《台灣之愛：盧俊義牧會筆記》

 | | | 轉寄

蘭大衛醫師留hō͘台灣人ê生命之愛

作者 盧俊義 2005.12.11

講tio̍h彰化基督教醫院，真緊to̍h會hō͘人想起一則感人肺腑之愛ê故事。He是發生tī一九二八年，彰化有一個kantaⁿ十二歲，名叫周金耀ê gín'á，因無小心跋倒腳tio̍h傷，關節部位傷口潰爛化膿腫脹，經人紹介到彰化基督教醫院去就醫。當時院長蘭大衛醫師發現伊ê傷口已潰爛了一大片，gín'á一直高燒bē停，蘭先生娘（蘭醫師ê bó͘蘭連瑪玉，Marjorie Learner Landsborough）知影chitê tāichì了後，每工到醫院去照顧chitê gín'á，並且一再鼓勵伊tio̍h勇敢，經過全體醫護人員細膩照顧之下，傷勢chiah漸漸穩定落來。

有一工，蘭先生娘竟然開嘴要求丈夫蘭大衛醫師割落伊腿部ê皮膚，補到chitê gín'á ê腳上，以彌補一直無法度癒合ê腳頭u傷口。Hit時ê彰化基督教醫院並無像現在有最新穎ê醫療科技設備，就tī蘭醫師娘ê堅持之下，蘭醫師tùi bó͘ ê腿上割落四條，每條大約是寬一寸、長三寸ê皮移植到chitê gín'á ê腳上傷口處。Chit段故事就是tī台灣醫界出名ê「切膚之愛」軼事，流傳迄今iáukú hō͘人感動不已。

雖然chit件動人ê愛之事蹟離今已經有七十六年之久，m̄ nā是彰化人，ē tàng講所有聽tio̍h chitê故事ê人lóng會動容。最值得注意ê是，chit件台灣醫界第一pái ê移植手術並無成功，但奇妙ê是因為蘭醫師娘無私ê愛，卻hō͘ chitê kantaⁿ十二歲ê gín'á周金耀，tùi生命垂危ê邊緣漸漸康復起來，後來m̄ nā痊癒，並且伊iáu獻身當傳道，也bat擔任過長老教會第十四屆總會ê議長。

Á最令咱感動ê是，蘭大衛醫師ê kiáⁿ兒蘭大弼醫師，後來接續了in父親ê志業，也獻身為台灣ê醫療工作服務。伊並無因為家己母親ánne偉大ê奉獻而經常津津樂道，或是beh求咱ê社會回饋甚麼，無，完全無﹗甚至tī中央研究院台灣史研究所籌備處於前年（二○○二年）十一月出版「蘭大弼醫師口述歷史」一書中，劉翠溶、劉士永、陳美玲等三位學者對伊訪問中談及chit段歷史事蹟時，蘭大弼醫師也只是淡淡談起，並且表示hit件事tī伊ê印象中是︰「我記得無jōa清楚，看bē tio̍h真chē但你ē tàng知影發生tī hia。家母也m̄ bat加講，伊只hō͘我看一pái，我bē記得家母bat kā我講過。因為伊生我ê時感覺痛，伊kā皮膚hō͘周金耀ê時也感覺痛，所以痛是仝款ê。而阮兩人lóng是伊ê gín'á。我推測he只是一個傳說，一個謠傳而已。我從來m̄ bat聽講，而且我也完全bē記得。」（該書第59頁）看pah，tī伊眼中，病人周金耀chitê gín'á kap伊lóng是媽媽ê gín'á，ánne謙卑家己父母所做過ê感人事蹟，一點á mā lóng無誇耀in一兼二代tī台灣醫界ê貢獻，這chiah是真正仁心、醫術ê最佳典範。

蘭大衛醫師是英國人，tī一八九五年十二月以年紀kantaⁿ廿五歲ê青年，就接受英國教會ê差派來到tú被中國割hō͘日本ê咱台灣，並tī次年（一八九六年十一月）接落彰化基督教醫院ê工作。Á伊ê gín'á蘭大弼醫師則是tī一九五二年接落父親ê工作，父子兩人共計tī彰化基督教醫院服務長達六十八年。Tī chit段漫長ê歲月中，in父子兩人透過醫院ê設備，訓練出真chē傑出而且優秀ê醫護人員，為台灣醫療工作奠下了相當好ê基礎，特別是蘭大弼醫師對台灣tī神經醫學上ê貢獻kohkhah是有目共睹。In所得tio̍h ê，並m̄是thàn真chē錢、投資大企業，kohkhah m̄是現在接棒者用盡辦法thàn大錢、起大樓來顯赫家己ê才華、功業，lóng m̄是chiahê粗糙ê表面，卻是父子兩代將in生命中最真實ê愛留tī台灣、奉獻hō͘台灣，尤其是蘭連瑪玉ê「切膚之愛」kohkhah是永遠留tī台灣人ê心中。出名ê畫家李石樵先生也bat以chitê故事繪了一幅「切膚之愛」ê圖畫，以紀念chit件留hō͘咱台灣人最珍貴ê刻骨銘心之愛。這也就是為甚麼tī彰化民間會流傳著一句話講︰「南門有媽祖，西門有蘭醫師。」

一個tùi遙遠ê英國來，而且tùi蘇格蘭首府最頂尖ê拉斯哥大學醫學院畢業ê高材生，tī年紀輕輕ê時就志願獻身到chitê當時iáu相當純樸、保守ê台灣來，並將家己bó͘ ê皮膚移植到一個完全生份、貧病交加ê孩童身上，chit種愛，chiah是真實ê生命之愛﹗也因為chit種ê愛，chiah會hō͘人ê生命復甦，也會hō͘人tùi「死亡」復活過來，hō͘失落ê生命重新尋回。

真實ê愛，m̄是用一棟一棟ê水泥大樓建造起來ê，也m̄是新穎科技設備鋪設出來ê，卻是用誠實ê心將生命彼此融合作伙chiah ē tàng孕育得出來。蘭大衛醫師ê家族留hō͘咱chit種ê生命教材，值得咱珍惜kap傳承。

今年tú好是蘭大弼醫師九十大壽，伊最近接受台南神學院之邀tńg來台灣，謹以此文表示衷心ê感恩。 （原載於自由時報2004年5月9日第15頁）

盧俊義牧師的個人網站。