《台灣之愛：盧俊義牧會筆記》

| | | 轉寄

這是值得一讀ê好書 ── 《守護銀髮族─醫療篇》

作者 盧俊義 台語翻譯: chuniok 2005.10.16

br>
Tti7台灣，無論是教學醫院或是一般私人診所，從事醫療工作者會將家己看診ê心得經驗，透過文字以寫故事ê方式來kā一般民眾講怎樣注意身體狀況，kap維護健康ê方法，實在是少kah真少，á門諾醫院卻是tī這方面siōng用心ê一個醫療團隊，真是令人感動。

過去ê醫生，寫病人ê病歷資料，lóng是用外文寫，病人mài講看m̄ bat，單單看in寫ê hit種七斜八歪ê字樣，連問to m̄敢問，心內kanta會肯定kap讚歎in學問高深。即使是現在已經比較會講究病人權益ê時代，也ē tàng要求醫生寫出咱看會bat ê診斷結果kap處方，一般人iáu是看m̄ bat真chē專用ê名詞，或是醫學術語，除非tī這方面有參與經驗，否則就算無文字閱讀上ê困難，也無法度明白hiahê文字所beh表達ê病情意義。也因為ánne，有bē少發生tī別人身上ê病例，一再重複出現tī咱家己ê身上，這除了造成不必要ê醫療浪費外，kohkhah可惜ê是也造成了身體ê損傷，á這原本是ē tàng避免ê事。

Á taⁿ門諾醫院ê醫療團隊，chiahê tī平時已經夠無閒ê醫師，願意用in tī醫療服務ê經驗，將所看tio̍h、tú tio̍h，而且ē tàng預防ê方法寫出來，hō͘所有讀者ē tàng加認識一kóa平時經常tú tio̍h ê疾病，卻是thang預防在先，或是醫療後ê自我保健等加kóa認識，這thang講是該院hō͘咱最珍貴ê一份禮物。Kohkhah特別ê是，chit本冊ê題材lóng是tùi病人ê身上取材，又koh是用敘述故事ê方式寫出，hō͘原本可能是乾燥無味ê深奧醫療學問，如今變成容易解讀kap明白ê知識，實在是非常難得ê一件事，也因此kohkhah顯現出chit本冊ê珍貴。

每個人lóng會有年老ê一工，á年老ê特徵就是病了了後，beh復原ê速度就kap行動仝款，會跟tòe年齡ê加添而緩慢落來，嚴重者甚至是連復原ê機會lóng真渺茫。Koh再講，因為社會結構ê變遷，年老又koh獨居ê jú來jú chē，即使有幫傭tī身邊，也無一定to̍h有路用。有ê就算有兒女同齊tòa，往往也因為子女需要工作而無法度照顧年老ê親人，只好kā身體健康ê事，往家己身上攬，á這siōng好ê方式，就是加認識一kóa chit方面ê知識，來減輕家己kap別人ê負擔。

另外一方面，我經常kā會友講，mài等到家己年老ê時chūn chiah teh學習認識年老，而是應該趁年輕有能力學習ê時chūn，就tio̍h加學習怎樣做老人，chiah bē tī這無閒ê時代，因為過度無閒á竟然bē記得家己原來早就已經變老人，hit時，想beh學kóa甚麼，恐驚lóng會感覺礙手礙腳loh。

Chit本《守護銀髮族 醫療篇》出冊chìn前，我有榮幸能得thang先閱讀，而且受邀寫chitê推薦，可能是黃勝雄醫師ài我知影，傳道者也應該像門諾ê醫療團仝款，將聖經ê信息用淺顯而且生活化ê例來詮釋出來，hō͘ kohkhah chē ê人因為讀會bat聖經話語，而認識信仰tī生命中ê意義pah。因此，看完chit本冊，我已經受tio̍h非常大ê鼓舞kap激勵。我也深信，當你看過chit本冊了後，一定受益真chē，chiahê就是門諾醫療團對咱台灣社會所做ê珍貴奉獻，真多謝in。願上帝祝福in。 （2004年3月2日為花蓮門諾醫院出版「守護銀髮族–醫療篇」一書序文，台語翻譯：Chuniok ）

盧俊義牧師的個人網站。