《台灣布袋戲e5歷史》

 | | | 轉寄

走chhōe布袋戲開台祖師

作者 陳龍廷 2005.11.20

布袋戲到底tī什麼時代傳來台灣？是叨一位藝人將chit項掌中技藝帶到台灣？叨一位藝人是台灣布袋戲ê開台祖？一旦咱開始追問台灣布袋戲ê來源，真可能有一連串ê問題出現tī咱腦海內。若ánne，beh ánchóaⁿ chhōe tio̍h chiahê答案neh?若beh túi清代ê史書、方志去走chhōe答案，chiahê官方ê檔案連提lóng m̄ bat提。

十九世紀初中國泉州最著名ê布袋戲藝人，包括金貓、銀狗、何象、少春lóng無來到台灣，只有聽老藝人傳聞而已。陸陸續續有真chē唐山ê布袋戲師傅來台灣演出，或定居落來授徒。

tùi目前台灣現存ê幾個布袋戲家族ê生命史kap傳承，ē tàng看出hitê戲班開台祖ê時代：五洲派ê第一代祖師黃馬，也就是黃海岱ê父親，世居咱雲林土庫馬公厝，二十一歲時，也就是1883年拜師蘇總學布袋戲，而蘇總師承唐山師傅「圳師」。

泉州師傅童全，廿歲時，也就是1873年隻身來台，tī咱艋舺一帶發展演藝事業。唐山師傅會來臺表演，甚至傳藝，重要ê客觀環境，就是「臺灣錢淹腳目」，chiah hō͘ in願意tī臺灣定居kap發展。tī台北盆地傳徒siōng chē影響最大ê陳婆，大約也kap伊同時代tī台灣活動，伊就是後來「小西園」、「亦宛然」掌中班ê祖師。

興閣派ê第一代祖師鍾任秀智，也就是鍾任祥ê父親，1873年tī彰化溪洲水尾村出世，聽講in祖先鍾力（18191857），原籍是漳州府詔安縣西坑鄉三都港頭村。

另外，仝款是潮調布袋戲班ê員林新平閣，第一代祖師詹其達（18051877），原籍潮州府饒平縣，是四代家傳ê布袋戲班。

員林大崙坑第一代主演吳謹直，是傳衍三代ê潮調布袋戲班，祖籍是漳州府平kap縣，其生命活躍ê年代也是十九世紀中期（18411879）。

由此可以瞭解，臺灣布袋戲ê第一代開台祖，或者in師承唐山師傅學布袋戲為業ê年代，大多是十九世紀中期左右，也就是道光、咸豐年間。Tùi chiahê線索中，咱大約ē tàng瞭解布袋戲傳入台灣ê時代，是tī十九世紀初期。