《台灣之愛：盧俊義牧會筆記》

| | | 轉寄

愛，就tī你我ê身上

作者 盧俊義...台語翻譯: Chuniok 2005.08.14

我聽tio̍h一則真有意思ê故事︰ 有一對新婚ê夫妻tī喜宴了後就beh去度蜜月，in來到機場航空公司ê櫃臺，托運行李the̍h登機證。新婚ê先生特別向櫃臺小姐講是beh度蜜月，希望伊ē tàng hō͘伊好位á。櫃臺小姐微笑回答講： 「無問題」，然後將登記證the̍h hō͘ chit位新婚ê先生，並且iáu祝福in有一個快樂ê蜜月旅行。當新郎官歡喜the̍h tio̍h登機證一看，發現座位竟然是畫tī「H」kap「J」ê位á，感覺真奇怪，怎樣會kā伊kap新婚妻子ê座位分開neh？心內真是bē了解。隨時問櫃臺小姐。

新郎問︰「小姐，這到底是怎樣一回事？怎樣會hō͘阮 “H” kap “J”，無hō͘阮 “I”neh？」

櫃臺小姐微笑回答講︰「先生，無錯，阮chia無 “I”（語調輕輕á，聽起來像「哎」)，因為 “I”（語音kap「愛」相同)就tī lín ê中間。」伊iáu特別將 “I”加重語音，hō͘伊聽起來ná親像「愛」一樣，然後笑笑á將登機證還hō͘新郎官，並再次祝福in蜜月旅行愉快。

新郎官the̍h過登機證後，將櫃臺小姐kā伊講ê話重述一pái hō͘新娘聽，新娘一聽也是滿頭霧水，m̄知為甚麼座位會是分開ê，兩個人不約而同回頭望一下櫃臺小姐，只見櫃臺小姐當teh對in iat手表示祝福。In就ánne the̍h tio̍h隨身行李去上飛機。但是in心中iáu是bē了解為甚麼會ánne，也因為in兩人lóng是頭一pái出國旅行，認為可能旅客siuⁿchē滿載pah，in想︰橫直先上飛機了後chiahkoh請空服人員幫忙，設法kap座位邊á ê人客換位á pah。

當in上了飛機chhōe tio̍h座位了後，一直teh找 “I” ê位á，但是怎樣chhōe也找bē tio̍h，但卻又發現in的「H」kap「J」竟然是作伙ê。Iáu是新娘聰明，真緊to̍h明白過來，伊輕聲kā愛人講︰「老公，飛機頂無 “I” lah，難怪櫃臺小姐會對你加重語音講 “I”就tī咱中間。」Chit位先生一聽也chiah恍然大悟過來，難怪伊一直teh chhōe “I”，就是chhōe bē tio̍h，chit時終於明白為甚麼航空公司ê櫃臺小姐一再kā in祝福，並且微笑ê原因。

無錯，「愛」就tī咱中間，因為上帝用祂ê形象創造人類（創世記一︰26)，上帝ê形象就是「愛」。Chit種「形象」所代表ê意義，就ná聖經所講ê︰「上帝是愛。」（約翰一書四︰16）真chē人一直teh chhōe愛，四界去chhōe。其實，愛就tī咱ê身上，tī咱每一個人ê生命中。會一直chhōe愛ê人，是因為bē明白愛ê緣故。一個真正會曉、認識愛ê人，會知影jú將家己身上ê愛釋放出來，所得tio̍h愛ê回饋也會jú chē。這也就是使徒保羅ǹg以弗所教會講ê一句真有名ê話︰「施比受kohkhah有福。」（使徒行傳二十︰35)á會將家己ê愛lóng無條件施hō͘別人ê人，就會發現上帝賞賜、回報hō͘伊ê，是kohkhah chē ê愛。只有自私、無想beh將愛施hō͘別人ê人，chiah會一直感覺無得tio̍h別人ê愛，chit種ê人會四界去chhōe愛，但卻會發現家己jú chhōe，愛是jú來jú稀薄，甚至chhōe bē tio̍h。

Bat有一chūn'á，台灣社會有人hoah出：「kā愛chhōe tńg來」，chit種ê口號，其實chit句話並無正確，因為真正ê愛是beh釋放出來ê。釋放jú chē，能量jú強；jú釋放，累積起來ê力量也就jú大。真實ê愛，是犧牲、奉獻，m̄是獨自擁有。只有想beh獨自擁有愛ê人，chiah會想tio̍h beh「chhōe」愛，但結果只會發現︰jú chhōe jú是感感bē滿足，hit種感受ná親像義大利人所講ê︰「貪心ê人，其心境就ná親像lim海水一樣，jú lim，嘴jú渴。」情形是仝款ê。

愛，m̄是藏tī深山，也m̄是tī遙遠ê所在，愛就tī你、我ê心中，而且就tī你、我家己ê身上。分享伊，會hō͘咱ê生命甘甜，hō͘咱體驗tio̍h生命ê豐富。愛，就tī你、我ê家中，當咱為伊付出jú chē，家中累積起來ê愛也就會jú chē。咱對社會、國家也是ánne。（華語原載於自由時報2004年4月14日第15頁，台語翻譯：Chuniok）

盧俊義牧師的個人網站。