《台灣之愛：盧俊義牧會筆記》

| | | 轉寄

Hō͘台灣人「刻骨銘心」ê禮物

作者 盧俊義 2005.12.18

前任台東基督教醫院院長譚維義醫師是一九六一年tùi美國科羅拉多州來ê基督教宣教師。伊tī該院整整服務了三十三年，直到一九九四年退休。同年九月伊得tio̍h前總統李登輝先生頒hō͘伊紫色大綬景星勳章，這也是tī台灣第一位外國人得tio̍h chit種勳章者。

譚醫師是真笑詼ê人，伊不但無一般醫師ê傲氣，也bē因為病患chē而擺出一副真不耐ê面孔，bē。我記得一九八二年，有一工我帶一位鼻樑被鐵棍phah斷ê小姐去看伊。當伊詳細診視了後，kā阮講︰「盧牧師，我是骨科醫師，無錯，但是我ê腳手比較khah粗。但我知影花蓮門諾醫院有一位醫師，也是骨科醫師，伊也是美國人，但伊ê『手路』（台語，意思是手藝）khah幼，處理鼻á會比我kohkhah好。我建議你帶chit位小姐去花蓮看伊。我來替你khà電話， 看伊今á日是m̄是有看病？」

我聽了感覺有點á無妥當，原因是花蓮門諾hit位醫師我並無熟，而且tùi台東搭火車iau2tioh8四小時，萬一去了，伊又m̄看，ánne怎樣chiah好？我kā我ê憂心kā伊講。但是譚醫師卻ánne回答講︰「盧牧師，你放心好了。Hit位醫師對鼻á真內行，因為阮美國人鼻á lóng比較khah大，台灣人lóng叫阮『啄』（台語音讀「tok」）鼻á，容易斷裂或受傷，á伊tī chit方面ê經驗也比我豐富。我已經khà了電話，伊tú好下晡有門診，你趕緊帶chit位小姐過去，我也已經kā伊講好lah。Lín去就kā伊講是tùi我chia去ê，ánne伊就知影。」

果然ná親像伊所講ê，chit位tùi美國來tī花蓮門諾醫院服務ê骨科醫師真高桿，kantaⁿ稍khóa用力sak一下，就將he斷了ê鼻樑kā伊矯正回位，然後用一塊石膏敷tī鼻樑頂。

其實譚院長已經真出名，台東地區ê人差不多lóng認識伊，也知影伊m̄ nā是一位真優秀ê骨科醫師，同時也是一位真gâu ê外科醫師。對待病人相當親切，iáu會常常kap病人聊天、講笑，來減輕病人ê痛苦。

有一pái伊應邀到台大醫學院演講，伊kā學生講，tī台灣三十gōa年，並無留落來甚麼珍貴禮物hō͘台灣人，因為伊所有最珍貴ê物件，包括結婚時送hō͘太太ê phōa鍊、手指等禮物lóng被偷lah。但有仝款物件是別人絕對偷bōe去、也賴不掉ê，但是卻會永遠留tī台灣人生命中ê，就是tī台灣有數以千計ê人，in身上ê骨頭lóng有伊留落來ê記號。

真正是ánne，伊送hō͘台灣人siōng好ê禮物，就是「刻骨銘心」ê骨頭醫治，特別ê是伊m̄ nā醫治了病人斷裂或受傷ê骨頭，也同時醫治了病人痛苦、悲傷ê心，伊hō͘真chē病人一踏入台東基督教醫院，就真自然感受tio̍h一股特有ê暖流tī生命深處中teh流暢。

有真chē人認為留落來siōng好ê禮物，就是建造一棟一棟ê大樓，然後tī大樓ê牆壁頂鑲上一塊紀念牌á，寫上某某人ê名字或是相關ê事蹟，或是題了家己ê名字kap頭銜、公司名號，看起來真感人，也真堂皇。但chiahê真緊to̍h會因時間ê過去而漸漸hō͘人遺忘，甚至有kóa刻tī頂面ê文字iáu會遭遇tio̍h持無仝意見者ê異議。Kohkhah糟糕ê是經過一段時間，真可能因為環境時空ê改變，chiahê原本ē thang紀念ê牌樓、雕像、文字等物，也會跟tòe更改、消失。Chiahê現象lóng thang tùi一kóa政治人物ê落場看會tio̍h，也ē tàng tùi一kóa tī商場上hoah起hoah倒一時ê商場紅人ê際遇看會出來。但相對於譚院長hō͘台灣人ê，只要是hō͘伊醫治過ê人，無論行到甚麼所在，he「刻骨銘心」ê生命記號就會跟tòe行到hia，永不分離，也永bē bē記得，因為he是生命ê禮物，也是生命中ê最愛。

其實，真正siōng好ê禮物，是刻畫tī別人生命ê中間ê，這是別人永遠無法度竊取、奪行或是替代ê，ná親像譚維義醫師所講ê，金銀珠寶錢財等人間看做貴重ê物品lóng有可能被偷the̍h，但伊留tī咱台灣人生命中siōng好ê禮物，就是伊he「刻骨銘心」ê記號──愛將永遠存在。 （原載於自由時報2004年5月2日第15頁）

盧俊義牧師的個人網站。