%, chún kah ē hông kiaⁿ tio̍h. Chi̍t ūi sǹgmiāsian sǹg kah chiok chún, lán ē chunchheng i kiò choh"pòaⁿsian", nāsī ánne Ogasawara kàusiū ē khamtit chunchheng choh"3/4 sian". Kinnî cha̍pgoe̍h jīla̍k, chit ūi Ogasawara kàusiū tī bīnchheh téngbīn īchhek kinnî Tâioân káuha̍pit tāisoán kiatkó, 22 koān chhītiúⁿ soánkí, Bînchìntóng 5 se̍k, Kokbîntóng 15 se̍k, Bînchiòngtóng 1 se̍k, bô tóng chek 1 se̍k. Sīmchì kā múi chi̍tê koānchhītiúⁿ tòngsoán miâtoaⁿ lóng lia̍t chhutlâi. Tongsî ū chin chē lâng kóng Ogasawara kàusiū chit piàn bô chún ah! chin pháiⁿsè, 30 kang āu ê cha̍pitgoe̍h jīla̍k soánkí kiatkó, tûliáu Kagī chhītiúⁿ iân āu soánkí ígōa, só͘ū ê koān chhītiúⁿ tòngsoán miâtoaⁿ kah i īchhek ê oânchoân kāngkhoán, chi̍ttiám'á chengchha to bô.

Chit piàn soán su ê Bînchìntóng tio̍h ū suiàu iōngsim chaipôe chit khoán ê "soánkí chengsoànsu", tī pêngsî tio̍h bô thêng chò múi chi̍tê koān chhī jînbîn tùi kok chèngtóng ê chichhî tō͘, ē tàng giánkiù chhut múi chi̍tê koānchhītiúⁿ kîkan ê piànhòa. Tē jī, suiàu chaipôe ē hiáu chíntoàn kok chióng chèngtī pēⁿchèng ê pēⁿlísu, giánkiù chhut múi chi̍t koānchhī ê būntê chhut tī tóūi. Tē saⁿ, suiàu chaipôe ē hiáu khui io̍hhng ê isu. Bián kúi nî, póchèng Bînchìntóng ē tàng kā choân kok múi chi̍tê koānchhī tīlí hó. Lán ēng chit piàn soánkí ê kiatkó lâi chò kiámthó.

Chò liáu huisiông hó liân jīm ê koānchhītiúⁿ, chit piàn bē tang koh chham soán, i só͘ thuichiàn kòa póchèng ê hāusoánjîn, chiàu lí kóng engkai ē tit tio̍h koānbîn á sī chhībîn ê chichhî chiah tio̍h, ná ē chhinchhiūⁿ Pîntong koāntiúⁿ Phoaⁿ Bōngan só͘ thuichiàn ê li̍phoat úigoân Chiu Chhunbí chiah iâⁿ bān gōa phiò niāniā, koh khah kîkoài ê sī, Kelâng chhītiúⁿ Lîm Iūchhiong thuichiàn ê li̍phoat úigoân Chhòa Sekèng, Thôhn̂g chhītiúⁿ Tēⁿ Bûnchhàn thuichiàn ê li̍phoat úigoân Tēⁿ Ūnpêng, Sintek chhītiúⁿ Lîm Chìkian thuichiàn i ê hù chhītiúⁿ Sím Hūikhēng, m̄ nā lóng chóng lo̍ksoán, jîchhiáⁿ phiò chha chin chē. Che sī siáⁿmi̍h tōlí? Hō͘ lâng siūⁿ bô.

Chit piàn soánkí, ū chin chē ūi koānchhītiúⁿ kah koānchhī gīoân hāusoánjîn, iânsio̍k 2018 nî ê siûhūn giânlūn, o͘pe̍h mē lâng ê lóng chóng koân phiò tòngsoán. Ánne, ē hō͘ chit chióng lâng tekì kah gō͘hōe kóng sòaⁿpò siûhūn giânlūn, o͘pe̍h mē lâng si̍tchāi chin hó ēng. Bînchìntóng tiongiong tio̍h hóhó giánkiù kái to̍k ê io̍hhong, tī siānliông ê Tâioân thó͘tē téngbīn si̍tchāi m̄ hó koh sòaⁿpò siûhūn giânlūn. Che sī chin giâmtiōng ê ùjiám!

　　 Chit piàn soánkí, Tâitiong chhītiúⁿ Lô͘ Siùiàn, Hûnlîm koāntiúⁿ Tiuⁿ Lē siān, Gîlân koāntiúⁿ Lîm Chumiāu, Hoalian Koāntiúⁿ Chhî Chinùi, Tâitang koāntiúⁿ Jiâu Khènglêng gō͘ ūi lúsèng ê Tiongkok Kokbîntóng koānchhītiúⁿ lóng piàⁿ liân jīm, kîtiong ū chò liáu chiâⁿ hó ê, ū chò liáu phó͘thong ê, ū chò liáu chin chha ê, tānsī múi chi̍t ūi lóng chóng koân phiò tòngsoán, tōa iâⁿ Bînchìntóng tùichhiú iâⁿ kah ū thang hóbē. Tàuté sī siáⁿmi̍h goânin?

　　 Chit piàn káuha̍pit tāisoán su liáu, Bînchìntóng tiongiong tio̍h kah Ogasawara kàusiū o̍h, siatkè chhut kui thò sin ê soánkí chheklio̍k, āupiàn soánkí chiah ū khólêng iâⁿ tò tńglâi. (221126)




日本學者、東京外國語大學Ogasawara Yoshiyuki（小笠原欣幸）教授， tī 2020年總統大選ê時，預測蔡英文總統得票率57.7%，kah實際得票率57.1% kantāⁿ差0.6%，準kah ē hông驚tio̍h。一位算命先算kah足準，咱ē尊稱伊叫作「半仙」，若是ánne Ogasawara教授ē堪得尊稱作「3/4仙」。今年十月二六，chit位Ogasawara教授tī面冊頂面預測今年台灣九合一大選結果，22縣市長選舉：民進黨5席、國民黨15席、民眾黨1席、無黨籍1席。甚至kā每一个縣市長當選名單lóng列出來。當時有真chē人講Ogasawara教授chit遍無準ah！真pháiⁿsè，30工後ê十一月二六選舉結果，除了嘉義市長延後選舉以外，所有ê縣市長當選名單kah伊預測ê完全仝款，一點仔精差to無。

Chit遍選輸ê民進黨tio̍h有需要用心栽培chit款ê「選舉精算師」，tī平時tio̍h無停做每一个縣市人民對各政黨ê支持度，ē tàng研究出每一个縣市長期間ê變化。第二，需要栽培ē曉診斷各種政治病症ê病理師，研究出每一縣市ê問題出tītó位。第三，需要栽培ē曉開藥方ê醫師。免幾年，保證民進黨ē tàng kā全國每一个縣市治理好。咱用chit遍選舉ê結果來做檢討。

做了非常好連任ê縣市長，chit遍bē tang koh參選，伊所推薦掛保證ê候選人，照理講應該ē得tio̍h縣民抑是市民ê支持才tio̍h，náē親像屏東縣長潘孟安所推薦ê立法委員周春米才贏萬外票niāniā，koh khah奇怪ê是，基隡市長林右昌推薦ê立法委員蔡適應、桃園市長鄭文燦推薦ê立法委員鄭運鵬、新竹市長林志堅推薦伊ê副市長沈慧虹，m̄ nā lóng總落選，而且票差真chē。Che是啥物道理？Hō͘人想無。

Chit遍選舉，有真chē位縣市長kah縣市議員候選人，延續2018年ê仇恨言論、烏白罵人 ê lóng總高票當選。Ánne，ēhō͘ chit種人得意kah誤會講散播仇恨言論、烏白罵人實在真好用。民進黨中央tio̍h好好研究解毒ê藥方，tī善良ê台灣土地頂面實在m̄好koh散播仇恨言論。Che是真嚴重ê污染！

　　Chit遍選舉，台中市長盧秀燕、雲林縣長張麗善、宜蘭縣長林姿妙、花運縣長徐榛蔚、台東縣長饒慶鈴五位女性ê中國國民黨縣市長lóng拼連任，其中有做了chiâⁿ好 ê，有做了普通 ê，有做了真差 ê，但是每一位lóng總高票當選，大贏民進黨對手贏kah有thang好賣。到底是啥物原因？

　　Chit遍九合一大選輸了，民進黨中央tio̍h kah Ogasawara教授學，設計出kui套新ê選舉策略，後遍選舉才有可能贏倒轉來。 (221126)