《宋澤萊新著《天路拾穗》台譯版》 |
|
|
|
轉寄 |
37【題目】聖靈內住kah聖靈灌ak
倪柝聲tī《真理ê聖靈》chit本冊裡﹝註1﹞,講tio̍h聖靈tī人ê內外兩面teh工作。伊講所謂聖靈tī人內面ê工作to̍h是teh指「聖靈內住」了後所產生ê九種聖靈果chí ê要素,伊ê目的是beh hō͘人成聖。講tio̍h聖靈tī人外面ê工作to̍h是teh指「聖靈灌ak」了後所產生ê屬靈恩賜,也to̍h是hō͘信徒有九種恩賜ê能力,伊ê目的當然是為tio̍h傳教做工,ná親像〈使徒行傳〉裡五旬節所發生ê hitê故事。倪柝聲認為一个基督徒若是ētàng有「聖靈內住」ê成聖經歷,koh有「聖靈灌ak」了後ê屬靈恩賜能力,he是「不得了ê tāichì」!
伊ánne講:「所以tī新約中,咱看tio̍h聖靈兩面ê工作:﹝一﹞祂臨到人ê身軀頂﹝二﹞祂tòa tī人內面。祂臨到人身軀頂,是為tio̍h能力、神跡kah見證。伊tòa tī人內面,是hō͘人聖潔。聖靈ê內住是beh kā基督供應hō͘咱,hō͘基督成做咱ê,hō͘伊成做咱ê性命,而且hō͘咱ētàng結出成聖ê果chí。」
Koh講:「咱若詳細區別頂面所講ê兩者,to̍h ē明白是án怎真chē關係聖靈ê觀念是錯誤ê。真chē人掠準,只要in有kakī ê五旬節,in ê問題to̍h ē解決。M̄koh chitmá你已經得tio̍h你ê『五旬節』,你成聖ê問題kám有解決?它kám有chhōa你贏過你ê脾氣à?he並無解決贏過罪ê問題。In hit種五旬節,kantaⁿ有恩賜,無果chí。」
Koh講:「保羅看見哥林多教會光景ê時,伊無講:『Chia ê情形真害,咱一定tio̍h停落一切。』真chē摩登派﹝註:應該是teh指福音派﹞ê教師ē kā一切『屬肉體』ê物件篩掉。保羅無就ánne kā一切篩掉,卻帶入一kóa物件來做平衡。哥林多前書3:16講,『豈m̄知lín是上主ê殿,上主ê靈tòa tī lín內面?』Lín一定tio̍h學習,聖靈tī lín內面,tòa tī lín內面,是啥物意思。」
Koh講:「摩登派﹝註:應該是teh指福音派﹞ê教師教導咱講:『恩賜是幼稚ê,咱是成人,無需要像方言ánne ê chhitthô物à。咱ê信仰比hit階段向前加真chē,咱比使徒in向前加真chē,所以咱ài kā chiahê物件phah無去。』另外一方面,hit kóa贊成聖靈恩賜ê人,心內所想ê,除了恩賜以外就無別ê;in輕視無仝款經歷ê人,in講:『我tī某年某日,有得tio̍h聖靈ê浸。』Chit兩派lóng是m̄ tio̍h ê。」
M̄koh,tī最後,倪柝聲iáu是強調「聖靈內住」ê成聖經歷比「聖靈灌ak」了後ê屬靈恩賜能力khah重要。換句話來講,基督徒ê內面修養iáu是比外顯能力koh khah珍貴。
對倪柝聲ê看法,我無反對ê意見,我感覺伊講kah真好,m̄koh這是用基督徒個人ê利益來立論ê。總是,若是為tio̍h傳教有利tī他人,屬靈恩賜ê能力kahná koh khah重要。
倪柝聲ê chit段文章mā hō͘咱知影,有「聖靈內住」ê成聖經歷ê基督徒,無一定to̍h有「聖靈灌ak」ê屬靈恩賜能力;有「聖靈灌ak」ê屬靈恩賜能力ê基督徒,無一定to̍h有「聖靈內住」ê成聖經歷。一內一外,兩者是完全無仝款ê。
註1:Beh讀《真理ê聖靈》chit本冊ê人,請點下kha網址:
https://www.churchinmarlboro.org/christdigest/NiTuoSheng/nituoshen/21.zldsl/211.shenling/chapter01.html#1
──2014、07、27貼tī基督教通訊