《宋澤萊新著《天路拾穗》台譯版》

 | | | 轉寄

第三部：聖靈內住篇_29【題目】聖靈內住是啥物？

作者 宋澤萊 2026.09.20






第三部：聖靈內住篇


29【題目】聖靈內住是啥物？

踏話頭：咱一定tio̍h研究聖靈內住。因為靠tio̍h聖靈ê內住，咱to̍h ētàng koh khah理解基督內面ê奧祕；siōng尾，藉tio̍h聖靈內住，上主beh kā永生bē死ê性命賜hō͘你！

※
1. 聖靈內住tī咱ê身軀裡

內住﹝indweling﹞是一个動名詞，to̍h是tòa tī內面ê意思。本文所述ê「內住」應該是teh指「永住」tī身軀裡chiah有算額，假使聖靈iáu ē離開to̍h無算數。

Tī《聖經》裡，有關係聖靈內住ê經文，siōng重要ê to̍h是記載tī〈約翰福音〉14：16~17節ê一段耶穌所講ê話：「我要求父，父to̍h另外賜hō͘ lín一位保惠師，叫祂永遠kah lín同在，to̍h是真理ê聖靈，乃是人bētàng接受ê，因為無看tio̍h祂，koh m̄ bat祂。Lín soah認bat祂，因祂常常kah lín同在，koh beh tòa tī lín內面。」Chit段話所以重要，當然是因為它是耶穌親嘴講ê，mā明確kā咱講，聖靈是ētàng永住tī咱基督徒「內面」ê。

Tī〈哥林多前書〉6：18~20節，保羅mā講：「Lín tio̍h閃避淫行，人所犯ê，lóng tī身軀以外，只有行淫ê，是得罪kakī ê身軀，kám m̄知lín ê身軀to̍h是聖靈ê殿？這聖靈是tùi上主來ê，tòa tī lín內面ê。而且lín m̄是kakī ê人，因為lín是重價買來ê，所以tio̍h tī lín ê身軀頂面榮光上主。」保羅ê chit段話有真chē ê涵義；重點在tī說明聖靈為啥物beh tòa tī咱內面。照保羅ê意思是講，自從咱信耶穌了後，罪to̍h受赦免à，是耶穌用祂受死ê hit種重kah親像泰山ê代價所贖回ê，所以咱已經是耶穌ê人，祂bē koh再hō͘你隨隨便便傷害kakī ê身軀，所以koh再特別有派聖靈內住tī咱內面，hō͘ 咱ētàng tī行為上顯示出上主ê聖潔，無koh有淫行。Siōng重要ê是，保羅Tī chit段話裡四pái講tio̍h「身軀」，koh明白講咱ê身軀tī聖靈內住了後，to̍h變成「聖靈ê殿」，表示聖靈m̄nā ētàng tòa tī咱ê「心」，尚且ētàng tòa tī咱ê「身軀」裡。

2.聖靈內住ê功用

親像頂面已經敘述ê，保羅tī〈哥林多前書〉裡講tio̍h聖靈ê內住是ài咱無koh有「淫行」，chia所講ê「淫行」可能是單指無正常ê性行為，功用kahná是比較khah小一kóa。M̄koh，聖靈ê內住實際上所beh斬除ê hit kóa tùi罪ê律所產生ê「邪情私慾」是真廣闊ê。保羅tī〈加拉太書〉5：18裡lóng總有講16種，he to̍h是「姦淫、lâsâm、邪惡、拜偶像、邪術、仇恨、相爭、怨恨、激心、結黨、紛爭、異端、嫉妒（有ê古卷tī chia有「兇殺」二字）、酒醉、沉淪ê宴席。」已經有實際ê邪惡行為，mā有實際ê邪念；koh tī〈羅馬書〉ê第八章講tio̍h，聖靈ê律到siōng尾ē sái信徒脫離罪ê律，也to̍h是戰贏這16種邪惡行為kah邪念。咱就ánne 知影聖靈ê內住ê功用是真闊，它ētàng引起咱ê內在本性ê改變是gōani̍h’á大。咱做聖徒ná ētàng隨便放棄「聖靈內住」ê chit種免費ê恩典leh？

3.聖靈內住怎樣ētàng戰贏罪ê律？

Ánne，聖靈ê律koh án怎ētàng hō͘人戰贏來脫離罪ê律leh？Tī《聖經》裡，並無koh khah進一步ê說明。有關聖靈永住tī咱身軀裡了後，kah罪ê律ê交戰過程，保羅tī〈羅馬書〉裡並無hō͘咱gōa詳細ê描述，伊kantaⁿ簡單講聖靈kah罪之間ê輸贏起落，到siōng尾ē hō͘咱擺脫罪ê律ê控制而已。所以chitê過程可能to̍h ē變成一種神祕，ta̍k人所講ê lóng無相仝。

我ê經驗是ánne：聖靈ē內住tī咱ê胸腹一帶。To̍h tī內住ê瞬間，咱ê石心隨時ē變成肉心，一向拗蠻m̄肯認罪ê本性ē變成歡喜來認罪，而且hit當時知影保羅所講ê 16種邪惡行為to̍h是根本大罪。咱ē因為知影罪ê內容soah感覺驚疑萬分！了後，當聖靈穩固內住tī咱ê胸腹了後，祂ē為咱建構起造一个內在ê空間，而且慢慢加添，喜愛犯罪ê「我」chitê感覺to̍h ē反向被聖靈包圍，變成是「我」整個被聖靈包裹起來，有時chūn ē分bē清「我」kah「聖靈」ê界線，「我」隨時受tio̍h聖靈ê監督kah管控。Tī「我」kah「聖靈」共同建構ê chitê世界，因為聖靈ê勢力ē jú來jú勇jú大，ē有恆常性ê平安kah喜樂產生，而且不時ē產生同情別人ê心，以及撙節kakī不良興趣ê心。講tio̍h「我」kah「聖靈」以外ê hitê肉體情慾世界ē被隔離驅逐，雙方漸行漸遠，kahná隔一條大溝，而且看tio̍h肉體情慾世界當直直衰敗、衰弱。有時，當肉體情慾ê念頭無法度避免koh起ê時，咱知影he雖然是我ê肉體ê邪情私慾，畢竟是屬tī整個世界肉體hit pêng ê物件，我雖然無法度禁止它，m̄koh它beh靠近我mā真無簡單，它一來到「我」kah「聖靈」共同建構ê新世界裡，to̍h自然被消熔去。Siōng重要ê是聖靈ē tī咱ê內在結出聖靈ê果chí，也to̍h是仁愛、喜樂、和平（和合本kah天主教ê思高版《聖經》翻譯做「平安」）、忍耐、恩慈、良善、信實、溫柔kah撙節chit九種美德，轉化咱ê本性，hō͘咱ê內在美善起來。因為聖靈ê果chí ētàng hō͘ 我感覺滿意、實在；我to̍h bē koh再對情慾世界ê物件欠一个跪，kakī甘願做奴隸。

M̄nā ánne，聖靈內住一段時日了後，to̍h ē一直指導咱認罪、悔改；祂甚至ē嚴厲管教你，tī你m̄肯認罪、悔改ê時，hō͘你親臨地獄á是陰間，hō͘你知影末日審判ê驚人，siōng尾你to̍h ē屈服，無koh犯罪，就ánne聖潔起來。

Siōng尾，hitê一直想beh犯罪soah遭遇tio̍h聖靈管控ê「我」（á是有人稱做舊我、老我），因為版圖kah能力jú來jú微細，終其尾消失無看tio̍h，to̍h tī hit瞬間，聖靈一跳to̍h變成唯一ê「新我」，了後發大光芒，你to̍h ē瞬間知覺tio̍h聖靈ê本質to̍h是「我是阿拉法（Alpha，Α/α），我是俄梅嘎（Omega，Ω/ω）」ê永遠性命，也to̍h是覺察tio̍h「新我」有無限闊大kah永垂不朽ê本質，kah神是同在、同質、永存、永在ê。Chit時你to̍h ē感覺永生bē死ê性命已經hō͘你掌握，成做你ê新主人，你已經被徹底換新a；to̍h是感覺kakī「得永生」a，也to̍h是「重頭生」a。就ánne完全明白kakī已經大範大範進入上主ê國，參與tī上帝ê國度裡，死了後除了生活tī天堂kah上主做伙以外，tó位mā m̄去。Chit時to̍h徹徹底底感覺kakī確確實實、完完全全已經得救，無koh有任何ê giâu疑kah驚惶。這是未死chìn前to̍h ētàng得tio̍h ê恩賜，mā是上主hō͘你chit世人siōng大ê恩賜。

4.聖靈ê內住需要koh khah chē人做見證

對咱變成粗瓷、聖靈永住ê歡喜，有名ê傳道人倪柝聲（Watchman Nee）bat激動講：「親愛ê弟兄姊妹，你kám知影你內面ê聖靈to̍h是上主？苦bē得咱ê目chiu被phah開，看見上主ê恩典是hiahni̍h’á大！苦bē得咱ētàng知影，藏tī咱內面ê豐富資源是hiahni̍h’á無限ê大！Hit位tòa tī我內面ê，m̄是kantaⁿ一種影響，乃是成就你ê一位；祂to̍h是上主！Hit位無限ê上主，竟然tòa tī我內面！當我想tio̍h chit點，我to̍h ē歡喜kah大聲hoah叫起來！我感覺無話語ētàng講清楚，發見chit項tāichì，to̍h是看見tòa tī咱內面ê聖靈，乃是成就你ê聖靈，這是何等ê福氣！我kantaⁿ ētàng重複講：『祂是有一个位格ê，祂是有一个位格ê。』Oh，朋友，我意愛對你重複一百pái — tòa tī咱內面ê聖靈是有一个位格ê。我只不過是一个粗瓷，m̄koh tī chitê粗瓷裡，卻貯無價ê寶貝，to̍h是榮光ê上主。」伊koh講：「若是上主ê kiáⁿ兒ê目chiu lóng phah開，看見hitê藏tī in內面ê寶貝是chiahni̍h大，in to̍h無koh驚chhoah kah擔憂à。你知影tī lín內面ê豐富資源kám有夠應付所tú tio̍h任何環境ê需要？你kám知影你有夠額ê能力，kā你tòa ê城市徙振動？你kám知影你有夠額ê能力，搖動chitê宇宙？Oh，hō͘我用siōng虔誠ê話koh再kā你講：你chitê蒙上主恩典來重頭生ê人 — 你ê內面有貯！」

﹝註1﹞Tī chit兩段話裡，倪柝聲一再講聖靈是有一个位格ê，意思to̍h是講聖靈是三位一體ê上主之一，聖靈to̍h是上主，祂有屬tī祂kakī ê上主ê主張，祂有祂ê律，ētàng教導你，hō͘你無koh驚chhoah kah擔憂，hō͘你ētàng有直直連sòa ê豐富資源，ētàng應付所tú tio̍h任何環境ê需要，祂to̍h是掌權ê上主。雖然倪柝聲chit段話帶有聖靈充滿ê氣味，mā比較khah有功利色彩，á無講tio̍h聖靈戰贏罪ê律ê hit方面，m̄koh咱的確mā看tio̍h伊對「聖靈內住」經驗ê一回坦白陳述！

總講一句，對聖靈內住了後ê實際經驗，一定tio̍h有koh khah chē人清清楚楚koh明明白白ka講出來，ánne，咱to̍h ētàng tī真chē ê主觀敘述裡，提煉出客觀ê共同經驗，就ánne來豐富「聖靈內住」ê涵義！

──2014、06、29貼tī《基督教通訊》
──2017、09、20小khóa修改tī鹿港

﹝註1﹞倪柝聲ê chit兩段話見倪柝聲著：《正常ê基督徒生活》﹝台北：台灣福音書房，1992﹞頁124~125。